Bahan Jamita Evangelium Ari Pentakoste II, 20 Mei 2013

Debata Pasahathon Tondi Parbadia

2 Timoteus 1 : 3 – 10

      A.      Patujolo

Ia surat 2 Timoteus on, ima sada sian Surat Parmahanion na tolu i. ( 1 & 2 Timoteus dohot Titus) na sinurat ni ap.Paulus. Digoari do Surat Parmahanion, ala marisihon rumang parmahanion tu si Timoteus dohot tu si Titus, ro di angka panogunoguon tu nasida songon dia do nasida marmahani huria ni Tuhan na sahat tu nasida be. Surat 2 Timoteus on disurat uju tarhurung si Paulus di huta Rom, hirahira taon 65 M. On ma paduahon ibana tarhurung disi, ala ni i dihalal rohana jonok nama ujung ni ngoluna, ai ingkon pasahathon ni panggomgomi Rom ma tu ibana uhuman mate. Di na tarhurung paduahalihon on, mansai hansit dihilala, ndang boi ibana bebas, nunga dirante tanganna (1:16), jala dibahen songon halak  parjahat. Dihilala mansai tarpunjung situtu ibana. DI situasi na songon ima dihasiholi rohana pajumpang dohot angka donganna saulaon, lumobi si Timoteus naung dirajumi songon anakna. Ala ni marhite suratna on ditonahon do asa ro si Timoteus mandapothon ibana tu hurungan na di huta Rom i, huhut mangalehon panogunoguon na tangkas tu ibana, ai si Timoteus na ma dietong rohana  na boi mangganti ibana laho manorushon ulaon naung pinungkana i. Lumobi hatiha i ala mansai poso dope si Timoteus, hurang dope habaranionna laho manjamitahon barita na uli i, lumobi mangadopi angka parpoda haliluon na sai marusaha mangelaela ibana.

Ia si Timoteus i ma sahalak  na marharoroan sian Listra (Ul.Ap.16:1). Halak Jahudi do ibana, alai anggo amana halak Junani do. Denggan do panogunoguon parugamoon hajahudion tu ibana sian inana dohot sian oppungna. Ditanda ibana Barita na Uli i marhite si Paulus di Listra, dung i ditogihon ap.Paulus ma ibana donganna mangurupi ibana mamaritahon Barita n Uli i, mamungka sian pardalanan ni si Paulus na paduahon. Dibereng ap.Paulus halak na burju do si Timoteus, dung i ibana ma sada dongan ni si Paulus na mansai jonok tu ibana. Di manang piga surat na tinongos ni si Paulus tu angka huria, sai ditaringoti do goar ni si Timoteus ( 2 Kor. 1:1; Pil. 1: 1; Kol. 1:1; 1 Tess.1:1; 2 Tess.1:1; Flm.1). Dihatindanghon ap.Paulus do holan ibana ma sian angka donganna i na boi saroha, sapingkiran jala sapangkilalaan dohot ibana, na so mangalului kepentinganna sandiri alai kepentingan ni Kristus do. Jadi, ala ni jonok ma panghilalaan ni ap.Paulus tu ibana, nunga dirajumi si Paulus ibana songon anak sandiri.

Dibagasan turpuk ta on diapoi si Pulus do ibana, asa sai tongtong marsigorgor rohana mangulahon tohonan naung sahat tu ibana, jala marsitiopan tongtong tu angka poda dohot tiruan naung jinalona sian ibana, asa tongtong dirajumi i songon silehonlehon na dipalumehon Debata tu ibana.

      B.      Hatorangan

      1.       Ayat 3 – 5; Songon naung hasomalanna; Nunga dipabotohon Ap.Paulus paralealeanna dohot angka ruas ni huria na manjalo suratna i, nang tarlumobi si Timoteus anak haholonganna i, na gabe panean ulaon pambaritahon Barita Nauli i, manorushon ulaonna. Dipaingot ap.Paulus do ibana asa songon ibana ma si Timoteus manguduti ulaon i songon angka daompungna na jolo manguduti ulaon i (di Padan na Robi) sian sundut tu sundut. Las do roha ni ap.Paulus marnida parsitutuon ni si Timoteus manguduti ulaonna mambaritahon Barita Nauli. Asa pangalaho na mangguduti i do na nidok na taringot daompunasida i, ndada taringot tu inti pangajarion i ( ai nunga marasing pangajarion ni Jahudi dohot siihuthon Kristus). Ala diida Ap.Paulus do adong “Warisan Rohani” sian oppung ni si Timoteus, Lois dohot sian inangna Eunike na marhaporsean jala sibulus roha. Ai nunga dipabotohon ap.Paulus di 1 Tim.1:5 5 “Alai na tinembak ni patik i do haholongon sian roha na ias, sian panolopi ni panggora ni roha, nang sian haporseaon na so marlaok.” Jala di 1 Tim 1 : 18 “I ma podahon, songon na huampehon tu ho, anakkonku, Timoteus, hombar tu hata panurirangon najolo, angka na taringot tu ho, asa marhitehite i ho manahan di paraloan na denggan i.”Na boi buatonta impolana sian i, ima naeng do marsangkap ap.Paulus asa ingot si Timoteus ise do dirina; ima panean di ulaon mambaritahon Barita Nauli. Ibana ma na boi manguduti ulaon i sian ibana nang sian keluargana (regenerasi kerasulan).

2.    Ayat 6 – 7; Dipungka do turpuk on dohot hata “ala ni i”, na marlapatan na marpardomuan do sipaingotna on tu isi ni suratna na di ayat 5, na manaringoti “haporseaon ni si Timoteus na so marlaok”, dohot denggan ni panogunoguon na jinalona sian ompungna boru si Lois, dohot inangna si Eunike. Marojahan tu si, ma dipaingot si Paulus ibana asa sai “diparatarata” silehonlehon ni Debata na tu ibana, i ma tohonan na pinasahat ni si Paulus tu ibana marhite na mangampehon tangan. Silehonlehon i marpardomuan tu panjouon dohot pangampehonon ni tangan (ordinasi). Dijalo si Timoteus do i duansa, ima: silehonlehon tohonan dohot silehonlehon hagogoon laho mangulahon tohonan i. Na mangulahi na ma sipaingot on tu sipaingotna di suratna parjolo (pat.1 Tim.4:14). Di surat parjolo i dipatorang do, ia silehonlehon i sahat tu ibana marhite hata panurirangon, i ma hata dohot padan ni Debata na dihatahon di tingki pamasumasuon i. “pangampehon tangan”, i ma angkup ni silehonlehon ni Debata songon tanda na tarida. Dipaingot si Paulus ibana tongtong marningot panjouon na tu ibana, sohot silehonlehon na patut angkup ni tohonan i. Domu tusi  ingkon sai marsitutu ibana mamangke silehonlehon na patut angkup ni tohonan i. Domu tusi ingkon sai marsitutu ibana mamangke silehonlehon i singkop, jala ingkon sai paratarataonna i di ganup tingki. Songon na nidokna di 1 Tim.4:14, silehonlehon i dipasahat tu ibana marhite na mangampehon tangan si Paulus. Alai ingkon botoona do holan tanda na tarida do pengempehonon ni tangan i, anggo silehonlehon i sian Debata sandiri do, ndada ala ni pangulaon ni jolma. Jadi na nimaksud ni si Paulus di silehonlehon na tu si Timoteus, i ma silehonlehon khusus, na marpardomuan tu ulaon panghobasion ditonghatonga ni huria. Jala silehonlehon i porlu “diparatarata”. Hata Junani na dipangke tu si marlpatan do “marsigorgor dibagasan ngoluna”. Ndang jadi mintop i sian ngoluna. Boasa ingkon sai marsigorgor i dibagasan ngoluna ?, ala : “dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton”. Sian holong ni roha diapoi si Paulus ma si Timoteus na dihilala boi dope sipata gale jala tahuton manghatindanghon Barita Nauli i. Ndang patut be angka naposo ni Tuhan i mabiar, ai tu sude angka na mannjalo tohonan i dipasahat Debata do “tondi hagogoon, tondi haholongon dohot tondi pangarajaion diri”. Pangantusion ni “tondi” dison, hira dos do dohot silehonlehhon. “Hagogoon”, ima silehonlehon ni Tondi Parbadia laho mambaritahon patik ni Debata dohot barita na uli di ganup tingki dohot inganan na dihaporluhon. “Haholongon” ima silehonlehon na dihaporluhon ni angka parhobas, na sai mangadopi jolma di ragam ni pangalaho dohot situasi. “Pangarajaion diri” manang disiplin diri mansai ringkot laho pasidinghon biar dohot pangalaho sipalensem, masa bodoh manang sikap na so parduli tu angka pangalaho na paleahon Kristus dohot Barita Na Uli i. Dipapos si Paulus roha ni si Timoteus, paboa naung dilehon Debata do angka tondi sisongon i saluhutna laho manghobasi Kristus i.

