Jamita Evangelium Minggu Palmarum (Maremare) 2 April 2023

Pinuji Ma Na Ro Di Bagasan Tuhan i

Diberkatilah Yang Datang Dalam Nama Tuhan

 Markus 11: 1 - 11

 

A. Patujolo

Hita na hinaholongan mansai jotjot do tabereng angka barang na asli ala ni bagakna jala jagona, gabe arga nilai ni barang i. Ala ni timbo ni arga ni barang na asli i, godang do na mambahen tiruan, dipasuman suman manang barang palsu, imitasi, manang di dok kw1, kw 2, kw 3 dohot satorusna alai mansai mura sega, ala goarna pe barang palsu manang kw ndang asli. Suang songon i do holong i, ingkon asli do haholongan i asa dihalomohon halak hita, alai molo holan hata do cinta manang holong i, margabus do hita disi, jala boi do gabe tadinghonon sada ina keluarga nang amantana i ala cinta palsu. Olo do gabe dipasirang ama i inana ala ndang satia holongna.

Alai dihita na hinaholongan holan cinta manang holong ni Tuhan i do na so palsu manang benar-benar tulen manang asli. Padan ni Tuhan i laho paluhon hita jolma pardosa on digohi do dibagasan diri ni Tuhan Jesus na manarita jala mangae na porsuk pola sahat tu na agoan hosa, mate di hau pinarsilang i laho holan tu hasonangan nang haluaonta. Ndang na janji palsu manang harapan palsu napinasahatNa tu hita. Mansai balga do holangNa i tu hita jolma (Ptds.Joh.3:16).

 

B. Hatorangan

1)      Dibagasan turpuk on ditomutomu natorop i do Jesus, dipambuat nasida ama angka ranting nang bulung ni hau palma, laos ditomtomu ma Jesus huhut marsoara na gogo: Hosianna! Pinuji ma na ro marhitehite Goar ni Tuhan i (Mrk.11:9). Hata “Hosianna” di hata Heber na marlapatan “lehon dihami haluaon”. Mansai arop do roha ni halak Jahudi hatiha i di hagogoon nang kemampuan adikodrati ni Guru na sian Nasaret i laho mangalehon haluaon. Ra nunga disaksihon nasida nniula ni Tuhan Jesus angka ragam halongangan asa gabe takjub jala dihirim rohana Jesus i mampu patupahon haluaon sian bangso Rom na menjajah bangso Israel hatiha i. Haluaon sian Kamus Besar Bahasa Indonesia na mararti: (keadaan) selamat; kesejahteraan; kebahagiaan. Selamat, slamet, salam, semua berakar dari Syalom. Jala ido na ditawarhon Jesus uju laho mamongoti huta Jerusalem Ibana ima haluaon. Sanggup doIbana mangalehon haluaon i ala Ibana do mual ni haluaon i sandiri. Jesus do Sipalua i, na masa do haluaon i uju na gabe pangoloi Jesus sahat tu agoan hosa di hau pinarsilang i.

2)      Na ro do Jesus Kristus i mamongoti huta Jerusalem marhite na manangkohi halode boban, bohiNa i sai toltol do tu silang i. Jala mansai tandi do sian na niarop haportibi on on songon sahalak raja na ingkon ma nian manangkohi sada hoda songon lambang pemimpin manang raja. Hape na ro do Jesus na nidok gabe pemimpin manang raja (politis di roha ni situan natorop i) holan manangkohi halode sambing. Dihatiha i di tano Filistin, halode ndang pola targoar binatang na lea, alai tongam do idaon jala sangap. Asa molo laho sahalak raja marporang manangkohi sada hoda do. Alai molo naeng mardame do raja i, nangkohanna ma sada halode. Jadi dison tabereng Jesus mamasuhi huta Jerusalem ndada nanaeng marporang, mambahen pangaloan secara politis, alai naeng pasahathon diriNa. Haroroan ni Jesus ndada laho marporang, alai laho mamboan hadameon. Ndang marhite bohi na togang, na  mardongan muruk, nanang marhite bohi na naeng mamolgak na uasan di mudar, alai marhite bohi na lambok na pinatuduNa marhite pangoloionNa laho mamelehon diriNa, HosaNa. Na ro do Jesus marhite dame asa holan tu hadameon. Jala halode i ma songon simbol ni hadameon.

