1. Tangiang Na
Hohom
2. MARENDE BE.
76: 1 + 3 SADA NAMA SANGKAP BL.199
v
Sada nama sangkap ni rohangku di sandok
portibi on.
Ndang tagamon na so las rohangku, molo
jumpang au inon.
Naeng ma sai ingoton ni rohangku, na binaen
ni Jesus tu tondingku. Uju pinorsanNa
i, saluhutna dosangki.
v
Jesusku sai paingot ahu Di dosangku di basaM
Ai andorang di na holom ahu Dipalambas Ho
rohaM
Nunga leleng dilului Ho do Au na lilu asa
unang mago
Ditaon Ho na bernit i Lao manobus tondingki
3. VOTUM –
INTRO – TANGIANG
Marhitehite Goar ni
Debata Ama dohot goar ni AnakNa Tuhan Jesus Kristus dohot goar ni Tondi
Porbadia. Amen!
Na tama do Birubiru naung tarbunu i manjalo
hagogoon hot hamoraon dohot hapistaran dohot sahala dohot hamauliaon hasangapon
dohot pujipujian, Amen!
Martangiang
ma hita : Ale Amanami jala Debatanami:
Parasiroha na sumurung do Ho di sude jolma manisia. Nunga dilehon Ho AnakMu,
Tuhan Jesus Kristus Tuhannami, manaon haleaon dohot siak ni bagi, pola mate
tarsilang, asa malua hami sian gomgoman ni sibolis. Sai parrohai ma hami
mamingkiri panaonon ni AnakMu, asa maruli hami marhite sian i di hasesaan ni
dosa dohot di haluaon sian hamatean paduahalihon, asa dapot hami hangoluan
salelenglelengna marhitehite Tuhan Jesus Kristus Tuhannami, Anak haholongan ni
rohaM. Amen.
4. MARENDE BE.
83: 1 NA LAO DO BIRUBIRU I BL.214.
v
Na lao do Birubiru i Mamorsan angka dosa
Ni nasa hajolmaon i Di benget ni rohana
Diporsan do sahitta i Di lehon do DiriNa i
Tu tangan ni pamunu Ditaoni do na bernit i
Ro di na tos hosaNa i Didok : Naeng
porsanonku.
5. NARASI 1: Jesaya 53: 1 – 7
53:1
Tung ise ma nuaeng porsea di jamitanami? Jala tangan ni Jahowa, tung ise ma naung
tumandasa?
53:2 Ai simbur do ibana tubu songon tumbur di adopan ni bohina, jala
songon tunas sian tano na mahiang. Ndang adong hinauli ni rupana manang
hamuliaonna; ia huida hami ibana, ndang adong rupana umbahen sihalomohononhon
ibana.
53:3
Dileai jala dipasiding jolma do ibana, baoa na somal mangae pardangolan
dohot sahit ibana, pola ditabunihon
halak bohina maradophon ibana, dibahen leana, jadi ndang pola hurajumi hami
ibana.
53:4 Tongon do angka sahitta diusung ibana, jala angka pardangolanta
diporsan; alai anggo rohanta mandok:
Debata do maminsang, mamungkul dohot pasipal ibana.
53:5 Hape ala ni pangalaosinta ibana
tartullang, binahen ni hajahatonta ibana mabugang. Ampe tu ibana pinsangpinsang
parhitean ni hasonanganta, jala binahen ni bugangna malum itahilala.
53:6 Luhut do hita lilu songon birubiru, ganup masitondong dalanna be, alai hajahaton
ni hita sudena dihonahon Jahowa tu
ibana.
53:7 Dipasipal pe ibana, sai
manaonnaon do anggo ibana, ndang manang mangkuling pamanganna, songon birubiru
do ibana na tinogu tu pamotongan, jala songon anak ni birubiru na hohom
maradophon jolma sigusting ibana, tung na so dibungka do pamanganna.
6. MARENDE BE.
718: 1 Hubege Jesus manjou
v
Hubege Jesus manjou hubege Jesus manjou
Sipalua au manjou porsan silang ihuthon ma
Au.
Sai ihuthononku Jesus sai ihuthononku Jesus,
Sai ihuthononku Jesus. Huihuthon Jesus
Tuhanki.