     3.       Ayat 8: Ala naung dijalo si Timoteus angka tondi na songon i, dipaingot si Paulus ma ibana, “unang maila manghatindanghon Tuhan i”. Diakui si Paulus do, na boi tarunjun do pe si Timoteus gabe tubu hailaon di ibana, ala “Barita na Uli i haotoon do di angka na bisuk ni portibi on” ( 1 Kor.1 : 23). Pangunjunan i boi tubu secara tidak langsung, ala si Paulus dohot si Timoteus nunga dipadomu dibagasan haporseaon, songon ama tu anakna. Hurungan na tu si Paulus boi do manghorhon hailaon tu si Timoteus, songon warga ni harajaon Rom. Alai ndang didok si Paulus na tarhurung ala ni harajaon Rom ibana, alai “tarhurung humophop Tuhan i” do. Lapatanna tarhurung ibana ala ni hadirionna songon apostel ni Kristus do, jala adong do sangkap ni Kristus marhite na tarhurung ibana. Diapoi si Paulus ibana , asa sadar di pangalaho i jala asa dohot rap dohot ibana manaon ala ni Barita na Uli i. Tarulahon ibana do i siala hagogoon na sian Debata.

     4.       Ayat 9 – 10: Dung dilehon sosososo na bersifat praktis asa parsidohot  si Timoteus di sitaonon ni si Paulus na tarhurung i, masuk dope ibana muse tu sada poda na balga na bersifat teologis di surat on, na gabe ojahan dohot motivasi tu angka siulaonna.Diparade Debata do hagogoon tu naposona laho mamorsan angka sitaonon na dokdok na dihorhon Barita na Uli i ala Ibana do Sipalua hita. Hata “dipalua” di ayat on martudutudu tu sada fakta sejarah, i ma ulaon penyelamatan naung pinatupa Debata. Na masa do i marhite hamamate ni Kristus Jesus. Saluhut jolma nunga tarihot tu angka hagiot ni portibi on, tarihot tu uhum ni Debata, jala tarihot tu angka halak na so olo unduk tu Debata. Alai marhite asi ni rohaNa dipalua do hita sian saluhutna i. Ndada holan i, laos dijou do hita marhite panjouon na badia i. Dipasahat Debata joujouna asa haruar hita sian ngolu na sirang sian Ibana, laho manean ngolu na marsaor dohot Ibana. Dibagasan ngolu na imbaru i, saor hita tu habadiaonNa, i ma marhite na dipintori hita, jala dilehon  huaso manean hangoluan dibagasan Ibana. Saluhutna i, Ibana do patupahon “ndada marguru tu ulaonta, tung sian tahina dohot asi ni rohana” do. Debata do martahi jala mamboan hita tu halasan ni haluaon i. Jala asi ni roha ni Debata dapot holan dibagasan pardomuan dohot Jesus Kristus, dohot pamorsanonna di dosanta marhite sitaonon dohot silang i. Silehonlehon i nunga disangkapi sian mulana. Jala aha naung tinahina sian mulana “nuaeng dipapatar”, gabe tarida tu saluhtna. (Titus 2 : 11). Sangkap ni Debata na buni hian dope nunga dipapatar dibagasan Jesus Kristus. Ulaon ni Jesus na paluahon dipatorang si Paulus marhite dua pandohan i ma : “pasohothon hamamate”, dohot “paullop hangoluan dohot hatongtongon”. Hamamate ni Jesus dohot haheheonna, i do na psohothon hamatean i. Dipatunduk i gabe so margogo. Angkup ni i dipaullop tu hita hangoluan dohot hatongtongon, songon hadirion ni Debata. Nunga sanga mago pasupasu i sian jolma ala ni hadadabu tu dosa. Alai ala panghophopon ni Kristus, gabe patar ma i tu hajolmaon, marhite Barita na Uli i.

      C.      Sipahusorhusoron

•  Tapagalak ma palitonta. Hita nahinaholongan ringkot asa jamot hita di namandalani ngolunta on, ringkot do taparbohali dirinta marhite “miak” asa mulak rata marhagogoon hita mamaritahon Barita Nauli i. Bohal i ima na paposhon rohanta, molo tabolus pe habahaba manang galumbang di na mardalan hita mamaritahon Barita Nauli i, ndang mabiar hita. Torus do hita mamolus habahaba manang galumbang i, gabe tolhas do barita nauli i tu inganan na tatuju.  Boi do gabe mago api hagaraon ni tondinta, ima molo ndang tutu be tahaholongi Tuhan Debata. Ingkon paratarataonta do silehonlehon ni Debata marhite TondiNa i laho manghatindanghon haporseaonta marhite Barita Nauli i, ditingki une manang na so une. Ganup ari ma taisi miak na pagarahon tondinta laho marbarita nauli, marhite na manjaha dohot na manangihon hataNa, huhut martangiang mangidohon pangurupionNa.
• Marhite Haporseaon di Ibana mandopang musunta. Na boi do musu i mamisat haporseaon  ni sasahalak, gabe haporseaon na marpengpeng, gabe adong tondi hatahuton dibagasan dirina. Alai molo taalo do musu i marhitehite gogo na sian Tondi ni Debata, gabe talu ma musu i, mandao jala mabiar. Molo Tondi hatahuton ndada ro i sian Debata, alai na rodo sian tondi na jahat sialo Debata ima pomparan ni angka Antikristus (bnd. 2 Tess.2:4; Pangk.21:8). Ala ni i laho mangalo tondi hatahuton i, dilehon Debata do tu hhita: Tondi Hagogoon (Luk.10; Mark.16:17-18), Tondi haholongon, na margogo manghaholongi Debata ( 1 Joh.4:19), dohot manghaholongi dongan jolma (Jona 15:12). Tondi haholongon na margogo manghaholongi musu manang na paburuburu hita (Mat.5). Dilehon Debata do muse tu angka siseanNa Tondi Disiplin jala na boi mengontrol dirina sendiri. Geb boi marhagogoon songon pinatupa ni Jesus di Markus 5, mangusir tondi na jahat. (bnd.Mat.28:20). Taingot ma na sai ro do sitaonon tu angka siihuthon Kristus. Alai Debata do na pasidinghon sitaonon ni sian hita. Marhite panjouonNa dohot na sai taisi ngolunta sian hagogoonNa. Selamat Ari Pentakosta II. Amen

Bahan Jamita Epistel Pentakosta II, 20 Mei 2013

Parbue ni Tondi

Galatia 5 : 22 – 26

      A.     Patujolo

Goar ni huta Galatia marharoroan sian bangso Kelt, mamuha sian taon 278 sM sahat tu Asia na metmet (Bangso Turki sisaonnari). Godang do huta i dipengaruhi sian budaya Hellenisme; na patomuhon adat ni Timur dohot Barat nang di ugamo dohot filsafat. Sahat do barita taringot angka parpoda haliluon na mangelaela halak Kristen di Galatia hatiha i. Ala ni i; Ia surat Apostel Paulus tu Huria di Galatia tinujuhon tu angka halak naung muba ala ni ulaon ap.Paulus, alai ruasna i dibagasan pangelaela ni angka parpoda haliluon na papeolhon hatigoran ni Barita Nauli taringot tu Haluaon ni Halak Kristen uju i. Jala mansai longang do roha ni ap.Paulus marnida hamumuba ni roha ni angka halak Kristen i sian haporseaonna (1: 2, 6-7). Pangajaran ni ap. Paulus di surat on marimpola ma i di bindu 5 dohot 6 ima taringot tu etika (pangalaho). Haluaon na jinalo ni angka na porsea di Galatia, ndada haluaon asa manghangoluhon pardagingon, alai haluaon na mangulahon haholongon dibagasan Tondi. Naeng ma didok roha ni ap.Paulus nasida boi manirang dohot mamulik diri sian angka parpoda haliluon na mandok haluaon i marhite na mangulahon parsunaton dohot Patik. Didok nasida angka kegagalan dinamangulahon patik i ingkon diae marhite na masuk tu bagasan bura. Dung i nasida pe sai mamuji ompunasida si Ambaraham na gabe sorminan nasida; ala marhite sunat do marpadan Debata dohot si Abraham. Ihutni i sai diusahahon nasida do laho manjehehon ap.Paulus marhite na manggugat haapostelonna. Mansai mura do terpengaruh halak Kristen na di Galatia ( 1:6). Ala ni ima dipaingot ap.Paulus huria i, ia Barita Nauli naung binoanna ima Barita taringot asiniroha haluaon nasian Debata sambing do jaloonasida. Ai nunga ditean Jesus Kristus bura ni Patik ima dosa i marhite silang i na gabe singkatta. Haluaon ni halak Kristen ima na mangolu dibagasan Tondi jala ndada na paolooloi hisap ni dagingna. Haporseaon dibagasan Kristus ima haporseaon na dinamis ala ni holong jala marhite i ma halak na porsea i mangulahon Patik ni Kristus i (4: 1-31; 5: 1 – 26; 6: 1-10).

