Bahan Jamita Evangelium Ari Hananek Tuhan Jesus, 9 Mei 2013

Gabe Sitindangi ni Kristus

Ulaon Apostel 1: 6-14

A.      Patujolo

Ia Ari Hananek ni Jesus Kristus tu Banuaginjang, ima sada hamamasa na mansai ringkot di halak Kristen. Ganup taon do dipestahon angka huria na di portibi on Parningotan di Hananaek ni Tuhan Jesus, i ma angka huria na mamangke taon parhuriaon (kalender gerejawi). Laos songon i do hurianta HKBP nunga sian na mamungka tu huria ditongatonganta sian sundut tu sundut mamestahon Parningotan di Hananaek Tuhan Jesus. Molo sian sundut partingkian pajoinokjonok do parro ni pesta parningotan  di Hamamate ni Tuhan Jesus dohot parningotan di Haheheon, Hananaek dohot Haroro ni Tondi Parbadia. Jala lapatanna pe marsirainrainan do. Ndang sirang nasida sian na sada nari ima na opat pesta parningotan i, ai laho paingothon hita do di pambahenan ni Tuhan Jesus tingki ngoluNa laho manghophop jolma pardosa i, asa malua nasida sian gomgoman ni angka sialo Debata Jahowa Ama na di banua ginjang i.

B.      Hatorangan  

     1.       Ayat 6: dijolo ni ayat on ima di ayat 5 dipatorang do taringot tu pandidion na badia na asing sian na pinatupa Johannes Pandidi na naeng masa haduan (Mat.3:11; Mark.1:8; Luk.3:16; Joh.1:33) jala dibagasan Buku Ulaon Apostel on digohi do pangungkapon ni si Johannes. Jala Jesus pe nunga marbagabagahon  haroro ni Tondi Parbadia (Joh.14:16-18,26-27; 15:26-27; 16:7-15) jala hasasaor i marrumangkon hagogoon ni huaso tu angka sisean i asa margogo nasida marhobas jala manggulahon parsuruonNa (Luk.24:49). Molo tajaha do angka buku   evangelium i dapot hita ma ia angka apostel i mamereng dibagasan politik na margogo di harajaon jala hagiot nasida mandapothon hajongjongan nang hak nasida songon halak Jahudi na loyal tu Tuhan, naeng taluhonon nasida angka musunasida jala pajongjonghon sada harajaon na togu dipanggomgomion ni Mesias na songon raja nasida.

    2.       Ayat 7 – 8; Dialusi Jesus do sungkunsungkun nasida i marhite na mandok: “...Ndang ro di hamu i, umboto taonna manang ombasna; na binuhul ni Ama i guru di huasona sambing. Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on”. Asa lam tangkas nanaeng dohonon ni Jesus i, naeng mangalehon sada gombaran tu angka siseanna= asa marsitutu mangulahon ulaonna laho mambaritahon Barita Nauli asa pagodanghu manungkun taringot na naeng siulahon ni Ama i mardomu ma i marhite harajaon na bersifat politis; Kristus na marhuaso gabe Raja. Sian ayat 8 on, godang do na so diparrohahon angka penafsir ima taringot tu parjojor ni goar ni angka kota; mamungka sian Jerusalem (angka sisean i manjalo Tondi Parbadia) jala haruar sahat tu humaliang Judea, Samaria jala sahat tu ujung ni portibi on. Ia parjojor ni goar huta i ndada na so adong lapatanna. Ia lapatan ni i laho patuduhon ia mamaritahon Barita Nauli i ndada nibatasan holan tu angka luat na tertentu, alai dibuhai sian ingannta/luatta  ganup, jala marujung sahat tudia sangkap ni Debata di hita laho mamaritahonsa. Hata “ujung ni tano on” jotjot do di lapati martudutudu tu Kota Rom na mansai tarbarita ditingki i. Alai molo lam tapamanat lapatan ni “ujung ni tano on” boi do i mandok mambaritahon Barita Nauli ingkon sahat tu sandok portibi on, asa ndada adong be agia ise pe na so manjalo Barita Nauli i. Hata “sitindangi” mansai jotjot do tajah di Buku Ulaon Apostel on. Sitindangi ima sahalak na mamaritahon (paboahon) angka na ni idana dohot na binegena (Ul.Ap.4:19-20). Ganup hata “sitindangi” di Buku Ulaon Apostel dilapati sian Hata Gorik (Marturia), jala marisihon pangantusion “martir” manang “Syahid”. Molo pandok Warren Wiersbe; ia buku Ulaon Apostel on laho mangondolhon assurance (jaminan) haroro ni Jesus na paduahalihon, jala didok nasida do muse; ia hananaek ni Jesus tu Banuaginjang ima bagian na mansai ringkot dibagasan panghobasion-Na, ala molo so mulak Ibana tu AmaNa, ndada boi gohanNa bagabagaNa i laho pasaorhon Tondi Parbadia (Joh.16:5-15). Jala muse Jesus na di Banua Ginjang i gabe Malim Bolon na manangianghon hita (Heb.4 : 14 – 16). Jala Ibana na mangondihon hita tu Ama i jala na manesa angka dodsanta molo tasolosoli angka dosanta (1 Joh.1:9- 2:2)