3)      Nang pe berengon halode i ndang songon  hasangapon ni hoda, lambat do jala songon na oto idaon alai mansai arga do i di Guru na siN Nasaret i. Asa tu angka siseanNa i pe ditonahon laho mambuat halode i. Didok Jesus do: “Na ringkot do i di Tuhan i” (ay.3). Ringkot do i di Tuhan i, Jesus ima Debata na gabe jolma ndang pola bangkol rohaNa na mangokui na ringkot di Ibana pangurupion ni halode i. Mansai ringkot do di roha ni Tuhan i asa halode i pasidohot  laho manggohi misi ni Tuhan i ima gabe sipardame ni Debata dohot jolma. Molo tapingkiri gabe dohot do halode i dongan saulaon ni Jesus dalam rangka pasauthon misi ni Jesus; ima na gabe Sipalua portibi on. Halode na poso i gabe dongan saulaon ni Jesus jala gabe simbol ni hadameon.

 

 

 

 

C. Refleksi

 

1)      Asa uju tamasuhi ma minggu Palmarum on naeng ma tangkas  di haporseonta manghatindanghon hasangapon, haholongon nang hagogooNa:

                                i.            Molo ro hita mamuji pasangap Debata, naeng ma pamujionta i sian haporseaon, ndang holan lipservice, ndang holan hata.

                              ii.            Molo tadok porsea hita tu Debata Ama, Anak dohot Tondi Parbadia unang ma gabe mimbar rohanta uju roha ujian.

                            iii.            Molo tajaha Hata ni Debata dohot tatangihon jamita unang ma asl dipaundukhon so mardongan parulaon nang tanggungjawab ni haporseaonta i.

2)      Unang “taparsilanghon” muse Tuhan i ala ni dosanta i na sai mulamulak ro mangarajai roha nang pikiranta. Halak na porsea naeng ma satia, manuhuk silang mamorsan ninadokdokna mardongan Tuhan i. Mansaoadahon diri huhut manuhuk silang ndang holan di  slogan, di hata, diparbinegean alai sai naeng ma ingot jal diulahon marhite hasatiaon. Hsatiaonta sahat tu na tos hosanta (Pangk.2:10c “.....Sai burju ma ho rasirasa mate; dung i lehononku ma tu ho tumpal hangoluan i!”)

3)      Unang ma adong na merasa dirina ndang marguna, biasa biasa, sederhana, ndang pola adong siparbagahon. Ingot ma halode na sederhana i, dipangke do di misi besar ni Debata. Nang hita pe dipangke Tuhan i do laho tu misi ni Debata. Sai olo ma hita dibagasan unduk dohot serep ni roha laho pangkeonaNa gabe ulaulaNa tu misi nang sangkap ni Debata.

4)      Tatiru ma Tuhanta Jesus na ro marhite goar ni Ama i, na ro ma hita marhite goar ni Jesus Sipalua i di na laho mangadopi angka na bernit, hamaolon, na dokdok nang sitaononta. Unang ma gok biar dohot angka dokdok alai marhite Jesus adong kesabaran, ketenangan, hadameon mangadopi segala hal, segala situasi dan kondisi. Sai taulahon ma ulaonta marhite serep ni roha, melayani dohot serep ni roha ndang marhite ginjang ni roha, tatiru  Tuhanta Jesus i na serep marroha ima demontrasi hamba yang melayani ima hamesiasonNa.

5)      Taolopolophon ma goar ni Jesus, tadok ma Hosiana (palua ma hami) marhite pembaharuan diri. Unang arop halak na asing pauba roham nang parangem, mulailah dari diri sendiri. Menyambut Sang Raja, Mesias yakni Yesus haruslah disertai dengan perubahan totalitas diri, pertobatan sejati yang mau hidup kudus dan suci asa tama Tuhan Debata mian di rohanta nang dingolum asa tudos songon na nidok di I Korint 6:19 Ndang diboto hamu: Dagingmuna do joro ni Tondi Parbadia, na di bagasan hamu, naung jinalomuna sian Debata; ndada hamu nampuna dirimuna.