B.      Hatorangan 

1.      Ayat 22 – 23;  Hata parbue dison na marlapatan na so dibaenbaen, alai martumbur sajo songon i. On ma      na mangatur panghalaho na marparsaoran jala angka prinsip ni parulaon hajolmaon siganup ari. Angka naung tubu paduahalihon marhitehite Tondi naeng ma mandalani ngoluna di na laho mamaritahon Barita Nauli i. Ala tung mansai dokdok do laho mamaritahonsa molo sahalakta paihutihut Tuhan i. Ingkon pangidoanta do gogo sian Tuhan i asa pinargogoanNa hita marhite TondiNa laho mamaritahon Barita Nauli i. Ala ni i ngolunta on ndada hita sandiri namarnampunasa, jala angka na porsea i, ndada ni rajaan ni daging i be, alai ni rajaan ni Tondi i do. Molo nunga mangolu dibagasan Tondi naeng dipatuduhon parbue ni Tondi i dibagasan ngoluna siganup ari. Mangulahon na ringkot gabe pasupasu tu humaliangna. Tung mansai godang dope angka jolma na so taruli Barita Nauli i. Nang di Asia, Afrika, Eropa,  Amerika dohot diangka luat na asing. Naeng tapatuduhon Barita Nauli i sian pambahenan marhitehite haholongon i. Naeng mangolu dibagasan Tondi na margogoihon hita patupahon saluhutna i. Marhite Tondi Parbadia i do boi tarpatupa hita na hombar tu lomo ni roha ni Debata i do umbahen didok muse di ayat 23 : “ndang maralo patik tu angka sisongon i”. On ma na ingkon taparrohahon sian pandohan ap.Paulus asa saluhut ngolunta dibagasan Tondi. Songon Kristus Jesus na mangalehon ngoluna tu hita jolma laos songon i ma angka siihuthon Kristus i sai na rade mangalehon; tingkina, rohana, nang ngoluna tu angka dongan jolma asa taruli hatuaon nang las ni roha. Paluahon angka jolma sian gomgoman ni sibolis, dosa, nang hamatean asa marngolu tondina jala margogo mandopang utiutiian ni sibolis, jala dapotan haluaon las ni roha nang ujungna taruli hangoluan na salelengnilelengna. 
2. 2.    Ayat 24 ; Ruas ni huria na di Galatia nunga ditobus jala Kristus na marnampunahon nasida. Nunga dilehon nasida dirina asa dididi jala diparsilanghon raphon Kristus i ( 2:19; 3: 27-29; bnd. Rom 6:6). Nunga ditotophon sada haputusan jala ingkon pinatuduhon dibagasan pangalaho siganup ari. Ingkon tapasiding angka hisaphisap ni daging, dohot hasomalanna. Ndada daging i be na mangarajai rohana nang partondionna tarlumobi. Asa di angka na nirajaan ni tondi portibi ima pardagingon sai na lomo do rohana dihisaphisapna, jala maralo tu partondion songon na nidok na di ginjang ni turpuk on ( Galatia 5:20 hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, bunubunu, parmabuhon, haormuson jala angka na suman tusi. Naung hupaboa najolo tu hamu, songon i do nang nuaeng: Ndang teanon ni angka na mangulahon sisongon i harajaon ni Debata). Tu angka nasida do hita disuru Tuhan i laho manondangi nasida. Molo nunga taihuthon Kristus nunga sangkambona hita dohot Ibana di sitaonon, hamamateNa, haheheonNa nang tu hananaekNa tu Banua Ginjang. Alai jotjot do lupa hita disi. SitanonNa laos sitaononta do i, hamamateNa laos hamamatenta do i, di haheheonNa laos di haheheonta do i, nang di hananaekNa laos hananekta do i sogot sahat di hasangapoNa i; haporseaon songon on ma naingkon tandap dibagasan haporseaonta. Haporseaonta i do na mamboan hita asa mangolu dibagsan Tondi. 
3. 3.    Ayat 25 – 26; Huria Galatia mangolu dibagasan Tondi na marlapatan martudutudu tu mual ni ngolu ndada tu ruhutruhut di hangongolu. Nggolu na jinakhon dibagasan Tondi ingkon dipapatar nang diulahon marhitehite Tondi. Molo sai mauas dihasangapon do hita, manjehehon, jala masihosoman, disi ma hita madabu tu pangalaho na mangkilala ia ganup parulaonta nunga denggan jala marguna dungi mangarop di diri asa nihormatan ni halak. Dibagasan pangalaho najengjeng jala jungking boi do sibonsiri roha na hatahuton na mandok halak na asing lam denggan ngoluna jala dapot parlabaan sian dirina, dna. Alai di hita na ginomgoman ni Tondi Parbadia ingkon pasidingonta do hisaphisap ni daging i, ai nunga disesa angka dosanta marhitehite mudar ni Kristus i. Naeng ma tapatuduhon ngolu na porsea na marhamonangan, ima manghamonanghon paraloan maradophon sibolis dohot dosa i. Saluhtna i tarpatupa hita hamonangan i molo sai dibagasan gomgoman ni Tondi Parbadia i. Taparangehon ma Tondi i, unang lemba hita di panggora ni Tondi i. Molo nunga niuluhon Tondi i hita, ndang adong be na marsilatean nang ngolu na rumar, alai tongtong dibagasan habadiaon; magigi ma ibana mida dosa nang pangalaosion i. Dipatuduhon ma ngolu na olo marparsaoran dohot manang ise pe; asa manondangi, patiurhon humaliangna marhite pambahenan na tama marguru tu pandok ni Tondi i.

      C.      Sipahusorhusoron

•      Marhite surat na on diigil ap.Paulus pangalaho ni angka naung manjalo haluaon sian Kristus, naeng ma mardalan dibagasan ngolu na badia na ginohan dibagasan Tondi Parbadia. Nang tu hita saluhutna naporsea, ima angka siihuthon Kristus, naeng ma ngolunta ima ngolu na dibagasan Tondi, jala marpangalaho dibagasan Tondi Parbadia. Asa di na tapestahon parningotan Ari Pentakoste II on, paingothon hita taringot tu na mangasahon huaso ni Tondi i dibagasan pardalan ni ngolunta siganup ari.
•          Tung mansai torop do jolma na manghalomohon hasangapon, hagabeon, nang hamoraon ni haportibion on. Naeng ma dipasangap ibana, manang adong na gila hormat, adong do muse patupa angka haulion ni pamatang, haulion ni luat asa dapot pujiapujian. Hape saluhutna i parsatongkinan do, na laho salpu do saluhutna i, ndang adong na manongtong na sian portibi on. Naeng ma angka na porsea dao sian pangalaho sisongon i. Molo tung mamora pe sahalak jolma ndada gabe ukuran asa marhasonangan jala dame rohana di portibi on. Ganup parbue ni angka haportibion (hisaphisap ni pardagingon)  ingkon malos manang mintop jala suda do ujungna. Poda 11:24 Adong deba halak na buas manaburhon, hape lam ganda do, adong huhut deba mangkolit hamoraonna, hape lam marpogospogos do. Angka na mangolu di haportibion dope, holan tu pardagingon i do i tama, alai maralo tu partondion. Molo dibagasan partondion sai na manongtong do panghorhon ni i. Sahat tu hangoluan na salelengnilelengna. Antong taparbuehon ma pangalaho ni parbue ni Tondi i, asa marhasongan hita. Amen. 

Bahan Jamita Evangelium Ari Pentakosta I, 19 Mei 2013

Tondi Parbadia Mangurupi Hita

Johannes 14 : 15 – 26

      A.      Patujolo

Molo tajaha mamungka sian bindu 14 sahat tu bindu 16: 33, ima hata partadingan ni Tuhan Jesus tu angka siseanNa. Molo tapaunur sian jujur ngolu ni Tuhan Jesus, sahat tu turpuk on, hira na mulak do hita muse tu masa ni ari haheheon. Boaboa ni Jesus taringot tu haborborhatNa tu “Bagas ni Damang”, mambahen bonsa roha ni angka siseanNa. Deba gabe patubu sungkunsungkun di roha ni angka sisean i. Hombar tu bonsa ni roha nasida i ditonahon Tuhan Jesus ma tu nasida, asa hot dibagasan haporseaon paboa Sada do Jesus dohot Ama i; hot mangulahon tona ni Kristus. Domu tusi diparbaga Tuhan Jesus do haroro ni Pangondian laho mandongani angka siseanNa. Marbonsir sian sungkunsungkun ni si Judas alais Tadeus;  “Boasa holan tu hami Ho papataron diri, ndang dohot tu portibi on ? Dapot roha do sungkunsungkun i, Parjolo; nanggo apala lumeleng nian nasida rap, jala napaduahon; asa unang hira pargabuson haheheonNa i. Dung i pasti do sai marhusari tu roha ni angka siseanNa, ia haheheonNa sian na mate, ingkon sai sarupa do i nian songon hatutubuNa tu sandok portibi on, ingkon sude umbotosa. Alai alus ni Tuhan Jesus tu angka siseanNa, i ma turpukta on. Asa mangula ma Tuhan Jesus marhite angka siseanNa, angka na porsea, angka na mangulahon hataNa na pinargogoan ni Tondi Parbadia.

      B.      Hatorangan

      1.       Ayat 15; Holong ni roha saurdot dohot haunduhon. Marhite haunduhon do dipatuduhon Jesus holong ni rohaNa tu Debata Ama, jala marhite haunduhon manang kepatuhan do dipatuduhon jolma na holong rohana tu Jesus. Lapatanna holong ndang persoalan hata alai ingkon tarida marhitehite pambahenan  manang parulaon siganupa ari. Manghaholongi Jesus ima mangaradoti patikNa, jala mangulahon hataNa. Didok Jesus di Johannes 15 : 10 Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana. Asa ndang persoalan na mura taringot tu holong, ai ingkon tangkas do adong haunduhon na marsitutu laho mangulahon patikNa ipe asa mian jolma dibagasan haholongon i.

