Managam
Haroro ni Kristus Panguhum i
Jesaya
2 : 1 – 5
A.
Patujolo
Ia panurirang Jesaya mangula di tingki masa halumlamon
ditongatonga ni bangso Juda dohot Israel Utara. Dua harajaon on naung mabola
dung mate raja Salomo, terlibat di situasi na marbadai jala marmusu. Dibahen i
ndang boi be bangso na dua i patuduhon identitas nasida songon bangso ni debata
di portibi on. Harajaon Israel sisampuludua marga i nuaeng gabe ndang sada be,
gabe ndang margogo be nasida laho mangadopi angka bangsobangso humaliang
nasida.
Jongjong do si Jesaya di parsitongaan abad pa-8-hon BC
(andorang so Kristus), laho paboahon hata ni Debata tu angka raja dohot uluan
di hatiha i. Dipaingot do harajaon Juda asa marhaporseaon tu Jahowa, unang mangunsande tu angka bangso
na bolon isara Assur dohot Misir. Ai nang pe ro ancaman harajaon Assur tu
bangso i, unang gabe laho nasida mangido pangurupion tu Misir.
Mangula do panurirang Jesaya di harajaon Juda, mulai sian
Raja Usia, Jotam, Ahas dohot Hiskia. Tarmasuk tokh nasional do ibana, na
berpengaruh ditongatonga ni masyarakat. Parbinotoanna pe mansai godang, ala ni
diparrohahon ibana do sude angka na masa di harajaon Juda uju i. Ndang
marnaloja ibana laho paingothon angka dosa ni bangso i. Ndang holan dosa di
bagas joro, alai dohot do dosa di masyarakat na adong. Sandok ndang tarbahen
hohom pamanganna laho paidaida na masa di ngolu ni jolma di tingki i.
Adong do tradisi Jahudi mandok si Jesaya tarmasuk do
pomparan ni raja. Alai laos adong do mandok pomparan ni malim do ibana, marningot
hajojonokna tu angka malim uju i di ngoluna dohot parbinotoanna taringot tu
ngolu ni bagasjoro di Jerusalem. Asa mansai tajom do angka sipasingotna di
bagas joro.
Panurirang Jesaya sada contoh panurirang na sintong, na
barani jala na benget di ulaonna laho paboahon aturan dohot uhum hasintongan tu
bangsona nang tu bangsobangso na asing. Didok ibana, na boi do dipangke Debata
sadasada bangso di tano on gabe “alat” manguhum bangso Israel. Ai Debata Jahowa
i ma Tuhan na marhuaso lahomanontuhon sejarah ni angka bangso di portibi on.
Jadi, ingkon sude bangso di ari sogot i marsomba tu jolo ni Jahowa, mandok
holan dibagasan Ibana do haluaon na sasintongna.
Ia goar ni Jesaya marlapatan “Jahowa do haluaon”.
Disarupahon ibana do bangso Israel i dohot partogi Sodom dohot Gomora na gok
dosa i. Ala ni i sogo ma roha ni Jahowa marnida nasida, laos dijouhon do bangso
i marhite panurirang Jesaya asa mulak tu Jahowa huhut mangulahon uhum dohot
hasintongan.
B.
Hatorangan
1.