7. NARASI 2:
Dung i
dipasahat nasida ma Jesus tu nasida asa diparsilangkon. Jadi laos Jesus sandiri
do mamorsan hau pinorsilang i. Jadi laho manogihon Ibana, disuru nasida ma sahalak,
si Simon sian Kirene goarna, ro sian ladangna; tu ibana ma dipaporsanhon hau
pinarsilang i, paihutihut Jesus. Mangihuthon Ibana torop halak nang angka
boruboru na manangisi jala mangandungi Ibana.
Jadi
didompakhon Jesus ma nasida, ninna ma: Hamu angka boru Jerusalem, unang ma Ahu
tangisi hamu, dirimuna dohot anakkonmuna ma!
Ai na ro ma
angka ari sogot, dohononna ma disi:
Martua ma
angka na hol, angka ina na so dung tubutubuan jala na so dung panarusan!
Disi ma
pungkaon ni halak mandok tu angka dolok: Tinggangi ma hami! Dohot tu angka tor:
Huphupi hami!
Ai molo
songon i pambahennasida tu hau na rata, aha ma tagamon masa tu hau naung masak?
8.
MARENDE BE. 76: 4 SADA NAMA
SANGKAP BL.199
v
Gok di Ho ma au ale Tuhanku Jala Ho ma
jambarhi
Dok ma amen rongkom ma goarMu, Tu bagasan
rohangki Lomo ni rohaM ma
sungkunonku, Di sude na naeng lahononku Olo i ma padanki Tu Ho Jesus Tuhanki
9. NARASI 3:
Alai ditogihon dope dua halak nari, parjahat,
sipamateon rap dohot Ibana. Asa dung sahat nasida tu dolokdolok na margoar
Golgatha, lapatanna partangkurahan, diparsilangkon ma Ibana disi rap dohot
angka parjahat i, na sada tu siamunNa, na sada nari tu hambirangNa. Jadi didok
Jesus ma: Ale Amang! Marpamuatima rohaM mida nasida, ai ndang diboto nasida na
binahennasida i.
Alai disurat si Latus ma sada boaboa,
dipalohot ma i tu hau i. On do hatana: Jesus halak Nasaret, raja ni Jahudi!
Jadi torop ma Jahudi na manjaha boaboa i, ai
jonok tu huta i do pamajalan ni Jesus, jala tarsurat do i di hata Heber, di
hata Rom dohot di hata Gorik.
Dung i didok sintua ni angka Jahudi ma tu si
Latus: Unang surati: Raja ni Jahudi; alai na nidokna i ma nian: Ahu do raja ni
Jahudi! Dung i dialusi si Latus ma: Na husurat i, naung sinurat do i!
Asa dung diparsilangkon angka soldadu Ibana,
dibuat nasida ma angka abitNa, diparopat ma i, di ganup soldadu sabagian be,
dungkon ni sampesampeNa. Anggo sampesampe i ndang marpanjaruman, na tinonun
sambing do i. Gabe masipandohan ma nasida: Unang ma taribahi on, martondung ma
hita taringot tu si, manang di ise i. Jadi jumpang ma surat i na mandok: dibagi
nasida do abithu, tondung di dibahen taringot tu sampesampengku.
10. MARENDE BE.
78: 1 O Ulu Na Sap Mudar
v
O ulu na sap mudar Binaen ni bugangMi
Na sian jangarjangar Sisungsang duri i
O
ulu hatongamon Hian do tumpalMi
Ditaon Ho haleaon Ho naeng sombaonki?
11. NARASI 4:
Ala
dilealeai angka na mamolus i Ibana, angka dipaelengeleng uluna mandok: E ho, na
magalohai joro i, jala pajongjongkonsa di bagasan tolu ari! Palua dirim! Molo na tutu Ho anak ni Debata: mijur ma Ho
sian hau pinorsilang i!
Suman tusi do
pangaleai ni angka sintua ni malim, siboto surat dohot sintua ni bangso i, ai
di dok be: Ia na asing dipalua, dirina so tarpaluasa. Raja ni Israel do Ibana.
Antong mijur ma Ibana sian hau pinorsilang i, asa porsea hami di Ibana! Naung
dihaposi Debata, antong, ima paluahon Ibana nuaeng, molo na lomo rohana, ai
ninna do: Anak ni Debata do Ahu!
Laos songon
i pangaleai i panamun i, na rap diparsilangkon dohot Ibana. Ai ndada Kristus i
Ho? Palua ma dirim nang hami antong!
Alai dialusi
donganna ibana dipinsang ma, ninna ma: Ndang dihabiari ho hape Debata, atik pe
rap hona uhum hita? Uhum na tigor do na tu hita, ai tajalo do upa ni
pambahenanta; alai anggo Ibana, dang adong diula na so ture. Laos ninna ma: O
Jesus, ingot ahu, ia dung sahat Ho tu harajaonMi!
