Dibagasan
Kristus Do Hangoluan
Johannes
1: 1-9
a. Turpuk
on, ima panindangion ni si Johannes taringot tu diri ni Jesus sandiri. Dibuktihon
do paboa Jesus Anak ni Debata na gabe jolma (logos), Sipanompa dohot
Debata-jolma dibagasan sada hadirion ( 1:1-10). Panindangion ni Jesus taringot
tu diriNa sandiri, pitu tanda halongangan na pinatupa ni Jesus, Panindangion ni
Debata Ama, Panindangion ni Tondi Parbadia.
NA marningot do hita di hatutubu ni Tuhanta Jesus. Ai nang pe ganup taon
tapestahon pesta hatutubu ni Tuhan Jesus, ringkot do parataratahononta aha na
nidok ni Hatutubu ni Tuhan Jesus tu hita, jala aha lapatan ni i tu ngolunta
dohot di angka parsaoranta siganup ari. Marhite Pesta Hatutubu ni Tuhan Jesus
na tapaestahon dibagasan ombas on, dipangkulingi do hita marhite sada
proklamasi manang panindangion na sian si Johannes taringot tu Jesus, i ma: na
Gabe Daging Ma Hata i”.
b. Dipatorang
si Johannes do tu hita, marhite na mamboan hita mulak (marningot) panompaon di
mulana i (ptds. 1 Musa 1: 1a). Andorang so ditompa Debata dope portibi on,
Logos (Hata) i nunga adong. Logos (Hata) i ndang na ditompa, alai sian saleleng
ni lelengna nunga adong hhian Hata i. Jala si Paulus pe, laos songon i do
dipodahon ( 2 Kor.8:9; Pil.1:2-5). SI Johannes manghatindangkon, ia “Hata” i
nunga ro tu p ortibi on dibagasan hadirion ni Jesus, na so marmula jala ndang
marharoroan sian portibi on, alai sahalak na ‘praexistent” do (nunga adong hian
andorang so adong dope portibi on). Maksud dohot tujuan ni si Johannes mamangke
hata i , ima; ia Logos (Hata) i, i ma sada hal na mansai porlu di ngolu ni
jolma. Dohot sada hata boi do hita patupahon las ni roha dohot apulapul sian
arsak ni roha dohot parungkilon di ngolunta huhut mambahen parsaoran na denggan
dohot angka dongan na di huhmaliang hita. Molo tadok sada hata na sintong jala
marsitutu, boi di gombarhon i isi ni roha jala rimpun ni ngolunta parbagasan.
Isarana: sada ina na naeng mangapuli ianakhonna, dipasahat do i marhite hata na
lambok jala tabo begeon. Dohot sada hata “olo” sian sahalak boru oroan
dipatolhas i do sude isi ni rohana. Songon i ma dibagasan Logos (Hata) i,
Debata papatarhon DiriNa, jala mangalehon diriNa, asa tangkas ditanda jolma,
jala boi dihaporseai. Ala ni, ndang tarsirang Debata dohot Hata i, dibagasan
holong na so marnamontok. Hatiuron sian Hatiuron, marsaor sian saleleng ni
lelengna sahat ro disaleleng ni lelengna. Jala Debata do Hata i, sisada Hasadaon
dibagasan Debata Ama, Anak dohot Tondi Parbadia. Asa manang ise na pajumpang
huhut marsaor dohot Hata i, ima halak na pajumpang dohot Debata. Dipatangkas si
Johannes do i di ayat 2: “I ma na saor tu Debata dimulana i”. Ala ni i, Hata i
manongtong do, ndang marharoroan sian tano on, alai sian mulana i nunga marsaor
dohot Debata. Ndang adong na asing, ia so holan Jesus na boi papatarhon rupa,
lomo ni roha ni Debata. Jadi, ala Debata do Hata i, Hata i do Debata. I do umbahen
na marhagogoon Hata i songon panompa. Dohonon ma adong pe Hata i, patuduhon
dohot patandahon Debata do tu angka jadijadianNa. Hubungan ni Debata tu Hata i,
ima marhite Karya penciptaan (Creatio ex Nihilo). Di naung saor Debata tu
portibi on gabe ditanda portibi on ma Debata marhite Jesus Kristus na sorang
dibagasan jala marhite jolma, ima laho patulushon sangkap haluaon.
c. Dialo
si Johannes do pandapot na mandok, ia materi (benda) na manongtong, termasuk
sibolis naung sai adong hian di lambung ni Debata. Alai si Johannes mandok;
nasa na adong marharoroan sian Hata i do i. Jesus Sipalua dos do i dohot Debata
Sipanompa. Alai ndang holan sipanompa sude angka na tinompa, alai dohot do
mangaramoti (memelihara). Sian diri ni na tinompa i, ndang adong hangoluan,
alai tergantung sian Hata i do. Hata i do haroroan ni ngolu dohot pasupasu.
