Jamita Epistel Minggu XVIII Dung Trinitatis – 19 Oktober 2025

Nunga Tangkas Huida Bohi Ni Debata  

(Aku Telah Melihat Allah)

Lukas 18: 1 – 8

 

1)    Huria ni Tuhanta, ditariashon Tuhan Jesus do di Bindu on dua umpama taringot na martangiang. Parjolo: turpukta on (ay.1-8) i ma parompuan na mabalu na jugul mangido. Paduahon (ay.9-14), i ma tangiang ni Parise na paboahon soara ni ogungna dohot tangiang ni sijalo beo na manompuk andorana mangido asi n iroha siala dosana. Diturpuk on diondolhon do paboa na haru sada panguhum na geduk do mambahen na denggan mangoloi Pangidoan ni parompuan  na jugul mangido i. Lam beha ma Debata, lobi umburju dope.

2)    Ay.1; Ndang pola dipaboa dison tingki ni pangkataion on. Alai marhite pandohan “Dung i dihatahon ma tu nasida”, boi patuduhon na Sarupa angka na hadir i tun a hadir di bindu na manjoloani bindu on. Di hata aslina didok : Σλέγέν αύτόϊς (dihatahon tu nasida) na martudutudu tu angka halak na hadir di jol oni turpuk on. Tuhanta paandarhon ringkot ni tangiang ai adong do hubungan ni tangiang dohot panomunomuon di haroro ni Jesus paduahalihon. i do asa didok Jesus, “dungo ma hamu tongtong mardongan tangiang” (Luk.21: 36). Uju martangiang sasahalak, jala ndang manigor diida ibana adong tanda na alusan ni Tuhanta tangiangna i, mura ma ibana gale. Tuhanta mandok, “Ingkon tongtong nasida martangiang” berbeda do on tu ajaran Judaisme tingki i na mandok holan tolu hali do maksimum sadari sasahalak martangiang.

3)    Ay.2-3; Ia panguhum i ndang dihabiari Debata jala ndang dipardulihon jolma. Berbeda do on sian II Korint 8: 21 “Ai hupingkiri hami na patut ingoton di jol oni Tuhan I, nang di jol oni jolma”. Panguhum i holan na dikendalihon ide dohot pingkirana do. Di tingki i, ia angka panguhum na niangkat ni si Herodes dohot na pinabangkit ni panggomgomi Rom, terkenal do na so sihabiaran Debata huhut na so sipardulihon jolma. Olo do halak on manggantihon hatigoran asal ma dapotan sampotong jagal. Molo ndang sanggup sasahalak panggugat mangalehon “jagal” na tabo, tagamon talu ma ibana di parkaro. Sandok tarbarita ma tingki i angka panguhum na papeolhon uhum. Tu sahalak panguhum sisongon i ma ro sahalak parompuan na mabalu laho memohon keadilan. Ianggo mangihuthon pamerengan ni uhum, magopo do haroro ni na mabalu i. Ndang sanggup ibana mangalehon sisip tu panguhum i. Jala ndang adong halak na pudina laho mendesak panguhum i manghatindanghon hasintongan. Nunga nian pasti alona i do parsala. Ai di hata aslina, αντίδίκόύ do didok. Lapatanna ia alona i pasti do di pihak na sala, ai anti ni kebenaran do. Alai nang pe songon i, ndang adong gogo di na mabalu i. Keadilan do na jinalahanna, ndang balas dendam.

4)    Ay.4-5; tekun do parompuan na mabalu i mangidohon keadilan tu panguhum i. Ala ni ketekunan gabe dipintori ma ibana. Mabiar muse panguhum i so tung ro ma na mabalu i manggariangi ibana. Kata kerja na dipangke (mandok “manggariangi”) i ma ύπωπαξη na marlapatan: menjemukan, menyusahkan, memukul, meninju dan melatih secara keras.