5)Ala ni i ro ma hita tu angka na di paporsuk portibi on, na terjajah secara jas mani dan rohani. Melepaskan belenggu belenggu, angka na tarjorat di pangalaho haholomon. Torop do halak na joujou manghasiholi haluaon, jala laos disi ma hita hadir mamboan haluaon, hadameon marhite Jesus Kristus i. Amen.

PARTORDING NI PARMINGGUON PARNINGOTAN DI HAHEHEON NI TUHAN JESUS KRISTUS (PASKAH II) HKBP CINERE RESORT CINERE- DISTRIK XXVIII DEBOSKAB Senen, 10 April 2023 – Pkl.19.00 wib

& Ev: Ulaon ni Apostel 3 : 24 - 26                           & Ep: Job 19 : 25 - 27   TOPIK : DEBATA PAHEHEHON NAPOSONA

------Tingki Nahohom----                                                                                                                 

 

1.         Marende BE. No. 95 : 1 + 4  “HALELUYA TAENDEHON” BL. 222

^♫♪♫  Haleluya taendehon nuaeng di ari haheheon Tuhanta Siparmonang i.

Ai malua do Ibana haruar sian tanomanNa na talu hamatean i.

Sun ulaonNa i dibaen Tuhanta, i Haleluya,

naung sahat di Tuhanta i upaNa na sumurung i.

                                       ------Jongjong----

^♫♪♫  Ale ari haheheon, boha ulaning hilalaon

ni rohangkon di tingkiMi.

Ndang hapalang las ni roha di hasosohot ni na roa,

ro di sude na hansit i.

O Jesus togu ma bangsoM tu Debata, tu na sonang,

O Rajangki naung hehe i pasahat au tu lambungMi.

 

2.      Votum – Introitus – Tangiang: (L:Liturgis ; R: Ruas)

L    :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Tung na arga situtu do asi ni rohaM, ale Debata! Jadi marhaporusan tu linggoman ni habongMu do angka anak ni jolma. Ai dilambungMi do mual hangoluan, di bagasan hatiuronMi huida hami hatiuron. Haleluya!

R   :  (Mangendehon): Haleluya, Haleluya, Haleluya.

L    :  Martangiang ma hita. Ale Tuhan Debata, Parasiroha na sumurung! Didok HataM do, ingkon manaon hami jala mate rap dohot Tuhan Jesus Kristus, asa rap hami dohot Ibana tu hasangapon. Sai parrohai ma hami, asa unduk hami tu lomo ni rohaM jala hot hami di haporseaon na ture asa tongtong manghirim di haheheon dohot di hasangapon sogot silehononMu tu angka na porsea di Ho. Amen.  ( Hundul )

 

3.      Marende BE.No.20 : 2 + 5  “O JESUS TUHANNAMI” BL. 6

^♫♪♫  Naeng ihuthononnami na pinatikhonM,i

Naeng pasidingonnami sogo ni rohaMi.

 

^♫♪♫   On pe O Tuhannami, tumpahi hataMi,

Masuk tu rohanami, paian ma disi.

 

4.      P a t i k :

L    : Tatangihon ma Patik ni Debata di Minggu Paskah II i ma Mateus 28 : 19 “Laho ma hamu, podai hamu ma saluhut bangso, didi hamu ma nasida tu bagasan Goar ni Ama, Anak dohot Tondi Parbadia!”. Ido sahatna.

          Antong, rap mangido gogo ma hita sian Tuhan Debata!

L+R     : Ale Tuhan Debata sai pargogoi ma hami mangulahon na hombar tu PatikMi. Amen.

5.      Marende BE.No.94 : 2  “ALE TONDINGKU NAUNG HEHE” BL. 44  ---Jongjong----

^♫♪♫  Talu sibolis dibahen Tuhanta, nang hamatean, nang dosa sudena.

Sai dihalashon rohanta ma i, pangoluonNa do hita sude,

pangoluonNa do hita sude.

 

6.      Manopoti Dosa:

L    :  Tatopoti ma dosanta martangiang ma hita! Ale Tuhan Debata, na badia jala na bonar. Parasi jala Partalup ni roha jala na basar do Ho! Sai marpangulahi ma rohaM mida hami. Dibahen i sai sesa ma sude dosanami! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami angka na hinophop ni Tuhan Jesus Kristus, Tuhannami. Amen.

