Sai
PabotohonMu Do Tu Ahu Dalan Hangoluan
Psalmen
16: 8 – 11
a. Ia
turpukta on ima sada tangiang elekelek dohot panindangion haporseaon na
manginona tu parngoluon siganup ari. Boi berengonta boha diajari hita laho
papatarhon haporseaon dipardalanan ni ngolunta. Holan dibagasan Debata do dapot
hita las ni roha, parlinggman, pangajarion, haluaon dohot hangoluan. Ndang
adong mual ni na manongtong ia so sian Tuhan Debata. On ma nanaeng sipasahaton
ni parpsalmen tu hita.
b. Boi
do angka jolma i mandapot angka las ni roha, hangoluan, dohot haluaon alai na
manongtong holan sian Debata do, ala mangalului haluaon dohot las ni roha ni
ngolu diluar ni Tuhan manghorhon arsak do i. Ia arta na ummarga di hita na
porsea ima haporseaon dibagasan Tuhan Debata, siala holan Debata do na boi
mambahen rohanta marlas ni roha, Tondinta marolopolop, Pamatangta demak , ndang
adong manang aha na boi mambahen ngolunta songon i ia so holan ala ni Tuhan i.
On ma arta na ummarga na hinilalahon angka jolma na marlinggom tu Tuhan Debata.
c. Na
umbalga muse na boi margogoihon hita ia haluaon ima tu saleleng ni lelengna, ia
halak na porsea na marpanghirimon tu Tuhan i dipalua sian angka na mate dohot
sian haporsuhon alai hangoluan na saleleng ni lelengna ima las ni roha sian
angka halak na satia marhaporseaon di Tuhan i. Sorop ni hamatean i naung
ditaluhon Tuhan Jesus marhitehite haheheonNa sian hamatean, siala: “Naung
dapotan hangoluan na salelenglelengna do na mangkaporseai Anak i; alai na so
mangoloi Anak i, ndang idaon ni i hangoluan; sai na mian do tahe rimas ni
Debata di ibana.” (Joh.3: 36)
d. Tung
aha pe naung adong di hita, nang arta, sere, perak nang hepeng molo so
marnampunahon arta na sasintongna i ndang na gabe jaminan las ni roha di hita.
Alai molo tung holan ingkau rata nang sira dohot indahan pe alai molo sai
raphon Tuhan i, ndang na gabe mago las ni rohanta. Dibagasan parngokuonta
siganup ari, na marnampunahon arta ndang na gabe menjamin sasahalak boi mangolu
dohot sonang jala demak, alai boi do mambahen ibana ndang boi mandai arta na
diibana i. Songon naung dipasahat Tuhan Jesus HataNa, molo taradoti HataNa jala
mian dibagasan holongNa: “Umbahen na huhatahon i tu hamu, asa di bagasan hamu
halalas ni rohangki, jala asa gok halalas ni rohamuna.” (Joh.15:11)
e. Sudena
i boi do gabe saut dibagasan ngolunta molo olo hita marsiajar sian parPsalmen
on dibagasan ngolunta; ima pasahatnon dirinta hibul tu adopan ni Tuhan, Ibana
ma na gabe uluan, Raja, nang panagmudi di ngolunta. Tung soadong do na boi
mambatasi las ni roha ni angka na porsea, aha pe na masa dibagasan ngolunta
ndang tuk mangago hita siala Debata na mandongani hita. Tarlumobi di Parningota
Haheheon ni Tuhanta Jesus Kristus manang Paskah 2 hon, gabe pagomoshon
haporseaonta nang semangatta laho mangihuthon Kristus i dipardalanan ni
ngolunta. Marhite hahaeon ni Kristus cara ni Debata laho pabotohon tu hita
dalan hangoluan ima hangoluan na saleleng ni lelengna, songon topik ni
minggunta: “Sai PabotohononMu do Tu Ahu Dalan Hangoluan.” Amen
