Nunga
Dipatoltol Jahowa TanganNa Na Badia I
Jesaya
52: 7 – 10
a. Ia
turpukta on termasuk do tu Jesayas na paduahon manang jotjot didok Deutro
Jesaya na marisihon jamita taringot tu habuangan na marhira taon 597-538
andorang so Kristus. Torop do uju i halak Juda na tarbuang tu Babel (dipaksa
manadingkon bona pasogit nasida lumobi bagasjoro na di Jerusalem). Dohot do
nang panurirang Hesekiel tu habuangan Babel songon i nang si Jesayas sandiri
(Jesayas paduahon). Pasingki sorin angka raja na gumonggom harajaon Babel
mamungka sian tingki ni Raja Nebukadnesar sahat ro di Raja Besyazar (Raja
parpudi di Babel) andorang so tinaluhon ni Raja Kores (Cyrus) Raja ni halak
Parsi (Persia). Maol do lupa sian roha ni halak Juda hasongeon ni Raja
Nebukadnesar, ai di tingki harajaon ni Raja Nebukadnesar ma marongso bagasjoro
na di Jerusalem (pusat keagamaan ni bangso Israel). Tung suga do i tu roha ni
halak Juda jala torop sian nasida na frustasi. Ala pola songon i ro di na
marongso bagasjoro i, diantusi nasida na so margogo Debata Jahowa manaluhon
Raja Nebukadnesar. Ala ni i, torop sian nasida na sumurut jala marbalik (porsea
tu ganaganaan ni halak Kanaan). Disituasi na songon i mamanurirangi si Jesaya
huhut laos mangapuli nasida di na nidokna: “Apuliapuli hamu ma bangsongKi”
(Jes.40). Huhut do ditariashon panurirang Jesaya taringot tu haluaon sipatupaon
ni Debata Jahowa tu nasida. Dipabotohon ibana do paboa na tuk do huaso ni
Debata mamangke bangso sipelebegu sandiri laho manguhum bangso Israel. Alai
laos marhuaso do Jahowa paluahon bangso Israel sian tangan ni bangso na manaban
nasida. Tangkas do disurirangkon panurirang Jesaya paboa na paluaon ni Debata
do bangso i sian tangan ni halak Babel. Marhite Naposo ni Debata (Ebed Jahwe; Hamba
Allah) malua do nasida sian tangan ni sipelebegu i, Ise ma i ulaning Naposo ni
Debata na paluahon nasida ? Mesias na pinaima nasida na miniahan ni Debata, ido
sipalua nasida. Ido pinaima nasida dohot panghirimon nasida.
b. Pandohan:
“Lehetnai di atas ni angka dolok....” na dipahombar dohot haulion na mamereng
sian dolok hinauli ni na tinompa ni Debata, lehet sian dolok marsoara na gogo
asa gumodang na umbege hata na hinatahon, manang songon hutana di atas dolok patar
diida halak. Parbarita na uli sian hata Gorik dilapathon : penginjil, na
pararathon Barita na Uli, na mamboan barita na uli, ima barita di haroroan ni
Dame, dohot haluaon, barita na pabalgahon roha ( 2 Sam.18; 19-32; Jesaya 21:
1-9). Pangantusion mambaritahon Barita na uli secara umum adong manang na piga
tudosanna isarana: mambaritahon hasosorang ni anak tu sada natorasna
(Jes.20:15). Paboahon tu sada komandan na monang pasukanna di parporangan (1
Sam.31:9).
c. Dibagasan
turpuk on adong do hatorangan na mangihut; barita aha sibaritahononna. Sibaritahonon
ni parbarita na uli i ma barita “Syalom”; dame, sejahtera, na maralo tu na
magopu manang didok: “Tohu”; gaor, sursar, so manghilala sonang (Jes.54:
10+13). Barita na uli di baritahon, barita haluaon na sian harajaon ni Debata
(Mark.1:15). Barita haluaon na sian Debata (Jesaya 43:12; 49:25; 40:10).
Haulion ni Barita na Uli i, i ma barita na marharoroan sian Debata na paradehon
haluaon, dame, dohot hasonangan di angka na manghirirm jala na paimahonsa haluaon
i (Luk.2:38). Sian mula ni sejarah, Debata bertindak mamillit jala
pajongjonghon harajaon Israel gabe sada harajaon Theokrasi (ima Debata sandiri
na marhuaso jala bertindak, manguluhon, jala manggomgomi bangso i gabe Raja; 4
Musa 23: 21; 2 Musa 15: 18). Ndang tangan dohot huaso ni jolma na mangarajai
bangso i, alai tung huaso ni Debata do (Pangk.8:23). Dimiahi Debata do na gabe
raja songon ulaula manggomgom bangsoNa bangso Israel i, isara Raja Saul, Raja
Daud dohot angka pinomparna ( 1 Sam 8: 5+10; 2 Sam 7; ptds. Pslm.2; 72; 79).
