“MARHAPOSAN TU JAHOWA MA
HAMU”
& Ev.Psalm 4: 2 - 9 & Ep.Pangungkapon 5: 11-14
- Huria
ni Tuhanta jotjot do digoari turpuk on “Uju tarlea hasangapon” hombar sian
ayat 3 “...sadia leleng on do lea rohamu di hasahalaonki...” Ndang apala
na mandok sai guluton hasangapon diibana alai sada panindangion na paboahon
parsigulutonna tu dignitas (martabat). Molo hita halak batak tung so boi
do gabe lea ngoluna hombar tu na sai disoarahon : Hamoraon, hagabeon,
hasangapon. Hamoraon yang berarti memiliki kekayaan atau memiliki
banyak harta. Hagabeon yang bisa diartikan memiliki keturunan atau
beranak cucu. Hasangapon yang didefinisikan memiliki kehormatan atau
kemuliaan bisa diartikan juga memiliki status sosial yang tinggi. Disima
dignitas (martabat) ni halak batak, molo so i ndang dipandang manang
dibereng halak ibana. Ia manisia na tinompa ni Debata dao sian angka na
tinompa na asing. Jolma i marmartabat, alai uju ro angka hamolon nang
persoalan disi boi do gabe moru dignitas na. Laos songon i ma parpsalm on
na gabe mago hasangaponna, ala ni fitnah. Jala dipaboa do dison taringot
tu halak na manghanholongi angka na marisuang jala na sai mangalului
gabus; jala dipasahat do i songon gosip tu halak gabe marlea ma goar ni halak
na hona hataan i. On ma sada hamaolon na niadopan ni jolma sinuaeng on;
ima boha do hita mangadopi reherehe. Di adat hasomalan ni halak purba
(timur), mansai dijaga do hahormatan marhite na manjaga dirina, sikapna,
nang pangalahona.
- Huria
ni Tuhanta, hombar tu na tarsurat di Bibelta i dung salpu haheheon ni
Tuhan Jesus sian hamatean, 40 ari sai marulakloni do Jesus patuduhon
diriNa dohot mangajari taringot tu Harajaon ni Debata tu angka siseanNa
(apostel), angka parompuan, jala tu lobi 500 halak (Ul.Ap.1:3b; 1 Kor.15:
5 – 9).
- Hombar
tu kalender ni hurianta adong ma 40 ari minggu paskah laho
mangarimangrimangi haheheonNa i andorang so hananekNa i tu Banuaginjang i. Minggu on
di goari do Minggu Misericordias Domini na marlapatan : “Gok asi ni roha
ni Jahowa do tano on” (Pslm.33:5b). Marhite Jesus Kristus do hagogok asi
ni roha ni Debata Ama i na so tardodo manang ise, ima hasisingkop ni asi
ni rohaNa tu angka jolma na manarita ala ni dosa. Lukas 6:36 Gabe parasiroha ma hamu, songon
Amamuna, Parasiroha i! Ima sosososo ni Tuhan Jesus tu hita asa marasi
ni roha hita tu saluhut jolma.
- Dibagasan
turpuk on patuduhon na nialaman ni parpsalm di haporseaonna na marsihohot
tongtong di parlinggoman nang haholongon ni Tuhan tu angka jolma na
marsitutu manjou dohot martngiang tu Ibana. Parlinggoman nang haholongon
ni Tuhan i dilehon tu angka jolma na: marparsaoran na rosu dohot Debata
Ama (ay.6,9); angka na sai masihol di panogunoguon jala na sai mauas di
Debata Ama i (ay.24,7); jala angka halak
na sai serep rohana (ay.4-6). Ido ala na disok do tong psalmen on
sada ende haporseaon siala na tutu do haposan Debata laho mangurupi jala
marasiniroha laho mangalehon haluaon tu angka jolma na manarita.
- Molo
panaritaan nang hasosahon na mandondoni hita, asa dipaingot do hita nang
pe manghorhon muruk ni roha huhut marungutungut, alai unang ma sahat tu na
gabe mardosa (ay.5). Alai dumenggan ma hita mangalusi dohot haholongon
jala pangurupionNa i manghorhon pelean na sintong. Jala marsihohot ma hita
manghaposi huhaso nang pangurupionNa tu hita (ay.6). Asa sondanghononNa ma
hita dohot bohiNa jala mangalehon hita las ni roha bolon asa sian nasida
na marlobilobi eme dohot anggur (astuanna angka sinamot nang arta portibi
on). Sian sauluhut pambahenan ni Debata na marasi ni roha tu hita, asa
Tuhanta i do na mambhen ngolunta gabe demak, sonang jala sinok hita modom
lobi sian angka arta na marlobilobi di jolma (ay.7-9).
