Mangolu
Dibagasan Holong Dohot Habisuhon
Kolosse
4 : 1 – 6
A.
Patujolo
Ia surat na tu huria
Kolosse on di surat Apostel Paulus uju tarihot ibana di penjara di huta Rom,
ala ni barita na uli i. Kolosse i ma sada huta na metmet di rura ni aek Likus+
160km didangsina ni huta Epesus rap dohot huta Laodekia Hierapolis, alai hira
ummaju do Laodekia dohot Hierapolis sian kolosse. Nunga adong jongjong huria di
huta na tolu i, alai ndang hea dope Apostel Paulus mandalani huta Kolosse.
Si Epafras ma na gabe
tokoh parbarita na uli na parjolo di Kolosse, jala marhite apostel Paulus do
ditanda ibana Kristus i. Ala na so hea i dope si Paulus mandalani huta kolosse,
sai sian Epafras do dijalo ibana barita taringot tu huria na di Kolosse.
Tantangan na niadopan ni huria Kolosse satingki i, ima angka pangajarion na
lilu, tarlumobi pengaruh gnostisisme ima angka filsafat sipaotooto (2:8). Adong
muse do ajaran hajahudion na sai mangondolhon tradisi na sian ompunasida isara
angka aturan taringot tu ari Sabbat dohot parsubangon di sipanganon (2:8,16).
Pangkhorhonna gabe masa ma hageduhon, haporseaon na marlaok ditonga ni huria.
Ditongos Apostel
Paulus do suratna on laho paingothon huria i taringot tu mara hinorhon ni
parpoda haliluon i. Ala ni impola ni surat on ima pangajarion ni Hata ni Debata
taringot tu Kristus. Jala di turpukta on ma na marisihon angka poda sipaingot
na mardomu tu ngolu ni huria i ditonga ni masyarakat tarlumobi maradophon jolma
angka na leban.
B.
Hatorangan
1. Ayat
1 : Angka induk naeng ma sadar di huasona na terbatas i, ai ndang tuk gogona
laho mangatasi saluhutna ulaonna i
ingkon dohot do anak somang i mangurupi ulaonna. Ala ni i ingkon manant do
angka induk laho mamangke huasona, sotung gabe geduk. Jala ingkon botoonna do
adong do na lobi marhuaso di ibana sian salauhtna ima Tuhan Debata. Jala
namangihut, tung pe portibi on sai mamareng angka na diduru ni jolma, isara ni
na mora, na pogos, jabatan, nang kedudukan ni sasahalak,alai di jolo ni Debata
dos do hita saluhutna ima halak pardosa na niasian ni Debata. Ala ni i ingkon
manat ma na laho mamangke huasona i, unang
marlomolomo laho pasombu tagasna alai naeng ma di pangke angka induk
huasona laho patulushon sangkap ni Tuhan i; na marhatigoran jala marhabonaron,
sude na i ndang dao sian bisuk ni Debata na pinangkena .
2. Ayat
2- 3: Huria na mangolu, ima huria na martangiang. Pamatang ni Kristus do huria
i jala Kristus do ulu, ni huria i. Alai ni i ingkon do tongtong terhubung
pamatang tu ulu i ma Kristus i marhite tangiang. Marhite tangiang do pasahathon
pujipujian, holso dohot nasa pangidoan na ringkot di ngolu partondion nang
pardagingon ni huria. Molo so martangiang, boi do gabe mago haporseaon. Bahkan
tangiang do hosa ni huria, ala ni i, ibarat ni hosa na so tarsirang sian
pamatang ni na mangolu, ingkon manongtong do huria i martangiang. Pandohan
“Dungo ma hamu disi”, marlapatan unang
tarpodom manang tarlalap (Ptds. Luk. 9: 32 dung pe dungo sisean i sian na
tarpodom asa gabe diida nasida hasangapon ni Tuhan Jesus, manang songon na di
porlak Getsemane uju martangiang Jesus hape tarpodom siseanNa na tolu i (Mat.
