Jahowa
Do Sijaga Hita, Jahowa Do Parlinggomanta
Psalm
121: 1b-7
a. Ia
turpukta on ima ende hananangkok, taringot tu pos ni roha manang haporseaon ni
angka halak na porsea tu Debata, na mardalan manuju bagasjoro ni Debata di
Jerusalem. Dipardalanan laho manopot huta na badia i. Huhut mardalan, huhut
merenungkan pardalanan (pengalaman ) ni ngoluna saleleng on, dipadomu tu
pambahenan ni Debata Jahowa na jinalona. Di na berefleksi par-psalmen on,
maralus do ragam ni sungkunsungkun na di rohana i, jala laos i do na gabe
panindangion di ibana. Panindangion i ma muse na dibaritahon ibana, asa ganup
na manjaha taruli pos ni roha dohot panghirimon na mangolu tu Debata Jahowa..
Songon pribadi manang punguan na sedang berziarah tahunan tu Jerusalem,
diendehon nasida do Psalm on. Intina: patuduhon sihol ni roha ni pandonganion,
pangaramotion dohot panjagaon ni Debata. Nyanyian yang menyiratkan adanya
keinginan untuk mendapatkan keamanan, berkat dan keselamatan dari Allah;
keselamatan pribadi maupun kelompok atau persekutuan.
b. Mangaranap
dompak angka dolok, laho mangalului pangurupion: Sada pernyataan na bersifat
sungkunsungkun laho menantang, na pabotohon ia dolok uju i dibahen do somalna
gabe inganan parsombaon ni angka bangso na so mananda Debata, ima bangso
sileban, jala jotjot do dihaporsea i inganan ni angka partahi ni jat, angka
inganan ni buronan. Alai parpsalmen on holan sian Debata Jahowa do marhaposan.
Ndang sian dolok i ibana marhaposn alai na manompa dolok i do dohot na manompa
langit dohot tano ro di angka pangisina. Debata na manompa saluhut dohot na
paradehon na ringkot di angka na tinompaNa. Pos do roha ni parpsalmen on, ndang
mabiar ibana, ndang pola tahuton. Ai ndang hea nanggo satongkin hape
dihalupahon Jahowa ibana. Tung ganup tingki do panjagaon ni Debata. Ala ni i,
molo marhaposan ibana tu Debata, tung so adong do sihabiaran, tung soa adong na
boi bahenon ni jolma tu ibana. Satia do Debata manjaga angka na porsea tu Ibana
c. Molo
Jahowa do na manjaga bangso Israel bangsoNa i, laos tong do Ibana Jahowa do na
manjaga angka ruasNa. Tung so loasonNa marmara angka na marhaposan tu Ibana.
Tung so jadi mago manang lilu nasida di pardalanan i, ai jonok do Ibana na
mangaramotisa. Tung so loasonNa mohopan di tingki arian (las ni ari) manang ngalian
nasida ditingki bodari. Sandok tung singkop do tahe pandonganion dohot
pangaramotion ni Debata. Ala ni panjagaon ni Jahowa, gabe dao ma sude nasa
hagogoon ni parjahat. Tung di dia pe adong ancaman i, jala manang sadihari,
saluhutna i ndang margogo be, ai jonok do Jahowa na mangurupi. Rade do Ibana
laho paluahon. TanganNa dohot huasoNa na sun hinagogo i do na mangalinggomi
sude nahinaholonganNa i sian nasa parmaraan. Tuhan Jahowa, Ibana do manjaga
dohot mangaramoti saleleng ni lelengna.
d. Haporseaon
dohot pos ni roha tu Debata, marojahan tu Debata na manompa nasa na adong dohot
na mangaromotisa. Ala ni i angka na porsea naeng ma ndang ganggu rohana jala
mabiar mandalani tingki nang ari ari ni ngoluna asa marhaposan tu Jahowa ma
ganup na porsea di Ibana, ala Jahowa do na marmahani hita, holan dibagasan
Jahowa do jumpang hita hadameon, hademakon, nang las ni roha na manongtong i.
Ala ni i molo ro angka pangunjunan, hamaolon, nang ancaman dipardalanan ni
ngolunta, sai unang ma didok rohanta naung dao Debata, manang so parduli manang
so diparrohahon. Molo didok Immanuel lapatanna: Tuhan beserta kita, lapatanna
sai donganna do hita manon angka hamaolon di pardalanan ni ngolunta, laos songon
i nang di las ni roha. Ai arsak dohot las ni roha sai marganti sorin doi
mandonohi ngolunta, alai pos ma rohanta sai pangkeon ni Debata do i manguji
haporseaonta tu Ibana. Molo Debata donganta ise be alonta?, molo ro angka
hamolon ndang na gabe tenang jala hohom sambing hita asa Tuhan i ma na
mangatasi i, NDANG, alai molo Immanuel, Tuhan berserta kita, sai donganNa do
hita manaon sitaonon nang hamaolon i asa margogo hita jala boi adopanta
saluhutna dibagasan haporseaon di Ibana.
e. Ala
ni i apala diujung taon 2014 on, marsaringar ma Hata ni Tuhan on marhite turpuk
na asahat tu hita bodari on, llaho manungguli haporseaonta na sai laon, betak
sai adong dope roha na ganggu di hita; merasa tidak aman dan nyaman. Ala ni i
naeng bulus rohanta angka na porsea pasahathon ngolunta tu tangan panggomgomion
ni Debata. Apala dinaeng mangujuingi taon on, dipaadop do hita tu arsak ni
bangsontana madabu Pesawat AirAsia QZ8501 pola 155 halak na gabe korban nyawa,
dibagasan arsak, tariluilu do angka keluarga na tinadingkonna, jala tadok
mauliate tu Tuhan i ala boi dope ditemukan bangke ni pesawat i dohot angka
korban. Jala didok barita i do na gumodang angka halak Kristen penumpangna.
Lapatanna i di hita tung marsangkap pe hita manang tu dia manang aha pe, sai
Jahowa do na patauhon dalanta. Huaso ni Debata ndang tardungdung ni kecanggihan
ni portibi on. Ala ni i hita na porsea dibagasan Jesus Kristus, ndang gabe
sihabiaranta na masa i, alai naeng ma lam umbiaran hita di Jahowa Debata. Tung
so taboto nanaeng siadopanta di taon na ro taon 2015, jonok ne ma tingki
manalpuhon taon 2014 on, alai tahaporseai ma songon na nidok par-Psalme on “Sai
jagaon ni Jahowa do ho sian nasa parmaraan, sai jagaonNa do tondim. Sai jagaon
ni Jahowa do ho laho ruar dohot laho bongot, olat ni on ro di saleleng ni
lelengna:. Amen.
