Monang
Jala Hehe Maralohon Hamatean
Rom
6 : 3 – 11
A. Ia
halak Kristen, baoa, dohot boruboru na porsea, i ma jolma pardosa naung malua
sian hamatean paduahon ala hamamate dohot haheheon ni Tuhan Jesus Kristus sian
na mate. Sude na porsea di Debata marhite Jesus Kristus, i ma nanung tardidi
tubagasan Goar ni Debata Sitolusada hadirion digoar do jolma na imbaru manang
na malua. “Asa molo dibagasan Kristus halak, na tinompa na imbaru ma i. Nunga
salpu pangalaho na robi, gabe na imbaru” ( 2 Korint 5: 17), ima jolma na
mambahen pernyataan manang na marpadan tu dirina, mandok:
ü
Najolo tarihot ahu tu hamatean ala ni dosa,
nuaeng malua dung di bagasan Tuhan Jesus Kristus
ü
Najolo mangolu holan tu diringku sandiri do ahu,
nuaeng mangolu tu Debata
ü
Najolo holan hagiot ni rohangku do hulului,
nuaeng mangulahon lomo ni roha ni Debata do hasudungan ni rohangku.
ü
Najolo sai dilelei biar do ahu mida hamatean,
nuaeng nunga hujalo tondi hagogoon sian Debata Jahowa namangonjar tondingku
masihol asa gira marsada ahu dohot Debata na di bagasan Jesus Kristus marhite hamatean i ( 2 Tim.1: 7).
B. Ai
nasa jolma naung tardidi tu bagasan Goar ni
Jesus Kristus, i ma naung rap tartanom tubagasan hamamateNa marhite
pandidion i; asa sahaheheon rap dohot Ibana tubagasan ngoluNa, i ma ngolu na
imbaru. Sahangoluan, sapangkilalaan dohot sahadirion dohot Jesus Kristus
dibagasan Tondi Parbadia mangulahon lomo ni roha ni Debata. I ma ngolu ni ganup
boa dohot boruboru na tongtong marguru tu lomo ni roha ni Debata na pahehehon
Jesus Kristus sian na mate tu Hasangapon dohot hamuliaon na hot ro di saleleng
ni lelengna. Asa ndang dirajai dosa i be ngolu ni ganup jolma Kristen, alai
dirajai Tondi ni Debata Jahowa do, na mamboan hita tu parsaoran na badia jala
marhadaulaton situtu dibagasan dame dohot las ni roha ni rahutan ni holong na
sian Debata. Songon hata ni endenta no. 44: 1-5 (BL.104) i.
C. Ia
jolma naung sangkambona manang sahadirion dohot Kristus Jesus, i ma naung tutu
situtu rap tarsilang jala rap mate dohot Kristus tu dosa i, jala rap hehe dohot
Ibana di bagasan hagogoon ni Debata tu nasa ulaon na denggan di bagasan
habadiaon dohot hadaulaton, na mamboan hita tu hangoluan saleleng ni lelengna
tu Debata Ama i. Lapatanna jolma na rade mamparsilangkon (mansoadahon) dirina,
hagiot ni rohana dohot sibukna, manolukhon haserepon ni roha, hatigoran, dohot
ngolu na marhasintongan di bagasan dame dohot haporseaon na marpanindangion.
Alai asa jumpang jolma i ngolu na marhatigoran di bagasan Jesus Kristus, holan
marhite haporseaon na mangolu dohot parsaoran na rosu (intim) dohot Jesus
Kristus marhite HataNa manang Barita na Uli dohot tangiang smabing do. I do
sinahap ni mudar parpadanan dohot Tondi Parbadia, tinudu ni Ulaon na Badia i (
1 Kor.11: 26; Joh.17: 3, 17; 6: 63; Rom 10:9-17).
D. Ganup
na manghirim tu hangoluan na manongtong
di surgo i, i do na tongtong mangolu di bagasan hatigoran dohot hasintongan
jala na tongtong rade mansoadahon dirina. Lapatanna: “ndang olo be ibana
lalapan ni angka na masa di portibi on,
nang pe di portibi on dope halak sisongon i tinggal; alai na tongtong
mamarangehon Hata ni Debata dohot Kristus dibagasan Tondi Parbadia di ganup
tingki; ai dilului rohana do angka na ro sogot, i ma parsaoran ni jolma na
badia raphon Jesus Kristus dibagasan Debata di Harajaon Banua Ginjang di
Jerusalem na Imbaru i:
ü
Natongtong umpeop panindangion di ngoluna,
mandok: “Najolo tarihot do tondingku tu hamatean saleleng ni lelengna, alai
nuaeng diihot asi ni roha dohot holong ni Debata Jahowa marhite Jesus Kristus
tu hangoluan saleleng ni lelengna do ahu” (Heber 13: 14; Rom 3: 24)
ü
Najolo diparhatoban dosa marhite patik, nuaeng
bebas (merdeka) jala ias sian nasa dosa ala naung diburi mudar ni Kristus Jesus
tondingku” (Rom 4 : 7, 8,25)
ü
Najolo musu ni Debata do ahu ala ni dosa dohot
pangalaosionku di HataNa alai nuaeng gabe anak dohot boru ni Debata do ahu jala
aleale ni Jesus Kristus dibagasan Tondi Parbadia (Psalm 32: 1-2; 2 Kor.6 : 18)
ü
Najolo, jolo holan mangolu tu diringku sandiri
do ahu, nuaeng mangolu tu Debata Jahowa dohot tu Jesus Kristus dibagasan
hatigoran dohot hasintongan do ahu” ( 1 Joh.2: 1 – 3).
E. Asa
di manang ise jumpang panindangion na songon on, di hata dohot parangena
siganup ari, dohonon ni Jesus Kristus ma tu ibana: “AnakKu do ho, sadari on do
ho Hutubuhon” (Heber 1: 5; 5: 5). Dung i alusan ni naporsea i ma marhite
haporseaonna dibagasan ngoluna siganup ari: “ndada ahu be na mangolu i nuaeng,
Kristus do mangolu di bagasan ahu. Ia mangolu pe ahu nuaeng dibagasan daging,
mangolu marhitehite haporseaon di Anak ni Debata na manghaholongi ahu jala na
mangalehon diriNa humophop ahu” (Gal.2: 20). Amen.
