Didongani
Asi Ni Roha Ni Debata Do Jesus
Lukas
2: 36 – 40
a. Diturpukta
on dibaritahon do sada barita na so dapot di evangelium na asing, i ma taringot
tu haroro ni si Maria dohot si Josep mamboan posoposo Jesus tu bagasjoro na di
Jerusalem. Sangkap nasida ima laho mangulahon adat hasomalan ni halak Jahudi,
na mardomu tu posoposo i na dohot mardomu tu inana na mangintubu, si Maria, ala
halak Jahudi do nasida. Alai dibagasjoro i pajumpang do nasida dohot dua halak
natuatua, i ma sahalak ama na margoar si Simeon sahalak ina na margoar si
Hanna. Si Simeon digoari do sahalak “na bonar jala daulat”, jala si Hanna
digoari do sahalak “boruboru panurirang”. Duansa nasida manindangi taringot tu diri
Jesus dohot pasahathon pujipujian tu Debata, ala dibagasan diri ni Jesus dohot
pasahathon pujipujian tu Debata, ala dibagasan diri ni Jesus, dibereng nasida
nunga patar Mesias na pinarbaga ni Debata tu halak Israel.
b. Dipataridahon
si Lukas do di turpuk on pujipujian na ro sian sahalak “boruboru panurirang”
dibagasjoro i na margoar si Hanna. Goar Hanna marlapatan do “Asi ni roha”.
Ndang apala godang taboto taringot tu diri ni Hanna on, asing ni barita na di
turpukta on. Alai sian turpukta on dipabotohon do:
Ø
Sian marga Aser do ibana, i ma sada sian sampulu
marga ni Israel naung mago i. Alai tarbukti do na adong do sian anggota ni
marga i na bertahan jala tongtong mangaradoti tarombona.
Ø
Ibana sahalak naung leleng mabalu, ai holan pitu
taon do ibana sanga marsinonduk. Digombarhon i do balga ni sitaonon na
binolusna. Alai sitaononna i ndada paholanghon ibana sian Debata, lam
pajonokhon do.
Ø
Nunga marumur ibana 84 taon, tarida sian i naung
mansai ganjang umurna. Alai nang pe naung matua ibana, torang do tongtong
rohana, ndang hea mandele.
Ø
Ndang meret nasida sian joro i; boi do i
marlapatan naung maringanan disekitar bagasjoro i ibana, alai boi do i
patuduhon na torus ibana beribadah tu Debata, mangaradoti parpuasaon dohot
partangiangon.
c. Dung
dibereng si Hanna, Jesus na binoan ni natorasna tu joro i dipuji ma Debata.
Suraon pamujion ni si Hanna di Debata, tong do ala naung dibereng ibana
dibagasan diri ni Jesus nunga disuru Debata MesiasNa. Alai ndang dipaboa si
Lukas isi ni pujipujianna i, songon i dohot komentar ni si Hanna taringot tu
Jesus. Na dipabotohon i ma pambaritahonon ni si Hanna taringot tu Jesus, tu
saluhut na manghasiholi “haluaon ni Jerusalem”. “Haluaon ni Jerusalem” ima
pandohan na asing na mardomu tu haluaon na binoan ni Mesias.
d. Dipaujung
si Lukas do turpuk on marhite barita hamumulak nasida sian Jerusalem tu huta
nasida di Nasaret, Luat Galilea. Mulak nasida dung jolosidung digohi nasida na
mardomu tu patik i. Dung i parpudi digombarhon si Lukas do taringot tu
pertumbuhan ni Jesus ditingki dakdanak Ibana. Dibolus Jesus do pertumbuhan
fisik, mental dohot pertumbuhan spiritual, songon sahalak dakdanak na normal.
e. Dipatuduhon
turpuk on do sada keyakinan; na silehonlehon ni Debata na mansai balga do sada
dakdanak. Ala ni i balga do tanggungjawab ni natoras tu dakdanak na
tinubuhonna. Angka dakdanak na pinasahat ni Debata tu natoras, ndada gabe
nampuna ni natoras i non i, na boi boanonna tu lomo ni rohana sambing. Alai
ganup dakdanak, na pinalumehon ni Debata do i tu natoras, asa ditogutogu
mangihuthon dalan ni Tuhan.
f.
