Jamita PASKAH II (Parningotan Ari Haheheon Ni Tuhan Jesus), 18 April 2022

“DEBATA PALUAHON BANGSONA”

 

& Ev. 2 Musa 14: 26 – 31                          & Ep.Roma 6: 3-11                                                                  

 

 

1. Ia turpukta on ima na masa halongangan di Laut Teberau na bola dua bagian. Dipaboa do naposo ni Debata si Musa songon uluan na hindat tungkotna tu atas ni laut, asa gabe mabaor ma aek laut i marhite alogo pur sian purba pahiang laut i gabe tolak ma angka aek i asa boi ma mardalan bangso Israel mamolus tano aek laut Teberau na mahiang i tu saborang gabe malua ma nasida sian soldadu ni halak Misir. Pambahenan ni si Musa dibagasan turpuk on patuduhon Debata na mamillit dohot manotophon jala mangalehon huaso tu angka ganup jolma na mangoloi dohot satia tu panjouonNa. Halongangan i ndada sada kejadian na holan na sian alam alai gabe dalan ni Debata tu bangso Israel asa sadar jala porsea nasida songon bangso na pinillit ni Debata jala ingkon mangihuthon panjouon ni Debata asa marhuaso panjouon i.
2. Diantusi Bangso Israel do na masa di Laut Teberau i sian pangantusion hagogon ni Debata, ala Dipatuduhon Debata do diriNa sian dua cara: ima marhite api na marsijongjong dohot ombun na marsijongjong. Ndang na manghohom Debata uju dibagasan hamaolon bangsoNa i. Dipalua do bangsoa i sian angka parmaraan dohot angka na so tinagam roha hian, sian na so tarpatupa gabe tarpatupa Debata. Astuanna asa diboto bangso Misir ia Debata ni Israel ima Tuhan na mangula dibagasan halongangan mangadopi Misir. Debata na mandopang soldadu ni Misir i asa gabe humasusa nasida jala bangsp Israel marhasil mamolus Laut Teberau i. Laos aek Teberau i do na malononghon soldadu Msiri i. Pambahenan ni Debata i patuduhon bukti ni huasoNa mangadopi angka musuNa jala bukti ni holongNa tu bangso nahinaholonganNa. Ala ni i songon bangso ni Debata, na marguru do hita  sian bangso Israel i na malua ala ni huaso ni Debata sambing. Na mangula do Debata di angka jolma na marsitutu mangulahon Hata nang patikNa. Diajari Debata do hita bangsoNa asa mangantusi dohot sintong huasoNa i na paluahon, asa gabe halongangan doi di pardalanan ni ngolunta, diparumatanggaon, di parkarejoan. Alai di angka na so unduk roha, na sai jogal rohana sai mangalo sai na pasudahon ni Debata do nasida jala disiaphon songon bangso Misir i. Siala ni i ma dipangido Debata hasatiaon laho mangulahon patikNa i sian bangsoNa asa patar huasoNa i di parngoluon ni bangsoNa.
3. Adong ma piga piga hal na boi putihonta songon sipahusorhusoronta:

1. Ia halongangan i na marproses do i. Uju disuru Debata tu si Musa laho manghindat tanganna, nda na satongkin dihindat alai parsadarian asa marhusor alogo i pabaorhon aek laut i. Dunkon tolak aek na i jala mahiang tano i gabe boi boluson ni bangso i. Lapatanna sude do marproses angka halongangan na binahen ni Debata. Molo tadok boha Debata mambahen halongangan asa dipalua hita sian covid-19 on ? tontu proses do i tabereng hurang lobi dua taon portibi on manaon pangontak ni virus i,alai nuaeng lam moru do dampakna. Namangula do Debata di portibi on laho pataluhon virus corona marhite angka ahli medis, para medis, pengusaha, pamarenta, petinggi negara, nang hita asa boi hita mandapot vaksin, kekebalan tubuh, manjaga higienitas, haiason, dohot mamparrohahon dirinta asa unang tertular virus i. Ala nii pasidohot ma hita di na patupa halongangan na sian Debata na gabe pangoloi di hata nang patik ni Debata asa marhasil songon si Musa i.
2. Debat na sai maringan ditongatonganta. Debata ima Immanuel sai adong do di hita, nang pe bangso Israel jotjot manghalupahon hajongjongan ni Debata dohot huasona i; ima marhite api na marsijongjong dohot ombun na marsijongjong mangalinggomi dohot na mandongani nasida as unang mabiar. Laos songon i do nang tu hita uju ro angka parungkilon nang mara di hita uang ma gabe bobonosan jala sai dibagasan biar hita. Sai na rade do Tuhan Debata ditongatonganta, jonok do Ibana di angka na manjoujou goarNa, Ibana na mangaramoti hita asal ma porsea hita jala marpos ni roha di hagogoonNa i.
3. Sai olo mahita marguru sian na masa tu bangso Israel. Jala marhite turpuk on diajari dohita asa tubu haporseaon na lam togu mamolus aek na boi mangalononghon i, alai molo Debata na marhuaso di hita tung boi do bolusonta aek i soada mara. Lpatanna unang ma marpangusandean hita tu pingkiran, rohanta nang gogonta sandiri, tapasahat ma luhutna i tu adopan ni Debata.
4. Naung dipalua Debata do hita sian mara bolon di hita jolma ima sian hamatean na saleleng ni lelengna i. Marhite Paskah na tapestahon paduahalihon on paboahon HAHEHEON NI JESUS manaluhon hamatean, dosa nang sibolis i asa sude hatahutonta i nunga dipatunduk Debata, soada be biar ni rohanta mamolus pardalanan ni ngolunta on nang pe adopanta godang angka hamaolon, angka na bernit nang mara pe holan Jesus do haposan laho manogunogu hita asa lam tau jala burju hita mangulahon Hata nang patikna i. Asa marhite i ma sahat hita tu hangoluan na so ra suda i ima surgo i na pinarade ni Jesus Kristu di hita angka na porsea di Ibana. Marlas ni roha ma hita manjanghon haluaon na pinarade JESUS KRISTUS I. SELAMAT PASKAH II. Amen.