26:40). Sada tantangan na borat na jotjot diadopi jolma di na martangiang, ima
mondohondok, tarlumobi ma ala ni halojaon mulaulaon di bagasan sadari i. Dungo
marlapatan sikap berjaga-jaga manang siaga. Di Padan na imbaru adong do manang
piga hali dipangke hata “Dungo”. Didok di Mateus 26: 41 “Dungo ma hamu jala
martangiang”. Dungi didok di Lukas 12: 37 “Martua ma angka anak somang i, na
dungo dapoton ni indukna di haroroNa i. 1 Korint. 16:13 mandok “Dungo ma hamu
marsihohot marhaporseaon, tang ma hamu jala margogo”. I Tess.5:6 “Sai unangma
tarpodom hita songon angka na leban, sai dungo ma hita jala marroha na torang”.
Pangk.16:15 “Ida ma na ro ma Ahu songon panangko, martua ma na dungo jala na
mangaramoti abitna asa hobas......” Tangiang
ndada holan marisi pangidoan, alai na rumingkot jala jumolo pasahathon i ma
mandok mauliate tu Tuhan i. Di na martangiang huria, tontu ndada holan na
ringkot di huria i sitangianghononna, alai ingkon ingot do huria i
manangianghon angka dongan nang nasa jolma na di portibi on, marhite tangiang
pangondianon (dao syafaat). Ala ni i Apostel Paulus pe mangido tu huria Kolosse
asa manangianghon apostel i dohot angka donganna parbarita nauli di
panghobasion nasida mamaritahon hahomion ni Kristus i tu angka halak na leban
na so mananda Kristus i dope. Sada tantangan na borat do mambahen halak na
leban asa porsea di barita na uli, ala ni i ingkon Tondi Parbadia do na mangula
mangungkap roha ni jolma i manjangkhon barita na uli taringot tu Kristus i.
Tung pe tarihot di hurungan Apostel Paulus tong do diingot ibana tugas
panjouonna dohot angka huria na hinobasanna, jala dipangido ibana asa tongtong
tulus mardalan ulaon marbarita na uli i marhite angka donganna saulaon.
3.
Ayat 4 : Ndada holan pintu ni roha ni jolma i
ringkot ungkap laho manjalo barita nauli, alai parbarita nauli i pe ringkot do
ingkon diboto cara manang metode pasahathon barita i asa sintong jala patar
manang tangkas. Boi do denggan binaritahon sada barita manang jinamitahon sada
jamita, Alai ndang dapot antusan ni na umbegesa manang boi do sala mangantusi,
sala tangkup manang sala tafsir na manangihonsa. Dison ma ringkotna kemampuan
dohot kesiapan ni parbarita nauli asa Apostel Paulus pe dohot angka donganna
saulaon ringkot do tangianghonon ni huria i asa margogo jala marbisuk di na
mamaritahon barita na uli.
4.
Ayat 5-6; Ndada holan di dirina sambing ringkot
ngolu ni huria i, alai adong do tugas
panggilan dohot tanggung-jawab ni huria i tu portibi on manang tutonga
masyarakat na di humaliangna, i ma mamaritahon barita na uli i tu na
humaliangna. Marbarita na uli ndada sai ingkon na marhite jamita verbal., alai
boi do marhitehite cara na paling sederhana:ima marhite parange; adong ma disi
dipatuudhon roha na pantas maradophon jolma na leban boi do gabe sada jamita na
mangolu na manait rohanasida manjanghon barita na uli i jala manghaporseai
Kristus. Dung i marhite panghataion na lambok, disi ma dipatuduhon panghataion
na mardongan holong na sian Tuhan i. Ndang hambar alai songon “na siniraan”, ima na mardai,
jala na marlapatan, boi gabe siingoton manang gabe marguna jala gabe pasupasu
ma i.