    2.       Ayat 16 – 17 ; Pangondian ima Tondi na sian Debata. Tung godang do angka tantangan di na mangulahon patik ni Kristus i, tarlumobi ma ala ndang rap be sisean i dohot Jesus. Alai dipapos Jesus do roha ni angka na porsea i, marhite na marbagabagahon haroro ni Pangondian i ma Tondi Hasintongan, na somal didok parakletos. Adong dua hata na dipangke laho mangantusi hata Parakletos on, ima: comforter, lapatanna penghibur, dohot hata Helper lapatanna penolong. Alai halak Junani gumodang mamangke hata Parakletos dohot pangantusion: sahalak na dijou gabe saksi manang pembela tu sada halak na mangadopi proses pengadidlan. Manang sada halak na dijou mangalehon semangat na imbaru angka tentara na baru mulak sian parporangan. Asa sian i tarida lapatan ni hata parakletos, ima: sahalak na dijou laho mangurupi (ssorang yang dipanggil untuk menolong), asa angka na patah semnagat gabe angka na margogo manang na gagah berani. Hadirion na songon i ma na pinarbagabaga ni Jesus tu angka siseanNa i ma Todni Parbadia. Boi do hira na so margogo manang patah semangat angka sisean i ala marsirang dohot Jesus, alai marhite haroro ni Tondi Parbadia gabe margogo ma angka sisean dohot angka na porsea tu Tuhan Jesus. DI Joh. 16: 8 – 15 dipatorang do ia ulaon ni Tondi Parbadia, i ma: mangajari portibi on asa mananda diri songon jolma pardosa, paposhon roha ni angka na porsea taringot tu hatigoran di bagasan Jesus, paingothon portibi on taringot uhuman na ro sogot dohot paposhon roha ni jolma manghaporseai Jesus na tarsilang i do Sipalua dohot Tuhan ni angka na porsea. Tutu portibi on ndangmananda Tondi Parbadia alai anggo angka na porsea ditanda do Tondi Parbadia, ai dibagasan Tondi i do angka na porsea jala dibagasan ngolu ni angka na porsea i do maringan Tondi Parbadia.

     3.       Ayat 18 – 21; Jesus manongtong raphon dohot angka na porsea. Mansai borat do dihilala angka sisean i parsirangan dohot Jesus, Ala ingkon tadingkonon ni sahalak Guru na mansai sangap i nasida. Pola dipatudos tu na songon kehilangan sahalak ama ( yun orphanos = tanpa bapa). Lapatanna ndang adong be di roha nasida na bertanggung-jawab jala na tongtong mangalehon petunjuk taringot tu parngoluon nasida, ai borhat ma Jesus mandapothon Ama i. Alai disituasi na songon i do Jesus mandok: “Ndang tadingkononKu hamu so marama, na ro ma Ahu mandapothon hamu”. Haroro ni Jesus na nidokna dison i ma martudutudu tu haheheonNa sian na mate, ai nang pe dibolus Jesus hamatean alai mangolu do Ibana muse di ari patoluhon. Haheheon ni Jesus i do bukti kebersamaan ni Jesus dohot angka na porsea, i do umbahen didok Jesus “alai idaonmuna do Ahu, ai na mangolu do Ahu, hamu pe mangolu do” tutu hangoluan na nidok ni Jesus ndada terfokus tu ngolu pardagingon alai ngolu partondion do. Asa haheheon ni Jesus i do jawaban tu sude keragu-raguan na muncul di ngolu ni angka sisean dohot angka na porsea (ptds. 1 Kor. 15: 13-19). Jala haheheon ni Jesus papatarhon tu portibi on paboa Debata di bagasan Jesus, angka na porsea mangolu dibagasan Jesus jala Jesus dibagasan ngolu ni angka na porsea. I do umbahen diulahi Jesus mandok “Manang ise na maniop angka patikhi jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ama tu ibana.”

     4.       Ayat 22- 24; Ndang pintor Tondi Parbadia niondolhon ni Tuhan Jesus di ayat 23-24, alai dialusi Jesus ma sungkunsungkun ni si Judas (ay.22) marhite na mangulakkon (ay.21). Songon dia do tanda na holong roha di Jesus; i ma mangulahon tonaNa ndada mangambati halalaoNa (haboborhatNa). Denggan do molo tajaha ayat 18 laho mangalehon hatorangan. Taida ma sada dramatisasi parsirangan na mamboan angka sisean i mandele, alai didok Tuhan Jesus: “Ndang tadingkohonKu hamu so Marama”. Marhite tona na pinasahat ni Tuhan Jesus on, naeng padoshon sada tugas tu angka na porsea laho papatarhon saluhut holong ni roha ni Tuhan i tu liat portibi on. Ndang pola siulaon na dokdok nian tona on, mangulahon holong ndada diluar ni pingkiran ni jolma. Alai hal na sederhana do i, i ma mangulahon Hata dohot Patik ni Debata. Marragam do hataridaan ni holong ni roha di Tuhan i, sipatuduhonon ni jolma di ganup angka langka dohot ulaonna, isarana mambahen demak/aman angka na bobos marroha. Hubungan ni Trinitas nunga tangkas tarida sian ayat 24, ai na mangaradoti Patik ni Debata maringan ma “hami” di Ibana (yun menein: tetap didalam dan berdiam di dalam) i ma Tondi Parbadia.

Molo digombarhon dison hasitolusadaon, naeng patuduhononna do sada rahutrahut ni parsaoran na mansai rongking. Halak na manghilala parsaoran na rongking dohot Debata laos dohot nang tu donganna jolma, i ma halak na marholong ni roha. Jadi halak naung tangkas mananda hasitolusadaon ni Debata (trinitatis) jala manghangoluhon i dingoluna, tarulaon na do manghaholongi Debata dohot manghaholongi donganna. Sabalikna molo so dihaholongi Debata, jala ndang diradoti hataNa, ndang mian Debata di diri ni jolma i, pasti ma ndang talup ibana gabe hapataran ni Debata di portibi on.

      5.       Ayat 25-26. Pandohan “tagan rap dope” ima laho pasunggulhon tu sisean i, paboa na mansai ringkot do i, jala boaboa adong na mansai krisis. Ai naeng rfo ma tingkina ndang rap be nasida. Tagan rap, na boi dope langsung nasida manghatai secara langsung (fisik), langsung marnida tiruan, alai naeng jumpang ma tingkina ndang boi be nasida rap secara fisik. Marhite keadaan na krisis i, sai hira parujungan ni ngolu sahalak natoras na pasahathon poda tu ianakhonna. Sai tinggil do sipareon ni iankhonna di pandohan natoras na i. Tarsongon i ma situasi  on, asa naeng ingot angka sisean ni Tuhan Jesus di angka tonaNa i.

Nuaeng ro ma muse bagabaga laos pangapulion tu siseanNa. Suruon  ni Ama i do Pangondian, i ma Tondi Parbadia, na ro sian Ama i, marhite goar ni Tuhan Jesus. On ma patuduhon hasitolusadaon na so tarsirang i. Atik pe tangkas be do fungsi manang pangulaonna. Ia ulaon Tondi Parbadia didok dison; i ma mangajarhon jala paingothon nasa naung hinatahon ni Tuhan Jesus tu angka siseanNa. Dipatangkas do pangajarion i na nidokNa di bindu 16:8-12, ima mangajari taringot tu dosa; taringot tu hapintoron dohot taringot tu uhum. Di bindu 14 ayat 16 didok; pangondian jala na mandongani nasida do Tondi i. Bindu 15:26 didok do, Tondi i ma manghatindangkon taringot tu Tuhan Jesus. Jala di bindu 16:13-14, didok Tondi i ma manogihon tu nasa hasintongan.

Asa tardok tung mansai bidang dpo siulaon ni Tondi i, ndang holan mangajari dohot paingothon alai dohot do mangondihon. Apostel Paulus tangkas do didok, diondihon Tondi i do angka na porsea i di sipangidoon marhite hata na hinoihon (Rom 8: 26), jala marguru tu lomo ni roha ni Debata do pangondihon ni Tondi i di angka na porsea (Rom 8: 27). Rimpunan ni sude pandohan i ma, ia dung borhat  manang manaek Tuhan Jesus mandapothhon Bagas ni Damang, Tondi Parbadia ma na gabe Pangondian, na manogihon, mangajari dohot na paingothon jolma na di portibi on di angka naung niajarhon ni Tuhan Jesus. Tondi Parbadia ma na maringan di bagasan halak na porsea (sisean ni Tuhan Jesus, bnd. 14:17), dung manaek Tuhan Jesus.

