“Pinasupasu Ma Na Ro
Dibagasan Goar Ni Tuhan i”
& Ev. Psalmen 118: 19-29
&
Ep.Matius 21: 1 - 9
- Ia
turpukta on na dipartingkian mar ari raja laho manghamauliatehon las ni
roha tu Debata na dipatupa nasida di Bagasjoro. Na ro nasida tu bagasjoro
na niudutan harorona sian angka tondong nang angka pinaribot. Disi ma
nasida pasahathon bagabagana marhite mamelehon pelean hamauliateon.
Partangiangan hamauliateon ni ruas na di pestahon dohot habobongotna dohot
suraksurak sian alaman, jala ende hamauliateon i diendehon dungkon sahat
nasida di Bagasjoro i. Parpunguan na dirajahon nasida mansai ribur situtu
uju mamestahon ari raja paradianan (Hari Raya Pondok Daun)
- Angka
batu na dibolongkon ni angka pande bagas i, mansai marasing sian na masa
disi. Panurat ni parpsalmen on mambahen sada gombaran batu parsuhi asa
gabe sipahusorhusoronta aha do lapatan ni batu parsuhi i jala ise ma na
nidokna batu parsuhi i? Adong ma dua sian buku psalmen on sipatoanghonon: na parjolo, Pslm 118:22,
batu na binolonghon ni angka pande bagas i gabe batu parsuhi. Marhite i
parpsalm patuduhon las ni rohana, ia Debata naung patimbohon Ibana di
inganan na tumimbo mangatasi saluhut musuna.
- Dibagasan
turpuk digombarhon parpsalm on do dirina songon batu na diambolonghon
pande bagas i. Sai ambolonghonon ni pande bagas i do batu na so suman tu
bangunan i. Parpsalm manghilala naung diambolonghon, dibuang songon batu
i, alai naung dipamalum Debata do ibana tu na marguna jala mangalehon
ibana hundulan na sangap di ulaon ni Debata, ima Batu Parsuhi (Batu
Penjuru). Tuhan Yesus menerapkannya kepada diri-Nya (Matius 21:42 ; Markus
12:10-11 ; Lukas 20:17). Petrus dan Paulus juga menerapkannya pada Yesus
(Kis. 4:11 ; Ef. 2:20 ; 1 Pet. 2:6-8).
- Haheheon
na bolon i sian AnakNa na ditulak gabe marhuaso bolon jala na sangap
situtu.Ari haheheonNa i gabe ari raja na bolon jala ido na gabe dasor ni
las ni roha halak na porsea. Raja na pinillit ni Debata di gombarhon
songon batu na di ambolonghon pande bagas. Batu dipahe songon istilah
Mesianis jala songon lambang pinompar ni si Daud. Batu parsuhi ma batu na
bolon na dipapeak di suhi ni partomuan ni dua tembok. Fungsina ima laho
manean na dua tembok i jala asa denggan jongjong bagas i. Batu parsuhi i
di lapati jala diantusi huria naparjolo songon hamamasa nanaung digohi
dibagasan hadirion ni Tuhanta Jesus Kristus. Parpsalm on manggombarhon
hamauliateon bolon ni natorop siala haluaon na sian Tuhan i. Angka
pengalaman rohani i m na mambahen na torop i gabe sidok mauiate jala mar
las ni roha jala ima ari na gok las ni roha.
- Habot
ni roha nang angka hasusaan na hea dibolus jotjot do mambahen tarhurung hita
asa pasohot diri disi gabe so morot be. Hape dihasiholi Tuhan i do hita
asa lam torus maju mangalangka siala ganup ari dibagasan ngolunta holan
ala asii dohot holong ni roha ni Debata sambing do na tajalo. Ala ni ma di
dok parpsalm pe tu hita di Ay.24 “Ari on do na jinadihon ni Jahowa, marolopolop jala marlas ni roha ma hita
disi.” Lapatanna, na boi masa doi ro tu hita sidangolon, hapariron, jala
habot ni roha na mambahen marsak rohanta, jala lungun panghilalaan pola
sahat na tumatangis, alai dipangido Tuhan i tu hita mamereng dao tu jolo
jala hehe. Siala dungkon i salpu ari na borat i sai ro ma angka si las ni
roha nang angka pasupasuNa tu hita, jala las ni roha i ima sada sian
parbue ni Tondi (Galatia 5:22 Alai angka on do parbue ni Tondi: Holong
dohot las ni roha, dame dohot lambas ni roha, habasaron, habasaon,
haporseaon, halambohon dohot hatomanon). Lapatanna tung so boi do hita
patupahon las ni roha i tu dirinta sandiri, ndang boi pinaksahon i adong
jala ro tu hita las ni roha i. Alai asi ni roha ni Debata do i, jadi holan
sada do kuncina, ima sai ro ma tu Tuhan asa paroonNa ma las ni roha tu
hita (Zefanya 3:17 Ai Jahowa Debatam do di tongatongami, ulubalang silehon
tua do ibana. Marlas ni roha situtu ibana mida ho, hohom ibana di bagasan
haholongon ni rohana; marolopolop ibana mardongan pujipujian mida ho.) Asa
tangkas ma songon na ni dok topik ni minggunta: “Pinasupasu Ma Na Ro
Dibagasan Goar Ni Tuhan i”. Tajanghon ma Tuhan Jesus Kristus Sipalua
hita, ndada ala ni na naung tajalo pasupasuNa, anang ala sinamot, manang
ala ni sukses, arta na godang, dao sian sahit nang parmaraan manang na
bernit, alai manjanghon Kristus i siala naung di lehon tu hita HALUAON
marhite mudarNa i. Unang ma songon
torop halak na manomunomu Jesus uju naeng bongot tu Jerusalem, na mandok “Hosana”
holan manghirim Jesus di haportibi on (asa gabe uluan nang gabe andalan
nasida). Hape ndung diboto nasida haroro ni Jesus ndang tu na sinangkap
niroha na torop i, alai tu sangkap ni Ama na marsuru Anak i; maneahon
hosana, dilehon do diriNa; dilinsingi, ditijuri, di bukbak, dipukkul, ala
ndang hombar tu lomo ni roha ni na torop i pola sahat di parsilanghon
Jesus i. Ima silang na lea i, gabe silang na badia i. Ima haotoon di torop
jolma na so tumandasa, alai habisuhon ni Debata do i laho paluhon jolma
nang portibi on sian dosa nang hamatean. Dipasupasu ma hita na mamuhai
angka ulaon, angka sangkap nang tujuan ni ngolunta raphon Tuhan Jesus i. Amen.
