Taluhon
Hajahaton Marhite Ulaon na Denggan
Rom
12 : 17 – 21
A.
Patujolo
Ia
bangso Rom ima sada bangso na umbalga sian angka bangso na asing di masa
partingkian ni Apostel Paulus, ala parhuaso
na gogo do nasida uju i, manggomgomi godang harajaon di humaliangna. Huta Rom
songon sada pusat pemerintahan ni Romawi di hatiha i jala godang do halak sian
desa na ualu na marroan tu luat i, laho mangalului ngolungolu. Ala ni i boi
dohonon; godang do peluang nang tantangan di huta i laho mamaritahon barita na
uli. Nang pe Huria Rom sandiri ndada na pinajongjong ni Apostel Paulus.
Kemungkinan, angka halak Kristen na maisolat tu huta i do. Alai mansai sihol do
roha ni apostel i laho mandapothon nasida (Ul.Ap.19:21) tu huta i, anggiat
tarlehon ibana tu nasida deba silehonlehon partondion laho patoguhon rohanasida
(1`:11, 15:29). Ai utang do dirajumi apostel i na mamaritahon barita na uli i (
1:14). Ala ni ido disangkapi Ibana laho mamboan barita na uli tu huria i ( 1
:15). Uju na dibagasan pardalanan tu huria Korint dope ibana. Hombar tu sangkap
na i, marhite surat on, diigil ibana do anggiat lam ditanda huria i asi ni roha
ni Debata na so hasuhatan i, jala lam tarida ngolu na imbaru ditongatonga ni huria
i.
Ia
turpuk on, ima sabahagian poda ni apostel
i taringot tu ngolu hakristenon. Ia bindu 12 on ima songon sada ikhtisar
ni poda na khusus, jala dapot hita ma disi benang merah ni hangongolu ni halak
Kristen. Dipajojor do taringot tu etika Kristen marhite dogmatika na
mangondolhon taringot parngoluan ni halak Kristen ima asi ni roha ni Debata.
Marhite haporseaon i do angka na porsea i manjanghon asi ni roha ni Debata
dibagasan holong ni roha dohot ulaon na denggan. Ngolu na sai mangulahon
haholongon dohot na denggan ima parbue ni haporseaon ni halak na porsea i.
B.
Hatorangan
1.
Ayat 17a
: “Unang
baloshon hamu na jat alo ni na jat”. Hinorhon ni hasadaon ni pamatang
ni Kristus i (ay.16), dipodahon Apostel Paulus
do ruas i asa unang mambaloshon na jat alo ni na jat. Ndang adong sanga
di roha ni jolma na manailihon rohana nang pingkiranna tu Kristus laho mamalos
na jat alo ni na jat. Boasa ? Siala Debata do haholongon i, na ingkon mian do
haholongon i (Debata) tu tongatonga ni huriaNa, asa ndang siula pamaloson na
jat alo ni na jat be ia haholongon i. Jala haholongon ni Debata ima na gabe
sorminan dohot mual ni nasa haholongon ni ruas ni huriaNa jala mangerbang tu
duru ni huria i.
2.
Ayat 17b;
Ingkon manat do hita mangulahon na denggan. Molo taja ayat on sambolus sambing
sai hira na so boi do hita mambalos na jat marhite na jat. Jala dijou do hita
laho mangulahon na denggan tu sude jolma. Alai molo taparrohahon terjemahan di
Hata Inggris dohot Junani dapot hita ma gombaran na marasing sian ayat 17a
dohot 17b, sai hira so ada hadomuanna. Teks Yunani tu ayat on dilapati,
“perhatikanlah (hal-hal) yang baik menurut pandangan semua orang-orang;” (Hasan
Sutanto, 2003, hlm. 865) New
International Version (NIV) manerjemahkon, “Be careful to do what is right in
the eyes of everybody.” (=berhati-hatilah melakukan apa yang baik di
depan semua orang). Astuanna, dituntut do sian hita asa manat jala jaga molo
naeng mangulahon na denggan dijolo ni halak. Boasa ? siala ingkon sian
haporseaon dohot holong tu Debata do hita laho mangulahon na denggan i tu
dongan jolma. Molo haholonganta Debata haholonganna do donganna jolma (ptds. 1
Joh.4:21).
3.