Gabe ninna
Jesus ma mandok ibana: “Situtu do na hudok on tu ho: Sadari on do
ho rap dohot Ahu di Paradaiso!”
12. MARENDE BE.
179: 1 ADONG DO SADA MUAL BL.20
v
Adong do sada mual i, di na mardosa i
Mansai denggan do mual i pasonang rohangki
13. NARASI 5:
Dung i
jongjong ma di lambung ni Jesus na di hau pinarsilang i, inana dohot paribanna
dohot si Maria ni si Kleopas dohot si Maria Magdalena. Anggo Jesus dung diida,
disi inana i dohot sisean haholongan ni rohaNa di lambungNa, didok ma tu
inanai: “Ndi ma, Inang Anakmi!” Dung i didok ma tu sisean i: “Ndi
ma, inangmi!” Jadi olat ni i ma dijangkon sisean i ibana tu jabuna.
14. MARENDE BE.
78: 3 O' ULU NA SAP MUDAR BL. 158
v
Au on tama o Tuhan, manaon na tinaonMi.
Dosangku do diporsan Ho na tarsilang i
Sai tatap ale Tuhan, au na
dijoloMon.
Huhut sai patuduhon, basaM tu
rohangkon.
15. NARASI 6:
Alai olat ni hos ni ari ro di pukul tolu
holom ma sandok tano on. Alai tar di
pungkul tolu dipangiar Jesus ma soarana, dianggukhon ma: “Eli, Eli, lama sabachtani, Ale
Debangku, Debatangku, boasa tung tadingkononmu Ahu?” Alai umbege i, ninna na deba sian angka na
jongjong disi: Na manjou si Elias do i.
Jadi
dung diboto Jesus, naung marujung saluhutna, asa jumpang na tarsurat i,
ninna ma: “Mauas Ahu!” Jadi adong ma di si isian ni tuak na asom i, jadi
dibutongi nasida ma limut tu bagasan tuak na asom, dipalohot ma i tu sada tolong laho
manurdukhon tu pamanganna.
Jadi dung dijalo Jesus na asom i, ninna ma: “Nunga
marujung”.
Dung i mangulahi marsoara na gogo ma Jesus,
ninna ma: “Amang tu bagasan tanganMu ma hupasahat tondingKu!” Jadi dung didok songoni, dipaunduk ma uluna,
tos ma hosana.
Tapahohom ma rohanta jala martangiang be ma
dibagasan rohanta (Diiringi Musik BE.No.335 : 1 )
..........(Manghuling giringgiring 7 hali marholangholang)...................
16. MARENDE BE.
78: 7 O' ULU NA SAP MUDAR BL. 158
v
Di na tadingkononku Sude di tano on
Disi ale Tuhanku Dapothon ma au on
Di na ponjot rohangku manostos
hosangki
Sai jangkon ma tondingku marhite
mudarMi
17. NARASI 7:
Jadi ida ma,
laos di na satongkin i maribak ma hirehire na di bagas joro i sian ginjang ro
di toru. Dung i humuntal ma tano, marigat ma dohot angka batu mamak. Mungkap ma
dohot angka tanoman, dung i hehe ma daging ni torop na badia angka na modom
disi, gabe ruar sian tanoman i. Ro do nasida tu huta na badia i pataridahon
nasida tu torop halak. Alai dung diida induk ni soldadu i rap dohot angka
donganna na jumaga Jesus i, lalo i rodi angka na masa i, mabiar situtu ma
nasida, ninna ma: Tutu do on Anak ni Debata! Jadi sude na torop i, na marluhut
mainondur, masitompuk andorana marnida na masa i, laos mulak ma.
18. MARENDE BE.
84: 1 AUT NA GINORGA TU ROHANGKU BL.195
v
Aut na ginorga tu rohangku, bohiM di na lao
mate Ho
Aut na huingot o Tuhanku, tongtong
pangkophopMi di au
Ai Ho do paluahon ahu, dosangku do pinorsanMi
Didaoni Ho parsahitonku, martua au binahen ni
i.