Ngolu dibagasan Hata i, ima “Hatiuron ni jolma”. Ai andorang so madabu jolma tu
dosa, jolma mangolu, marsaor dohot Hata i, i ma na mangolu dibagasan hatiuron,
marsaor dohot Debata dohot nasa na tinompa. Songon i do nang dung madabu jolma tu
dosa, hatiuron na sian Tuhan i sai tongtong do marsinondang, nang pe jolma i
ndang manjangkon na tiur i, alai sai tongtong paloashon dirina di linggoman ni
haholomon. Jala halak nampuna ni Debata hian pe ndang olo manjangkon na tiur i
(ptds. Ay.11). Ndang ditanda nasida Debata dohot dirina sandiri, ala ngolu
partondionna nunga marsahit jala mate. Nang pe na holom i ndang manjangkon na
tiur i, alai sai tongtong marsinondang na tiur i. Hatiuron dohot hangoluan na nidokna disi, ima:
hangoluan na manongtong, haluaon sian uhuman. Jadi ia hatiuron dohot hangoluan
i holan dibagasan Jesus Krsitus do. Laos i do na tinudu ni si Johannes Pandidi
na manudu (pabotohon Tuhan Jesus do Hata i nunga gabe daging).
d. Andorang
so ro dope Jesus i, ndang dung adong naung marnida Debata. Tutu pigapiga hali
dipabotohon Debata do hadirionNa tu jolma i, Isarana; manghatai do dohot jolma
na parjolo i, manghatai do dohot si Noak, si Abraham, si Jakob, si Musa dohot
angka panurirang. Alai ndang sada pe sian nasida marnida Debata. Ise do Debata?
Boasa ala hatiuron ndang dope saor
manondangi tu portibi on. Ringkot parateatehononta dison, ia hangoluan (junani;
zoe= ngolu, mangalehon hangoluan). Lapatanna: na mangalehon hangoluan do haroro
ni Jesus tu portibi on, mamungka sian hatutubuNa, hagodanganNa, sahat tu
parniahapanNa di hau pinorsilang, rade Ibana mangalehon hosaNa bahen
panghophopon ni haluaonta sian dosa dohot hamatean. Unang dibagasan haholomon
be na porsea i, alai asa hatiuron nama manondangi ibana: ‘unang tartuktuk,
unang misteri, unang so ditanda Debata’.
Hombar tu evangelium Johannes, ia haholomon ima angka hajahaton. Jadi angka
halak na dibagasan haholomon na jahat do sude manggomgomi ngoluna. Alai mabiar
do haholomon i marnida hatiuron (3:19,20), asal ma olo mardalan di hatiuron i
(8:12; 12:46). Laho manjangkon panondang i (Jesus), nunga disuru patujolo
songon perintis, sitindangi, i ma si Johannes Pandidi. Maksudna disi laho
mangalusi keraguraguan ni portibi on do taringot tu bagabaga i nunga be
dipasaut Debata marhite Tuhan Jesus. Jadi, fungsi manang peran ni si Johannes
Pandidi songon sitindangi do ibana paboahon nunga ro panondang i, Sipalua.
Ibana Tuhan, Ibana do na nidok ni Hata bagabaga (5:37; 3:25-30; 4:1; 10:41)
e. Turpuk
on paboahon inkarnasi :Hata i gabe daging, ndang manggombarhon dalam bentuk
peristiwa manang barita hatutubu ni si Palua i. Alai mangondolhon tu aspek
teologia ni proses inkarnasi i do. Asa tangkas do tu na porsea i mangauhon
makna/tujuan, aha do umbahen na olo Tuhanta Jesus ro tu portibi on marrumang jolma jala saor Ibana
rap dohot jolma pardosa di portibi on. Ala ni i unang ma pesta Natal i
dipestahon holan na naeng marningot sejarah peristiwa ni hatutubu ni Sipalua i
sambing. AI jotjot taida kecenderungan pesta Natal i holan napatuduhon
ahriburon, alai gabe holip rumang ni holong dohot las ni roha ala godang boban
tingki na mamestahon i. Ali na rumingkot asa gabe daging Hata i, ingkon
marsitutu ma hita mangulahon Hata ni Tuhan i; tahaporseai Hatai, tajangkon,
jala tahangoluhon ma Hata i, asa taruli hita di hatiuron, haluaon dohot
hangoluan sisaleleng ni lelengna, dibagasan Jesus Kristus. Amen.
