Kristus
Raja Ni Hadameon
Mika
5: 1-4
a. Namangula
do Panurirang Mika ditongatonga ni bangso Juda na tongon dibagasan situasi na
mansi maol (Krisis). Mangihuthon paretongan ni angka ahli, na manurirangi do
Ibana hirahira di taon 725-701 sM, ima ditingki panggomgomion ni Raja Ahas
dohot Raja Hiskia di harajaon Juda. Hira satingki do ibana dohot panurirang
Hosea, na manurirangi di harajaon Israel Utara. Mansai porsuk do parniahapan ni
bangso Juda di hatiha i. Tarsosak do nasida sian Utara marhite serangan ni halak
Assur, na tongon maralo dohot halak Misir di sabola Selatan. Sai diuji halak
Juda do nian mandopang harajaon Assur i, marhite na patupahon manang piga hali
pemberontakan, alai ndang tolap nasida mangalo. Ujungna gabe hona kepung ma
huta Jerusalem, ibukota ni harajaon Juda, lumobi di huta Jerusalem na
manghorhon tu hasesega ni ngolu parugamaon dohot kemerosotan di bidang moral. Dibagasan
konteks na songon i ma ro hata ni Debata tu bangso o marhite panurirang Mika, i
ma na manogunogu nasida asa sai tongtong mangasahon hagogoon ni Debata, jala
asa tongtong marpanghihrimon di haluaon na marharoroan sian Tuhan i. Di
turpukta on disurirangkon si Mika do hatutubu ni sahalak Raja na miniahan (Mesias), na mamboan haluaon dohot hadameon
ditongatonga ni bangso i, dohot di saluhut bangso na di portibi on.
b. Disurirangkon
Panurirang Mika do haroro ni Mesias na pinarbagabaga i sian Huta Betlehem na di
luat Efrata. Huta na metmet do huta i, alai laos huta na tarbarita do muse ala
sian huta i do haroro ni raja nasida na tarbarita, ima raja Daud, laos
tarbarita do lapatan ni huta i, Betlehem Efrata: kota roti, lumbung roti (hause
of Bread). Na metmet do huta Betlehem martimbangkon sian angka huta na asing na
mansai torop di tano Juda. Alai huta na metmet i do dipangke Debata gabe haroro
ni Raja ni Israel, jala haroroan ni Mesias dohot Sipalua hajolmaon. Laos
digombarhon i do perhatian ni Debata na mansai baga tu angka halak na metmet,
manang angka halak na so marhagogoon, manang angka halak na so mararga di
pamerengan ni portibi on. Dipatuduhon do hadirion ni Raja na pinarbaga i, naung
gabe raja “sian na hinan, sian angka na robi salelengnielengna”. Sian i boi
antusanta, paboa Mesias na pinarbaga i, ima songon parhitean sian ari na robi
tu ari parpudi, manang sian tingki panompaon tu ari haluaon ni jolma. Ala ni i,
Mesias na naeng tubu i, i ma Mesias na paluahon sude jolma, sian mulana sahat
ro di ujungna.
c. Ala
naung madabu raja ni halak Israel/Juda di hatiha i, jadi pasahathon ni Debata
ma jolo bangso i untuk sementara tu tangan ni musunasida, paima dapot tingki ni
hatutubu ni Raja na pinarbaga ni Debata. Martudutudu do on tu habuangan na pinamasa
ni Debata tu bangso i. Nunga ditaban halak Assur halak Israel Utara mulai taon
722 SM, jala halak Juda hona buang ma muse tu huta Babel mulai taon 597 SM.
Jala torus ma muse keberadaan ni bangso i dibagasan gomgoman ni bangso na
leban, paima hababangkit ni Mesias i. Lapatanna, ingkon mangae sitaonon dohot
haporsuhon do bangso i. Alai na marujung do muse sitaonon dohot haporsuhon i, ai paluaon ni Mesias i do
nasida muse sian tangan ni musunasida. Paluaon ni Debata do nasida muse sian
habuangan dohot sian gomgoman ni angka bangso na leban. Pasipasi ni bangso i
ingkon papunguonna do muse, asa boi marsada dohot angka hahaanggina, gabe pungu
ma nasida sada bangso, jala sada punguan na niuluhon ni sahalak Parmahan.
d. Ala
hatangkangon nasaida na saleleng on nunga marserak nasida, alai ala holong ni
Debata dipataridahon ma muse hasatiaonNa tu padan naung binahenNa i na
pajongjong nasida gabe sada bangso ditongatonga ni portibi on. Roma sada tingki
naeng pasadaonNa muse nasida saluhut naung marserak i ala bangso ni Debata.
Pasipasi (sisasisa), na secara umum, marlapatan ndang marguna be jala ingkon
ambolongkonon nuaeng dipaulak muse gabe marguna jala margogo. Dison tarida
keunikan ni pambahenan ni Debata. Nunga leleng nasida songon birubiru na so
marparmahan, ganup nasida masitondong dalanna be. Alai ndang dipasombu Debata
nasida lilu. Ro ma muse parmahan i manogihon angka birubiruna mulak tu barana
hian, jala ndang paloasonna nanggo sada pe mampar sian punguan i (ptds.