Ayat 18;
Halak na marnampunahon holong na sian Kristus ima halak na olo mardame dohot
sude jolma. Molo na tarsurat di King
James Version (KJV), “If it be possible, as much as lieth in
you, live peaceably with all men.” (=Jika mungkin, sejauh itu
bergantung padamu, hiduplah berdamai dengan semua orang.) Kata “berdamai” dalam
ayat ini dalam bahasa Yunani menggunakan struktur kalimat aktif. Berarti, kita
harus aktif berdamai dengan semua orang. Selain itu, kata ini juga menggunakan
keterangan waktu present. Berarti, kata kerja ini (=hidup berdamai) dilakukan
terus-menerus. Jadi ingkon torus do hita na porsea siboan dame. Adong do lima
parsaoran ni dame on. Naparjolo : naolo do hita dipadame
songon halak pardosa dohot Debata na songkal i marhitehite Jesus Kristus. Napaduahon;
Naolo ma hita angka naung tinobus Kristus i mardame dohot dirinta sandiri.
Angka na so olo mardame dohot dirina sandiri ima na sai torus stress, ala sai
marsigorgor paraloan dibagasan roha. Napatoluhon: Naolo ma hita mardame
dohot dongan jolma. Lapatanna ndang siboan mara nang bada, ndang patubu
pargutugutuon manang parbolatbolatan. Napaopathon: Natarjou do hita
padamehon dongan jolma dohot Debata. On ma tugas zending manang marbarita na
uli. Boasa mansai ringkot on ? Mansai ringkot do asa unang gabe sarombang dohot
portibi on, boi do ala slogan “DAMAI”
gabe sipados sude angka ugamo na di portibi on, ndang luluannabe na sintong.
Ala ni i di jaman moderen on ringkot do baritahononta Barita Na Uli i laho
padamehon godang jolma dohot Debata.. Napalimahon: ima na tarjou do hita
laho padamehon angka dongan jolma na dibagasan parbadaan, manang
parbolatbolatan. Molo nunga gabe agen pardamean dipangido do sian dirinta asa
tontong marsihohot mangharingkothon i. Boha do hita ? Molo masa badabada, nunga
tardok si pardame hita napasangaphon Debata ? Manang sabalikna gabe hita do
patubu bada i ? dison ma ringkot dihita na mengevaluasi diri manang introspeksi.
4.
Ayat 19
: Ai didok do di Poda 20 : 22 Unang dok: “Ingkon marbalos bahenonhu na jat i.”
Marhaposan tu Jahowa ma ho tagonan, asa Ibana manumpak ho. Disi ro sosososo ni
Debata tu hita asa unang mambaloshon na jat, disosoi do muse hita asa pasahathon
tu Debata na tau paluahon hita. Panurat na tu halak Heber pe mandok di Heber
10:30”Ai tatanda do Ibana, naung mandok : Ahu do nampuna partubolon: Ahu do
mamaloshon.” Dung i muse : “Uhumon ni Tuhan i do bangsoNa”.
(Ptds.Rm.12:19). Jadi boasa disuru hita pasahathon pamaloson i tu adopan ni
Debata ? Siala Debata do nampuna partubolon i. Di Padan na Robi dipatorang do
taringot tu Bangso Israel na sai dihuphupi Debata mangalehon partubolon
dinasida. Dihaholongi do bangsona i, disi dibereng bangsoNa i nunga suda gogona
( 5 Musa 32:35-36). Dison ma Debata sandiri na patauhon tu hita, ia Ibana
sandiri do na marnampunahon pamaloson i di angka jolma na manggugai bangsoNa.
5.
Ayat 20;
Mangulahon
na denggan tu musu. Haholongon ni Kristus sai dipatuduhon do marhite na
mangulahon na denggan u angka na mangharingkothonsa; tarlumobi tu angka na
tardok musunta na mauas jala male. Mansai menarik do molo didok “musu”, na
marlapatan haholongon ni Kristus i ima haholongon na ingkon sahat tu angka na
tardok musu (seteru). Molo jumpang hita alo manangmusunta na mauas jala male,
pasombuonta do ? manang mangurupisa? Marhite haholongon na sian Kristus naeng
do tarida pangoloionta laho manesa dosa ni musunta dohot manghaholongi musunta.
6.
