Mangurupi
Halak Na Pogos
Lukas
16 : 19 – 31
A.
Dibagasan turpuk on digombarhon do dua ragam
kondisi ni ngolu ni jolma na mansai marasing. Na parjolo: i ma na mora, ndang
apala dipaboa ise goarna holan pangalahona do dipaboa na mora ibana. Dipaboa do
tingki ngoluna di portibi on, ganup ari do marlas ni roha, mamahe pahean sutra
na rara dohot haen bontar na lamot. Jala digombarhon do paboa na so adong be na
hurang di na mora on, ai didok do na gok las ni roha ngoluna, jala ndang adong
be na so tuk patupaonna, singkop do di
ibana las ni roha i. Napaduahon, si Lazarus na pogos. Marharoroan sian hata Latin
do goarna i, lapatanna: “Debata do p[angurupi di ahu”. Mansai suhar do parsorionna
sian parsorion ni na mora i andorang di portibi on. Peakpeak do ibana ganup ari
di jolo ni pintu ni na mora i, jala gok baro do dagingna (ay.19-20). Jala ndang
adong na tau sipangasahononna sian dirina manang sisolhotna, jala ganup ari lam
manamba do pangontak ni na bernit i diae, ai ro do biang mandilati barona i. Gari mangusir biang na
mambahen lam balga bugang ni barona i, ndang tuk gogona, ba lam ma jongjong
lumobi mardalan laho manjujung baringinna. Singkop do las ni roha ni na mora i,
laos sungkot do haberniton diahap si Lazarus na pogos i andorang di portibi on,
atik pe jonok do inganan nasida ganup ari, boi mansiidaan mata, boi
mansigoraan, so adong na mangambati.
B.
Molo taparrohahon turpuk ndada apala diusir na
mora i si Lazarus na peakpeak di harbangan nasida. Diloas na mora i do ibana
peakpeak di inganan pamolusan, diloas do nang manganhon ebaeba na pistik sian
tangan ni angka tamue. Somalna ndnag marburi nasida dunghon simpul mangan, atik
pe ndang marsendok nasida mngan. Laho
paiashon tanganna, dibuat ma roti na denggan laho manghois na lohot di tanganna
i, laos dibolongkon ma roti i. I do ginoaranna ebaeba di bagasan turpuk on.
Dipaberengbereng na mora i dohot angka donganna na ginokhonna i do na niae ni
si Lazarus i tarmasuk biang na sai ro mandilati barona i, ai ndang adong na
holip sian mata nasida. Alai adong do hadosan nasida di ombasna be, na ingkon
boluson nasida, ima hamatean i. Rap marujung be do parsorion ni jolma di
portibi on, adong bonana laos adong do nang ujungna. Martiti be do saluhutna,
nina Parjamita sian si Salomo ( 3:1-8). Alai adong dope pardalanan dibalik ni
hamatean i, na ingkon bolusonta jala ndang adong suhatsuhat ni partingkianna ai
si salelnglelengna do pardalanan i, suhar be tu na binolus nasida andorang di
ngoluna. Tu banua toru do bongot na mora i dunghonsa mate ibana. Ia banua toru
on digoari do di hata Gorik: “Hades”; ingana paruhuman tu jolma alani angka
dosana. Disi ma jumpang api na so ra mintop na mansai mohop situtu alai ndang
mosok jolma i (jaha, Markus 9:43). Sai mangangguhi sahat ro di na patunggoripon
do ngadol ni jolma i ala ni hansitna di “hades” i ( Jaha, Mat.8:12). Tutu do
nadada soal lokasi hades on, alai soal kondisi dohot eksistensi do o n. On ma
gombaran ni hangoluan naung ditadingkon Debata, ndang diantoi Debata be jolma
na mian di kondisi on manang na beha pe gogo ni anggukanggukna, manang aha pe
na masa tu nasida. Sandok nunga dipaeleng Debata bohiNa jala ditundalhon nasida
na mian di hades on. Molo so diantoi Debata be ngolu ni hita jolma, holan
anggukangguk na so tarhatahon be hansitna sibolusonta.
