Manjamitahon Barita Na Uli Sian Nasa Roha
(Memberitakan Injil Dengan Segenap Hati)
Roma 1: 8 – 15
1.
Tarbarita
do surat Rom songon sada ojahan ni ulaon reformasi na binahen ni Martin Luther.
Deba ma i siala jumpang dibagasan surat on angka poda teologia na hantus,
lumobi ma i taringot tu hatigoran, haporseaon, patik, uhum, dosa dohot na asing
dope. Deba sian i nunga tarida nang di turpukta on. Alani i do umbahen na
digoari Martin Luther surat Rom on evangelium na mansai paltak jala tegas. Pola
dope didok ibana, asa diguruhon halak Kristen ma nian surat on. Kata demi kata
(wort fur wort). Ima Alani argana jala pentingna. Denggan do molo
taparrohahon na pinangido ni Martin Luther i. Jala ujionta ma jolo mangihuthon i
nang pe so apala saluhutna hata na di turpuk on tasulingkiti. Ringkot do muse
botoonta paboa apala ayat 17 i do dibahen par-Padan na Imbaru na gabe tema ni
sude surat Rom.
2.
Ay.8-9;
di ayat on nunga manigor tarida keadaan ni huria Rom. I ma sada huria na
marhaporseaon jala haporseaonna i tung tarbarita do sahat tu liat portibi on.
Ai so adong dope surat kabar hatiha i, beha do umbahen na boi tarbarita haporseaon
nasida ? Tontu boi do sungkunonta sisongon i. Tutu do i, alai molo taingot huta
Rom do na gabe ibu kota ni harajaon Rom, na mangarajai sahat tu “liat portibi
on” tontu ndang pola longang be roha disi. Ai mansai godang do na haruar-masuk
Rom, angka pegawai, partigatiga dohot na asing, gabe boi ma begeon jala botoon
nasida taringot tu huria ‘na imbaru i’. Godang ma ingin tahu disi, dohot do
taringot tuhaporseaon nasida ditaringoti halak. Jala sahat do barita i nang tu
si Paulus, na di huta Korint uju i. Angka haporseaon na denggan ni sadasada
huria sai tarbarita do sahat tu inganan na asing. Alai laos songon i do
sabalikna, angka na hurang denggan pe dipatupa huria i, mura do i tarbarita tu na
dao. Tontu nunga boi botoonta, barita na beha sian hurianta be, na sahat tu ‘ruar’.
Jamita on mangido tu hita asa hapaorseaonta i ma nian tarbarita, unang ma angka
na hurang denggan i. Siala haporseaon na tarbarita i ma umbahen pola mandok
mauliate si Paulus tu Debata marhitehite Jesus Kristus. Jala hata hamauliateon i
do apala na parjolo isi ni suratna i. Ndang hea apostel i lupa di nasida, pola
digoari sitindangina taringot tusi. Luar biasa do i marningot huria ni Tuhan i laos
ulaon na denggan do hape i. Beha ma tutu boi iba manghamauliatehon huria ni
Tuhan i molo so pola hea niingot i.
3.
Ay.10-15,
tarida do beha sihol ni roha ni apostel i pajumpang dohot huria Rom. Ndang
holan pasombu siholna, alai mardongan sangkapna umbalga sian i dope. Pola do
ditangianghon ibana i, ndang holan sahali alai jotjot do. I do na nidokna: “Tongtong
di angka tangiangku”. Ndang marnabosan ibana disi jala rade paimahon
alus dohot lomo ni roha ni Tuhan i. Dihaporseai rohana do, na Debata do na boi patiurhon
dalanna manopot huria i. Sangkapna pajumpang dohot huria i, ima asa boi
masilehonlehon di angka silehonlehon partondion i. Sharing ninna hat ana somal
tabege. Marhitehite i gabe boi marsipatoguan roha. Asa lam tumangkas i, naeng
do paresoonta satongkin ayat 12 i. Songon on do na nidokna: On do tahe:
Naeng dapotan hiras ni roha nang ahu sian hamu hinorhon ni haporseaonta be,
lapatanna; asa rap dapotan hiras n iroha hita sude, ahu marhitehite
haporseaonmuna, hamu marhitehite haporseaonku. On do parjumpangan ni halak
Kristen, parjumpangan dibagasan haporseaon. Molo so mardongan haporseaon do
parjumpangan i, ndang boi i mambahen hiras ni roha manang apulapul. Ndang boi i
patoguhon roha ni dongan. Jala ndang boi i mangalehon parbue tu dongan (ay.13).