Ayat 21;
Taluhon
ma hajahaton i marhitehite na denggan. Ndang holan pasahathon pamaloson
i tu Debata, alai hita pe dipangido do asa manaluhon hajahaton i marhitehite na
denggan. Na marlapatan ndang holan Debata na mangula disi alai dohot do nang
hita. Parasinganna, Debata mangula laho patupa pamaloson tu angka na mangulahon
hajahaton tu hita, alai hita mangulahon angka na denggan tu angka na mangulahon
hajahaton tu hita. Alai ndnag diantusi portibi on i, ala so dijalo portibi on
panobusion ni Kristus i naung manaluhon hajahaton marhite na denggan. Holan haKristenonta
i do na boi mangantusi dohot mangulahon i. Boha do tu hita ganup marsadasada ?
Boi do dohononta mansai maol na mangulahon na denggan manaluhon hajahaton, alai
ndang adong na so tarpatupa Debata marhite TondiNa i ima Tondi Parbadia i, na
manguluhon roha nang pingkiranta patupahon i. Nga rade tahe hita gabe siula na
denggan laho manaluhon hajahaton i ?
C. Sipahusorhusoron
v
Dibagasan huria i pe, boi masa do tubu
parbadaan, ndang pola ulaanta pamaloson tu alonta, alai sandok tapasahat ma tu
Tuhan i. Berengma, ai na marlulu do Debata laho manguhum nasida na manggugai
huriaNa i. On do na mangungkap rohanta nang pingkiranta, boi masa do
ditongatonga ni huria i hagunturon adong antek-antek ni sibolis na marrumangkon
songon surusuruan. Boha do hita ? molo ro sahalak dongan Kristen na mambahen
jut rohanta dohot na mangasupi hita, tabalos do pambahenanna manang ndang ?
manang pinasahat do tu Debata ? Ingot ma angka dongan ia Debatanta i ndang lupa
jala na so perduli di pardangolanta, alai Ibana ima Debata na perduli, nang pe
sipata paloasonNa do masa angka panaritaan, alai ndang loasonNa sahalakta laho
mangadopi i. LehononNa do pangurupion marhite gogo sahat tu na mambalos angka
na manjahati hita. Ima providensi ni Debata tu bangsoNa. Disungkun do nuaeng tu
hita; porsea do hita di providensia ni Debata?
v
Haholongon.
Lam tamba do angka na pistar, na manjahai Bibel, dohot angka buku theologia
dohot tu angka pelayanan alai mansai maol do marsosialisasi dohot angka ruas na
asing, jala bangkol rohana mangulahon haholongon i marhitehite pangurupion. Ai
holan mangisi utokutokna do marhite manjahai buku as pistar alai mansai mahiang
do rohanasiada jala ndang margogo. Didok do di 2 Korint 8 : 21, Ai hupingkiri
hami na patut ingoton di jolo ni Tuhan i, nang di jolo ni jolma. Molo
tardok hita sahuria, manang pamatang ni Kristus naeng ma dipatuduhon haholongon
i marhite na mangulahon angka na denggan diadopan ni Debata dohot manisia.
Angka na manghaholongi Debata ima angka jolma na mamparohahon na nidok ni
Debata dohot na mangulahonsa. Laos songon i do nang angka na manghaholongi
dongan jolma ima na mamparohahon donganna jolma jala masuaha do mangurupi. Naeng
ma tarida semangat na mangurupi marhite haholongon i tu dongan jolma.
v
Mangulahon
na denggan balos ni na jat. Boha do pangkilalaanta
molo adong na manjungkati rohanta ? adong do na masa pangasungi tu ibana alai
gabe hansit rohana jala ndang olo be ringgas marminggu manang tu punguan. Alai
sabalikna naeng do marlulu rohana laho mambalos. Dison ma hita disosoi Apostel
Paulus asa unang mambalos na jat marhite na jat. Alai disosoi do asa tabalos na
jat marhitehite na denggan. Tapatuduhon ma sikap ni angka anak ni Debata naung
dipamonang dibagasan Jesus Kristus, ingkon monang maralohon angka sumbia ni portibi on, ingkon monang manaluhon
hajahaton marhitehite na denggan. Jadi ndang holan manesa dosa nang sala ni donganta alai huhut mangurupi musunta
manang angka na manjungkati rohanta. Ai sian hita do dijalo Tuhan i sikap na marpanari songon panarihononna di daging
nang partondion. Sikap ni Apostel Paulus naeng do manarihon partondion ni
bangso Rom, nang pe dijajah bangso Rom bangso Israel hatiha i, sai diigil rohana do
laho mambaritahon Barita na Uli i tu bangso i. Ai dijou do hita mangulahon na
denggan jala Debata mangulahon pamaloson i, sai marsangap ma Tuhan mian
dibagasan ngolunta. Amen !
