Pangapulion
Dibagasan Kristus
Pangungkapon
7 : 9 – 17
A. Patujolo
Ia buku Pangungkapon on
marrumang sada panatapan sian haporseaon ni sahalak naposo ni Debata na margoar
si Johannes, tu na masa sogot. Digoari do buku on di hata Gorik “Apokalipsis”,
na marlapatan Pangungkapon manang Wahyu sian Jesus Kristus tu si Johannes
taringot tu na masa di balik ni sejarah (partingkian sisaonnari), diujung ni
angka tingki dohot di angka banuaginjang i. Angkup ni i, buku on ma na ummaol
antusan sian sandok angka buku na asing i, ala disurathon marrumang angka hata
pangungkapon (sastra apokalipsis) dohot angka simbol na godang maol siat tu
roha, manang pamingkirion na modern. Alai torop do manguji mangantusi isi ni
buku on secara hurufiah, jala torop halak mamangke buku on songon ojahanna laho
mangetong andigan ma masa haroro ni Kristus paduahalihon i, na laos ari
paruhuman parpudi tu portibi on, atik pe tangkas do dipodahon Jesus tagan di
portibi on Ibana, ndang adong na umboto sadihari i masa, nda holan Ama i
sambing.
Ia latarbelakang ni buku on ima
na sinurathon si Johannes di ombas na masa pangaleleon na jorbut tu halak
Kristen di angka huria na parjolo i. Si Johannes na dimaksud dison i ma sian
angka apostel i, anak ni si Sebedeus (Mat.10:2). Dimulana marrumang sada surat do buku on, na
ditujuhon tu pitu huria na di Asia (1:4). Asia na nidokna ndada dos dohot Asia
na tatanda saonnari, alai ima sada propinsi ni harajaon Rom hatiha i, tar
sekitar Turki nuaeng. Huria na pitu i, i ma na margoar: Epesus, Smirna,
Pergamos, Tiatira, Sardes, Piladelpia dohot Laodekia. Ragam do pangalaho na
masa di ganup inganan hajongjongan ni huria i, na mardomu tu moral dohot
haporseaon, na maralo tu ha-Kristenon. Mansai godang dope panghorhon ni angka
pangalaho i tu ngolu ni angka halak Kristen na parjolo i. Angkup ni i mansai
gogo do pangaleleon dohot panggosagosaon tu halak Kristen hatiha i, siala ndang
diihuthon nasida be angka hasomalan ni sihatoropan na maralo tu haKristenon i,
isara na marsomba tu angka dewa-dewa, termasuk marsomba tu Kaesar na dirajumi
angka na torop hatiha i dos dohot sada dewa. Nian ndang apala sude kaesar
pasobokhon dirina dos dohot sada dewa. Alai kesar na di tingki ni Pangungkapon
on, i ma Kesar Domitianus na mangarajai sian taon 81- 96 M, tangkasdo
pasobokhon dirina songon sada dewa, na ingkon sisombaon ni sude warga ni
harajaon i (somal digoari na masa i “emperor
worship” na marlapatan: panombaon tu kesar). Manang ise na so unduk tu
aturan i, hona uhum ma i mansai borat. Mangae ma angka halak Kristen, ala nunga
dipodahon tu nasida na holan sasada Debata Jahowa di bagasan Jesus Kristus do
sisombaon jala sioloan di ngolu on sian sandok ngolu.
Si Johannes songon uluan di
huria di Efesus hatiha i, dihurungkon ma di sada pulo na metmet, i ma pulo
Patmos. Alai disi ma ro pangungkapon tu ibana di ari hatutuana i na disurathon
muse jala ditongos tu angka huria dohot halak Kristen na tangkas manaon na
porsuk siala ni pangaleleon na mansai jorbut hatiha i, asa unang sumurut nasida
sian haporseaonna, alai asa tongtong marsihohot dibagasan panghirimon di ngolu sogot, ai teanon ni angka na monang i ma disi
hangoluan na salelengnilelengna, alai hona uhum ma angka siihuthon parhuaso
manang na gogo ni portibi on na marinduk tu sibolis manang setan.
Deba sian pangungkapon na
pinapatar ni Kristus tu si Johannes, i ma turpuk on, taringot tu Paruhuman
Parpudi di ari sogot i, siadopan ni sude hajolmaon na mangolu manang angka
naung mate pe.
B.