Gariada parjumpangan na so mardongan haporseaon patubuhon angka na hurang
denggan do i. Sipata tahi na jahat dohot bada do parbue ni parjumpangan na so
mardonganhon haporseaon.
4.
Nda
jotjot do hita manopot angka dongan ? Taboan do haporseaon tusi? Ndada gogonta
mangalehon silehonlehon partondion i, alai parbue ni haporseaon do i. Ndang
holan si Paulus patoguhon roha ni huria i, alai dohot do huria i patoguhon roha
ni si Paulus. Asa boi ingkon kedua belah pihak do marhaporseaon. Sharing
ma molo sude nampunasa, ndang holan
manjalo manang mangalehon, alai rap mangalehon jala rap manjalo do. On do na
hurang sipata di tongatonga ni hurianta. Sai hira holan pangula i do na
patoguhon roha ni huria i, huria i ndang pola patoguhon roha ni pangulana.
Ndang songon i, rap tarapul, rap marhiras ni roha do, i do nidok ni Symparaklethenai
di ay.12. Halak na rap marhiras ni roha i ndang holan halak Kristen na di Rom i,
alai dipangido roha ni si Paulus do asa sude jolma do. Halak Gorik bangso na
leban, parhapistaran dohot na hurang roha. Bangso na so mamangke hata Gorik.
Tung sude do tahe naeng dihamonanghon Barita na Uli na pinasahat ni si Paulus.
Jala utangna do i di roha ni si Paulus. Barita na uli na pinasahat ni si
Paulus. Barita na uli nang zending ndang marbatas i holan tu sadasada bangso
manang Bahasa. Sude do naeng paluaon ni Barita
na uli i.
5.
Ay.16-17
dibahen si Paulus do sada pengakuan na luar biasa taringot tu Barita na uli i. Didok:
“Ndang huhailahon Barita na Uli i”, lapatanna molo tung adong pe na
maila disi anggo si Paulus ndang maila. Nunga ditanda ibana i, ai hagogoon ni
Debata do i. Songon dinamit ni Debata do i na boi manguba saluhutna. Ndang adong
na mabalgahu manang mapirhu na so boi digarar ibana. Na boi paluahon angka na
naeng mago sian saluhut bangso, Jahudi manang gorik. Dibagasan evangelium i do
dipapatar hatigoran ni Debata. Molo so mar-evangelium hita, ndang jumpang hita
hatigoran ni Debata. Jala ndang taboto aha lapatan ni haporseaon. Ai hatigoran
ni Debata sian haporseaon tu haporseaon do i. Ndang tarsirang haporseaon sian
hatigoran ni Debata. Na mangolu do partigor i ala ni haporseaonna. Godang do na
manggoari dirina partigor, alai ndang na hinorhon ni haporseaon, ndang mangolu
na songon i. Digoari halak Siboto surat dohot Parise do dirina partigor Alani patik,
alai ndang na sian haporseaon, ndang mangolu i. Asa ndada ulaon alai haporseaon
do. On do na nidok ni si Luther “Sola Fide”, lapatanna: haporseaon sambing
do ! Alai disi dijaha ibana Rom 1: 17 on na mandok : “iustus ex fide
vivet” (partigor hinorhon ni haporseaon mangolu do) manigor tangkas ma
diantusi asing ni hatigoran hinorhon ni ulaon sian na hinorhon ni haporseaon.
Dison ma naeng patuduhonon ni surat on asing ni patik sian haporseaon hinorhon
ni Evangelium i. Barita na uli, hatigoran dohot haporseaon ndang na tarsirang i
di bagasan ngolu ni halak Kristen. Molo naeng tandaonta do hatigoran ni Debata
ingkon tajangkon do Barita na Uli, molo naeng marhaporseaon do hita ingkon
marhitehite Barita na uli do (Rom 10:14). Antong tajangkon ma Barita na uli i,
unang tahailahon, ai hangoluan do i. Amen.