5)    Ay.6-7; naboi do hape panguhum na geduk sipata patupahon pamintorion. Dao umboi muse do Debatanta i mamintori halak na porsea. Debata do mamintori na porsea, i ma na manjou Debata arian dohot borngin. Sadar do na porsea i paboa mansai godang do hinaringkot ni ngoluna. Laos diokuhon do, holan tu Debata do boi manghirim di sude hinaringkot ni ngolu i. Ianggo holan manghirim di portibi on do, kekecewaan dohot kegagalan do hasilna. ANgkup ni on, berengonta ma kalimat terakhir di ay.7, “tung pangerngeronna ma di nasida?” Adong penafsir mandok, ia “nasida” dison martudutudu tu angka sipangalo Debata. Gabe pangerngeronna ma di nasida asa adong kesempatan marhamubaon ni roha. Penafsir na asing mandok ndang tu sipangalo alai tu naung pinillit ni Debata do si pangerngeron. Tujuanna: margogoihon naung pinillitNa i asa Manahan uju hagogotan. Hata aslina μακρόθύμέί έπ αύτόις (mereka) dison sesuai tu penafsir na parpudi nangkin ma.

6)    Ay.8; Tibu nama ro pamintorion i. Hata “magira” dison lapathononta do tu pengertian ni “tingki ni Debata”. Ai didok di II Petrus 3: 8 “Alai tangkas ma ingot hamu, angka haholongan: Sada ari do di Tuhan i songon saribu taon, jala saribu taon songon sada ari!” Pasti do masa pamintorion ni Debata na magira i uju ro tingkina. Di na sinungkun ni Jesus manang tagamon do jumpang ni Anak ni jolma i haporseaon di tano on di haroroNa i, ndang na mandok na so adong be na porsea. Na nidokNa i ma ciri ciri ni jolma na holan manghirim di tano on uju haroroNa i, i ma ndung jolma na marhaporseaon. Ndang okuhononnasida dalan ni Debata jala ndang be idaon nasida pamintorion tu halak na pinillit ni Debata.

7)    Huria ni Tuhanta, sian turpuk on adong piga piga siputihonta ima:

Ø  ia parompuan na mabalu on sitiruon do habaranionna laho manjalahi hatigoran. Adong alona parsala, ndang mabiar na mabalu i mandok na sala do alona i. Ianggo sian haadonganna manang na mam-back up ibana. Alai ndang mampu hapogosonna i mangambai ibana mangalului asa jongjong hatigoran. Hasintongan/keadilan ndang be milik segelintir orang berada, alai gabe milik ni sude lapisan Masyarakat.

Ø  Sitiruon do nang ketekunan ni namabalu i mandok asa dipintori panguhum i ibana maralohon alona i. Sampe pola do merasa panguhum i na dinengnengi na mabalu i ibana. Gabe saut ma dipintori panguhum i parompuan i. Taida muse ma panguhum na geduk i. Nang pe sahalak na geduk ibana, na boi do dapot sian ibana pamintorion. Asa ndang pintor “apriori” hita marnida angka pardosa. Sai boi do dapot na denggan sian nasida. Ala ni i do asa ingkon taarahon jamita dohot parmahanionta tu pardos ana geduk. Taarahon ma nasida marhite Hata ni Debata asa muba sian dalanna na geduk i.

Ø  Ingkon tongtong do hita gabe sipartangiang. Na so tupa lemba laho manomba Tuhanta. Parjolo; mamuji Debata siala hasongkalonNa. Mangihut ma mangido na ringkot tu hita. Tadatdati ma martangiang, jala unang kebutuhanta i tabahen suhatsuhat ni silehonlehon ni Debata na songon alus ni tangiangta, alai lomo n iroha ni Debata do suhatsuhat. Ndang jadi mandele molo so pintor dialusi Tuhanta tangiangta hombar tu suhatsuhatta.

Ø  Debata Jahowa do na taokui Alamat ni tangiangta. Tu Ibana ma hita mangalualu, ai Ibana do na mamintori hita. Molo dung tahaposi Debata do silehon tua di hita, unang be hita marlaok. Unang be laho hita tu angka debata hepeng, hasangapon, huaso dna.

Ø  Topik ni Minggunta mandok : Nunga Tangkas Huida Bohi ni Debata. Tangkas taida BohiNa i marhite hagirgironta laho martangiang, dohot di hatoguon ni haporseaonta. Marnida Bohi ni Debata ala jonok jala solhot tu Debata di panggulmiton ni ngoluna. Molo jonok hita dohot Debata na jumpangan hita do Ibana di ragam ni angka na masa dibagasan ngolunta. Molo nunga tatanda Jesus Kristus i di ngolunta laos tatanda ma Debata Ama i na paluahon hita sian ragam hageduhon, haholomon nang hamatean jala di pabongot hita tu hangolouan na saleleng nilelengna i. Parhaporseaon na haposan ma hita di jol oni Debata. Amen.