     3.       Ayat 9 – 11; Pandok ni si Wiersbe taringot tu ayat on, ima sada jaminan haroro ni Jesus na paduahalihon na boi sipeopon, ala dibagasan ayat i, adong di dok angka surusuruan i mandok : “....Anggo Jesus i, na tarhinsat sian lambungmuna tu banua ginjang i, na ro do Ibana sogot, songon na niidamuna Ibana laho dompak banua ginjang i” (11b). Ala ni i ganup na porsea tu Jesus na naek tu Banua Ginjang dibagasan rupa na boi idaon ni manisia, ingkon porsea di haroroNa na paduahalihon na marrumangkon pamatang nang rupa na nyata jala na boi di bereng manisia. Ala ni i haroroNa nanidokna paduahalihon i marhite ombun diadopan ni angka jolma (Mat.24:30; 26:64; Pangk.1:7), ndada haroro na sangombas boti (sangkidop mata) di pangantusion ni pigapiga huria ( 1 Kor.15:51-52; 1 Tess.4: 13-18).

     4.       Ayat 12-14; Di ayat on dipatorang taringot tu angka sisean i na mangoloi parsuruon ni Guru nasida (ima Jesus), mulak nasida tu Jerusalem sian dolok Jetun, nangkok nasida tu Bilut parginjang (kemungkinan di jabu ni Johanes Markus; Ul.Ap.12:12 ). Disi ma nasida na saroha nunut dibagasan unduk dohot serep ni roha marpungu martangiang huhut managam hasasaor ni Tondi Parbadia. Molo tinaringotan tu na martangiang on, boi dapot hita nasida manongtong martangiang dibagasan haserepon. Mansai ringkot do pangalaho sisongon on tiruonta dibagasan hurianta ganup, ala molo adong parungutunguton dohot parsalisian di roha ni angka dongan na martangiang i, ndada boi nasida martangiang dohot denggan. Martangiang do angka sisean i dibagasan haserepon sahat tu na taralus tangiang nasida i. Dilehon do tingkina asa martangiang.

C.      Sipahusorhusoron

v  Hananaek ni Tuhan Jesus tu Banuaginjang ima sada puncak ni panangkokhon ni Kristus dibagasan hamuliaon ni Debata. Dipabangkit, dipatimbo, jala laos dipasangap Debata marhite na hundul disiamun ni Debata (Mark.16:19; Heb.1:3-4). Hananaek ni Kristus tu Banuaginjang mamuha dalan jala gabe jaminan tu angka na porsea ia hita pasidohot do dipahehe jala dipatimbo Ibana. On ma na gabe pangkirimon tu angka na porsea, nunga diparade Kristus inganan tu hita na porsea di Ibana. On ma sada kepastian di hita hangoluan na salelengnilelengna. Hananaek ni Kristus tu Banuaginjang laho mangangkat status ni angka na porsea gabe panean di Harajaon ni Debata. Songon panean ni Harajaon ni Debata naeng ma tapatuduhon citra-diri ima imago dei ni Debata songon ruas ni Harajaon NI Debata ala hita do na gabe sitindangi ni Kristus di portibi on.

v  Asa hita saluhtna na gabe sitindangi ni Kristus sai tongtong patuduhon komitmen dohot tanggungjawab laho mambaritahon Barita Nauli i marhite keseriusan, haserepon ni roha, pangoloion jala hasatiaon. Hita ma angka anka ni Debata na tarjou gabe sira dohot panondang di portibi on jala gabe pasupasu tu humaliangta. Amen.