Ndang
Adong Na So Tarpatupa Debata
Lukas
1: 26 – 38
a. Mansai
denggan do si Lukas laho patorangkon na binaritahonna marhite pandohan; “Salpu
onom bulan” ima na patuduhon ndung onom bulan mardenggan pamatang si Elisabet
ipe asa dibaritahon tu si Maria na mardenggan pamatang ma ibana. Jadi boi
taperkirahon onom bulan ma umposo Jesus sian si Johannes. Alai na barbaju dope
si Maria oroan ni si Josep. Molo naung oroan pe i dihatiha i nunga songon naung
marsaripe, alai ndang boi dope nasida sabagas. Alai ndung diboto si Josep
oroanna i mardenggan pamatang, disi do tubu roha ni si Josep laho maniranghon
si Maria. Nang pe diboto si Maria konsekuensi ni ni naung mardenggan pamatang
ibana di hasomalan adat Jahudi, alai ndang umbiar ibana tu gogo ni portibi on
gok angka sitimbangan, nang dipingkiri ibana isarana: a) Boha ma ibana laho
patoranghon tu si Josep naung mardenggan pamatang ibana; boi do gabe
disirangkon si Josep ibana. b) Ingkon adopanna ma keluargana, bohama keluargana
manjalo na masa i, naung mardenggan pamatang ibana so jolo marbagas. c) Ingkon
hona ruhut ni hajahudion ma ibana ima uhuman hamatean; ala boi do dituduh ibana
naung mangalangkup, asa uhum mandabu batu ma tipa tu ibana songon naung
tarsurat di (5 Musa 22: 20-21).
b. Alai
hot do ibana, ndang mabiar nang pe so masuk tu logika manang pingkiranna na
masa i, alai mansai marasing dohot sikap ni si Sakaria na so porsea di
hasosorang ni anak ditonga keluarga nasida naung hol hian jala naung marumur.
Jala adong do siputihonta sian barita na uli on. Molo si Elisabet na hol boi
gabe tubuan anak nang pe naung marumur na godang, ala ni ndang adong na so
tarpatupa Debata molo pe boi si Maria mardenggan pamatang sian Tondi Parbadia.
Holan sikap unduk dohot na mangoloi do di diri ni si Maria, ndang adong sikap
ni si Maria meragugkan manang manulak bagabaga ni Debata di Ibana. Ido sikap na
boi siparrohahononota, asa nasa pangalaosion ima sikap na so porsea jala
mardosa, songon na niulahon si Adam dohot si Hawa i, so pangoloi di Hata ni
Debata baliksa dilaosi do jala hata ni sibolis i do dipatangitangi asa mardosa.
Ala ni i Hata ni Debata ndang silaosan i alai nioloan dibagasan roha jala
diulahon. Nang pe molo secara logika ndang masuk tu lingkiran nang rohanta di
hajolmaon, alai ala haporseaon do na gumogo mangkuling jala marhusor dibagasan
rohanta ido na mangatasi logikanta. Ido umbahen didok ndang adong na so
tarpatupa Debata.
c. Songon
na di Epistel i pe, tung denggan pe sangkap ni si Natan tu si Daud asa
pajjongjongon ni si Daud sada Bagas joro ni Debata, ndada gabe saut i, ingkon
lomo ni roha ni Debata do na saut (ptds. Pslm. 127:1). Lapatanna, angka na gabe
naposo ni Debata ndang bergantung be tu angka gogo dohot pingkiranna naeng ma
hibul rohana marsiguntang tu Debata, asa lomo ni roha ni Debata ma na saut;
marhite sikap haunduhon dohot pangoloi di HataNa: : “Naposo ni Tuhan i do ahu.
Sai saut ma tu ahu songon na nidokmi”, on ma pandohan dohot pengakuan na
luarbiasa sian si Maria, nang pe ingkon adopanna angka konsekuensina haduan,
rahasiana ima: 1) Unang ho mabiar, ale Maria; ai dapotan asi ni roha do ho di
Debata. Molo naung dapotan asi ni roha ni Tuhan tontu ndang laosanna be i,
naung dihaporseai Debata ma ibana manjalo i, sada tugas na mansi uli, nang pe
godang resiko nanaeng siadopanna. 2) Naung dibagabagahon surusuruan i do Tondi
Parbadia manjagai ibana: “Songgopan ni Tondi Parbadia ma ho jala linggoman ni
hagogoon ni Natumimbul i do ho”. Ala ni imolo nunga songgop Tondi Parbadia di
hita, ndang be mabiar hita, alai margogo manghatindangkon Ibana (ptds. 2
Tim.1:7 “Ai dilehon Debata do tu hita tondi hagogoon, tondi haholongon, tondi
pangarajaion diri, ndada tondi hatahuton.”)
d. Naparpudi
ma Advent IV on di hita, asa pahothon haporseaonta manjanghon Tuhan i tubu
dibagasan ngolunta. Molo naung dilehon Tuhan i i di hita asi ni roha (Grace),
dipasahat do hita angka tugas pelayanan na uli na denggan asal ma porsea hita,
sai dongananNa do hita di angka ulaonta. Ndang tadingkononNa hita. Ndang
surusuruan i be na ro hita jolma mamboan barita las ni roha, ala naung jongjong
do huriaNa di tongatonga portibi on manggantihon ulaon surusuruan i laho
mamaritahon Barita las ni roha ima Barita Na Uli i tu angka jolma na di portibi
on. Ndang adong na so tapatupa Debata;
Tuhan akan memungkinkan kita; yang tidak mampu menjadi mampu, songon
naung dipatuduhon Jesus diulaonNa songn jolma Ibana: na mapitung gabe marnida,
na pangpang gabe mardalan, na huliton gabe hi[as, na mate gabe mangolu. Nang
hita pe molo so mampu hita dimampuhon Debata do hita asal ma tapangke gogoNa na
sian Asi ni rohaNa (Grace) tu hita. Dari Imposible menjadi I’m Posibble. Amen.