Dung i asa botoon ni huria i alus na patut tu ganup jolma.
Ai pasti do ndada sude na manangihon barita i manigor manjanghon jala porsea.
Sai adong do i na gabe tubu sungkunsungkun dibagasan rohana taringot tu Kristus
i. Ala ni i ingkon rade nasida mangadopi
kemungkinan mangalusi sungkunsungkun i jala mangadopi kemungkinan sikap na menolak
manangna so rade manjalo manang manguhumi jala boi mengancam nasida songon na
masa di si Paulus pola tarhurung ibana. Mangadopi situasi na songon i, ingkon
botoon nasida ma alus na patut.
Sudena ulaon i ulahonon nasida ma dibagasan partingkian di
ngolu ni huria i. Ala ni i ringkot do serius nasida mangulahonsa huhut
mamparhaseang tingki. Unang ma ala na tarihot i Apostel Paulus gabe gale huria
i, jala unang ma ala ni borat ni tantangan i gabe lalap manang tarpodom huria
i, alai diparhaseang ma tingki. Ingkon tongtong do rade huria i mangulahon
tugas panjouonna di portibi on m anang sadihari pe (di tingki na une manang na
so une) i ma laho pamalumhon jala paluahon portibi on sian dosa dohot
haholomon.
C.
Sipahusorhusoron
1. Huria
na mangolu ima huria na sintong mamaritahon barita na uli manang ber-Marturia.
Ala ni i tarjou do huria na di portibi on marbarita na uli tarlumobi tu angka
na so mananda haluaon i dope. Nunga adong nian angka parhobas na tarpillit jala
dipaojak mangulahon missi. Alai songon pamatang ni Kristus, sude do ruas ni
huria tarjou mangulahon i, ndada ingkon marhite jamita, alai tarlumobi ma
marhite parange manang panghataion. Jamita
na marhite pangulaon i do na patar diadopan ni jolma nang dihumaliangna,
ido hataridaan ni huria na ber Missi, huria na missioner ima huri na mangolu.
2. Lam
borat do tantangan na niadopan ni huria di na mandalanhon missi i di jaman
nuaeng on. Sekularisme, materialisme dohot angka kecenderungan na asing na so
pola mangharingkothon ugamo be. Disamping ni i sude ugamo do mengklaim dirina
na sumintong. Disituasi sisongon i ringkot do asdong toleransi antar umat
beragama. Jala disi ma patuduhonon ni angka halak Kristen i jati diri
Kekristenan na perduli tu lingkungan hidup, masyarakat na dihumaliangna.
Dibagasan kepedulian i do adong tubu holong na sian Tuhan Debata laho
pauliulihon, manumpahi angka na uli jala na denggan. Ima pasupasu na sian
banuaginjang i, naeng papataronta dibagasan parngoluonta. Ala ni imolo las roha
ni na humaliangta marnida hita manang na so saugamo dohot hita, ima na gabe sada pangalahona marbarita nauli. Ala ni i
tapangke ma holong na sian Tuhan Debata.
3. Tangiang i ma parhiteanta berkomunikasi dohot Tuhanta.
Marhite tangiangta ma tapasahat pujipujian hamauliateon dohot nasa pangidoanta.
Alai olo do sipata maol di na deba ruas ni hurianta martangiang. Ndnag piga
ruas ni huria na rade molo dipangido martangiang di tonga ni punguan, dohot
alasan ndang diboto martangiang. Hurang malo manang poso dope, hape di tingki
singkola minggu ingkon ingotonna ma marpasiajari di na laho martangiang lam ma
uju di na marguru malua i. Marhite tangiang do tapatupa hubungan na rosu dohot
Tuhan i, asa disi ma dipatuduhon Tuhan i tu hita habisuhonNa, jala marhite tau
hita mangadopi ragam hamaolon dibagasan parngoluanta. Amen