Digoari do minggunta on Minggu dung Natal manang
Minggu Dung Pesta Parningotan ni hatutubu ni Tuhan Jesus. Tagamon nunga
tapestahon hatutubu ni Jesus i di tingki na salpu marhite ragam ni angka pesta.
Tahirim do marhite angka pesta natal i pajumpang hita dohot Jesus. Alai molo
naung patar do Jesus Kristus i di hita songon Raja jala Sipalua hajolmaon,
naeng ma gok dame rohanta maninggalhon taon on jala mangeahi taon na imbaru. Manjangkon
Jesus marlapatan do i; olo hita patutoru dirinta, songon Kristus na olo
patutoruhon dirina tuat tu portibi on. Saleleng gompang dope kesombongan dohot
ginjang ni roha i dibagasan rohanta, ndang tagamon boi hita taruli di haluaon
na binoan ni Jesus. Ganup halak na patimbohon dirina, ingkon madabu do
tubagasan haleaon bahenon ni Jesus. Alai ganup na patutoruhon dirina, ingkon
patimboon ni Jesus do tu hasangapon.
h. Songon
Si Hanna naung mabalu holan 7 taon do marsinonduk, ndada gabe sai marsak mannag
mandele, di umur 84 taon sai margogo do ibana ala sai pasolhothon diri tu
adopan ni Debata marhite tangiang nang pujipujianna dibagas joro ni Debata. Si
Hanna ima na mewakili penderitaan ni hajolmaon dihasiangan on, saleleng di
ngolunta on ndang tarbahen hita malua sian sitaonon dohot parungkilon. Sitaonon
boi do manghorhon arsak, sogo ni roha dohot pangaloon tu Debata. Alai laos boi
do sitaonon i padaukhon roha gabe lambok jala simpatik. Boi do sitaonon i
pagalehon haporseaon, alai laos boi do i patoguhon haporseaon, songon na tarida
di ngolu ni si Hanna. Nang pe gok sitaonon dohot parungkilon ngoluna, alai
ndang hea didondoni sitaonon i rohana dohot haporseaonna. Torang do tongtong
rohana sahat ro diujung ni ngoluna, mangantusi sangkap hatuaon ni Debata
dibagasa Jesus Kristus. Jala ala ni i margogo laho mamuji dohot
manghatindangkon pambahenan ni Debata. Na dapot ibana do hagogoon i marhite pangoromon
ni hagiot hagiot ni daging (parpuasaon) dohot partangiangon. Nang hita pe naung
manjalo asi ni roha ni Debata dibagasan Jesus Kristus ima angka siihuthon Jesus
Kristus, na margogo do laho mamolus nasa parsorion ni ngolunta. Hita naung
mandai asi ni roha Debata dibagasan Jesus kristus ndang sumurut di ulaon
siganup ari. Suang songon i di Minggu Natal on, tung naung salpu pe Perayaan
Parningotan Ari Hatutubu ni Tuhan Jesus, ndang na gabe salpu semangat Natal i.
Unang ma semangat natal di hita holan di perayaan Natal marhite dekorasi natal
dijabu nang digareja, dung salpu natal disiman ma muse dekorasi natal i di
kardus jala digudangkon, Alai asi ni roha ni Debata dibagasan Jesus Kristus
naung tubu i, ndang salpu boti di ngolunta, sabalikna torus tapeop Asi NI roha
(Grace) ima Jesus Kristus i dipardalanan ni ngolunta asa torus dipataru hita
marhagogoon di ngolunta nuaeng sahat tu ngolu na saleleng ni lelengna. Amen.