     C.       Sipahusorhusoron

v Haunduhon dibagasan holong. Ingkon saurdot do holong dohot haunduhon, na mandok holong rohana tu Jesus ingkon unduk do ibana mangulahon patikNa, jala ingkon radot  di hata ni Jesus. Ai holoan tu angka na mangaradoti hataNa do Jesus papatarhon hadirionNa di haheheonNa i. Na mandok holong rohana tu Jesus ingkon diulahon do tona ni Jesus, ai pargabus do halak na mandok holong rohana di Jesus hape dihosomi donganna jolma ( 1 Joh.4:20), ai torang do tona ni Jesus asa manghaholongi dongan jolma doshon diri sandiri (Mat.22:39). Angka na mangolu dibagasan holong dohot haunduhon i do na jumpangan haluaon di hamonangan ni Kristus i, jala holan tu angka na unduk di hataNa do papataron ni Debata hadirionNa, nang pe sude jolma boi do pangkeon ni Debata pasauthon sangkapNa, alai ianggo hapataran ni hadirion ni Debata holan tu angka na holong roha jala na unduk di hataNa do. Parsaoran dohot Debata dohot hapataran ni hadirion ni Debata tarihot dibagasan holong, jala holong i tarihot dibagasan haunduhon. Lam tangkas haunduhon tu Debata , lam tatanda ma Debata dingolunta jala lam tangkas ma nang holong ni rohanta tu dongan jolma. Didok di Johanes 3 : 16 “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” Marhite i, ia holong do dasor ni saluhut parngoluon dohot parsaoran ni angka na porsea. Jala tangkas do haborhatan ni holong i, ima holong na pinungka ni Debata, Debata manghaholongi Jesus, Jesus manghaholongi jolma, jolma manghaholongi Debata marhitehite Jesus, jala jolma ingkon manghaholongi donganna jolma dohot nasa na tinompa ni Debata. Asa saluhut gulmit ni ngolu ni angka na porsea ingkon dirahut dibagasan holong na polin.

v Ndang boi sirang Tondi Parbadia i sian Tuhan Jesus. Ai Tuhan i do i na ro sian Ama i laho manguduti pangaramotionNa di portibi on. Tondi ni Debata do na mangajari jolma nuaeng mangaradoti patik ni Tuhan Jesus, i ma holong. Dipatuduhon ma holong ni roha i, ndada holan tu Debata dohot dongan jolma, alai tung dohot do nang tu lingkungan. Manjaga haulion na tinompa ni Debata asa gabe pasupasu tu hajolmaon.

v Ringkot do ingkon botoonta di tingki Pentakoste on, asa tarsunggul hita di pandohan 1 Johannes 4 : 1, “Unang ma ganup tondi haporseai hamu, unjuni hamu ma manang na sian Debata angka tondi; ai naung borhat torop panurirang pargapgap tu portibi on”. Mansai godang do tondi manang huaso na muncul di zaman on; isarana; konsumerisme, hedonisme, egoisme dohot angka naasing, ringkot sijamothononta. Jala angka pargapgap pe na pasumansuman diri tu halak na ginohan ni “Tondi Parbadia” pe ragam do; na sai hira burju berengon alai naeng mangaltup, nang pamauphon. Siala ni i marbisuk ma hita unang olo dipaotooto (Matius  10:16 Husuru do hamu songon birubiru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati!). Ala ni i mansai ringkot hita saluhutna ruas nang parhalado diparbohali di pangajarion taringot tu Tondi Parbadia asa lam ma sipaingotan jala masitoguan, ai disi ma tapatuduhon na sisada tondi angka na porsea i , bnd. 1 Kor.6: 17; 2 Kor 12: 18 (Galatia 6:2 Masiurupan ma hamu mamorsan angka na dokdok i; i ma dalan mangaradoti patik ni Kristus.). Selamat Ari Pentakoste I.  Amen

Bahan Jamita Epistel Ari Pentakosta I, 19 Mei 2013

Tondi Parbadia Mangajari Tondinta

Rom 8 : 14 – 17

      A.      Patujolo

Mansai godang do angka parbinoto di Teologia Protestan manghatindangkon ia Buku Rom on ima  sada tulisan na umbalga (magnum opus; karya terbesar) sian nasa buku naginurithon si Paulus. Hira na diusehon pikkiranna do mangondolhon angka pokok-pokok teologia na ringkot botoon ni huria i. Masa songon i ala perbedaan pandangan ni huria na berlatar belakang  Jahudi dohot non-Jahudi na adong di huta i. Dilehon ibana do bohal laho mengisi huria i, sekaligus menyadarkan halak Kristen na sai tongtong mangondolhon patik songon syarat ni haKristenon. Ndada na mandok na hurang berisi uraian teologis na asing i. Adong do tolu bagian na hinamham ni bindu ualu on,  ima: ayat 1-7 taringot  tu parbue ni ngolu na marhatigoran. Ayat 18-30, manaringoti pangkirimon tu Tuhan Jesus Kristus. Ayat 31-39, manaringoti parbue ni haporseaon.

Tujuan ni surat on i ma laho paingothon huhut patoguhon haporseaon ni ruas ni huria na mangadopi hangoluan na tongon dibagasan gomgoman bangso Rom. Mansai ribur do huta i, ala ni hamajuonna di parbinotoan, militer, pardomuan ni angka budaya, ugamo, dohot angka ulaon pesta pora. Ihut ni i adong muse tantangan na niadopan ni halak Kristen di Rom uju i, i ma filsafat ni Epikurus na mangajarhon; ia daging manang pamatang i , i ma pusat ni ngolu nang hasonangan. Poda on mampanghorhon tu masyarakat gabe marguru tu hasonangan (hedonis), tarhurung do di pangalaho ni ngolu na sai hura-hura manang marpesta-pesta. Ala ni ima Ap.Paulus manurathon surat on ima laho paingothon angka halak Kristen asa sai mangolu dibagasan hatigoran  na sian Tondi ni Debata. Laos alus ni Apostel Paulus do on tu angka jolma na manggoari dirina siulahon patik, huhut mambahen patik songon syarat, hape mago ma impola ni patik i, ima holong ni roha tu Debata dohot holong ni roha tu dongan jolma. I ma na gabe sibingkasi ni turpuk jamita on. Tatangkasi ma.

      B.      Hatorangan

     1.       Ayat 14-16. Mangolu songon anak ni Debata. Molo marhite Patik i, ndada sanggup jolma i malua sian dosa dohot hamatean, ala gabe madabu do jolma i lam bagas tu parhatobanan na pabiarhon nasida. Molo diulahon pe angka patik i dingolu nasida siganup ari dohot di partangianganna holan ala ni biar ni rohanasida sambing do i dohot na terpaksa ala ni ancaman maut. Hape molo diangka jolma na  mangolu dibagasan Tondi sai marlas ni roha do dibagasan hatuluson. Dasor ni parulaonna ima haradeon dohot  parsitutuon, siala marhite Tondi i, nunga dipabangkit statusna gabe angka anak ni  Debata. Asa boi pamatehon parulan ni daging, ingkon ditogutogu Tondi Parbadia do. Ndang tarbahen jolma sian dirina, ingkon sude ngolu berpusat tu Tondi. Ndang na mandok na so adong be peran ni jolma. Tongtong do adong peran ni jolma, alai tanpa Tondi gabe dao do i manirpang, ndang mampu menghadapi panggora ni daging i. Di pangantusion na songon i gabe didok si Paulus “angka na tinogihon ni Tondi, ido anak ni Debata”. Ndang pola na mangondolhon sifat Eksklusif molo didok si Paulus naung gabe anak ni Debata do saluhut angka na porsea di Tuhan Jesus Kristus, jala ndang dibagasan hubungan biologis. Lapatanna, naung gabe anak ni Debata do hita ndada ala ni garis keturunan Israel, alai ala naung panobusionNa do. Dung ditobus jolma sian dosana, gabe masuk ma halak na porsea i tu sada parsaoran keluarga rap dohot Tuhanta Jesus na manjou: “Abba, mandok: Ale Amang!” (bnd.Gal.4:6; Mat.6:9; Mark.14:36). Hata Abba sian hata Aram, laho manggombarhon jonok ni dirina dohot Debata; jala manggombarhon parsaoran siganup ari sahalak ama tu anakna, jala diain huria ma i dibagasan liturgi dohot ajaranna. Manang ise na barani manghatindangkon naung gabe anak ibana di adopan ni Debata ingkon bertanggung-jawab ma ibana di angka pangalaho dohot ulaonna mangulahon lomo ni roha ni Amana.

Asa molo dung tadok Abba tu Debata, adong garis manang hatontuan ni Ama i na ingkon dihangoluhon i ma: Parjolo; tangkas taboto dohot manghatindangkon naung tajalo tondi haanahon, ndang tajalo tondi hatoban. Lapatanna ndang be patuduhononta sifat manang bangko-bangko hatoban, ima mabiar mamereng tuan na kejam tingki paadopadop bohi sajo, alai tondi na bertanggung jawab do, diinganan na buni dohot diinganan na patar, disude partingkian dohot inganan. Molo dipangke dison hata “hatoban’ ndada dibagasan pangantusion panghobasion ni hatoban tu tuanna na naeng dohononna, alai bangko na hurang denggan na jotjot dapot dihatoban do. Maralo situtu do bangko hatoban tu bangko anak. Napaduahon; Tondi i manghatindangkon di tondinta (ay.16), diterjemahan bhs.Indonesia didok : “Roh itu bersaksi bersama-sama dengan roh kita”. Molo tapamanat, na naeng dohononna ima Tondi Parbadia i manogunogu jala mengarahkan tondinta manghatindangkon paboa na tutu hita anak ni Debata. Ndang tarbahen tondi ni jolma naung gok dosa i manghatindangkon Debata, holan marhitehite hasasaor ni Tondi Parbadia do (pat. 1 Kor.12:3). Napatoluhon; tahaporseai naung parsidohot hita di siteanon di Harajaon ni Debata rap dohot Kristus naung manean hamonangan i. Molo rade hita manaon songon Jesus Kristus naung manaon pardangolan i, rap ma hita muse manean hamonangan dohot hasangapon i.

Songon angka anak ni Debata, adong  siteananta dibagasan huaso dohot harajaonNa. Gabe anak ni Debata do hita marhitehite hamamate ni Kristus Jesus jala gabe panean (pewaris) di Harajaon ni Debata. Nang pe bermakna eskhatologis parsaoran ni anak dohot Ama i, alai angka na porsea i ingkon tongtong do mangolu marpangoloion songon anak na unduk mangulahon hata ni Amana.

      2.       Ayat 17. Mangolu dibagasan hamuliaon ni Ama. Molo pandok ni Ap.Paulus, ianggo angka anak ni Debata ndada tarsirang sian AnakNa na sasada i, ima Jesus Kristus. Songon sitaonon ni Kristus i ala ni hasintongan dohot HarajaonNa, laos songon i ma niadopan ni angka halak na porsea i (bnd. Mat.10:38; Luk.14:27). Boi do songgop angka panaritaan di angka na porsea i, alai doshon songon Kristus na naung monang i manaluhon sitaonon i, jala marhite Tondi ni Debata, hita pe angka na porsea pinargogoanNa do, jala marsihohot dibagasan Kristus asa tung margogo mangadopi dohot manaluhon sitaonon i. Tung godang do angka tantangan nang angka godaan na boi manegai parsaoranta dohot Debata Ama i, na sai marusaha do sibolis i laho manait rohanta asa hatobanna hita dibagasan dosa dohot biar ni roha. Ndada pasombuon ni Debata i masa, ia TondiNa i do na manjaga i hita uju dibagasan hagaleon hita (bnd.8:26-28). Songon Kristus na monang  jala na pinasangap i, nang hita pe taruli hamuliaonNa do raphon dohot Ibana. Tangkas ma na niajarhon Ap.Paulus ia panaritaan na tinean ala ni Barita Nauli i, ndada adong i martimbangkon hasangapon na naeng sipapataronNa sogot  tu hita, molo sai hot hita mangolu dibagasan Tondi dohot hasintongan. (Rm.8: 18; Joh.4:24).

      C.      Sipahusorhusoron

v  Patuduhon ma parange hatiuron di adopan ni Debata. Molo taida na masa di tingki on, lam mangimbukbuk do hajahaton di portibi on. Marhitehite pangalaho naung maralo tu patik dohot Hata ni Debata. Pola do torop jolma angka naung korban hinorhon ni hajahaton i, songon nabinaritahon di televisi isarana barita kriminal (pembunuhan, pemerkosaan, penipuan, perampokan, pergaulan bebas, pelecehan seksual, godang na mangoloi hisaphisap ni dagingna di ganja, morpin, sabu-sabu (narkoba). Saluhutna pangalaho na tagori i, ima na marguru tu daging. Ndang olo ibana ditogihon Tondi i. Disada sisi muse, ditingki godang jolma mamereng Tuhan songon parhuaso na garang roha (kejam), jala gok rimas, dipaingot ap.Paulus do marhite Tondi asa gabe angka anak ni Debata hita, na so manjalo tondi  hatahuton nang tondi parhatobanon  (bnd. 2 Timoteus 1:7 “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton”). Gabe anak ni Debata ima status na so mungkin jaloonta molo diluar ni Tondi ni Debata hita.

v  Taoloi ma Tondi Parbadia i. Sibasabasa do Tondi ni Debata di bagasan ngolunta. Dilehon do tu hita Tondi-Na asa mangolu hita. Dapotan parbue na denggan hita marhite ulaonta siganup ari. Ditogihon Tondi i do hita tu dalan lomo ni roha ni Debata. Taoloi ma tongtong panogihon ni Tondi i. Parbue ni tondi na nidokna ima angka ulaon, pambahenan, nahinalomohon ni Tuhan i. Molo olo hita pasidinghon angka ulaon na so hinalomohon ni Debata, jala olo hita patupahon ulaon na denggan di jolo ni Debata. Boi hita gabe parhitean ni pasupasu (saluran berkat) tu halak na asing. Laos i do panjouon na sahat tu hita songon siihuthon Kristus. Di Galatia 5 : 22 didok Apostel Paulus: “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon”. Ai nasa na tinogihon ni Tondi ni Debata, angka i do anak ni Debata.

v  Gabe huria na inklusif (terbuka). Ndang na gabe eksklusif huria manang halak Kristen molo adong pengakuan naung dijalo tondi haanahon, naung diain gabe anak ni Debata. Alai justru patuduhon tanggung-jawab na lam balga do, pataridahon sifat dohot sikap ni Ama, i ma na gok holong dohot asi ni roha. Sifat na songon i ingkon tongtong tarida di ngolu ni halak Kristen (huria) di masyarakat dohot bangso nang pe sai lam tu dokdokna parsorion dohot tantangan tu huria i. Gariada lam benget ma hita manaon asa dapot hita, ai Tuhanta pe ditaon do haporsuhon andorang so bongot tu hamonangan dohot hasangaponNa.

Nunga tajalo tondi haanahon sian Debata, ndang tondi hatoban na mambahen hita mabiar. Ala ni i tama do angka huria barani mandok angka hata hasintongan di tongatonga ni bangsonta. Unang dohot huria ni Tuhanta tarboanboan tu angka pangalaho ni portibi on, alai ingkon tangkas ma dipatubegehon panindangion na tongtong berpihak tu angka na pogos, tu angka na terpinggirkan, tu na pinaluktakluntak ni ketidakadilan, jala rade paingothon angka naung dao mardalan manadingkon hasintongan ni Debata. Saluhutna i tarpatupa hita siala na olo do tondinta  niajaran ni Todi Parbadia i, asa marhasangapon ma Debata diginjang ni saluhutna. Amen.

Bahan Jamita Evangelium Minggu Exaudi, 12 Mei 2013

Hasadaon Dibagasan Tuhan

Johannes  17 : 20 – 26

      A.      Patujolo

Ia bindu 17 on digoari do tangiang ni Tuhan Jesus; songon Malim Bolon na sumurung jala na sun denggan salelenglelengna, na tongtong mangondihon saluhutna (Hebere 5 : 6,7: 17-28). Dipasahat Jesus do tangiang on, dina laho mandapothon sitaononNa. Diapoi do sisean i asa marpos ni roha jala rade mangadopi haporsuhon huhut asa mangido sisean i tu Debata Ama di bagasan Goar  ni Tuhan Jesus. Didok; “Haporsuhon do jambarmuna di portibi on (16: 33). Ala ni i ma diapoi jala dipapos rohanasida saleleng di portibion laos ditangiangkon. Jadi tung bagas do pingkiran dohot holong ni roha ni Tuhan Jesus di daluhutna, laos songon i do holong ni rohaNa tu Ama i, gabe dipasahat saluhutna tu Ama i. Ima na targombar di tangiang ni Tuhan Jesus Kristus, Malim Bolon jala na sun denggan i. Adong ma disagi 3 bagian ni tangiang on: ayat 1-5; Tuhan Jesus manangianghon diriNa dohot ulaonNa, Ayat 6-19; Manangianghon angka siseanNa, Ayat 20-26; ima turpuk jamita on, manangianghon angka na porsea di sude tingki dohot inganan.

     B.      Hatorangan

     1.       Ayat 20-21; dung sun ditangianghon Tuhan Jesus diriNa, ulaonNa, dohot angka siseanNa, nuaeng sahat ma tangiangNa mangondihon saluhut angka na porsea, ima na porsea tinogu ni hata ni angka sisean i. Dihamham tangiang on do sude na porsea sian angka bangso, luat, sian generasi tu generasi di sandok portibi on sahat tu ari na naeng ro gabe sada hasadaon (persekutuan). Dipadomu do tangiang on slauhut na porsea sian ari na salpu sahat tu tingki na naeng ro, angka naung tubu dohot na naeng tubu dope. Ala ni i, na sada do sude angka na porsea i dipadomu ni Jesus Kristus, nang pe marasingasing angka goar ni huria dohot ingananna.  Dibagasan haporseaon tu Ibana do hadomuan i angka na porsea dohot angka huria na hinalomohon ni Tuhan Jesus, ndada hasadaon organisasi dohot hadosaonangka ruhutruhut parugamoon. Hasadaon manang hadomuan na di bagasan haporseaon na di Jesus Kristus dohot tu Ama i do nang hasadaon ni oukimene; parsaoran ni angka huria di portibi on. Hasadaon ni huria ndang tarsirang i isan na pararathon barita na uli do portibi on. Tujuan ni hasadaon i laho manghatindanghon Tuhan Jesus do, asa porsea portibi on, sipalua do Ibana na sinuru ni Debata. Dibaheni, ingkon marsitutu do angka na porsea/huria mangaradoti hasadaon i, asa lam tamba na porsea tu Tuhan Jesus. Maralo do tu tangiang ni Tuhan Jesus on angka parsalisian dohot parbolatbolatan di tongatonga ni angka na porsea dohot huria. Partuktuhan manang pangambati do i tu halak na naeng ro tu Tuhan Jesus. Sabalikna molo sada, saroha, sapingkiran dibagasan haporseaon  laho pararathon batita nauli, i do mamboan hasadaon ni angka naporsea mar-oikumene. Laos hasadaon ido manogu angka jolma gabe taruli haluaon. Jadi na paluahon do hasadaon i nang tu angka na porsea dohot tu huria nang di portibi on. Alai diboto Tuhan Jesus do, ndada mura hasadaon i jumpang ala ditongatonga ni angka negara, bangso dohot houm na marasingasing do angka na porsea i. Godang do angka persaingan, parbolatbolatan, parsalisian dohot parmusuon jumpang di angka negara, bangso dohot houm. Mansai balga do panghorhon ni on tu huria dohot  tu angka na porsea. Ndang holip sian panatapan ni Tuhan Jesus hamaolon i, i do umbahen diondihon Ibana marhite tangiangNa saluhut tu Ama i. Huhut laos dilehon do hasangapon na sian Ama i asa rimpas hasadaon ni angka na porsea songon hasadaon ni Ama i dohot Anak i di bagasan tondi dohot haholongon.

