Jesus Kristus Siboan Haluaon Salelenglelengna
Yesus Pokok Keselamatan Yang Abadi
Heber 5: 7 - 10
A. Patujolo
Ia Buku Heber ima na martujuan laho pahothon haporseaon
ni halak na porsea asa tangkas tandaonna Debata dibagasan Jesus Kristus. Asa marhite
i panuraat mamangke analogi laho
manggombarhon pambahenan ni Tuhan Jesus songon Sipalua hajolmaon, ima marhite
perananNa sonngon Malim Bolon. Ia bindu 5 on mangondolhon tu peranan ni Malim
Bolon, molo dibagasan Padan na Robi na tarida di diri ni si Melkisedek, jala
nuaeng tarida dibagasan diri ni Jesus Kristus. Sian Heber 5:5-6 ditaringoti
taringot tu ha-Debataon ni Jesus dohot sangkap ni Debata sian nahinan marhite
ulaon ni angka malim.
1) Na parjolo dienet sian Psalm 2:7,
na jumolo dipaboahon di bindu 1 ayat 5. Sian ayat on patogoshon ha-Debataon ni
Jesus. Sian sundut teologis, ayat on martudutudu tu Kristologi ni evangelium Johanes
na mandok ia Jesus ndada na tinompa, ndada rupa ni Tuhan na tumoru, alai Ibana
na gabe diparianakhon ndada na binahen. Ona muse do na gabe panindangion
haporseaon Nicea.
2) Napaduahon dienet sian Psalm 110:
4. Turpuk on patandahon sada tokoh naung targoar ima si Melkisedek na
ditaringoti di 1 Musa 14 na marhahonaan tu si Abraham. Mansai penting do
hajongjongan nasida, saiala partalianna tu sejarah ni sangkap ni Debata sahat
tu hubunganna dohot Jesus. Melkisedek ima prototipe sian Jesus songon Anak ni
Debata, Malim Bolon tu saluhut manisia. Heber 7: 3 manggombarhon Melkisedek on
dibagasan istilah mistik jala ahistoris songon jolma na so marama, ndang
marina, ndang martarombo, arina ndang marmula jala ngoluna ndang marhaujungan,
ala ibana ditompa songon Anak ni Debata, hot do ibana gabe malim sahat ro di
saleleng ni lelengna. Alai na ginoaran on ima model ni jolma na spesifik jala
tarpuji disahalk Malim Bolon.
B. Hatorangan:
Sian pangalaho ni Jesus i, adong ma pigapiga hal na
ingkon sibuatonta:
1) Haunduhon nang pangoloion; ima sada pangalaho na mansaii ringkot di angka na
porsea jala na gabe sayarat na rumingkto na ingkon ginohan tu hita naung mengalami
pertumbuhan rohani jala sahat tu na lam tang haporseaonna, jala di Jesus
sandiri: Heber 5:8 “......diguruhon do pangoloion marhite sian na tinaonanna i!
1)jala didok do di Pilipi 2: 8 Dipatutoru
do dirina; na gabe pangoloi do Ibana paima mate, pola tung mate tarsilang! Molo
saluhut angka ama na di sandok portibi on mangarophon angka ianakhonna asa
unduk jala gabe pangoloi di angka hata nang parentana, lam ma Debata Ama na di
Surgo i, diarophon do angka anakonNa asa mangolu dibagasan haunduhon ni roha,
ndada mangolu sian lomolomona sambing. Uju ro Jessu tu tongatonga portibi on
songon Anak, dibahen Ibana do songon tiruan tu hita taringot boha do Ibana
unduk mangoloi laho mangulaho lomo ni roha ni Debata Ama i. Siala ni i; Ala ni
i do dipatimbo Debata Ibana jala dibasabasahon tu Ibana Goar na sumurung asa
nasa goar, asa somba tu Goar ni Jesus nasa ulu ni tot, na di banua ginjang i
dohot na di tano, nang na ditoru ni tano, jala asa nasa na marsoara
marhatopothon: Jesus Kristus do Tuhan, bahen hasangapon ni Debata Ama”
(Pil.2:9-11). Kristus do na gabe tiruan do hita di haunduhon ni roha, laos
songon i ma molo tajaha di Padan na Robi, adong si Abraham na unduk tu Debata
uju dipangido Debata ibana laho mamelehon anakna na sasada i ima si Ishak songon
peleanna. Sian pangalaho i, pangoloion ni si Abraham naung taruji disi (1 Musa
22: 16-18). Alai ndang muramura di na laho mangulahon parange pangoloi, alai
ndad gabe alasanta asa ndang olo marsiajar laho mangulahonsa. (1 Ptr.1:14).
2) Gabe tiruan;
Manguduti pangantusion di ayat 9 nangkin, marhite panaonon ni Tuhan Jesus i
sahat tu hasingkopanna, jala gabe siula haluaon na manongtong tu saluhut jolma
na unduk tu Ibana, ala ni i naeng ma hita maniru pambahenanNa i marhite:
Ø Parjolo; asa rade rohanta
mangadopi angka hamaolon, panaritaan di ngolunta. Ala maniru Tuhan Jesus
Kristus, marhite panaritaanNa, tahaporseai jala tahaposi do ia Kristus diparbadia
i di hajongjonganNa, diparbadia i marhite mudarNa sandiri.