C.
Ia si Lazarus na pogos i, diboan surusuruan do
ibana tu ampuan ni si Abraham dunghonsa mate. Tu ampuan lapatanna; mian di jolo
ni si Abraham, ganup ari diramoti jala disarihon Debata. Hombar tu haporseaon
ni halak Jahudi. Ia SI Abraham maringanan di banuaginjang do dunghonsa salpu
ngoluna sian portibi on, i ma inganan na singkop hasonangan dohot hasangapon
(jaha: Rom 4:11). Didok Jahudi do tu angka na daulat marroha molo marujung
ngoluna, nunga borhat ibana tu ampuan ni si Abraham ( jaha; 1 Musa 15:15,
Panguhum 2:10). Asa songon hades na tinaringotan nangkin i do nang inganan ni si
Abraham dohot si Lazarus, ndada soal lokasi alai soal kondisi dohot eksistensi
do, jala panghilalaan ni jolma na sahat tu si do na hinatahonna. Didok si ayat
23; inganan ni si Lazarus i di ginjang, na marlapatan ia hasonangan dohot
hasangapon na jumpang di si i ma di ginjang ni kualitas ni nasa hasonangan
dohot hasangapon na jumpang di portibi
on songon naung binolus ni na mora i. Suhar do na niae ni na mora i suang
songon i nang si Lazarus di ngoluna di portibi on tu ngolu na di balik ni
portibi on.
D.
Sian sungkot ni haberniton dibanua toru i,
manaili ma na mora i dompak ginjang, laos didok ma tu si Abraham asa disuru si
Lazarus naung marsonangsonang i manornophon ujung ni jarjarina tu aek laho
palamohon dilana. Ndada na mandok na boi do masipangkulingan jolma na mian di
hades dohot na mian di banuaginjang, ai torang do lung na bagas di parholangan
nasida laho mamolati na dua kondisi eksistensi ni ngolu on. Ia na naeng
hatahonon ni ayat 24 on ima parniahapan ni na mora i do. Na mangido asi ni roha
do ibana sian si Abraham, hape nunga salpu tingki parasian manang tingki
halehetanna (Kairos), ai di ngolu andorang di portibi on do rade Kairos i.
Ndang adong be Kairos molo dung mate jolma i, ai tingki aionios nama na
mardalan. Kairos i ma tingki na terbatas jala na laho salpu na jumpang di ngolu
di portibi on, alai aionios i ma tingki na so terbatas jala si
salelengnilelengna. Kairos, ima partingkian na pinasahat ni Debata tu hita jala
dijou do hita asa mamangke Kairos i. Urusan ni jolma do pemakaianna. Aionios;
ima partingkian ni Debata, ndnag adong mulana dohot ujungna. Urusan ni Debata
do i, ndnag urusanta pemakaian ni i, ndang adong manang aha n boi sihatahononta
di partingkian aionios on. Nunga tarlambat na mora i. Mangido asi ni roha do
ibana di na so tingkina, hape ndnag parasi ni roha ibana di tingki halehetansa
atik pe tuk situtu do sipatupaonna. Angkup ni i sai songon na marpanarihon do
ibana di na so tingkina. Disarihon do 5 halak hahaanggina asa unang dohot
nasida bongot tu banua toru mangae na hansit songon binolusna i ( 27-28). Dipangido
do si Abraham asa disuru halak manopot hahaanggina i laho pabotohon hinabernit
ni parniahapanna di banua toru i. Diboto do mandok tu si Abraham, Ompung ! Donganna
na mian di banua toru i do na naeng suruon ni si Abraham on, ai angka na mian
di kondisi dohot eksistensi disiala ni uhuman na sahat tu nasida be, i do na
tuk manghatahon hinahansit nbi banua toru i. Tutu nunga didok si Abraham tu
ibana na so adong pardomuan di nasida, jala nunga salpu tingkina laho
pasahathon pangidoan on.
E.