Jala songon pusat ni harajaon dohot parugamaon ima Jerusalem ( 2 Sam.6; 1
Raja.8; Pslm.87)
d. Alai
ndung tarbuang bangso i, ndang tarida gogo ni raja Israel. Sion, Jerusalem huta
hahotan ni parugamoon, nunga marumpak, huta hahotan ni parugamoon i nunga
marumpak, nunga gabe huta na tarulang alai tusi ma nuaeng marsoara barita na
uli na sian Debata ai Debata mulak gabe raja. Hamonangan ni Kehadiran ni Debata
manguba suda bentuk ni na srsar, ngolu na gaor boi gabe ngolu na sejahterah
manang syalom, ngolu na mardame, ima naneng baritahonon ni parbarita na uli i.
Parbarita na uli i mansoarahon tu Sion, parbarita na uli i patubegehonsa tu
pangisi ni Sion. Molo di Bindu 40: 9, didok: “Pangiar ma soaram....” marlapatan asa
soara i dipabotohon tu sude halak Juda na dihabuangan dohot halak Israel na
tinggal gabe pasipasi di Jerusalem sandiri dohot di Zion dohot di angka huta
naung tarulang. Alamat ni barita na uli i, ima tu huta Sion. Huta Jerusalem
diboto hirahira 2000 taon seb.Masehi na ditaluhon si Daud taon 1000 seb. Masehi
di tingki i adong bentengna na margoar Sion na gabe sada bagian utama ni Jerusalem
na ginoaranna Sion. Di Sion do Istana ni
raja Daud, jala disi do dipajongjong bagasjoro. Dipangke do sipata goar Sion
manggoari Jerusalem sude, songon huta ni Debata, na jotjot taida i di angka
buku Pesalmen. Dipamangkeon ni goar olo do sai jumolo didok Sion asa goar
Jerusalem (Jes. 40:9; 41:27; 52:9). Boi do digoari muse Huta na ditongatonga ni
dolok batu (Pslm.125:2). Tu roha na magopu di Sion di patubegehon syalom, damai
sejahtera, tu roha na patagamtagam hamagoan dohot hasusaan dipatubegehon barita
na uli ima barita haluaon, adong pembaharuan situasi napinatupa ni Debata
sandiri, ai Debata gabe raja di nasida, songon di mulanai pamilliton i dinasida
gabe bangsona, jala Debata na gabe raja i ma na Theokrasi. Ndang raja na
menjajah Debatanta i alai raja siboan Dame do, raja siboan haluaon do. Barita
na Uli nabinoan ni parbarita na uli na sinoarahonna di angka dolok tu roha na
digohi biar, diangka na tarbuang, diroha ni angka na tertindas, tu roha ni
angka na tertekan na manghirim dipangurupion ni Debata, na tongtong manghilala
na Debata gabe raja di Ibana, na mangarajai ngoluna tusi do disoarahon
parbarita na uli i barita haluaon i barita las ni roha i ai Debata gabe raja
(Jes.41: 10, 14; 43:1,5; 44:2; 51: 7; 51: 4).
e. Panomunomuon
ni parbarita na uli i, panjaloon disiboan barita haluaon i di angka naung
managam haroro ni pangurupi didok songon parhal (watchman), parjagana manjaga
paimaima aut boha adong kejadian na so tinagam hamagoan manang hatuaon. Parjaga
na sai tongtong dungo jala sigop manggorahon aha na masa. Didok do angka panurirang
songon par-hal, parjaga (Jes.62:6; Jer.6:17; 31:6; Mik.7:4), pola didok si
Jeremia ala soadong na manangihon soara ni angka panurirang dibahen orbuk tu
pamanganna : Andung ni si Jeremia 3: 29. Parbarita na uli i mandok tangihon
parhalmu ima soara na gogo dipangiar soarana patolhashon, manghatindanghon aha
na binegena, dohot na niidana sandiri dohot tangkas adop bohi pajumpang mata tu
mata ( 4 Musa 14: 14). Parjumpaan na ungkap laho manjalo barita na uli i, gabe
marolopolop nasida ala Debata dibaritahon mulak gabe raja di nasida ( 4 Musa
10: 36). Namarlapatan hubungan naung putus hian mulak muse gabe marhubungan na
imbaru; mangolu dibagasan panombaon na imbaru. Songon respon na manjalo barita
na uli i gabe buha pamanganna marsoara olopolop mangolophon Jahowa. Dipangiar
soarana rap mamuji Debata. Angka pasipasi, angka na tading di Jerusalem
diarahon asa dohot marlas ni roha, dipangido dohot marolop mamuji Jahowa, ala
Jahowa mulak manatap bangsona Jahowa paluahon Jerusalem sian lungun ni ngoluna
ala ni i gabe marlas ni roha, marolopolop nasida mamuji Debata, jala tangkas,
na marpangulahi roha ni Debata marnida nasida. Natarbuang dohot pasipasi boi
pajumpang ala Debata mamereng nasida, Debata najonok tu bangsona (Jer.32:4; Pslm.98:3,
4). Debata na gabe Raja na mangguluhon, na memimpin, na manarihon, na manogihon
tu dalan hangoluan, marmahan mamboan tu hasonangan (Pslm.136: 12; 5 Musa 5: 15;
7: 19; 26: 8. Marhite hagogoon ni Debata do paluahon bangsona ( 5 Musa 4: 34).