Hes.34:16, 23). Songon parmahan na denggan na bersedia mangalehon dirina
manghophop angka birubiru molo ro ancaman, songon i ma digombarhon
tanggungjawab ni panggomgomi na naeng ro i. Mansai bagas do pandohan
syalom(hadameon) i, na secara sederhana boi antusanta: parngoluon na sempurna,
materi nang dohot ngolu partondion. Dihamham hata syalom on do hatonggion,
haulion, keamanan, las ni roha dohot angka na asing dope na marpardomuan tu
ngolu ni jolma. Marasing situtu do hape ulaon ni panggomgomi na naeng ro i sian
angka raja na asing di Israel na di hatiha i. Bangso Assur, harajaon na gogo,
songon na mewakili angka harajaon na leban na adong di sekitar nasida i sai
tongtong do berusaha manaluhon dohot menguasai bangso ni Debata. Alai nuaeng
ndang margogo be angka bangso na leban, ai nunga adong hagogoon na so boi
tartaluhon. Bilangan pitu parmahan dohot ualu induk ni jolma i, ima pandohan na
bersifat apokalyptis. Bilangan pitu marlapatan cukup jala ualu marlapatan lebih
dari cukup. Na nidokna disi, molo ro Assur naeng manungkum nasida, panggomgomi na
aneng ro i memiliki hagogoon melebihi sian hagogoon na niantusan nasida. Asa
maringan ma nasida di situasi na aman situtu. Rahasia hagogoon ni panggomgomi
na naeng ro i, ima ala ndang sian dirina ibana mangula, ala Debata Jahowa do na
manonggopi dohot membungkus ibana. Marhite ulaon dohot hagogoonNa i gabe
dapotan tua dohot las ni roha bangso ni Debata. Ditongatonga krisis na nialaman
ni halak Juda, lumobi pangisi ni Jerusalem, gabe sada apulapul do panurirangon
ni si Mika on tu nasida, jala na boi paheheon semangat dohot pangkirimon di
nasida.
e. Jesus
Kristus do Raja ni Huria, na laos Raja ni angka raja na adong di portibi on.
Asa dapot hadameon dohot kesejahteraan ni angka bangso, ingkon marojahan tu
kepemimpinan ni Jesus do kepemimpinan ni angka panggomgomi, i ma kepemimpinan
na marojahan tu huaso dohot hamuliaon ni
Debata. Molo madabu angka pemimpin ni portibi on tu pangalaho na manonjolhon
huaso, jala manggulut hasangapon dohot hamuliaon ni dirina, ingkon sai susa do
bangso na pinimpinna. Dipaojak Debata do huria i dohot sude angka na porsea
gabe pasupasu tu angka bangso manang masyarakat na humaliangsa. Tontu sipataridahononta
do on marhite angka tiruan na denggan di pangalaho, di sikap, di parsaoran, di
pangulaon, lumobi di angka ulaon holong ni roha. Huria na sintong mangolu ndang
holan tu dirina, alai na ingkon sai marpardomuan do ibana tu saluhut angka
donganna. Na sada do huria i slauhutna niihotan ni haporseaon dohot holong ni
roha ni Jesus Kristus. Ala ni ingkon sai marpanarihon do huria i tu angka na
pogos, na tertindas, na gale, na marsahit, na tarhurung, dohot saluhut angka na
dangol di portibi on.
f.
Di ari pesta Natal umum bodari on; ndang tagamon
so mansai las rohanta manjangkon barita taringot tu holong ni roha ni Debata di
hita. Nang pe jotjot madabu hita tu dosa, alai umbalga do holong ni roha ni
Debata di hita manogunogu hita. Tajangkon do i di ngolunta na saleleng on, nang
pe secara individu, di keluarga, huria, masyarakat nang dohot bangsonta di
Indonesia. Panosak ni krisis demi krisis, nang di ekonomi, politik, sosial nang
budaya, dohot mental rakyat Indonesia, boi patubu hagangguon di ganup jolma na
merajalela angka kejahatan nang kekerasan laos songon i angka bencana alam.
Naeng ma lam bisuk hita laho menyikapi angka na masa ditonga ni bangsonta nang
negaranta. Tahalungunhon do hadameon dohot kesejahteraan ni bangsonta on, na
dibagasan proses do bangsonta, dibagasan pergumulan asa lam ture jala denggan
mardalan institusi nang pemerintahan negaranta. Sadalan dohot i, dihirim do
ditonga nu hiranta HKBP terlayani angka panghobasion na lam ampit, jala ndang
dao i sian p angulaon nang panghobasion naposo ni Debata ima angka pandita di
huriana. Namarhajongjongan do angka pandita di huria HKBP gabe uluan, na
mamboan ruas ni huria tu panandaon nang panogunoguon ni asi ni roha ni Debata.
Naeng ma jumolo hita mamereng sian ‘dapurna’ ima singkola pandita manang
STT-HKBP. Singkola i do na gabe center of Theology, sian i ma diramu Hata ni
Debata gabe aplikatif tu pelayanan manang panghobasion di huria. Sai ro do nian
angka suara sumbang hinorhon ni oknum pelayan pendeta na pola hurang mangalehon
dirina laho marhobas; hurang ditanggung jawab nang hurang dikemampuan pe. Hape
mamereng tantangan jaman na lam maju dohot canggih dihirim do lam malo angka
pelayan fulltimer nang pandita laho mewaspadai perkembangan jaman on ditonga ni
ruas ni huhria. Ala ni i porlu do hita songon ruas ni huria mendukung,
manangiangkon, huhut manumpahi parsingkolaan ni teologia HKBP asa gabe dapur na
meramu, membina, dohot membangun teolog-teolog na tarjou melayani bukan untuk
dilayani maniru Tuhanta Jesus na ro tu portibi on laho melayani jala manogunogu
jolma sahat tu hasonangan na salelengnilelengna. Amen.