             -----Mangkuling musik angonangon BE.No.464: 1------

Bagabaga ni Debata taringot tu hasesaan ni dosa! Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa ditangianghonnasida.

Hasangapon ma di Debata na di ginjang!

      L+R :  Amen

7.      Marende BE.No. 89 : 4 “ATE DI DIA SOROPMI” BL. 130

^♫♪♫   Mangolu do Tuhanta i na hehe do Ibana,

Ditaiti do ruasNa i mangihut tu Ibana.

Ndang tinggal di tanoman i saluhut na porsea i, di hata ni Tuhanta.

 

8.      E p i s t e l:

L    : Turpuk Epistel di Minggu Paskah paduahon sadarion i ma Job 19 : 25 – 27 “Ai tangkas do huboto mangolu do Sipangolu ahu, jala Ibana parpudi jongjong di atas orbuk”.

R   :  Jala ia dung malangke hulinghulinghon, jala malua ahu sian sibukhon, idaonhu ma Debata.

L    :  Ahu sandiri ma tutu marnida Ibana gabe hatuaonhu, apala matangkon marnida Ibana, jala ndada anggo sileban; pola tung suda piangku dibahen sihol ni rohangku di bagasan.

          I do sahatna. Martua do angka na tumangihon Hata ni Debata jala na umpeopsa.

 L + R     : Amen.

 

9.     K O O R :

a)      Sektor 1 – Efesus

b)      Sektor 2 – Kolose

c)       Sektor 3 – Galatia

d)      Sektor 4 - Korintus

 

10. Marende BE.No.635 : 1  “RO MA TUHAN JESUS” BL. 635 -–Jongjong---

^♫♪♫   Ro Tuhan Jesus Anak sasada, parasi roha, parholong i.

          Mate Ibana humophop hita, rumar tanoman i ai hehe Jesus i.

          Ala hehe Jesus ro do ari sogot, mangolu au, ndang mabiar au.

         Huboto do sonang au raphon Jesus, sonang ma au ala naung hehe Jesus i.

 

11.   Manghatindanghon Haporseaon:

L    :  Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok!

R   :  Ahu porsea di Debata Jahowa… d.u.    (Hundul)

 

12.   K O O R :

a)      Sektor 5 – Tesalonika

b)      Sektor 6 – Pilipi

c)       Sektor 7 - Yudea

13.   TINGTING:

 

14.   K O O R:

a)      RNHKBP

b)      Parompuan

c)       Ama

d)      Lansia

e)      Gabungan

15.  Marende BE.No. 93 : 1 -2  “PESTA PASKAH HATUAON” BL. 94  

     ^♫♪♫        Pesta Paska hatuaon, Pesta Paska haluaon,

sian hamatean i, sian hamatean i.

Tuhan Jesus do pasuang, hangoluan,

hasonangan tu saluhut jolma i.

 

 ^♫♪♫ Talu ho banua toru, ndang tarbahen

tiopanmu Raja Siparngolu i, Raja Siparngolu i.

Hamatean, hamagoan, na so pola habiaran, nunga talu i sude             

                                   

16.   J a m i t a: ULAON NI APOSTEL 3 : 24 – 26   

            

17.   Marende BE. No. 634 : 1.... “NUNGA HEHE TUHAN I” BL. 634  

                   =====Pelean Ia, Ib +  II Caritas Emergency HKBP=====

^♫♪♫  Nunga hehe Jesus i disungguli Debata, talu hamatean.

Hehe do, hehe do Kristus na tarsilang, Kristus na binunu.

Gogo ni Debata manungguli, paheheon Kristus i.

 

^♫♪♫  Holan Ama Debata na pahehe Jesus i, talu hamatean.

Muba ma arsak i dohot sitaoanon gabe las ni roha.

Gogo ni Debata manungguli, paheheon Kristus i

---Musik---

^♫♪♫  Puji ma Jahowa i ai dirade na hot i, surgo i na sonang.

Mate pe daging i ndang be ganggu hita, hehe do luhut na.

Gogo ni Debata manungguli, paheheon Kristus i.

