Pangunjunan
pasoranghon pasupasu
Jakobus
1 : 2 – 8
A.
Patujolo
Surat
Jakobus on termasuk do tu na ginoaran angka surat umum (hatopan) na tinongos tu
huria songon na tarsurat di Jakobus 1 : 1 “ mandapothon na sampuludua marga na
di parserahan”, i ma angka ruas ni huria na sian halak Jahudi na tinggal di
luar ni Palestina. Ruas ni huria na gabe alamat ni surat on i ma angka na
parjolo masuk Kristen di Jerusalem jala na marserak sian i tu luat na asing ala
ni pangaleleon songon na niadopan ni si Stefanus (ptd. Ul.AP.8:1), i ma di luat
Fenesia, Siprus, Antiokhia, dna (Ul.AP.11:9). Diondolhon do di surat Jakobus on
mangarajumi angka pangunjunan na masa i gabe las ni roha jala na manguji
haporseaon huhut manuntut habengeton. Ia sangkap ni surat on i ma laho
patoguhon haporseaon ni angka halak Kristen na marungkil jala manaon ala ni
angka pangunjunan na manguji haporseaon dohot patorangkon lapatan ni haporseaon
i do paluahon jolma, paingothon huria di lapatan ni haporseaon na marpangulaon
(praktis) marhite parange dohot angka ulaon na denggan.
Molo
tajaha Buku ni si Rick Warren; “God’s
Power to Change Your Life”, dibaritahon ibana do disi ditingki haposoonna.
Sai masihol do ibana asa marparbuehon sada sian parbue ni tondi na di Surat
Ap.Paulus na tu Galatia bindu 5 i ima habengeton. Dimanogot ni ari martangiang
do ibana asa diurupi Tuhan ibana laho mamparbuehon parbue ni tondi i. Arianna
i, mardauk pogu ma ibana di parsingkolaanna, ro ma sahalak na jengjeng na
sangajo mangusehon sipanganonna tu ibana, gabe tonu ma paheanna. Hinorhon ni i
gabe mohop ma rohana, alai diingot ibana do tangiangna i di na manogot i. Di
orom ibana ma dirina laho mamalos.
Dibagasan
turpuk on dipatorang do taringot pangunjunan na marparbuehon pasupasu(ay.12).
Molo didok pangunjunan na marlapatan do i di Hata Indonesia “Ujian” tu
haporseaonta. Alai tauhal ma lam bagas di hatoranganna.
B. Hatorangan
1. Ayat 2; Mansai ragam do
lapatan ni hata “Pangunjunan”
di Bibelta i. Naparjolo; ima pangunjunan laho mandabuhon hita na marharoroan
sian sibolis, isarana pangunjunan masa di Jesus ditingki di halongonan (Mat.4:
1-11) dohot di Jakobus 1:13. Napaduahon; ima pangunjunan na laho
mamburi rohanta, dohot margogoihon hita, na marharoroan sian Tuhan Debata na
jotjot do on didok di Hata Indonesia “Ujian”. Napatoluhon; Ima gabungan
nadua sian pangantoion ni Debata tu sibolis songon na masa tu si Job. Diunjuni
do si Job asa madabu tu na mardosa. Alai disi ro pangunjunan i disi ma sangkap
ni Debata laho margogoihon ibana.
Molo
na dibagasan turpukta on na masa pangunjunan ima na sian paduahon i do marhite
angka hamaolon dohot parmaraan. Angka na porsea ima angka siihuthon Jesus
ingkon adopanNa do hamaolon songon jamita di minggu na salpu : “Pangalaho di na mangihuthon Jesus”
(Mat.8:18-22). Ai godang do anggapan ni angka siihuthon Jesus molo angka na
porsea i, sai urupan ni Debata jala dipasupasu di sude partingkian; dilehon
hahipason, sinamot na godang, adong parkarejoan, denggan parsiajaranna, jala
marhasil na niulana, ala ni i adong ma anggapan sude ma mardalan dohot denggan.
Hape nunga maralo nian i sian naniajarhon ni Hata ni Debata. Isarana molo
tajaha di Mat.7:13-14 molo dalan na laho mangihuthon Jesus ndang digombarhon
marhite dalan na bidang, alai sabalikna ima marhite dalan na sompit, na
manggombarhon gok hasusaan do nang hamaolon. Ido umbahen tangkas taparrohahon
tujuan ni surat Jakobus on (1:1) ima tu angka halak Kristen na sian Jahudi na
marserak di luar ni Palestina. Dihasogohon halak Jahudi na so Kristen do
nasida, nang songon i angka halak na sian gomgoman ni Rom! Jadi tangkas ma
hamaolon na niadopan nasida (ptds. Ul.Ap.14:22b; Pil.1:29; 2 Tim.3:12).
