“HUASO NI DEBATA NA
PANGOLUHON”
& Ev. Ulaon ni Apostel 9: 36-43 & Ep.I Rajaraja 17: 17-24
- Tabita
manang digoari si Dorkas na ginurithon di Buku Ulaon Apostel 9 :
36-43. Ibana ima sahalak parompuan,
sisean ni Jesus na godang patupahon angka na denggan jala masilehonlehon. Holan
marhite na mampargunahon jarum dohot bonang ibana mambahen baju dohot pahean.
Naung godang do marhite karyana i laho mangurupi torop angka na mabalu na
manghalomohonsa. Marhite talenta na i do asa gabe pasupasu tu saluhut
halak na dihumaliangna, jala mansai arga doi diadopan ni Debata. Boi do
ibana mamparhaseang talentana na so apala boi dohonon kemewahan alai
kesederhanaan na mansai dihaporluhon torop halak. Ndang apala marjamita si
Dorkas songon si Petrus di loloan, so ada parbinotoanna taringot tusi,
alai naung dijamitai ibana do torop halak
marhite pambahenanna na masilehonlehon pasahathon asi ni roha ni
Debata tu halak na asing. Na tau do si Dorkas tung so hae do Tuhan i
manjalo na so adong di ibana alai aha naung adong hian di ibana ima sipelehononthon
tu Tuhan i.
- Boha
do taringot tu hita sandiri ? naung dibasabasahon Tuhan Debata do tu hita
angka silehonlehon i, angka halobianta. Hea do i saluhutna tapargunahon
gabe pasupasu tu angka dongan jolma ? Manang holan na marungutungut do
hita holan ala ni hagaelonta na tapatuduhon asa gabe maila hita mambahen
otik na denggan sian dirinta ? Naeng ma hita marsiajar sian si Dorkas, asa
dilehon Tuhan Debata tu hita habaranion nang hagogoon laho manghobasi
tuhan i marhite na adong di dirinta tung metmet pe i manang sederhana asal
ma dibagasan bulus ni roha jala tulus rohanta marhite las ni roha, mansai arga doi di
Debata nang tu angka dongan jolma. Asa marsangap ma Tuhan i marhite
ngolum.
- Pasahathon
eulogi (ima mandok hata pamujion di halak naung monding) sipata mansai
maol doi pasahaton molo memang mansai burju do halakna uju di ngoluna jala
mansai bahat angka hal positif naung niulana na sai laon dibagasan
ngoluna. Boi ma i tadok mansai mura. Alai boha ma sabalikna molo halak na
monding i marpanglaho na roa jala
jungkat uju di ngoluna hian. Uju di ngoluna ndang boi goaron gabe teladan,
manang sitiruon. Ido umbahen pasahat eulogi mansai maol do i.
- Dii
turpuk on di paboa do haroro ni angka ina namabalu maningkir bangke ni si
Tabita, paboahon angka na mansai ringkot di hita. Tabita manang digoari si
Dorkas sahalak ina na burju, lambas marroha, jala masilehonlehon, ibana ma
sahalk sisean ni Jesus Kristus i na patuduhon holongna tu bahat halak na
pogos. Dihobasi ibana do Tuhan i marhite na boi sibahenonna mambahen
pahean. Uju marsahit ibana jala monding, torop do angka ina na mabalu manganndungi bangkena i marhite na
mmboan angka abit nang pahean na uju i di lehon si Tabita tu nasida. Sai ingot
do pe di roha nasida si Tabita i ala ni holongna mansai dihilalaon nasida.
Mansai las situtu rohanasida, mandok mauliate tu Tuhan i ala boi dope
nasida mamereng parngoluon ni si Tabita siala naung di pahehe si Petrus si
Tabita sian hamatean.
- Saluhut
hita jolma pasti ingkon mate do, alai ndang taboto andigan tingkinta. Ido
umbahen asa uju di ngolunta on ringkot do adong rujiruji di hita: ‘molo
haduan mate ahu, aha ma nanaeng sidohonon ni angka donganhu manang
keluargaku taringot tuu ahu ?’ Manang sungkunsungkun na mansai ringkot on
di rohanta: “Aha ma didok Tuhan i
taringot tu ngolunta na sai laon ?”, ido umbahen asa tapasahat saluhut
ngolunta tu adopan ni Tuhan Debata songon si Tabita i, asa gabe sisean ni
Kristus i ma hita na olo manghobasi marhite angka silehonlehon ni Tuhan i.
- Molo
hasomalan nang gaya ni hidup tung hea do i gabe silehonlehon, alai na
tabahen sandiri do i na gabe pilihanta manang haputusan dibagasan rohanta.