 

18.   Tangiang Pelean – Tangiang Ale Amanami - Tangiang Pasupasu:   (Jongjong)

PARTORDING NI PARMINGGUON PARNINGOTAN DI HAHEHEON NI TUHAN JESUS KRISTUS (PASKAH I) & PARHEHEON PAROMPUAN HKBP CINERE RESORT CINERE- DISTRIK XXVIII DEBOSKAB Minggu, 9 April 2023 – Pkl.10.00 wib

& Ev: Kolosse 3 : 1 - 4                                    & Ep: Psalmen 118 : 14 - 21   TOPIK : RAPHON JESUS DIPAHEHE

                                                                                                                 

 

 

 

1.    JOUJOU PARSOMBAON TU DEBATA : (L:Liturgis; R:Ruas)

 L    :         Hamu dongan sahuria, na marlas ni roha do hita sadari on, ala nunga monang Tuhan Jesus maralohon huaso ni hamatean i. Hamonangan ni Jesus gabe hamonangan nang di hita, ima na tapestahon di ari Minggu sadari on. Alani i hupasahat hami ma tu hamu: SELAMAT PASKAH ma di hita sude.

R  :  "Selamat Paska ma tutu"   

L : Raphon Tuhan Jesus do hita dipahehe, i ma topik ni Minggu sadari on di hita. Di Pesta Paskah na gok las ni roha on, ditotophon HKBP do gabe Pesta Parheheon ni Kategorial Parompuan HKBP.

Ina : Las ma rohanta, hita angka parompuan ni HKBP ala dipapatar Jesus tu hita haheonNa i.

L  : Di bagasan las ni roha, tapangiar ma soaranta mangendehon naung hehe Jesus sian hamatean mangungkap dalan di angka na porsea tu hangoluan salelenglelengna. Tapangiar ma soaranta mamuji Debata marhite na marende sian BE. No. 96 : 1-3.

 

2.    Marende BE.No. 96 : 1 - 3  “Nunga talu hamatean”   BL.101

      ♫♪♫ Nunga talu hamatean, dibaen Tuhan Jesus i;

Ai na hehe do Ibana, songon na nidokNa i.

Haleluya, haleluya! Nunga hehe Jesus i.

Haleluya, haleluya! Nunga hehe Jesus i.

 

       ♫♪♫ Ia angka boruboru, lao do tu tanoman i;

Ndang disi be Tuhan Jesus, nunga hehe sian i.

Haleluya, haleluya! Nunga hehe Jesus i.

Haleluya, haleluya! Nunga hehe Jesus i.

                         …… (Musik - Jongjong) ……

       ♫♪♫ Marlasroha be ma hita ala hehe Jesus i;

Ai malua sude hita sian hamagoan i.

Haleluya, haleluya! Nunga hehe Jesus i.

Haleluya, haleluya! Nunga hehe Jesus i.

 

3. VOTUM – INTROITUS – TANGIANG :   

L     :   Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Nunga hehe Tuhan i, nunga tutu hehe Ibana. Ari on do na jinadihon ni Jahowa, marolopolop jala marlas ni roha ma hita disi. Batu naung binolongkon ni angka pande bagas, i ma gabe batu parsuhi. Pinamasa ni Jahowa do i, halongangan do i anggo di matanta. Haleluya!

R    :    (Mangendehon): Haleluya, Haleluya, Haleluya.

L     :    Martangiang ma hita! Ale Tuhan Jesus, Tuhannami! Na mandok mauliate do hami tu Ho, ala ditaluhon Ho do dosa dohot hamatean marhitehite hamamateMi, ala disondangi Ho tanomannami, asa marpanghirimon na mangolu hami ala ni haheheonMi. Ndang pola be mabiar hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho dibagasan haporseaon na mangolu, paima sahat hami tu lambungMu. Amen.                                                                                             ( Hundul )

 

4. Marende BE.No. 89 : 1     “Ate di dia soropmi”    BL 130

       ♫♪♫ Ate di dia soropmi nuaeng, o hamatean?

Di dia hamonanganmi nuaeng, banua toru?

Na talu do hamu sude, na talu do sibolis pe,

Ai ditaluhon Jesus.

      

5.P A T I K :

L     :    Tangihon hamu ma Patik ni Debata na tarsurat di Rom. 10 : 9. “Ai malua ma ho, molo diparhatopot pamanganmi Tuhan Jesus i, huhut dihaporseai roham, naung dipahehe Debata Ibana sian angka na mate”. I ma sahatna. Antong, rap mangido gogo ma hita sian Debata!.

