Tuhan
Jesus na Mangapuli Hita
1
Tessalonik 4 : 13 – 18
A.
Patujolo
Ia
Huria na di Tessalonik, di ibukota Makedonia, ima sada huria na dipuji apostel
Paulus. Mansai borat do apostel Paulus laho pajongjong huria na di Tessalonik
(2:2), i do umbahen apostel Paulus mansai dihormati songon apostel ni Jesus
Kristus. Ditingki maringan di Korint do pe ibana, dipangido ibana do asa laho
si Timoteus tu huria Tessalonik mamereng keadaan dohot situasi ni huria i, jala
ala laporan ni si Timoteus do umbahen nataronjar roha ni apostel Paulus manurat
suratna on.
Tujuan
ni suratna on asa margogo huria i laho mangadopi parungkilon nasida, dohot
pasintonghon pamingkirion nasida taringot tu pangantusion na sala di ari haroro
ni Tuhan Jesus na paduahalihon i. Ai adong do na mararsak ni roha ala didok
ianggo halak Kristen naung mate andorang so ari ni Tuhan i, gabe ndang dapotan
hamuliaon di ari i.
Alai ro ma apostel
Paulus paingothon unang dietong nasida angka na sumurung, molo pe boi mangolu
dope di hatiha i. Ndang sumurung hita jolma sian angka donganta naung jumolo
monding, songon na nidok na deba jolma di portibi on.
Ala
ni iso tung dietong huria Tessalonik i muse, paboa jonok nama ari ni Tuhan i
gabe so porlu be ninna rohanasida mulaulaon. Gariada porlu do “kerja keras”
nasida huhut dibagasan habadiaon laho paimaimahon ari ni Tuhan i. AI jolma na
so mangula, unang ma ibana mangan ( II Tess. 3:10).
Ari
haroro ni Tuhan (parousia) i ma na gabe ari las ni roha di hita angka na porsea
i, ai di ari i ma hita dapotan haluaon na sasintongna. Haluaon i ndada mangonai
holan tu halak na porsea na mangolu dope uju di ari haroro ni Kristus, Alai
dohot do tu angka jolma na porsea naung jumolo monding sian hita.
Alai
ajaran taringot tu “parousia” i mansai jotjot do dihalupahon angka jolma di
portibi on. Hape, molo so taingot ari haroro ni Tuhan i di ari sogot i, gabe
harugian na bolon do i tu hita lumobi tu huria ni Kristus na adong di hasiangan
on.
Dibagasan turpuk on,
ro do apostel Paulus paingothon huria Tessalonik, asa porsea di ari paruhuman
sogot i, ai haroroNa i ndang boi etongon ni jolma pardosa on, alana hombar tu
lomo ni roha ni Tuhan i do !
Molo
tasigati Padan na Imbaru adong do 318 hali ditaringoti taringot tu Parousia (
ari haroro ni Tuhan Jesus na paduahalihon). Ala ni i, apostel Paulus paingothon
huria i, asa sude pangalahonta tapadenggan, ai adong do ari paruhuman sogot
jala disi do jaloon ni jolma i hombar tu na niulana be!
B.
Hatorangan
1.
Ayat 13 – 15: Apostel Paulus mangajarhon paboa
boi do tompu ro ari ni Tuhan i, jala boi do i ganup tingki na so panagamon ni
jolma. Lapatanna, ingkon diparade huria do dirina laho manomunomu ari ni Tuhan
i, ai ndang taboto manang marsogot-haduan ro Ibana. Ala ni i, unang sai angka
donganna jolma naung mate diarsakhon; ai dirimpu tudia ma annon jolma naung
monding i? Sai songon i ma holso ni halak Kristen na di huria Tessalonik,
dirimpu ni halak Kristen di huria Tessalonik sumurung nasida sian angka naung
jumolo mate i. On ma na diupayakan ni apsotel Paulus di hatiha i. Hape, na
rumingkot do di nasida asa angka na mangolu i pasintongkon dirina, asa boi
dijalo Tuhan i sogot di banuaginjang. Ianggo angka naung mate i, nunga
sonangnasida, nunga modom nasida ro disaleleng ni lelengna. Ndang didai nasida
be na hansit, songon hita jolma na mangolu on dope nuaeng!
Ianggo jolma naung monding dibagasan Kristus, tondina langsung raphon Tuhan Jesus, alai anggo
dagingna modom do sahat ro di ari haheheon sogot i ma di ari paruhuman i.
Lapatanna modom dibagasan Kristus, songon posoposo na pinapodom ni inana di
ampuanna sandiri, saluhut angka naung monding i.