19. NARASI 8:
Alai adong
ma disi torop boruboru, na manatapnatap mandaodao, ima angka naung mangihuthon
Jesus sian Galilea, paturehon Ibana. Jadi ala tongon ari parhobasan ni pesta na
balga, naeng ma unang di hau pinarsilang angka bangke di ari Sabat i; alani
dipangido angka Jahudi ma tu si Latus, asa disuru na mangarosak haehae nasida
jala dipaijur. Gabe ro ma angka soldadu i, dirosak ma haehae ni naparjolo i
songon i do donganna na rap tarsilang dohot Jesus.
Alai dung
sahat nasida tu Jesus, diida ma naung sanga mate Ibana, gabe ndang dirosak be
haehaena. Alai ditullangkon sada sian angka soldadu i ma mundimundina tu andora
ni Jesus; manigor puas ma sian i mudar mardongan aek.
Na marnidasa
i do na manghatindangkon i, jala sintong do na hinatindangkonna i. Ibana do
umboto sintong ni na niidana i asa anggiat dohot hamu porsea. Ai na masa do i,
asa jumpang na tarsurat i na mandok: ndang jadi ponggolon holiholiNa!
20. MARENDE BE.
449: 1 Sai solhot tu silangMi. Logu. 300
v
Sai solhot tu silangMi, Jesus Ingananku.
Mual na mabaor disi, I ma I nu mon ku
SilangMi, Tuhanki I ma pujionku,
Paima sogot sahat au, I endehononku,
21. NARASI 9:
Jadi dung bot ari, di ari parhobasan i, i ma
patujolo ni ari Sabat, ro ma si Josep sian Arimatia, na masuk rapot godang,
halak na sangap na maimaima di harajaon ni Debata; dipatomos ma rohana laho
bongot tu jolo ni si Latus mangido bangke ni Jesus. Jadi longang rohani si
Latus, ala naung mate. Gabe dijou ma letnan i, disungkun manang naung leleng
mate. Asa dung ditangkasi i sian letnan i, dipasahat ma bangke i tu si Josep.
Jadi dituhor si Josep ma dagangan, dipaijur ma Ibana.
Alai ro ma nang si Nikodemus, ima naung ro
manopot Jesus borngin-borngin najolo, diboan ma mir na marsaor aloe”, arga
saratus hati. Dung i dibuat nasida ma bangke ni Jesus, dibaluti ma tu dagangan
rap dohot na hushus i, mangihuthon adat pananomon ni Jahudi.
Alai adong ma mardonokkon hapajalanNa i sada
porlak, jala dibagasan porlak i sada tanoman na imbaru, na so dung hapeahan ni
manang ise dope. Asa tusi nama dipeakkon nasida Jesus, siala ari parhobasan ni
Jahudi, ai jonok do tanoman i. Dung i digulang ma batu bolon tu baba ni tanoman
i, dung i laho ma nasida. Alai mangihut do angka parompuan, naung mandongani
Ibana ro sian luat Galilea; dibereng nasida do tanoman i ro di parpeak ni
bangke i. Dung i mulak ma nasida paturehon angka na hushus ro di miak mir. Jadi
manipat ari Sabat i, so nasida mangihuthon patik i.
22. MARENDE BE
334: 3 NASA JOLMA INGKON MATE BL. 186
v
Jesus Kristus nunga mate Ala ni mangolu au
Singkop
tua diparade I pe las rohangku lao
Manadingkon
pardagangan Mandapothon hasonangan
Mandapothon
Jesuski Ai malungun au tusi.
23. NARASI 10:
Alai torang
arina i, na mangihut tu ari parhobasan i, marluhut ma angka sintua ni malim ro
di parise tu jolo ni si Latus, angka ninna ma: Huingot hami, Tuannami, naung
didok pangansi i, di na mangolu dope Ibana: Na hehe ma Ahu di ari patoluhon!
Antong dokkon ma manjaga tanoman i sahat ro di ari patoluhon, asa unang ro
angka siseanna manangko Ibana sian na mate; gabe rumoa maon, sipaotooto parpudi
sian na parjolo i. Jadi didok si Latus ma tu nasida: Togihon hamu parjaga i!
Laho ma hamu mangaramoti tanoman i, dipajagahon, huhut ma disahapi batu i.
24. MARENDE BE
412: 1 Ndi di dolok adui. BL. 387
v
Ndi di dolok adui silang ni Tuhan I,
Sap mudar, sap tijur do i.
Jesus mate disi asa malum dibaen
Sude angka gondok roha i.
Dibaen i, tung holong rohangki
Mida silang di Golgata i
Hupa solhot diringku tusi.
Dompak surgo pardalanan ki.
25. PANUTUP:
Tangiang Ale amanami + Pasupasu