Jala boi do i hombar tu lomo ni roha ni Debata manang gabe maralo tu lomo
ni rohaNa. Jotjot do godang sangkao nang tujuanta angka na uli na denggan
laho pasangaphon Tuhan i songon angka na porsea hita, alai mansai jut do
roha, godang do na so hombar tu lomo ni roha ni Debata, na tabahen sandiri
manang sian angka donganta sahaporseaon.
- Marsiajar
ma hita sian pangalaho, pambahenan nang pelayanan nisi Tabita manang si
Dosrkas gabe pasupasu tu torop halak na di humaliangna. Ima gaya hidup, na
tarjou roha nang haporseaonna. Naung di pahehe si Petrus do ibana sian
hamatean i. Mansai otik do halak na dibaritahon di pabangkit sian hamatean
di Bibelta i. Marhite badita ni si Dorkas paboahon tu hita ia halak na
mate ala ni dosa boi do paheheon marhite huaso ni Barita na Uli ni Jesus Kristus, na marhuaso digijang ni
dosa nang hamatean. Dorkas gabe
pasupasu uju mangolu nang mate pe, jala bage barita na uli do
parngoluonna, sada kesaksian na memotivasi hita sahat tu tingki on. Ndang
apala di patorang tangkas taringot tu dirina na uli do rupana manang na
mora do ibana, alai boi do tardok pengusaha ibana. Dung i ndang apala di
paboa naung marhasohotan do ibana manang naung mabalu. Alai na pasti
diparrohahon ibana do na ringkot di halak ima angka ina na mabalu.
- Marhite
turpuk on manjou hita na porsea asa paposhon rohanta: ia holan marhite huaso
ni Debata do na pangoluhon hita laho:
Ø Mangihuthon Jesus sian nasa roha,
gogo, pingkiran: ndada “asa” alai “Ala”.
Huhihuthon Jesus gabe siseanNa ahu ndang asa mamora ahu di arta portibi on,
ndang asa malua ahu sian mara ni portibi on, ndang asa .....na asing. Alai gabe
sisean ni Jesus ahu ala naung dipalua ahu sian hamatean, ala naung hujalo
haluaon, las ni roha, ala naung gabe partohap ahu di harajaonNa. B.E. 690 : 1 Hibul rohangku tu Tuhan Jesus sude ngolungku di Tuhan Jesus,
ihuthononku do Tuhan Jesus ndang olo au sumurut be. Gabe sisean ni Tuhan
Jesus: sahalak na porsea, na olo marsiajar tongtong tu Hata ni Debata. Na
berkomitmen di pelayanan nang ngoluna.
Ø Marlas ni roha laho mambahen
angka na uli na denggan tu saluhut halak. Jadi naung habitual action di nasida, manang naung dihangoluhon ala
dipasomalsomal. Torus manorus, martaon taon diulahon. 1 Timoteus 4:7 Pasiding ma angka turiturian na so gabeak,
na so marnosan i. Pasomalsomal ma dirim mangulahon hadaulaton! Lapatanna nanung dihangoluhon do
na mambahen na denggan i marhite na sai tongtong masilehonlehon. Jadi halak na
porsea i ndang mangholit, ndang ditahantahan dirina nang sangkapna laho
masilehonlehon, masibasabasa tu humaliangna. Ala ni i molo bangkol dope rohanta
manang mangorom rohanta masilehon lehon atik na gabe halak na mangholit do
hita. Ndang diboto mandok mauliate tu Tuhan i. Asa halak na porsea, halak
Kristen i na tutu, sai bulus, jala tulus do rohana memberi, tidak pelit,
bersedekah. Dijou do hita asa mangulahon na denggan ala naung dipalua Tuhan i hita. (Efesus
2:8-10, Matius 5:16). Mari bersedekah (charitiy)
ima ungkap ni rohanta paboahon burju ni roha ni Debata tu hita asa gabe halak na
burju hita masilehonlehon tu halak na hurangan.
Ø Manghobasi marhite na boi
sihobasanta. Sederhana do pangidoan ni Tuhan i tu hita ndang pola lobi sian
gogonta. Sadia tolapta mangurupi, mangalehon, patupahon, tabahen ma i dibagasan las niroha. Unang dibagasan
tekanan, ungutungut,manang ala didok
baru pe taronjar roha. Dibagasan Tahun Kesehatian on di Hurianta HKBP,
tapatuduhon ma na sada hita di huria i, saroha, sapingkiran, sapangkilalaan asa
tarpatupa hita na boi sipatupaonta laho manghobasi huria ni Tuhanta. Rom 12:1
Na huapoi ma hamu, ale angka dongan, marhitehite asi ni roha ni Debata: Pasahat
hamu ma dagingmuna bahen pelean na mangolu, na badia, na hinalomohon ni Debata;
i ma hadaulaton ni na marroha. Amen.