Tangkas do alus ni si Abraham tu ibana songon na
tarsurat di ayat 29 i. Nunga singkop surat ni si Musa dohot angka panurirang
dalan haluaon di nasida. Molo diulahon nasida do na nidok ni surat ni si Musa
jala dioloi na nidok ni angka panurirang, nunga terjamin nasida sahat tu ampuan
ni si Abraham, so pola ingkon adong na so rian banua toru patoranghon hansit ni
banua toru i. Ndang mungkin masa na pinangidona i. Aha pe dipodahon halak
taringot tu dalan tu ampuan ni si Abraham jala dalan pasidinghon banua toru,
ianggo hasintonganna nunga tangkas di buku ni si Musa dohot hata panurirang.
Ndang adong sihirimon barita na asing. Molo so unduk do nasida tu na nidok ni
si Musa dohot tu hata ni angka panurirang, ndang tarbahen nasida bongot tu
ampuan ni si Abraham i, baliksa tu hades do nasida bongot. Tutu tangkas do dihatahon
di buku ni si Musa (jaha 3 Musa 25), taringot tu taon Sabbat dohot Jubileum,
angka dalan laho mangurupi angka na pogos dohot hatoban asa malua sian
hapogoson dohot parhatobanon. Ndang boi adong manongtong na pogos manang hatoban ditongatonga nasida ( 5 Musa 15:4),
jala ingkon ringgas nasida mngurupi na pogos ( 5 Musa 15:8,11), ai nasida pe
hatoban hian do di jolo ni si Parao gabe ditobus Jahowa Debata ( 5 Musa 15:15).
F.
Ia dosa ni na mora i namambahen ibana bongot tu
hades, i ma dosa haholiton, ndang humusor rohana (compassion: tergerak hatinya)
manatap sitaonon laho mangurupi si Lazarus na pogos i, atik pe ganup ari
dipaberengbereng ibana. Dipeakhon ibana do sinadonganna i di ginjang ni saluhut
tarmasuk di ginjang ni hajolmaon. Dibahen ibana do sinamotna dohot tingki na
adong di ibana holan laho pasombu hisaphisap ni rohana sambing, so pola
memperdulikan pangontak ni hapogoson ni halak na dilambungna. Pulut do rohana
marlas ni roha ditongatonga ni halak na tumatangis disiala pangontak ni
hapogoson i. Didok rohana do peristiwa na somal masa do molo pajumpang dohot
angka na pogos, jala ruhut niportibi on do hapogoson i suang songon i hamoraon
i. Hukum alam na so tarpasoada do i. Hape ia ibana, hamoraonna i do na
manontuhon gaya hidupna, jala ndang diboto na adong do hadomuan ni hamoraonna i
tu sikapna maradophon halak na pogos, dohot tu ari paruhuman sogot. Tutu ndada
ala ni pambahenanta mangurupi angka na pogos asa malua sian hapogosonna dalan
bongot tu banua ginjang, alai dionjar kepastian na parsidohot do hita tubanua
ginjang i, rohanta laho mangurupi angka na pogos ( Ep.2:8-9).
G.
Sada syarat na sian Jesus Kristus laho
parsidohot di siamun ni Debata di ari sogot, i ma manarihon angka na pogos, na
lea, na dangol, na marsangkot bulung. Jala dipasobok Jesus do diriNa tu na metmet. Jadi manang aha
na binahen tu angka jolma na metmet, na mambahen tu Jesus do i (Mat.25:40). Sipasidingon
do nasa haholiton, na mambahen arta laho pasonang roha ni nampunasa sambing, ai
ndang sian arta i hangoluan (Luk.12:15). Ingkon adong do nilai sosial ni arta,
marlapatan tu dongan jolma. Lam godang artanta, lam tangkas ma pangurupionta tu
angka na patut, lam saor ma hita jala lam arga ma hita di jolo ni dongan jolma
suang songon i nang di jolo ni Debata.
Sai unang ma artanta mambahen hita holang sian donganta na humaliang hita. Sai
ingot ma jumolo hita manghilalaon sudena artai sian pasupasu ni Debata sambing
doi. ( BE.792 “Pasu-pasu
hami O Tuhan”) Amen.