Molo
didok “las ni roha sambing molo madabu tu bagasan pangunjunan” ndang
na sengaja hita asa madabu tu pangunjunan i. Unang gabe balik talapati
pangunjunan i asa gabe pasupasu dihita gabe talului manang tasengaja hita
madabu tu pangunjunan. Na deba nari mangalapati dirohana: mandok mauliate tu
Debata hinorhon ni hamaolon i, ala ni sahit, nang hamatean i. On ma sikap na
sala! Ndang hamaolon manang hasusaan i na gabe tahalashon manang taanggap
pasupasu, alai angka na denggan na
sorang sian hamaolon ima: habengeton
nang habadiaon. Tapatudos songon pandohan ni Ap.Paulus di 2
Korint 12: 9b-10 “Asa tagonan ma hupapujipuji diringku di bagasan angka
hagaleonku, asa songgop tu ahu hagogoon ni Kristus. Dibahen i, sonang do
huhilala di bagasan angka hagaleon, pangaleaion, hasosahan, pangaleleon dohot
hagogotan ala ni Kristus; ai jumpa gale ahu, disi do ahu margogo.” Sian
i nunga botoonta ndada dihasiholi Ap.Paulus angka sitaonon i, alai hasil manang
panghorhon ni hasusaan i do. Ala ni i, ingkon padaonta do sian dirinta angka
hamaolon nang pangunjunan i asal ma unang mangulahon dosa. Ido umbahen didok di
tangiang Hatopanta i Mateus 6:13 “padao
ma hami sian pangunjunan”, pangunjunan na nidokna ima na sian sibolis i.
Molo ro pangunjunan i; ingkon tongtong do hita mamuji Tuhan i, lam pasolhothon
diri tu adopanNa marhite tangiangta (ptds.Poda 17:22; 18:14)
2. Ayat 3: Hata “habengeton” sian hata Gorik “Hupomone”, na marlapatan: haboion martahan sian
hasusaan, ndang holan sikap martahan sambing (manguhom/pasif) alai marpangalaho
na denggan (aktif) di tingki ro hasusaan laho mamuji pasangaphon Debata. Jotjot
do ro respon na so terkendalikan sian dirinta uju ro hasusaan; boi muruk,
marmungutmungut, laho tu angka ulaon na so denggan, parmabukon, mar-narkotika,
jala olo laos bali sian haporseaonna laho mardatu. Marhite habengeton i do hita
tau manahan sahat ro diujungna dina laho mangihuthon Jesus. Molo so
marhabengeton tudos do i songon halak na marroha tano na marbatu, holan
satongkin do martahan boni haorseaonna dungi melos laos mate ma
(Mat.13:5-6,20-21). Habengeton na nidok ni turpuk on do na boi mampanghorhon tu
portibi on, jala gabe sada halongangan na marnidasa. Ala Tuhan i do na
dipangasahon laho manaon i asa marhabengeton (Joh.15:5; 1 Kor.10:13). Ai ndang
dapot hita habengeton si songon i ia so manaon hasusaan hita.
3. Ayat 4 : “Asa Gabe rimpas hamu, angka na so marlindang, na so
marnahurang”, on ma tujuan ni angka hamaolon dohot hasusaan i. Alai molo
didok na so marnahurang ndang marlapatan di pardagingon i gabe madabu tu
Teologia Sukses (Kemakmuran). Sabalikna lapatanna di partondion do, ala
pandohan “hasingkopon dohot na so marnahurang” pandohan di partondion do i.
Songon sere jolo ditungtung do i asa badia ( 1 Ptrs.1:7), suang songon i do hau
anggur i ingkon dipaias, dirantingi asa gok parbuena (ptds. Joh.15:2b). Ala ni
i ma angka halak Kristen ingkon mangadopi ragam hamaolon asa marhabadiaon
ngoluna hinorhon ni i. Ala mansai godang do dosa na songgop tu dirinta na ingkon
siburionta, ima; pangalangkupon, ginjang ni roha, halosohon, hosom, teal, elat,
late, parmurukmuruk, holongan di hepeng dna, jala dibahen Tuhan do angka
pangunjunan i laho paiashon angka ragam ni dosa i. Ala ni i molo martangiang
hita asa diburi hita sian angka dosanta unang ma tarsonggot hita molo dialusi
Tuhan i marhite ragam angka hamaolon (ptds.2 Samuel 12: 13-24).