Ayat 1-2 : Dibuhai Panurirang Jesaya do ulaon
panurirangon marhite panindangionna paboa nasa na niidana didasori legalitas na
marharoroan sian Tuhan Debata sandiri do i. Marhite sian i ma gabe diantusi
ibana laho manurirangkon taringot tu na naeng masa maradophon Juda dohot
Jerusalem (ay.2). Molo tu tradisi kuno, jumpang do pangantusion ni halak hatiha
i ima : ia molo dolok na timbo dirajumi do i songon dolok na badia ima inganan
ni angka debata sileban (ptds. Pslm.48:2). Hombar tusi ma molo taparrohahon
ayat 2 i, dapot hita do pigapiga sitangkasanta do : a) Masa do sogot, diujung
ni angka ari. Diantusi angka na malo do i, ima sada tingki na dao sian tingki
ni panurirang i. Disi ma ombas ujung ni sejarah ni portibi on; jala ganup jolma
ingkon diuhumi do hatiha i. Laos boi do
goaran hata on martudutudu tu tingki/ ombas ngolu ni jolma di portibi on
di ari parpudi/haroro ni Jesus pa dua halihon (Hen.1:2). b) Bagas ni Jahowa di
punsu ni angka dolok. Dolok na nidok na
dison ima dolok Moria/Dolok Sion, ima inganan ni si Abraham uju naeng mamelehon
anakna si Isak uju i ( 1 Musa 22:2). Sasintongna Dolok on ndada na tumimbo sian
saluhut dolok, ala godang dope angka dolok na tumimbo di portibi on, tarlumobi
na adong di humaliang Juda: alai di ari sogot i: dolok Sion i gabe dolok na
tumimbo sian sandok dolok, ala saluhut dolok na timbo i ingkon patutoruonNa do
muse. Dison ringkot antusanta ia dolok na timbo on martudutudu do i tu angka
debata sileban; jala torop do jolma laho marsomba tusi. Alai Jesaya
mangondolhon marhite ayat 2 i: Debata Jahowa i ma Debata na tumimbo sian
saluhut debata nasinomba ni jolma. Ala masa ma di ujungna Jerusalem gabe
inganan ni hasadaon ni ganup bangso: na marasing sian huta Babel songon inganan
parbolatan ni jolma: alai ianggo Jerusalem gabe inganan parsaoran ni nasa jolma
na marharoroan sian sandok bangso.
2.
Ayat 3: Mansai torop jolma ro tu dolok na badia
i, ala nunga ditanda jala diboto nasida paboa dolok Sion nama tumimbo di sandok
portibi on: ala ni ido ragat nasa bangso ro mandapothonsa nangkok tu si manomba
Debata. Jala huhut nunga diokui saluhut bangso; Ia Debata Jahowa ima Debata
Sasadasa ndnag jumpang Debata asing sian Ibana. Diombasi tung ragat jolma na
masihol naeng mananda Debata sitompa saluhutna huhut rade jumangkon nasa
hataNa, uhumNa, tarlumobi parsombaonon dohot na marpardomuan tu ruhutruhut
manang etika parngoluon songon naung mananda Debata. Laos saurdot dohot i masa
ma ragam ni angka perubahan-perubahan na balga dibagasan ngolu ni jolma marhite
na manghangoluhon parsombaonon na sintong tu Debata. Asa masa do di na
sangombas i torop jolma manang angka bangso dohot houm manolsoli diri ala naung
marsomba tu angka debata na so marnosan manang naung mangulahon parsombaonon na
so marimpola jala huhut marisuang ditingki na salpu. Ala di tingki i dirajumi
nasida do naung jumpang dingoluna poda nang pangajarion na sintong. Tarida do i
marhhite pandohan na mandok : “Ai marharoroan sian Sion do sogot patik i, jala
sian Jerusalem hata ni Jahowa.” Dison diulahi si Jesaya sahali nari manaringoti
taringot tu jolma dohot angka bangso namaporus tu sion, ima hinorhon ni
namangeahi patik ni Debata (patik na sampulu i), suang songon i nang hata ni
Debata na marharoroan sian Jerusalem.
3.
Ayat 4 – 5 :Sada na tangkas naeng ondolhonon ni
turpuk on ima: Sion gabe sada pusat ni harajaon hadameon, jala dilumbahon do di
si taringot tu sandok jolma tarbahen rap mnian di harajaon i. Jala laos Debata
sandiri do bangkit gabe panguhum di si, i ma manguhumi bangsobangso marhite
hasintongan dohot habonaron. Molo nunga jongjong Debata gabe Panguhum
ditongatonga ni Sion, ima laho gabe patubu situasi na gok dame las ni roha na
tung mansai singkop. Asa ndada jumpang be disi hajahaton, dohot sangkapsangkap
na roa, laho mangago donganna jolma. Asa dihorhon i do perubahan bolon
ditongatonga ni ngolu ni jolma. (ptds. Mika 4:1-3). Na parpudi di turpuk on,
ima sada pandohan na gabe joujou tu pinompar ni si Jakob (bangso Juda) asa
unang tartading nasida sian angka bangso na asing na ro marrongoman tu
Jerusalem, asa pasidohot mardalan dibagasan dalan hatiuron i. Lapatanna
disoarahon si Jesaya do asa luhut bangso ni Debata patuduhon parngoluon na tutu
mangolu dibagasan hamubaon ni roha. Ala ni indada jumpang nasida haluaon, ia so
molo mangolu dibagasan sondang hatiuron. Ala holan haholomon, hagunturon dohot
hamatean do sitagamon ni nasa na mian di duru ni sondang ni Tuhan i.