- Hamu
angka na hinaholongan, na mangolu do hita di tonga ni portibi na naung
sega on, na manarita, na tarsosak sian angka ondamondam na asing. Siala ni
i songon parpsalm on na sai mamboan sude pergumulanna dibagasan tangiang
tu adopan ni Tuhan Debata. Adopanta doo angka na masa kenyataan sinuaeng
on na manarita: hapogoson nang na soada be hatigoran; angka pangalaho
radikalisme ni ugamo; dohot krisis ekologi (naung sega angka
lingkunganta).
- Naung
he a do di dok Jesus di Johannes 16: 33 “Asa mardame hamu di bagasan Ahu, umbahen na huhatahon angka i tu
hamu. Haporsuhon do jambarmuna di portibi on; alai pos ma rohamuna: Nunga
talu hubahen portibi on.” Pangurupion ni Tuhan topet do ni tingkiNa. “Ida ma, ndada na hurang ganjang tangan
ni Jahowa laho mangurupi hamu; jala ndada marhapal pinggolna, so marbinege.”
(Jes,59:1) Ala ni i marhaposan tu Jahowa ma hamu.
- Hita
nahinaholongan molo taparrohahon, sai adong dope angka na porsea i na
holan goarna ni ktp halak kristen, alai ndang adong haporseaonna. Boasa ?
siala mansai torop dope na sai mangasahon artana, hepengna, hapistaranna
nang gogona sandiri. Ndada Tuhan i be na rumingkot dibagasan ngoluna.
Didok rohannasida molo nunga godang artana naung boi do nasida manuhor na
dilomo ni rohana. Sintong do i? Ndang na gabe halak na munafik hita alai
kenyataan di hita jolma diharingkothon dope hepeng nang arta i, alai ndang
na gabe arta nang hepeng i na rumingkot laho manelesaihon saluhut parsorionta.
Boi do dohonon haluaon, las ni roha, hadumaon, nang olopolopta,
hahipasonta tuhoron marhite hepeng ? Didok dibagasan Bibelta i: Jeremia 17:5 “Songon on do hata ni Jahowa: Marjea ma baoa na marhaposan tu
jolma, manang tu bolon ni botohonna, gabe dipasurut rohana sian Jahowa”.
Porsea tu Debata na marlapatan saluhut tapasahat dibagasan tangiang nang
pangidoanta tu adopan ni Debata. Ido na niajarhonNa tu hita ; Matius 7: 7 “Pangido hamu ma, sai na lehononna do tu hamu; lului hamu ma, sai
na jumpangan do hamu; tuktuhi hamu ma, sai na ungkaponna do di hamu.”
- Torop
do halak na mulana i marhasil do ulaonna alai dipudian ni ari gabe
harugian na nidapotna, adong muse halak najolo i ibana mansai burju, alai
dung leleng naung moru haburjuonna tu halak. Pangalaho sisongon i boi do
ala naung madabu nasida tuu ginjang ni roha, sai na holan mangasahon gogo
na sambing, ndang pos rohana di panogunoguon ni Tuhan Debata, jala hurang
manghamauliatehon i saluhutna. Gabe torop do holma madabu tu ginjang ni
roha ala ni pangkat, jabatan, halobianna, parbinotoanna, angka alealena nang
sisolhotna gabe andalanna. Sian naung hea masa di pengalaman mambuktihon;
ia angka dongan, aleale pinaribot laos nasida do na mangojabhon ibana jala
manegai ulaonna. Laos ditundali do ibana asa gabe gagal. Parbinotoanta
tarbatasa jala boi sala manghorhon hasesega di ngolunta. Angka jabatan
nang halobionta tarbatas do na boi do i manegai ngolunta. Ido umbahen
diapoi jala dipodai Debata hita marhite naposona si Salomo namandok di Poda 3: 5-6 “Marhaposan
tu Jahowa ma ho sian nasa roham, jala unang marpangunsandean ho tu
pingkiranmu sandiri. Sai Ibana ma tanda di nasa dalanmu, asa Ibana patigor
angka dalanmu.” Songon goar ni Minggunta Misecordias domini na marlapatan Gok asi ni roha ni Jahowa do
tano on, tahaposi ma Tuhan Debata jala unang be ganggu rohanta.
Naung Hehe Jesus i sian hamtaean i mangelhon bukti tu hita jala paposhon
rohanta naung talu hamatean jala dihamonangho hita maralohon sibolis,
hamatean nang sude boban ni ngolunta. Amen.