Ala ni i didok si Paulus, unang gabe marsak rohanta
marningot angka naung monding i, songon angka nasung monding, songon angka na
leban na so marpangkirimon i. Alai marlas ni roha ma hita siala hamonangan na
gok na naeng lahonon ni Tuhan Jesus tu
hita di ari ni Tuhan i.
Dibagasan hata ni Debata dipaingot apostel Paulus do huria
i, asa tahaporseai do ari haroro ni Tuhan i. Molo hita angka na mangolu dope,
ndang boi jumolo dijalo Tuhan i sian angka naung monding i na mate dibagasan
Kristus. Ai halak na mate dibagasan Kristus ingkon parjolo do i dipahehe
Debata, sian hita angka jolma na mangolu dope alai na mangolu dibagasan dosa i.
Ndang adong hasurunganta sian nasida naung jumolo monding, holan pangulaon
siala ni haporseaon do na manontuhon ngolunta di ari sogot i.
2.
Ayat 16-18; Di ari haroro ni Tuhan Jesus na
paduahalihon i, ro do Ibana ,ardongan suraksurak, marsoara ma raja ni
surusuruan, tabege ma sarune ni Debata. Haroro ni Jesus dibagasan hamuliaon i,
joujouNa ma sude halak naung mate dibagasan Kristus, dung i hita angka na
mangolu sope di ari i.
Soara ni sarune ni Debata manjou sude jolma na porsea naung
monding nang na mangolu dope. Soara ni sarune i mamaritahon hamonangan
maralohon hamatean i, jala paboahon naung ro do sahalak Raja i ma Jesus Kristus
i. Raja na monang i do na manogihon angka naung monding, suang songon i nang
hita na mangolu on dope, taitonNa ma hita raphon surusuruan ni Debata laho
manomunomu Tuhan i tu langit on. Jadi olat ni i ma sai tongtong hita raphon
Tuhan i! Paubaonna ma dagingta na lea on, gabe doshon dagingNa na sangap i
(ptds. Pil.3:21; 1 Kor.15:51-52). Tu surgo i ma hita marlojong laho manean arta
na sumurung i di harajaon ni Debata!
Nuaeng, tahirim do hira ro ari haroro ni Tuhan i na boi
mangalehon las ni roha na sasintongna tu hita. Ai disi do hita angka na porsea
dapotan hamonangan dohot paradianan saleleng ni lelengna i, masipaidaan dohot
angka na porsea i naung jumolo monding sian hita
Antong, ala ni i naeng ma masiapulan hhita marhite angka
hata ni Debata na tabege i. Dison ma fungsi ni halak Kristen i :masiapulan”,
lapatanna olo mangalehon pangapulion tu dongan, asa manahan sahat ro di ujungna.
C.
Sipahusorhusoron
Ø Molo
taparrohahon dijaman na mubamuba on, jotjot do muba roha ni jolma, muba
pangalahona siala ni hagiot ni portibi on. Boasa? Ala hurang do panghirimon ni
roha tu Tuhan i. Hape didok do : Rom 12:2 Jala unang gabe sarombang hamu
dohot portibi on; alai gabe imbaru ma hamu, dung muba pingkiranmuna, asa tau
hamu manimbangi lomo ni roha ni Debata, i ma na uli, na hinalashonna dohot na
sun denggan. Mansai marasing do nian portibi on dohot na niigil ni
Debata. Asa hita angka siihuthon Kristus didok do anak bagabaga, naung
dibagabagahon haluaon tu ari sogot. Ala ni i ma molo muba pe angka jaman on
dohot portibi on unang dohot hita muba tusi, alai muba tu haimbaruon ma na
dihalomohon ni roha ni Debata.
Ø Taringot
tu Ari Sogot (Parousia); ndang hibul haporseaon ni na deba tu Debata Jahowa i,
ndang dope dihaporseai na adong do ari paruhuman sogot. Lalap do jolma tu angka
na tarida, alai tu Debata na so tarida i maol do tahaporseai. Mansai biar do
jolma tu hamatean alai mangulahon dosa ndang mabiar. Hape tu ari sogot i molo
nunga mabiar tu hamatean mabiarma nian mangulahon dosa.
Ø Marhite
turpuk on diarahon do hita asa unang
marsak marningot angka na tahaholongi naung jumolo monding. Ai jotjot do tabege
hata Memento
mori (ingot ari hamamatem) , asa molo marningot angka naung jumolo sian
hita naeng marningot hita pe haduan songon nasida do. Alai porsea ma hita di
ari ni Tuhan i na ro di sada tingki. Ai disi ma jaloonta hombar tu saluhut na
taula saleleng di portibi on, manang na denggan manang na roa. Ala ni i
taulahon ma na denggan binsan tingki parasian on dilehon Debata hita kesempatan
asa marhamubaon ni roha. Tuhan Jesus ma na mangapuli rohanta. Amen.