C.
Sipahusorhusoron
1.
Hasadaon Dibagasan Kristus. Hita angka
naung tinobus dibagasan mudar ni Jesus Kristus didok do angka na porsea. Jala
haporseaonta i do na pasadahon hita songon huria jala Bagasjoro i do sada
lambang manang gombaran ni inganan parpunguan hatopanta. Mansai strategis do
pajongjong Bagasjoro i di sejarah ni bangso Israel songon lambang ni
parsadaannasida. Dung dipajongjong Raja Salomo Bagasjoro i mansai paltak
pangarajumionnasida taringot tu lambang ni parsadaan i. Sai diingot nasida do
i, dipature jala dipauliuli. Ganup taon do angka pangaranto na diparserahan na
digoari Jahudi diaspora laho manopot Bagasjoro i laho mamestahon Paskah. Alai
nuaeng didok ndada tu bagas ni Jahowa na di punsu ni dolok Sion na di Jerusalem
i na gabe tujuan ni ngolu ni halak Kristen. Songon naung tarsurat di Heber 12:
22-24 na torop dope halak mangolu di Hajahudion manang manghaporseai patik uju
so Kristen nasida. Alai naeng do muba tu dolok Sion ima huta ni Debata sambulo
ni tondi i do diarahon nasida. Hombar tu si didok angka penafsir, di situasi na
sinurirangkon ni si Jesaya di bindu 2: 2 on do parngoluon ni angka na porsea i:
Ima na marparsaoran di joro ni Debata ditongatonga ni HuriaNa. Disi do jumpang
pangajarion taringot tu angka dalan na niaturhon ni Debata, jala laos disi do
marparsaoran nasa jolma so marnida latarbelakang ni : parbangsoon, houm, dohot
marga. Asa i do tutu parsaoran ni huria i, i ma parhahamaranggion na niihotan
ni mudar ni Jesus Kristus Tuhan i. Tu si do hita dijou asa rade marparsaoran na
togu dohot Ibana nang dongan jolma. 1 Korint 12 : 27 “Alai daging ni Kristus do hamu,
jala ruas hamu sama hamu.” Efesus 4 : 6 “Sian Ibana do sandok daging i dipadomu
jala martomu, tiniop ni sude uraturat pangurupi, gabe lam magodang daging i
mangihuthon pangulaon ni ganup ruas di bagianna be, pinauliuli di bagasan
haholongon i.”
2.
Ia goar ni minggunta ima Minggu Advent I; na
mangondolhon eskatologis asa diarahon do sude ruas ni huria haporseaonna tu na
managam haroro ni Kristus na paduahalihon i. Jala rajumon ni ruas i do ia
haroro ni Kristus na paduahalihon i songon Panguhum laho manguhumi sude bangso.
Aha do sijamothononta di masa advent I on ? Tontu ingotonta ma na mardalan do hita
dibagasan hatiuron ni Jahowa (ay.5). Molo nunga dibagasan hatiuron ni Jahowa,
tiurtiur ma antong pardalananta, berengonta ma dia na so sitondongon dia do na
ramun, jala na dihagigihon ni Debata. Ndang marhuaso be disi gogo ni haholomon
manang sibolis i. Dijou do hita mardalan di hatiuron asa torus ma i mian dibagasan
ngolunta sahat na ro Kristus na paduahalihon i. Lapatanna manat na ma hita
mangalangka silangkaanta. Andigan ro Kristus i rade manang so rade ingkon
taparade torus dirinta di na managam haroroNai marhite angka ulaon asi ni roha,
angka ulaon na denggan na hombar tu lomo ni roha ni Debata. Amen.