R    :    Ale Tuhan Debata sai pargogoi ma hami mangulahon na hombar tu patikMi. Amen.

 

6. Marende BE.No.624: 1 -2   Haleluya, Haleluya

♫      Haleluya, Haleluya nunga hehe Tuhanta i/Haleluya, haleluya puji goarNa i.

Jesus sigomgom tano on. Tuhan ni sandok portibi on.

                                           ----jongjong----

♫    Boan barita na uli tu saluhut na tinompa i.

 Haleluya, Haleluya nunga hehe Tuhanta i/Haleluya, haleluya puji goarNa i.

 

7. TANGIANG MANOPOTI DOSA:  

L     :    Hamu angka dongan na hinaholongan ni Tuhan Jesus Kristus. Sian bortian ni dainang nunga mardosa hita jala sahat tu nuaeng pe jotjot do taarsahi Debata marhite hata, pambahenan dohot pingkiranta na maralo tu lomo ni roha ni Debata. Alanii, tapaunduk ma rohanta marsinggang tu adopan ni Debata laho manopoti dosanta na godang i, martangiang ma hita: Ale Tuhan Debata, Amanami Parasiroha na sumurung jala pardengganbasa. Na ro do hami nuaeng tu joloM mangarsakhon dosa dohot pangalaosionnami. Jotjot do hulaosi hami patikMu na mambahen jut rohaM marnida hami jala ndang huhaholongi hami Ho sian nasa rohanami dohot sian nasa gogonami dohot sian nasa ateatenami dohot sian nasa pingkirannami.

R     :    Ale Tuhan. Dihirim Ho do sian hami asa manghaholongi dongannami doshon dirinami. Hape, ndang huhaholongi hami dongannami doshon dirinami, baliksa tahe jotjot do hubahen hami sogo ni roha ni dongannami marhite hata dohot pambahenannami.

L     :  Ale Tuhan Jahowa, di na hubolus hami ariari ni ngolunami di portibion, huadopi hami angka hamaolon dohot parungkilon. Jotjot do hami ndang marhaposan tu Ho, holan gogo dohot pingkirannami do na hupangasahon hami. Gabe jotjot ma hami madabu tu pandelean, ngolu na bobonosan, ngolu na tahutan ala so Ho hubahen hami haporusan dohot partanobatoan ni ngolunami.

Ina   :   Ale Tuhan Jahowa, diigil Ho do sian hami asa gabe ina na pantas marroha. Hape di parngoluonnami siganup ari ndang marsitutu hami manghangoluhon i. Jotjot do hami lemba mangajarhon hataM di tongatonga ni keluarganami.

L     :   Ale Tuhan. Disuru Ho do hami patundukhon dohot mangajari angka na tinompaMi. Hape ndang huulahon hami parsuruonMi hombar tu lomo ni rohaM alai hombar tu lomo ni rohanami do laho pasombuhon hagiot ni dagingnami. Ndang hujaga jala huramoti hami angka na tinompaMi baliksa tahe husegai hami do hinauli ni natinompMi. Ale Tuhan, lehon ma tu hami tondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibion, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami. Amen.                 

                                 -----Mangkuling musik angonangon BE.No.683 : 2-------

L     :   Tabege ma hata bagabaga ni Debata taringot tu hasesaan ni angka dosanta: Parasi roha jala pardengganbasa do Jahowa, lambat tarrimas jala parasi roha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Ai songon dao ni langit sian tano on do gogo ni asi ni rohana di angka na mangkabiari Ibana. Songon dao ni habinsaran sian hasundutan dipadao Ibana sian hita angka pangalaosiontai. Songon asi ni amaama tu angka anakna asi ni roha ni Jahowa di angka na manghabiari Ibana. Hasangapon ma di Debata na di ginjang, Amen.

 

 

8.Marende BE.No. 94: 1    ALE TONDINGKU NAUNG HEHE    BL. 44

♫    Ale tondingku naung hehe Tuhanmu Nunga ditaban do banuatoru

Las ma roham ai martua ma ho Rap dohot Jesus mangolu ma ho

Rap dohot Jesus mangolu ma ho.

 

9. E P I S T E L:

           L : Turpuk Epistel di Minggunta sadari on, tarsurat di Psalmen 118 : 14 – 21. Jahowa do pargogongku dohot endengku, jadi gabe hatuaonhu Ibana.