Ø Paduahon, marhite panaritaanNa i,
naung dipatupa Kristus do ulaonNa songon Anak di tonga portibi on, patupa
hadameon tu pangalaosion, sian on naung singkop do ulaoNa i. Marhite i ma
diarahon tu hita asa olo gabe sipardame, siboan dame, sipatupa dame. Mardame ma
hita dohot dirinta sandiri, mardame ma hita dohot musunta, mardame ma hita di
tonga ni bagasa, keluarga, parkarejoan, parpunguan, masyarakat, bangso dohot
negaranta. Talaksanhon ma rekonsialisasi marhite haholongon na torus tarida
dipardalanan ni ngolunta.
Ø Patoluhon, Dung unduk jala marsihohot
manggulahon na parjolo dohot na paduahon, asa talehon ma rohanta lam gabe
pangoloi jala torus satia mangulahonsa. Maniru Tuhanta Jesus Kristus na gabe
siula haluaon na manongtong tu manisia. Marhite panaritaanNa i naung manggarar
lunas arga ni dosa nang sitaononta, jala mandapot habadiaon nang las ni roha na
gok di ruasNa. Taringot tu haluaon i naung binaritahonNa i di Bibelta i.
Ditongos do tu hita TondiNa i laho margogoihon hita manjalo haluaon i, Ndang sae
holan na mamboto na niajarhon ni Kristus i, manang manghatindanghonsa marhaporseaon
tu Ibana, alai dohot do na mameop Hatana dohot na satia tu Ibana. Holan angka
na burju roha jala satia tu Ibana, manuhuk silang jala mansoadahon diri,
mangihuthon Ibana jala mangulahon lomo ni rohaNa.
3) Jesus Kristus siboan haluaon salelengni lelengna; (ay.9), dung sun Ibana
paujunghon ulaonNa hombar tu na dihalomohon ni Debata, hehe ma ibana jala
manaek tu surgo marhite hasangapon nang hasongkalonNa. Disi ma di surgo i Ibana
na gabe siboan haluaon na saleleng ni lelengna. Ala Ibana do Mesias jala Sipalua
jolma na mardosa na porsea tu Ibana. Ibana do na gabe bona jala mual ni haluaon
tu saluhut jolma na mardosa na porsea di Ibana. Asa tudos ma songon na nidok di
Ulaon ni Apostel 4: 12 Asa ndang adong
haluaon di bagasan manang ise na asing; ai ndang adong goar na asing ditoru ni
langit dilehon tu jolma, parhiteanta tu haluaon. Siala nda adong jolma na
mampu manean goar nang jabatan na badia i di portibi on, ia so holan di Jesus Kristus i sandiri.
Jala dipaboa di Lukas 1: 69-70 “Dipatindang do di hita tanduk
haluaon, di bagas ni si Daud naposona i, hombar tu na hinatahonna marhite sian
soara ni angka panurirangna na badia i sian na robi”.
4) Dijou Debata gabe Malim Bolon;
(Ay.10), dibaritahon do ia Melkisedek ima sahalak raja hasintongan amanang raja
ni hatigoran sian huta Salem manang Jerusalem. Ibana ma malim ni Debata na
songkal. Ibana ma malim ni Debata na mamasumasu si Abraham. Ibana ma Malim
Bolon na saleleng ni lelengna (ptds. 1 Musa 14:18-20). Di Padan na Imbaru gelar
Raja Jerusalem na di goari Melkisedek, gabe dipasolhot tu Jesus Kristus,
Tuhanta i. Siala Ibana gabe Malim Bolon na manongtong, Malim Bolon na umbalga
sian si Aron dohot saluhut malim bolon na adong di portibi on. Ibana ma Malim Bolon
na pinilit ni Debata, najinouNa, jala dipahothon Ibana sian mulana i. Heber 6:
20 Tusi do bongot Patujolonta, i ma
Jesus, naung gabe sintua ni malim salelenglelengna, mangihuthon horong ni si
Melkisedek.
C. Sipahusorhusoron
1) Na porsea do hita, na dijou do
Jesus Kristus i gabe Malim Bolon marhite Debata Ama i, sian mulana. Asa satia
ma hita mandok mauliate, memujimuji Ibana, martangiang, mandok mauliate,
manomba jala manghobasi Ibana sian nasa roha ateate nong gogonta.
2) Marlas ni roha ma hita angka na
porsea di Ibana, Debata Ama na marhabangso di Banuaginjang, naung paluahon jala
pahehehon Ibana Jesus Kristus AnakNa na sasada i sian hamateanna manongtong
laho manobus jala paluahon hita saluhut jolma pardosa asa porsea di Ibana.
3) Marlas ni roha ma hita angka na
porsea, naung nangkok do Jesus i tu Surgo laho paradehon inganan tu hita na
gabe sintuhu haluaon na manongtong tu saluhut jolma na porsea jala na mangoloi
di Ibana. Amen.