4. Ayat 5-8; Pangido ma tu Debata habisuhon i. Di ragam hamaolon
nang sitaonon i, jotjot do hita gabe lilu, so binoto be mangula manang aha.
Dipartangingkian sisongon i ma ringkot jaloonta habisuhon sian Tuhan i asa tolap
hita mangadopi hamaolon i dohot denggan. Tuhan Debata do mual ni habisuhon,
jala lehononNa do i asal ma tapangido sian Ibana. Alai ndang sude jaloonta sian
na binagabagahonNa. Alai tongtong do pangidoonta tung pe so sian lomo ni
rohanta. Boi do ndang saut na tapangido isara ni : hahipason sian sahit,
sinamot, nang sintasinta, dna. Alai molo taringot habisuhon i sai lehononNa do
i. Alai adong do syarat na; di na mangido i tu Tuhan Debata ingkon ima
ingkon dibagasan haporseaon, unang adong
ganggu ni roha. Jotjot do ra hita martangiang asa malua sian parmaraan, alai
sasintongna na ingkon jaloonta ima habisuhon do asa tung boi mangadopi hamaolon
nang hasusaan asa saluhutna i hombar tu lomo ni roha ni Debata. Molo nunga
marhaporseaon, ndang ganggu be roha disi. Alai na ganggu rohana ima na mardua
roha; jala ndang adong pos ni roha disi (Heb.11:1; Jak.2:23).
5. Ayat 7 – 8; Halak na mardua roha. Ndang tolopan hita angka na
mardua roha dibagasan ngolunta gari Debata dihasogohon do pangalaho sisongon i.
Ai didok do di Pangungkapon 3 : 16 Alai dibahen na danggoldanggol sisilon ho, so haru
ngali, so haru las, utahononku ma ho sian pamanganku. Sian i pe nunga
botoonta ndang dapot hita agia aha pe molo na bersikap mendua hita, laos
diutahon nama. Lapatani i, ndang adong be gunana, nga tarbuang, jala ndang
marguna be.
C. Sipahusorhusoron
v
Arsak dohot Las ni roha patau haporseaonta. Molo
tadok dirohanta ndang adong hasusaan; boi do dohonon ndang anak ni Debata hita,
manang tadok ma jolo anak ni Debata alai sai na mangoloi do di pangidoan ni
portibi on. Alai molo taadopi hamaolon
nang hasusaan i, unang ma pintor hatop tadokhon i ala ni dosanta. Boi do ala ni
dosanta diajari Tuhanta hita marhite angka hasusaan. Alai ingkon botoonta do
muse, dipasaut Debata pe hasusaan nang hamaolon i di hita, ndada na mandok ala
ni na mardosa hita, alai nanaeng manguji haporseaonta do i. Tung mansai bahat do ragam hamaolon nang
hasusaan i; isarana sian ekonomi, parkarejoan, parsahiton, keluarga,
parsingkolaan, rongkap, parsaoran, parhuriaon, masyarakat nang sian negara
pe. Angka parsualon i boi do nunga boi
tarduga hita manang sotarduga hita. Jala angka na sotarduga on ma na nidok na i
pangunjunan i (ay.2). Saluhutna i ala keterbatasan ni jolma i do, ndang adong
na singkop, tung so boi do hita mangasahon pingkiran, hapistaran, nang arta na
di portibi on, sude na i terbatas do. Jala ndang tardungdung hita parbinotoan
ni Debata na gok bisuk i. ala ni ijotjot do ala so pamotoan manang ala
keterbatasanta, manang ala ni haotoonta boi hita madabu tu ragam pangunjunan,
parmaraan, sitaonon, jala boi do gabe madabu tu pandelean manang manundali
Debata. Hape sasintongna molo tarajumi angka na masa dibagasan ngolunta sai dipangke
Tuhan Debata do angka arsak nang las ni roha laho pahot haporseaonta songon
nanidok BE No BE.707:1 “Hagogoon dohot apul-apul”Hagogoon dohot apul-apul/do
dilehon Tuhan I tu au,/Ganup ari au ditogu-togu /ganup tingki diondingi au./Ai
hombar tu lomo ni rohaNa /do dilehon Tuhan I tu au/Ro marsorin arsak las ni
roha/haporseaon hu di patau.(Ptds.Rom 5:3-5). Jala dipatudu Debata do
holongna marhite ragam angka namasa di ngolunta; ndada holan di las ni roha,
dibagasan arsak pe ima angka hamaolon hasusaan tong dipatudu i sada bagian sian
holongNa laho mangajari hita. Didok di Pangungkapon 3:19 Ai nasa na huhaholongi,
angka i do hupinsang jala huajar. Antong, haringkothon ma na paubahon roha.