           R:  Soara ni olopolop dohot hatuaon marsaringar di undungundung ni angka partigor: “Siamun ni Jahowa do sibahen hamonangan.

           L:   Timbul situtu do siamun ni Jahowa, siamun ni Jahowa do sibahen hamonangan.”

           R:  Ndang tagamon mate ahu, sai na mangolu do ahu, asa hupajojor angka pambahen ni Jahowa.

           L:   Nunga gogo tutu dipinsang Jahowa ahu, alai nda tung tu hamatean ahu dipasahat.

           R:  Ungkap hamu ma di ahu angka bahal ni hatigoran, asa hubongoti angka i laho mamuji Jahowa.

           L:   On do bahal ni Jahowa, bongotan ni angka partigor do i sogot.

           R:  Mandok mauliate ma ahu di Ho, ala naung dialusi Ho ahu, jala manjadi hatuaonhu.

           L:   I do sahatna. Martua ma angka na tumangihon Hata ni Debata jala na umpeopsa. Amen.

 

 10. Marende BE. No. 633 : 1 + 5  “Nunga hehe Kristus i”  BL 633

           ♫♪♫  Nunga hehe Kristus i, Haleluya, sian hamatean i, Haleluya

   Parlangitan jouhon ma, Haleluya, tano on, alusi ma Haleluya.

                      (Jongjong)

           ♫♪♫ Sangap ma di Tuhan i, Haleluya, puji ma GoarNa i, Haleluya.

Baen hamonanganNa i, Haleluya, manondangi ngolumi, Haleluya.

 

11.MANGHATINDANGHON HAPORSEAON:

           L:   Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok!

           R:  Ahu Porsea di Debata Jahowa….. d.u. (Hundul….)

12. K O O R :

a)   RNHKBP

b)   Ama

 

13.  TINGTING

 

14.  K O O R : Parompuan

 

15. Marende BE. No. 627: 1-2 ”Jesus naung hehe” BL 627          

            ♫♪♫ Jesus naung hehe Haleluya puji endehon Haleluya,

Hamonangan ni Tuhanta i na manaluhon sibolis i.

            Reff : Las ma roham puji ma Tuhan i, ala naung talu hamatean i.

                     Sesa dosanta Haleluya mangolu Jesus Haleluya.

 

             ♫♪♫   Di ari na patoluhon i, maloha do tanomanNa i.

  Jesus Raja hangoluan i, na patundukhon sibolis i.

              Reff : Las ma roham ……

 

 

14. J A M I T A:  Kolosse 3 : 1 – 4

 

15. Marende BE.No. 635 : 1…“Ro Tuhan Jesus” BL 635

 

        (Pelean Ia, Ib +  II Pelean Tu Ulaon Kategorial Parompuan HKBP)

     

       ♫♪♫ Ro Tuhan Jesus Anak sasada, Parasi roha, Parholong i.

Mate Ibana humophop hita, rumar tanoman i, ai hehe Jesus i.

Ala hehe Jesus ro do ari sogot mangolu au, ndang mabiar au. Huboto do sonang au raphon Jesus. Sonang ma au ala naung hehe Jesus i.

 

        ♫♪♫  Di paraloan, au dongananNa, pos do rohangku di ngolungki.

PamonangonNa au anakhonNa, ala naung monang jala hehe Tuhanki.

Ala hehe Jesus ……

                             ----- Musik -----

           ♫♪♫ Molo marujung muse ngolungku, mansohot do nang sitaononki.

  Ai nunga talu banua toru, di tomu Jesus au na tinobusNa i.

  Ala hehe Jesus ……

 

16. PARSURUON:           ( Jongjong )

L  :  Nunga hehe Tuhan i, jala naung rap hamu dipahehe dohot Kristus, jalahi hamu ma angka na di ginjang.

R  : Ingkon hehe ma hami jala hobas ma hami tu ulaon na denggan, jala hatindanghononnami ma haheheonNa i tu angka dongan na humaliang hami.

L  :  Nunga hehe Tuhan Jesus sian na mate, ala ni borhat ma hita manopot angka ulaontabe dibagasan las ni roha.

 

 

17. Tangiang Pelean: