Sai
PabotohonMu Do Tu Ahu Dalan Hangoluan
1
Korint 5: 6b – 8
a. Ia
turpukta on marbonsir sian persoalan ni sahalak baoa na mangulahon
pangalangkupon dohot pardihuta ni amana. Pardihuta ni amana i nunga panindi na
papigahon i. Alai ndang dipatorang na diulahon baoa i pangalangkupon ndung
sirang do parompuan i sian amana manang dipasirang sian amana manang naung
mabalu i, ndang tangkas. Molo di hasomalan ni adat Hellenis, sahalak pardihuta do
umposo sian amantana, jadi boi do na satorbang umurna dohot anakna. Sian
pengamatan di turpuk on, ndang ruas ni huria Korintus ianggo parompuan i, ala
sipabalaion na ginoaran di turpuk on ima bersifat maskulin lapatanna baoa i do.
b. Domu
tu persoalan pangaangkupon i, ia di huria Korint naung talpe tu pangalaho
kompromis tu pangalangkupon i jala manenganengahon diri nasida. Ala ni i tujuan
ni poda ni apostel Paulus di turpuk on ndada holan baoa na mangulahon pangalangkupon
i, alai dohot do nang sikap ruas ni huria di Korint laho mangadopi i. Ido
umbahen didok apostel i : “Ndnag diboto hamu?”, lapatanna naung diboto ruas na
di Korint i do na masa i ndang tingkos. Tangkas do di Padan na Robi di orai do
pangalaho pangalangkupon ni baoa dohot pardihuta ni amana (3 Musa 18: 8; 20:
11; 5 Musa 22: 30). Pangalaho sisongon i gabe bura nang hamatean (5 Musa 27:
20). DI angka halak sileban, nang halak Gorik dohot Rom, pangalaho sisongon i
ima pangalaho harorangon. Dipamasa do uhuman di angka na mangulahon sisongon i,
hape ia huria Korint ndang tegas tu angka na mangu;ahon sisongon i. Ala ni i
sasintongna ruas ni huria Korint ingkon patuduhon sikap: a. Maila mamereng na
masa sisongon i, ndada na gabe las rohana; b. Ingko sipabalion nasida do angka
ruas na mangulahon sisongon i tu sibolis. Molo didok Apostel Paulus sipabalihon
tu sibolis boi do lapatan ni i, sipasidingon sian punguan ni halak na porsea
(ptds. 1 Tim 1: 19-20), lapatanna asa unang bali pangalaho pangalangkupon i
mannag ditiru ruas ni huria Korint. Ido umbahen didok si Paulus: “unang ma hamu
sarombang dohot portibi on.” Jala pamatang na mardosa i sipasahaton do tu
sibolis asa mago pamatangna i. Hata ‘pamatang’ manang ‘sarx’ dilapati na
bersifat dosa; napaduahon songon pamatang ni daging. Alai na dipatuduhon dison
ima pamatang na bersifat daging. Maniaphon pamatang marhite sibolis dilapati
doi songon ulaula ni Debata laho pabadiahon fisik ni halak na mardosa i.
Namaniaphon pamatang i ima sada konsekuensi sian pabalihon nasida manang
disiplin ni huria. Tung pe nian songon uhuman do i alai dipatupa i laho pauliulihon
partondionna. Mungkin dipingkiri apostel Paulus molo so adong dukungan
partondion sian angka halak Kristen, boi do gabe lungun roha ni na hona
bali i, jala anggiat ma gabe muba rohana
sian angka dosana. Ala ni i dipaujung Apostel Paulus marhite sipaingot tu huria
Korint molo sikap na manengahon diri i na so olo mangatasi persoalan i sada
pangalaho na so denggan.
c. Ido
umbahen ditonahon dibagasan turpukta on asa manjaga habadiaon, songon umpama na
niasoman, asa na naeng dohonon ni apostel Paulus do tu ruas i laho pabalihon na
mangulahon pangalangkupon. Ruas ni huria na tenga roha i ndang talup mamingkiri
na masa dosa sisongon i, nang pe naung diulahon sahalak ruas boi do manegai
sude ruas ni huria di Korint. Naeng ma ias ruas ni huria i sian asom i, marhite
na pabalihon halak na mangulahon dosa i. Asa huria na niudi na imbaru ma huria
Korint songon pamatang ni Kristus na badia.
d. Umpama
on dibuat sian parningotan ari raya Paskah, ima na manaringoti haluaon ni
bangso Israel sian tano Misir. Ditingki na tarhipuhipu ma bangso Israel laho
manadingkon Misir asa so ada be tingiki di nasida laho paimahon sagusagu i asa
niasoman, asa disundut na mangihut pinompar ni bangso Israel pe ditonahon laho
marningot paskah marhite sagusagu na so niasoman. Diparenta Debata do nasida
asa manganthon sagusagu na niasoman i saleleng pitu ari, jala diari parjolo
ingkon bolonghonon nasida naniasoman sian jabunasida be (2 Musa 12:14-20). Alasan
ni halak Jahudi mangambolonghon naniasoman sian bagas nasida ndada holan alasan
teologis alai dohot do ala tu hahipason. Molo leleng naniasoman i dibagasan
proses fermentasi boi do mambahen infeksi. Didok Apostel Paulus do ia huria
Korint ima sagusagu na so niasoman di Kristus, birubiru paskah naung dipelehon.
Dipatuduhon Apostel Paulus do lapatan ni hamamate ni Kristus laho manghophop
jolma sian dosa nang hamatean. Marhitehite Jesus, dipalua Debata bangsoNa na p
inilitNa sian bura ni dosa. Ala ni i pesta paskah na paduahon on, patoguhon
haporseaon nang semangatta laho mangihuthon Kristus dipardalanan ni ngolunta.
Songon topik di hita “Sai pabotohonMu do Tu Ahu Dalan Hangoluan” naeng ma lam
jamot angka na porsea i di Hata ni Debata na gabe dalanta mamboto dalan ni
Debata tu hangoluan, jala na olo do hita mangoloi HataNa i asa malua hita sian
halumlamon na di portibi on. Amen.