Songon Bangso Israel na tarbuang tu Babel, tung pe disi dipatuduhon Debata
rimasNa alai dibagsan ni i holongNa do laho mangajari bangso i marhamubaon ni
roha. Diajari Tuhan i do hita patuduhon holongNa marhite ragam ujian na taadopi
dibagasan ngolunta. Ala ni i unang ma hita pintor mandate molo ro pangunjunan
i, ai sada dalan ni Debata doi laho manghaholongi hita, asa tau hita mangidohon
gogo nang habisuhon sian Ibana.
v
Las ni roha dibagasan pangunjunan. Di na laho
mangadopi sitaonon i pe hita ingkon patuduhononta do songon anak ni Debata hita
na marhaporseaon na togu. Dibagasan benget ni roha i do asa dipatau hita mamuji
Debata, dohot mangulahon nasa na denggan hombar tu Hata ni Debata asa gabe
panindangion habengetontta i. Isarana si Paulus dohot si Silas di Ul.Ap.16:25;
nang pe dibagasan hurungan nasida tongtong do benget rohana huhut mamuji
Debata, ro ma halisungusung manghutur hurungan i, gabe bungka ma pintu ni
hurungan nang benganna i. Alai ndang pintor humalaput nasida laho marlojong,
alai laos dipasanga do tingki laho marbarita nauli, huhut manjamitai na di
hurungan i termasuk ma soldadu na manjaga nasida i asa namangihut ma tardidi
soldadu i dohot sabagasna. Ihutni i di Panurirang Habakuk di Habakuk 3:17-18
tung hamaolon na niadopan nasida tongtong do nasida mamuji Debata, ido na
dipangido ayat 2 i taringot tu las ni roha dibagasan pangunjunan. Indada so
boti ndang marulaon manang pasif, alai ingkon tongtong do aktif dihabengeton i
mangulahon parsuruon ni Debata marhite HataNa nang PatikNa i. Dibagasan
pangalaho na pasif i ndang adong na tau siparbagahon sian i, ndang boi gabe
kesaksian tu manang ise pe. Alai sabalikna molo aktif do hita, tarida ma disi
parbue ni haporseaonta na mangolu do hape haporseaonta i di angka parulaonta na
hombar tu Patik nang Hata ni Debata. Jala disi ma tarida panindangion na tutu
taringot tu na tahaporseai sian Tuhan i. Asa disi ma ngolunta ngolu na
marpanindangion. Matieus 26:41 Dungo ma hamu jala martangiang, asa unang hamu bongot tu
pangunjunan, ai na girgir do nian tondi i, alai gale do ia daging!
v
Illustrasi: Adong ma sahalak calon pandita na
mangido asa ditangianghon pandita seniorna ibana marhabengeton. Dung i martangiang ma
nasida, jala dipalu pandita senior ima
martangiang. Hape ditangiang ni pandita senior i ndang adong mangidohon benget
ni roha. Alai sabalikna do asa dilehon Tuhan i di calon pandita i ragam ni
hamaolon dohot hasusaan. Gabe muruk
calon pandita i tu pandita senior i. Alai didok pendeta senior i do
alasanna: “Holan sada do dalan asa marhabengeton ho ima marhite hasusaan manang
panaritaan.” Di hita saluhutna nahinaholongan dibagasan Jesus Kristus,
ala ni i unang ma gabe ro rimasta manang muruk ni rohanta tu adopan ni Tuhan
Debata, molo masa hasusaan dohot hamaolon di ngolunta. Alai ido dalan ni Tuhan
Debata laho manopa hita asa marhabengeton jala dibagasan habengeton i ma
dipatuduhon Debata pasupasuNa marhite habisuhon na patuhon hita mangulahon
angka na denggan hombar tu Hata ni Debata, asa mampanghorhon pasupasu tu
humaliangta. Rom 8 : 28 mandok : “Alai taboto do, saluhutna do manumpak tu na
denggan di angka na marholong ni roha di Debata, angka na jinouna sian tahina
hian”