Hatorangan
1. Ayat 9-11 : “Adong ma hubereng....”.
Dilehon Debata alus tu isi ni parungkilon na diadopi apostel i, i ma inganan
dohot na masa (situasi) las ni roha naung diparade Debata tu angka na burju
mangihuthon Ibana sahat tu ujung ni ngoluna, i ma surgo na so boi idaon ni
jolma di portibi on. “Mansai torop na so dapot bilangan ni jolma”;
manggombarhon balga dohot lambas ni inganan di harajaon ni Debata, i ma huria
naung marghamonangan (triumphant), huria naung niurupan ni Debata dibagasan
parnidaan na parjolo na berjuang dope di portibi on (crusis), i ma punguan ni
jolma na marharoroan sian angka torop bangso na so marbolat ala ni hata, houm,
parbangsoon, alai gabe sada bangso ni Debata. “Marabit na saksak”;
manggombarhon pangalaho, hadirion na polin, saksak, pita jala torang, tiur
songon panondang, pataridahon hamuliaon ni angka naung hehe tu hangoluan. Ala
naung dipaias jala diburi mudar ni birubiru ni Debata sian nasa
hajahaton/haramunon gabe ias nasida. Didok “Maniop maremare”; molo
ditaringoti maremare na naeng marningot pangalaho ni na masa di pesta las ni
roha , mamestahon ari raya parlapelapean marningot pandonganion ni Debata tu
halak Israel na mamolus parhorsihan, i ma dung malua nasida sian angka
pardalanan na borat sian Misir tu tano Kanaan. Molo di tingki pesta on na
jongjong do halak Israel di jolo ni
bagasjoro maniop maremare hombar tu 3 Musa 23:40-43; ptds.Zakaria 14:16.
Di pesta i huhut nasida mamujimuji Jahowa jala manjouhon Hosianna, Hosianna.
Zakharia manggombarhon pesta parlapelapean i tu pesta na ro sogot. Hira
tindakan na sarupa ma na masa di banuaginjang dibagasan diri ni angka naung
marhamonangan dohot las ni roha di parporangan ni ngoluna maralohon panurirang
pargapgap, nang pe dipasiaksiak nasida sahat ro di na mate, na so olo
diparhatoban ala naung sumeahon dohot mamelehon sandok ngoluna, hosana tu
Debata marhite parsihohoton nasida manghaporseaon di Jesus Kristus. Songon
panomunomuon ni panglima perang na manghamonanghon parporanganna, manang songon
panomunomuon di sada raja na marmulia, patudos tu panomunomuon ni na torop di
Jesus na mamashi Jerusalem.
2. Ayat 12 ; Pasahathon pujipujian.
Dipasahat do pujipujian laho pasangaphon Debata mangolophon asi ni roha naung
dijalo nasida sian Debata. Sian Ibana jala ala Ibana do umbahen adong haheheon
i (Harajaon ni Debata). Angka nasida i ma na ro sian haporsuhon godang naung
mamuri abit nasida jala dipasaksak mudar ni Jesus Kristus, na hum jongjong
humaliang habangsa ni Jesus Kristus dohot humaliang angka sintua dohot parngolu
na Opat i. Dung i manungkap ma nasida dijolo ni habangsa i huhut marsomba tu
Debata dohot marlas ni roha arian dohot borngin. Sintua na di jolo habangsa ni
Debata dohot Kristus, i ma na mewakili Huria ni Jesus Kristus sepanjang zaman
di surgo i, songon gombaran ni 24 Devisi Hamalimon di Israel Nasional ( 2 Musa
19: 6; 3 Musa 19: 2; Mat.5:48; 1 Ptr.2:9; Pangk.1:6; 4:4; 5:10). Angka soara ni
ende dohot panindangion nasida dung masuk tu parsaoran na sun badia jala na
songkal dohot na marnalanala i, i ma:
Ø
Pujipujian : napatuduhon na sun
songkal do Debata Jahowa dibagasan Jesus Kristus i, nasa sangkapNa ingkon tulus
do sude (Jes.55:11)
Ø
Hasangapon: Na sun Badia do Jahowa
dibagasan Jesus Kristus, nasa hataNa ingkon saut do (Psalm.33:9; 119:90-91;
145:5)
Ø
Hapistaran: Na sun hina bisuk do
Jahowa dibagasan Jesus Kristus, na so hadodoan do pingkiranNa jala na so
habogasan do angka dalanNa (Jes.55:8-9; Rom.11:33)
Ø
Hamauliateon: Parasiroha jala
pardengganbasa do Jahowa dibagasan Jesus Kristus. Ndang olo mansadi holong
dohot asi ni rohaNa tu ganup jolma na setia tu IbaNa (Psalm.100:5; Jer.33:11)
Ø
Hagogoon: Na sun hinagogo do Jahowa
dibagasan Jesus Kristus, ai nasa na tinahiNa ingkon tulus do, ndang haambatan
manang aha (Psalm.24:1-2; 136:6-8)
Ø
Hatoguon: Na sun manongtong do
Jahowa dibagasan Jesus Kristus, na marmulia do IbaNa jala ndang marujung
saleleng ni lelengna (Jes. 44:6; 1 Kor.3:11; Heb.13:8; Pangk.1:8)
Ø
Salelenglelengna: Nasa na di Debata
dibagasan Jesus Kristus hot somubamuba saleleng ni lelengna, songon Debata hot
ro di saleleng ni lelengna.