    2.       Ayat 22 – 24; Dipadomu Tuhan Jesus do hasadaon i tu hamuliaon na jinaloNa sian Ama i dohot tu haholongon. Nunga ditadingkon hamuliaon ni Debata hian jolma i, alai nuaeng patar ma muse haluaon i dohot haholongon i dilehon tu angka na porsea dibagasan Tuhan Jesus Kristus. Ido pasingkophon hasadaon ni angka na porsea songon hasadaon ni Jesus dohot Ama i dibagasan tondi dohot haholongon. Dipangido Tuhan Jesus do asa patar di portibi on holong ni roha ni Debata tu Ibana dohot tu angka na porsea tu Ibana jala didok ia disi Ahu, disi ma dohot angka na nilehonMi tu Ahu asa sun denggan hasadaon i songon Debata dibagasan Jesus, Jesus dibagasan na porsea. Udut tusi muse dipangido Tuhan Jesus do asa diusehon Ama i holong ni rohaNa tu Jesus tu bagasan roha ni angka na porsea, asa marsihaholongan nang angka na porsea i dibagasan holong na sian Debata. Asa gabe sada tondi dohot holong do angka na porsea dohot Tuhan i ( 1 Korint 6:17).

     3.       Ayat 25-26 : diayat 11 adong pandohan; “Ale Amang nabadia...” nuaeng gabe : “Ale Amang na bonar naeng patuduhon habonaron ni Debata. Haposan do Debata jala na bonar manesa dosanta jala paiashon hita sian nasa hageduhon, molo tatopoti dosanta (1 Joh.1:9). Angka na manjangkon Jesus do  na mananda dosana. Alai anggo portibi on, ndang ditanda Ibana, jala ndang dijangkon. Alai anggo angka na porsea i, dijangkon do Ibana, jala dihaporseai. Ala ni i patut do angka na porsea i manjalo angka na pinangido ni Jesus tu nasida sian Debata. Dipangido Jesus do  asa tongtong dibagasan holong na sian Debata na porsea i manghaholongi Jesus.

     C.      Sipahusorhusoron

v  Hita na porsea dibagasan Jesus Kristus; nunga ditangiang Jesus i hita tu Debata asa sada hita. Laos ala ni on ma ingkon idaon do hinaringkot ni na manangianghon dohot mangaradoti hasadaon ni angka na porsea dohot huria marhite angka ulaon oikumene. Parsidohoton tu angka ulaon dohot gerakan oikumene pe ingkon lam tamba do di sude huria, di tirket huria, nang ressort tarlumobi di hatopan pe. Asa marhite i lam boi patar hasadaon ni angka na porsea tu Debata. Alai hasadaon i ndada holan di hata,  naeng tarida di pangkilalaan tu angka huria na ginosagosa ni portibi on. Asa rup manghilala marhite aksi nang pambahenan patuduhon solidaritas di angka huria na pinasiaksiak portibi on. Godang nai  tahe angka huria na ditutup siala IMB na  so adong manang ala ni angka jolma intolerant gabe dibongkar paksa ma bagas joro dohot paksa. Boha do hita angka na porsea di negaranta on patuduhon hasadaon na sapangkilalaan (bnd. Gal.6:2).

v  Taparrohahon do tangiang ni Jesus uju di portibi on dope Ibana; ai manongtong do tangiangNa i laho mangondihon hita; asa unang madabu hita ala ni ragam pangunjunan i (bnd. Luk.22:31-34). Nunga simpul diula Jesus haluaon i; jala hundul disiamun ni  Debata. Alai anggo tangiangNa manangiangkon hita tongtong do jala marpadan do Ibana laho mangalusi angka tangiang (Luk.11:9-10)

v  Goar ni minggunta minggu on margoar Exaudi  : “Sai tangihon ma soarangku ale Jahowa” (Pslm 27:7). Boha do hita asa ditangihon Debata ? alusna asa jumolo hita manangihon soara ni Debata nang joujouNa tu hita, marpangalaho na hombar tu lomo ni rohaNa. (bnd. Jes.38:3; Mat.6:33,; Mat.7:21). Ndanda dao pangantusion ni topuk minggu on sian minggu na salpu; ima asa martangiang.  Molo naeng tangihonon ni Debata soaranta, sai jumolo ma hita patuduhon haoloanta mangulahon parsuruonNa; mian dibagasan HataNa na Badia i marhitehite holongNa., naolo do hita marparsaoran na rosu dohot Debata marhite angka parsaoran na denggan dohot donganta sahaporseaon nang dihumaliangta pe. Disi ma patar hasadaon na dibagasan Tuhan i, ndada marpangalensem, manang na pinaksa. Alai ala holong na sian Tuhan i do na mangonjar rohanta jala tung margogo hita patupahon i ala sai martangiang hita tu Debata mangido pangurupionNa patupahon saluhutna i.  Horas mar-Exaudi ma hita. Amen!

Bahan Jamita Epistel Minggu Exaudi, 12 Mei 2013

Sada Dibagasan Jesus

Pangungkapon 22 : 12 – 17

      A.      Patujolo

Buku Pangungkapon, ima na pinasahat ni Tuhan Jesus Kristus tu si Johannes tingki tarbuang ibana di Pulo Patmos, ala ni parsihohotonna manghatindnagkon Tuhan Jesus. Borat do na niadopan ni Huria na pitu hasahatan ni pangungkapon on ; ima Hhuria Epesus, Smirna, Pergamos, Tiatira, Sardes Piladelpia dohot Laodikea.

Na masa do pangaleleon tu hUria na parjolo i, sian pamarenta, ala so olo nasida marsomba tu kesar. Gabe ditudu do nasida pemberontak. Dung i adong muse do dosa  na masa na mangela nasida isara ni parmainanon dohot angka pargabuson, dna.

Ditingki pangaleleion i torop do na hona sian nasida. Dihatiha si songon i ma ro Kristus pasahathon pangungkapon marhite Johannes tu na 7 huria i. Tontu sekaligus do na masa tu huria na pitu i, boi masa nang tu angka Huria di tingki on. Ala ni i dohot do joujou ni turpuk on masa tu Huria na pitu i, boi masa nang tu angka Huria di tingki on. Ala ni i dohot do joujou ni turpuk on nang tu hita di hatiha on, ima sada di bagasan Jesus. Hasadaon apala nanidokna, ima marhitehite pangalaho maradophon Kristus Raja ni Huria i songon dia ma pangalaho ni i ? Ido sisigatanta hombar tu turpuk on.

     B.      Hatorangan

     1.       Ayat 12; Sisada pangkirimon managam HaroroNa. Dipabotohon do na gira do Kristus i. Ai didok; “Ida ma, gira ma Ahu ro. Lumbalumba taringot tu haroro ni Tuhan i do i, ima haroroNa na paduahalihon, manang haroroNa dung manaek Ibana tu banuaginjang. Dipingkir si Johannes do pintor ro Jesus i padua halihon so jolo marujung ngoluna, Ido umbahen songon i dihudus ibana mamaritahon Kristus i. Laos songon ido nang ngolu ni si Paulus umbahen haru dihudus ibana mangkatindangkon Tuhan i. Hape sahata tu sadarion so ro dope Ibana paduahalihon (bnd.2 Petrus 3: 3-10). Ndang adong na umboto sadihari ombas ni haroroNa i, sagari Anak i pe ndang umboto, nda holan Ama i (Mat.24:36) Asa nanaeng dohononNa tu hita: saurdot jala sada huhut dungo managam manang sadiahri pe Ibana ro paduahalihon. Sandok sisada pangkirimon ma hita managam haroroNa i.

2.       Ayat 13 +16; Guru di Ibana do saluhutna. Molo tajaha na dua ayat on, Jesus patandahon diriNa, paboa guru di Ibana do slauhutna, aoi Ibana do manjadihon saluhutna jala dibagasan Ibana do digohi angka bagabaga na sinurirangkon ni angka panurirang. Ibana do tutu urat dohot marga ni si Daud, bintang sipaias na marsinondang i, manondangi haholomon, asa mardalan di natiur disinondang ni bintang sipaias i. Nunga sian mulana Ibana adong, jala Ibana do na jumadihon saluhutna umbahen na manjadi (bnd. Joh.1:1-4). Ibana do mangarade nang kebutuhan ni ganup asa denggan mangolu. Dibahen i holan Ibana do sisombaon jala sihaposanta (Patik I + Lapatanna). Tapataridahon ma i marhite gulmit ni ngoluna be.

