Jamita Partangiangan Epistel Minggu Palmarum, 10 April 2022

Ev: Mateus 21: 1 – 9                          Ep: Psalm 118: 19 – 29

Topik :

Pinasupasu Ma na Ro Dibagasan Goar ni Tuhan i

 

 

a.Ayat 1-2: Tuhan Jesus Siboto saluhut: Andorang sahat Jesus tu Jerusalem, jumolo nasida mandapothon Betpage donok Dolok Jetun. Dungi disuru Jesus ma dua siseanna laho mambuat halode na tambat dohot anakna. Diboto Jesus adong disi Halode, Diboto Jesus do adong disi tambat halode dohot anakna, na marlapatan Tuhan Jesus na mamereng saluhut na tinompaNa. Tuhan Yesus Mahatau, Maha melihat, Dia tau ada keledai betina beserta anaknya terikat di kampung di depan mereka.Tuhan Jesus na mamboto na diIbana, natinompaNa i, Tuhan Jesus na mamboto mamillit na dumenggan sian hita jolma. Saluhut na tinompana i diboto Tuhan i do manang beha rupana nang roha ni jolma i tahe sahat do didodo tu roha nang ateatenta. Ala ni i dang adong na buni sian adopan ni Tuhan i.

b.       Ayat 3: Na ringkot di Tuhan i: Diajari Tuhan i do alus laho mangadopi sungkunsungkun na ro tu angka siseanNa i ala mambuat halode i. Ndang dipasombu Tuhan i hita laho mangulahon tugas pelayanan so jolo adong parbinotoan. Disuru do hita mangulahon parsuruonNa, diparbohali do hita laho patupahon saluhutna i. Boi do tubu di hita molo hita na marnampunahon halode i; Talehon do na adong di hita molo ringkot di Tuhan i ? Talehon do saluhut ngolunta tu Tuhan i ? Atik maol dope hita mangalehon na dumenggan tu Tuhan i. Holan dua jom do parmingguon dohot partangagiangan alai boasa ndang olo hita mangalehon tingkinta tu Tuhan i. Hape sian Tuhan i do saluhutna na adong di hita. Boasa hita mansai maol mangalehon mulak muse tu Tuhan i molo mansai ringkot do di Tuhan i? Ala ni i tasigati ma roha nang pingkiranta atik maol do pe hita mangalehon na adong di dirinta, atik boha sai holan pikiranta i na mandok: ndang di Tuhan i pelean i, atik na taetong holan harugian na mangalehon tu Tuhan i.

c.     Ayat 4 – 9 :  Uju jenek ne na ma Jesus dohot angka donganna mandappothon Jerusalem, angka pangaradeon laho manomunomu haroro ni Mesias i diparade torop jolma. Ingkon godang do jolma na marnida habobogotna tu Jerusalem marhite na manggombarhon Ibana na ma na tinagam roha ni natorop i. Sian dia do  torop ni jolma na ro tu si ? Ima sian luat Palestina dohot sian angka luat na asing, siala angka halak Jahudi di Israel dohot namarserak i laho do marpungu mamestahon ari raya paska di Jerusalem uju i. Boi ma dapot rohanta torop ni jolma na ro tu Jerusalem hatiha i. Boasa ma ingkon ro Jesus tu Jerusalem asa laho paboahon umbahen na Ibana ma Mesias i ? Siala Ibana na naeng paboahon ia Mesias ni halak Israel nunga ditongos Debata, alai na hona gantung do Ibana di Hau Pinarsilang i binahen ni angka uluan ni ugamo hatiha i. Tuhan Jesus naeng maningtinghon hadirionNa dohot denggan andorang hamamateNa asa saluhut halak na sai manulak ibana ndang adong be sidalian manang aha pe. Na ro do Mesias i manggohi panurirangon naung dipaboa di Padan na robi bongot tu Jerusalem, mangae na bernit jala pola mate songon na sinuriranghon di Jesaya 53, jala hehe ma Ibana muse sian angka na mate, jadi ndang adong be sidalian na torop i manulak Jesus.

d.       Asa digohi Tuhan Jesus ma na sinuriranghon di Sakaria 9: 9 laho bongot tu Jerusalem. (Sakaria 9:9 Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina.) Lapatanna haroroNa i paboahon masa ni hadameon siala hamusuon na ingkon marujung jala Raja i do na monang sogot. Ibana ma simbol ni Raja Hadameon na tigor. Haroro ni Jesus marhite na hundul diatas halode inaina laos dohot muse mangihut anak ni halode i, na marlapatan ndang na ro Tuhan i  mamboan hamusuon alai dame do, marujung ma parporangan, na ro ma hadameon. Haroro Na i tu Jerusalem na naeng pabotohon “Dame ma di hamu” (Sakaria 9: 10). Hataon digohi marhite haroro ni Tuhan Jesus na marsihundul di atas ni halode inaina na mamasuhi Jerualem. Halak Israel na managam panurirangon ni si Sakaria 9:9, panomunomuon i mansai ribur jala mambahen halak Parise mandok saluhut portibi on naung gabe siihuthon Jesus (Joh.12:19).