3. Ayat
13 – 17: Upa sijaloon jala sidaion ni angka naung manaon ragam ni haporsuhon
dohot ragam ni angka pangunjunan (marsiak, marpogos, marlea). Ala satia
sahat ro di ujung ni ngoluna mangoloi dohot manghatindanghon Debata, i ma:
dijolo ni habangsa ni Jesus Kristus i do nasida mangoloi Ibana arian-borngin di
JoroNa. Marsaor dibagasan holong ni roha na rimpas, gok las ni roha dohot dame
na rimpas, dibagasan hasonangan dohot hamuliaon naung rimpas (sempurna)
salelengnilelengna. Ala ndang adong be anggukangguk, hamatean, na hona bura,
nang arsak, manang aha na hansit, iluilu dohot parmusuon, tung tarapul tahe
roha ni na rap dohot birubiru paskah i, i ma Kristus Tuhan i. Birubiru i do
mangaramoti nasida na manghaholongi nasida, na marasi ni roha mida nasida
(Ptds. Jes.49:10; 29:8). Kristus mangalehon aek tu angka na mauas, ai Ibana do
aek na mangolu (Joh. 7:38; ptds. Joh.6:48) Ibana do na mangalehon mangan angka
na male, ai Ibana do roti hangoluan i.
C.
Sipahusorhusoron
v
Tahaporseai do naung partohap hita di
parsaoranta dohot Debata marhite haporseaonta di Tuhan Jesus Kristus dung
tardidi, manghatindanghon haporseaon dohot nang parpadanan na badia i. Alai
ndang na rimpas dope parsaoranta dohot saluhut na badia i di jolo ni habangsa
ni Debata dohot Jesus Kristus saleleng di portibi on dope hita. Jala tangkas do
didok hata ni Debata, ingkon mamolus lan haporsuhon, pambebeon dohot hamatean dope
hita saluhut laho mamongoti habangsa ni Debata. Ai ndang tarbahen so hona lele
nasa na naeng marparange na daulat marhite Kristus Jesus saleleng di portibi
on, dalan papitahon dohot pasaksak haporseaon dohot holong ni rohanta dohot
panghirimonta tu ngolu na marlas ni roha di parsaoran dohot Debata raphon Jesus
Kristus di habangsaNa na di banuaginjang sisalelengnilelengna i. Sian zaman tu
zaman hasusaan bolon i sai tongtong do ingkon alamanna i. Alai di saluhut na
masa i, marhamonangan do halak Kristen i, ai ujung ni ngoluna ndada portibi on.
Ndada sitaonon hata parpudi di angka na porsea, alai ngolu na di banuaginjang i
do. Panghirimon na songon on ma margogoihon Huria, angka na porsea di portibi
on, ai marpungu do muse hita na porsea, maruloshon abit na bontar. Naeng ma
hita saluhut na porsea di Jesus Kristus
parade ngolunta, gogonta, hosanta laho mamongoti parsaoranta dohot Debata di
tingki naung binuhulNa i. Ai tangkas do didok Debata dohot Kristus : “Martua ma na mate dibagasan Tuhan i, olat
ni on. Tutu didok Tondi i, mansohot ma nasida sian parungkilon nasida, ai na
mangihut ma tu nasida na niulanasida i”.
v
Alai boha do tahe haporseaonta taringot tu ari
paruhuman sogot ? so datung ala ni zaman
na maju on, gabe holan rasionalis (mangasahon utokutok sambing) nama hita di
ngolunta on. Ujungna ndang tahaporseai be haheheon sogot dohot ari paruhuman i.
Ala ni i tauji ma jolo dibagasan haporseaonta manatap dao tu jolo tu tingki na
so tarbuhul alai na pasti, dung i hombar tusi ma hita mangula jala mangolu. Di
ujung taon parhuriaon sai tagori do parade diri tu ajalta be. Boha do na
paradehon diri tu ajalta be ? Hea do didok di jamita na sinurat ni Pdt.DR.
Justin Sihombing, “Sarihon Pangapudianmu” ninna. Asa naeng nian sari be rohanta
tu ujung ni ngolunta. Di sada tulisan ni Dr.Andar Ismail didok nasida; holan di
hamamate niba sandiri adong dua hal na mansai porlu paradeon. Parjolo,
parsirangan dohot angka na hinaholongan. Tadingkonon ma sude nasa na hea solhot
tu iba dohot ulaon, jabu, kendaraan niba. Ndang mura i. Hea do tarpingkir di
rohanta be, aha ma hata parpudi sidohonon tu dongan na solhot tu iba. Ise ma
nian didok roham na jonok tu lambungmu di hamamatem. Jala boha nian didok roham
goarmu dipaninggalhonmu, songon nidok ni pepatah: “Harimau mati meninggalkan
belang, gajah mati meninggalkan gading, manusia mati meninggalkan nama.” Goar
na songon dia tadingkononmu ? Napaduahon,
parjumpangan dohot Debata? Marlas ni roha manang mabiar, maila, mardua roha,
biahaton, marolopolop? Hombar do i tu pangaradeonmu. Songon dia ma dihilala
rohanta pandohan dohot bohi ni Tuhan i tu hita ? Lambok manang na murhing ?
togihononna manang usironna? Haolonna manang lotlotanna ? Apostel Paulus naung
parade diri, on do didok di 2 Timoteus 4: 8 :8 Diri nama di jolongku
tumpal hatigoran, silehonon ni Tuhan, Paruhum na tigor i, di ari sogot i tu
ahu; alai ndada holan tu ahu, tu saluhutna do tahe, angka na mangkaholongi
hapataronna i.Amen!
v
