Paimaimahon
Jala Manghasiholi Haroro Ni Ari NI Debata
2
Petrus 3 : 6 – 15
a.
Turpuk on manaringoti songon dia pangalaho na
ture, managam ari haroro ni Tuhan i. Ai ingkon bahenon do persiapan laho manomunomu
Ibana, songon dia do asa tarbahen hita gabe panea sogot di harajaon ni Debata.
Molo pe godang parungkilon na taadopi di ngolu on, gariada ingkon las rohanta,
ai gabe masihol do hita tu surgo hasonangan i. Ndang ngolu na di portibi on
sihirimon ni rohanta, alai ngolu sisaleleng ni lelengna do jala ndang piga
jolma na sahat tusi. Holan i nuaeng, boasa sai marsak hita di ngolu on, hira so
marhaporsaon be idaon ngolu ni jolmaa i. Holan lomo ni rohana be do diula jolma
i nuaeng, ndang diboto adong do na manontuhon ngolunta, nang pe tahilala hira
na so adong Tuhan i mangolu di hasiangan on. Alai na umporlu tabahen ma
ngolunta i asing sian angka donganta di portibi on. Alai ndang na mandok na
paasingasingkon ngoluntaa i ai parsatongkinan do ngolu ni jolma i di portibi
on.
b.
Haroro ni Tuhan i songon panangko borngin do
haroroNa, ndang tinagam ro, hape ro, ndang binoto sadihari ro. Holan i do
ujungna ingkon gabe masarsar ma sisiasia ni tano on bahenon ni api, songon i
tano ro di sude ulaon na di atasna maasoksok ma sude. Didok Apostel pAulus,
molo songon i jorbut ni ari ni Tuhan i, porlu naeng lam sumurung parange na
badia dohot hadaulaton ni jolma na sintong manomunomu ari haroroNa na balga i.
Molo masarsar do langit jala malala tartutung do angka sisiasia sude, tontu
porlu dijaga jolma i ngoluna sian hisaphisap ni portibi on. Angka pangalensem
dohot angka didok hata insaakinsak do na palambathon ari ni Tuhan i dibahen
pangalaho nasida naso ture. Lapatanna, boi hita pahatophon haroro ni ari ni Tuhan i marhite parangenta na badia
i. AI molo sintong ngolunta, Debata pe hatop do ro laho manogu hita tu
harajaonNa i. Talmud Jahudi mandok; “Molo halak Israel sintong marhamubaon
ngoluna saada ari pe, pintor ro do Mesias i gira!” Tindakan parpudi sian
sangkap ni Debata i ma na tinompa na imbaru. Ai ingkon saabar do hita
marmaimahon langit na imbaru dohot tano
on imbaru, inganan hatigoran i, hombar tu bagabaganaa. Terjaadi do
pembaharuan (reformasi) total di ari ni Tuhan i, ndang songon harajaon sinuaeng
be na gok haburuhon i. Ndang ngolu na maasa nuaeng be adopanta di surgo i.
Sonang nama ngolunta, ai tigor do sude dapothononta disi sude; jolma na mauas
male mida hatigoran i, ingkon dapotan na hinirim ni rohana uju i.
c.