e.       Uju adong na manungkun, ise pola nasida i? Adong namandok Panurirang Jesus do nasida sian Nasaret. Dipauba Jesus goar ni Nasareth, inganan ni halak na pogos (Joh.1:46) gabe marmulia dipuji torop halak. Laos songon i do dunghon hehe Ibana, naun maruba silang na lea i jala bura, gabe hamuliaon jala gok asi ni roha. Alai sasintongna na bongot Jesus tu Jerusalem ndada laho mangarajai disi. HarajaonNa ima Harajaon ni Debata (Psl.45:7), ndada harajaon ni portibi  di kota Jerusalem. Ido umbahen na bongot pe Jesus tu Jerusalem laho manggohi bagabaga na naung tarsurat di Zakaria 9:10, mamboan dame tu saluhut halak. Hadameon i ndada sian parporangan, ndada sian hagogon ni sinjata, alai na dipelehon do diriNa di hau pinarsilang i. Naung digarar Jesus do pardameanta marhite mudarNa na badia i. Ido alana na bongot Jesus tu Jerusalem laho patandahon buhaanNa panghobasionNa di portibi on,ima na rumingkot, ima hamamateNa di hau pinarsilang i. Ndang adong dalan tu harajaonNa di siamun ni Debata Ama i ia so jolo marhite dalan na sian silang i.

f.      Dungkon tarimangrimangi turpuk on jala tapahusorhusor dibagasan rohanta, idaonta ma hamuliaon ni silang ni Kristus i marhite opat point:

1.       Na rade do Kristus diparsilangkon jala marhite HolongNa i tu hita jolma. HolongNa i unang ma dilapati asa sombaonta Kristus i siala gabe Raja Ibana ia so adong pangantusion na sintong. Molo holan raja sambing do alai ndang diantusi gabe Sipalua diibana, tung so ada do panghirimon diibana laho dipalua. Ndang adong dalan haluaon dimanang ise pe ia so molo Jesus na manobus hita jolma. HaholonganNa i tu hita jolma umbahen na olo Ibana di rehei, dipusa, diitijuri jala sahat tu na agoan hosa laho paluahon hita jolma pardosa on.

2.       Na gabe pangoloi do Kristus i sahat tu na mate di hau pinarsilang i songon sada haunduhonNa tu Ama i. Dibagasan tangiang ni Jesus di Porlak Getsemane, (Mat.26:39  Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do!). On ma na patuduhon haunduhonNa tu Debata Ama i pola sahat tu hau pinarsilang i (Pil.2:8).

3.       Silang i ma gabe lambang ni haunduhon ni Jesus na mutlak, haunduhon na paluahon jolma asa ganup na porsea tu Ibana ndang tu hamatean na saleleng ni lelengna, alai asa bongot tu hangoluan na manongtong i (Joh.3:16). On ma hasongkalon dohot huaso sian haunduhon tu Debata Ama i. Ise ma na marnampunahon huaso na umbalga sian Kristus i? Nda Ibana do Anak ni Debata Ama na marhuaso i? Na gabe pangoloi do Ibana, patutoru diriNa tu Debata Ama i. Ise ma hita na tumoru sian Ibana, alai sai mangalo do hita tu Debata Ama na di Surgo i ? Hita jolma na tinompa na gok hagaleon nang hahurangan alai barani dope hita mangalo Debata, alai ianggo Jesus Kristus i unduk do rohaNa sahat  tu na mate di hau pinarsilang i. Holan marhite haunduhon tu Debata Ama, asa saluhut sangkap ni Debata na singkop i jala na denggan i boi mardalan. Asa manghorhon tu haulion ni parngoluonta saluhut, marsiajar ma hita mangoloi jala unduk holan tu Debata Ama i.

4.       Silang ni Kristus i na gabe simbol ni naung diusehon holong ni roha ni Debata Ama tu hita saluhutna. Diparsilanghon ma sogo ni roha ni Debata jala di papuas. Diparsilangkon ma uhuman na tu jolma na mardosa i dipaujung ma saluhutna. Siala sogo ni roha ni Debata naung di papatar, hatigoran naung dipadalan, jala uhuman naung dipatupa di hau pinarsilang i, siala ni i ndang adong be na tading sian hita. Holan asi ni roha nang hasatiaon ni Debata na nilehonNa i tu hita marbualbual, songon holongna i tu AnakNa i. Hita pe gabe anak ni Debata ala ni hamamate ni Kristus di hau pinarsilang i. Hosianna ma di Anak ni Debata, tajanghon ma haroro ni Tuhan i marhite dame, las ni roha, puji-pujian, nang hamauliateon ala naung dipalua hita sian hagogotanta. Amen.