Jerusalem inganan pusat pamujion ni Debata di halak Israel (Jes. 6: 1-5; Pslm. 24:
7-10), mamuji Tuhan na manompa saluhut (pslm.93: 3; 96:11-12), ala ni i
marsuraksurak, marolopolop nasida mamuji Tuhan (pslm.97:9). Haroro ni Debata
manopot bangsona asa nasa bangso mamereng haluaon na pinatupaNa (Psl.98: 3;
ptds. Maleaki 3:1) gabe nasa daging marnida haluaon na sian Debata songon
jamita ni si Johannes Pandidi (Luk.3:4-6).
f.
Tangan ni Debata langsung bertindak namanogunogu
bangsona sian parhatobanan, tangan ni Debata manogunogu bangsona tu inganan na
ni lehon ni Debata tu bangsona ( 2 musa 15: 16-17). Tuhan pemimpin, pahlawan
setia di bangsona (Jes.42; 13. Debata songon parmahan (pslm.23:1; 1 Musa 13:
18; 1 Musa 48: 15; Pslm 80: 2; 95: 7; 78:52; Hes.34:11-16; Luk.15:4-7).
Mangendehon ende na imbaru di Jahowa ima manghatindanghon pambahenan ni Debata
na jinalona, mangendehon ende na imbaru manghatindanghon pambahenan ni Debata
paluahon bangsona sian habuangan ni ngoluna dibaoan tu kemerdekaan dibagasan
harajaonna (Pslm.98:1). Marhite pambahenan ni Jahowa di bangsona gabe saluhut
bangso marnida hamuliaonna. Patudos tu panindangion ni si Musa marhite haluaon
na pinatupa ni Debata paluahon bangso Israel sian tangan ni Mesir gabe dohot
halak Midian mandok pujipujian di Debata ni saluhut Dedbata ( 2 Musa 18:
10-12). Gabe nasa bangso mananda Debata na sasada i ima Debata parmahan na
manatap bangsona na manghirim di haluaon
sian tanganna na badia. DI angka jolma na olo managam na rade manjalo Debata
gabe raja di ngoluna (Pang.8:23). Gabe bangso na mamereng haluaon na pinatupana
(Pslm.98:3; Luk.3:6)
g. Hajongjongan
ni Debata di keadaan na sursar, di ketertindasan, keterbelakangan disi ma
Debata mangalehon hadameon. I do gombaran ni ngolu na tarbuang na dibagasan
hasusaan, alai ndung ditanda ibana asi ni roha ni Debata disi ma ibana
manghilala hadameonNa, sai mangulun ma rohana jala manghirim di pangurupion ni
Debata Jahowa. Asi ni roha ni Debata na mangula jala sahat tu tonga portibi on
ima marhite Jesus Kristus i, rade mamereng, manghilalahon, dohot mangurupi,
nang manogunogu hita jolma na susa ala ni dosa tu hasonangan. Jala sahat do tu
hasonangan na manongtong i asal ma porsea hita di panghophopon ni mudar ni
Kristus i. Alai hita naung manjalo haluaon i, naeng do pasahathon i marhite na
marbarita na uli. Naung dipasonang Debata do hita menikmati angka kemajuan
jaman nuaeng. Naung taruli hita di kecanggihan tehknologi tlevisi, radio, nang
handphone, dohot internet. Saluhutna i naeng ma taparhaseang laho mamaritahon
Barita na Uli i. Mardomu di hurianta HKBP pesta Natal 2 hon on, diarahon do
hita marpanumpak tu ulaon radio Bona pasogit FM HKBP, tahilala do sada ulaula
do i dilehon Tuhanta laho mamaritahon Barita na uli i; ima karya ni Debata na
dipasahat tu hita asa naeng saluhut bangso taruli haluaon marhite barita na uli
i, lam bidang cakupan ni radio i tu angka na so porsea dope. Molo didok topik
ni Natal na paduahon on di hita: “Nunga dipatoltol Jahowa Tanganna Nabadia I”,
namarlapatan ima Jesus Kristus i, naung ro tu portibi on, ditubuhon ma angka na
porsea i, ima ruas ni huria i na dohot patuduhon partisipasina diparngoluon ni
maryarakat, bangso nang Negaranta Indonesia on, mamboan syalom, hadumaon, damai
sejahtera. Amen.