Dibahen i didok si Petrus ninna : “Hamu angka
haholongan” Molo didok songon i tontu marlapatan do angka na hinaholongan ni
Tuhan i do na gabe hasahatan ni surat on. Asa dipangido ngolunta i unang
martihas, unang hasurahan, dibagasan dame. I do ngolu ni jolma na sintong
manomunomu ari ni Tuhan i. Molo tarajumi do lambas ni roha ni Tuhan i songon
sada “Kesempatan” paubahon rohanta, i do
mambahen hita malua sian rimas di ari sogot. Alai molo gabe taetong i
songon dalan laho paotootohon Debata, tontu uhum na jorbut i nama sipaimaonta
di ari i. Asa songon naung manurat si Paulus, apostel i, tu huria i taringot tu
habaasaon ni Debata, marguru tu parbinotoan naung dilehon tu ibana; naeng
songon i haporseaonta tu hata ni Tuhan i (ptds. Rom 2:4; 3:25-26; 9:22-23; 11:
22-23). Dipatorang Apostel Petrus do di suratna on, songon dia didok Apostel
Paulus di saluhut angka suratna na memang maol antusaan taringot tu ari ni
Tuhan i, alai unang ma gabe dipalipe angka na so marroha jala na so togu
rohana, na manghorhon hamagoan di hita angka
na porsea i. Ndang adong manang sahalak
sian hita jolma na umboto ari ni Tuhan i ! holan Ama i do. Marhite turpuk on ma
dipangido tu hita aasa mangarade diri laho pature diri, patingkos ngolu nang
pangalahonta, asa ditingki parasian on na nilehon ni Debata tu hita tapangke
dohot denggan laho paubahon roha, menjaga kekudusan hidup.
d.
Di minggunta on na masuk do hita tu Minggu Advent
na paduahon, boha do panghobasionta laho manjanghon haroro ni Kristus i, nang
pe molo marhite peringatan perayaan laho manomu nomu haroro ni Kristus na
parjolo ima hatutubuNa, alai naung salpu do i. Naung dimasa na paimahon
haroroNa paduahalihon nama hita angka na porsea. Jadi masa advent on dihita na
laho paimaimahon haroroNa napaduahalihon. Adong dua masa Advent (penantian): na
parjolo ima Advent khusus: ima tu angka pribadi ni angka na porsea i. Rade
manang so rade hita di sada tingki, sai marujung be do haduan ngolunta di
portibi on. Ndang boi hita marnalemba disi; manang mandok; sai ganjang dope ari
manang tingki, manang mandok; gira tudia. Molo ro ajalta hape ndang rade roha nang
haporseonta di Kristus i, ima ngolu na so hasolsolan. Sasintongna nunga dibahen
Debata angka tanda di ngolunta,asa tongtong taingot na aadong tingki na ingkon
marujung ngolunta. Napaduahon ima Advent umum na ingkon marongso ma sude na di
portibi on, jala sude unsur ni portibi on gabe suda do jala disiaphon manang
jotjot didok Hari Kiamat. Tung godang do menafsirhon ari kiamat i, adong ma na
marhhite penanggalan suku Maya gabe diadaptasi tu film “2012”, suangsongon i
angka na mangetongetong ari dohot tingkina. Hape di Hata ni Debata mandok
soadong na mamboto ia so holan Ama na di Ginjang i.
e.
Ala ni i angka na porsea di Jesus Kristus naeng
ma parade diri laho manomunomu haroro ni Kristus napaduahon i marhite: - Napaubahon diri; tung
dihalomohon Debata do hamubaon ni roha ni parjahat. “ndang dipagele Tuhan i
bagabaga i, songon na nidok ni roha ni na deba; alai lambas do rohana mida
hamu, ai dipangido rohana, naeng unang ma nian mago agia ise, naeng ma tahe
saluhutna sahat tu hamubaon ni roha”; - Ngolu na daulat, ima na marpardomuan tu
Ari ni Tuhan i dohot pangalaho na tama managam ari i. Dipatuduhon ma parange na
badia dohot na daulat, so martihas, so hasurahan jala dibagasan dame. Domu tu inganan
na pinaimaima i, tontu ingkon pahombaron ma diri tusi. Ingkon badia ma
pangalaho dohot pangulaon. Ingkon rimpaas (sempurna) ma didapot Tuhan i di ari
ni Tuhan i maimaimahon i dohot na manghasiholi ari ni Tuhan i. Asa gabe sada
tiruan ma nang tuhumaliang hita di ngolunta, marhite i mamboan nang mangarahon
torop jolma tu hamubaon ni roha. Amen.