Ala guru di Ibana do saluhutna, dijouhon i do tu hUria na pitu i nang tu hita nuaeng, asa marsihohot hita manghaporseai Ibana di tingki las ni roha dohot di na mamolus arsak pe nang sitanonon parungkilon tahe (BE. No.149:1,3) tu ngolu sisongon i do na nidok ni si Paulus: “Marlas ni roha ma hamu mangkirim! Marbegent ni roha ma di haporsuhon! Jugulhon hamu ma tangiang!” (Rom 12:12)

    3.       Ayat 14-15: Na ro do Ibana huhut mamboan upa hombar tu na niulana be. Nunga dilumbahon Jesus haroroNa nian di Mateus 25: 31-46, hamamasa ni i do na nidok ni turpuk on. Paboa  na ro do Ibana pasahathon hatuaon tu angka na porsea, na sada dibagasan Ibana (ay.14). Ima angka na marsihohot manghaporseai Ibana agan pe manaon na hansit, na porsuk, didok: “Sai burju (seyialah) ma ho rasirasa mate; dung i lehononku ma tu ho tumpal hangoluan i!” (Pangk.2:1ob). Jala hona uhum ma ianggo halak parjahat, na digoari angka biang: ima angka siulahon rasun, angka parmainan dohot pamunu dohot sioloi na so denggan rodi nasa manghaholongi jala na mangulahon gabus” (Ay.15). Jadi diharoro ni Tuhan i tarbagi dua do hajolmaon i sogot (2 Korint 5:10). Na satia dapotan tua sian adopan ni Debata, jala na so satia hona uhum do sogot. Ala ndang taboto manang sadihari harorona, tarjou do hita songon na tu huria na pitu i, asa paubahon roha jala marsihohot hombar tu hata ni Debata mangadopi angka na masa, ai di angka sisongon i do hatuaon marsihohot hombar tu hata ni Debata mangadopi angka na masa, ai di angka sisongon i do hatuaon sogot i, sihirimon i, siteanon ni angka na mamburi abitna be, marhite mudar ni Kristus i, ai holan i do na tuk mamuri hita sian pardosaonta be. Boha ma Huria na pitu i mamuri abitnasida na ingkon tiruonta nuaeng. Epesus: disuru do asa manadingkon ngolu holong, dipangido asa mulak (muba), molo ndang hona uhum. Smirna didok: nang pe ro pangunjunan, hot ma burju rasirasa mate dungi taruli ma di tumpal hangoluan. Pergamos; Denggan do nian, alai adong na mangoloi poda ni si Bileam gabe mangulahon parmainanon (4 Musa 31:16) poda na sala, dijouhon asa muba nasida. Tiatira; pasombuhon panurirang pargapgap, mangulahon parmainanon. Dijouhon asa muba molo ndang hona uhuman. Sardes; tarpodom, dijouhon asa muba, jala tarsunggul ma di tugasna. Philadelpia: otik do gogonasida, alai diradoti do hata ni Debata (Pangk.3:8-0). Laos dipatogu do asa ditiop tumpalna, unang adong na mambuat i sian nasida (3:11). Laodikea; marngolu dangoldangol sisilon (3:15-17), dijou asa marhamubaon (3:19). Sude na pitu huria i dijouhon asa managihon hata ni Debata. Sai diujungi do ganup Huria didok : “Ditangihon na marpinggol ma na nidok ni Tondi i tu angka huria.” Ingkon sada do roha ni sandok ruas ni huria manangihon hata ni Debata di ngoluna be (Rom 10:17; Luk. 11:28).

4.       Ayat 17; Jou Ibana asa dohot na humaliang manjou GoarNa. Namarlapatan do ia Tondi i mangajari dohot mangalehon gogo tu oroan i (huria) manjouhon : “Ro ma Ho”! Sude i patorangkon tu hita gabe dohot na asing manjouhon ala ni panindangionta na pinargogoan ni Tondi Parbadia. Disi ma substansi ulaon laho mamaritahon Barita Nauli. Marhite hata, pambahenanta, parsaoranta sandok gulmit ni ngolunta ingkon do gabe panindangion tu halak na humaliang hita. Halak na sada dibagasan Kristus, tongtong do tarjou mamaritahon Barita Haluaon i saleleng ngoluna. Tu angka nasida na bertanggung-jawab di pangkirimon sisongon i do gabe manjalo: aek hangoluan, ima bongot tu haluaon sogot i, tu surgo hasonangan i. Disi ma patar hasadaon ni angka na porsea i, ima hasadaon na manongtong ro di salelenglelengna. Ido nanidokna Huria hatopan ni halak Kristen angka na badia. Sada tongtong salelenglelengna dohot Jesus Tuhan i. Ndang dohot disi angka na so manjalo habadiaon sian Kristus (na so porsea) nang pe marngolu nasida idaon di portibi on rap di huria na tarida sinuaeng, ai holan angka ruas ni huria na badia na so tarida i do nanidokna di ponggol patoluhon hata haporseaon i.

    C.      Sipahusorhusoron

 v  Naeng ma tangkas hasadaon na jinouhon ni turpuk on tu hita. Asa hasadaon na nidokna i tu hita asa tarida ngolu na marpanarihon tu dongan jolma marhite parsaoran, nang kepedulianta mangurupi d onganta na dibagasan haholomon, haotoon. Ngo ni na porsea di Jesus Kristus sude tarjou pauliulihon portibion marhite angka pambahenan na marlapatan tu na dihumaliangna. Asa hasadaon i mardasor tu sunstansi ni haluaon na sian Jesus i, paluahon sandok portibi on. Sude angka na tinompa ni Debata mandapot haluaon i. Hasadaon i ma jo na ingkon sipahebahebaonta dibagasan ngolunta (ingot ma motto ni GKMI : Ut Omnes Unum Sint= supaya mereka satu adanya, bnd. Joh.17:21  Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu ). Tarida ma ngolu sisada upa jambar haluaon, sisada haporseaon, sisada ulaon zending.

 v  Goar ni minggunta ima minggu Exaudi na marlapatan: sai tangihon ma soarangku, ale Jahowa. Soara joujou i boi do tangkas soarahononta marhite tangiang, asa ditangihon Jahowa hita (songon udut ni turpuk evangelium minggu Rogate na salpu i). Dibahen i, ala guru di Ibana do saluhutna songon na tarida dijolo nangkin, hot ma hita so mubamuba holan manjou Ibana di angka na masa di ngolunta di portibi on. Holan Ibana do na tuk paluahon hita dalan basabasa. Ala ni i, holan Ibana do jouonta marhite partangiangonta. Ai holan Ibana do na tuk mangurupi hita, patauhon hita mangadopi sude na masa di pardalanan ni ngolunta. Horas Mar-Exaudi. Amen.S

Bahan Jamita Evangelium Ari Hananek Tuhan Jesus, 9 Mei 2013

Gabe Sitindangi ni Kristus

Ulaon Apostel 1: 6-14

A.      Patujolo

Ia Ari Hananek ni Jesus Kristus tu Banuaginjang, ima sada hamamasa na mansai ringkot di halak Kristen. Ganup taon do dipestahon angka huria na di portibi on Parningotan di Hananaek ni Tuhan Jesus, i ma angka huria na mamangke taon parhuriaon (kalender gerejawi). Laos songon i do hurianta HKBP nunga sian na mamungka tu huria ditongatonganta sian sundut tu sundut mamestahon Parningotan di Hananaek Tuhan Jesus. Molo sian sundut partingkian pajoinokjonok do parro ni pesta parningotan  di Hamamate ni Tuhan Jesus dohot parningotan di Haheheon, Hananaek dohot Haroro ni Tondi Parbadia. Jala lapatanna pe marsirainrainan do. Ndang sirang nasida sian na sada nari ima na opat pesta parningotan i, ai laho paingothon hita do di pambahenan ni Tuhan Jesus tingki ngoluNa laho manghophop jolma pardosa i, asa malua nasida sian gomgoman ni angka sialo Debata Jahowa Ama na di banua ginjang i.

B.      Hatorangan  

     1.       Ayat 6: dijolo ni ayat on ima di ayat 5 dipatorang do taringot tu pandidion na badia na asing sian na pinatupa Johannes Pandidi na naeng masa haduan (Mat.3:11; Mark.1:8; Luk.3:16; Joh.1:33) jala dibagasan Buku Ulaon Apostel on digohi do pangungkapon ni si Johannes. Jala Jesus pe nunga marbagabagahon  haroro ni Tondi Parbadia (Joh.14:16-18,26-27; 15:26-27; 16:7-15) jala hasasaor i marrumangkon hagogoon ni huaso tu angka sisean i asa margogo nasida marhobas jala manggulahon parsuruonNa (Luk.24:49). Molo tajaha do angka buku   evangelium i dapot hita ma ia angka apostel i mamereng dibagasan politik na margogo di harajaon jala hagiot nasida mandapothon hajongjongan nang hak nasida songon halak Jahudi na loyal tu Tuhan, naeng taluhonon nasida angka musunasida jala pajongjonghon sada harajaon na togu dipanggomgomion ni Mesias na songon raja nasida.

    2.       Ayat 7 – 8; Dialusi Jesus do sungkunsungkun nasida i marhite na mandok: “...Ndang ro di hamu i, umboto taonna manang ombasna; na binuhul ni Ama i guru di huasona sambing. Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on”. Asa lam tangkas nanaeng dohonon ni Jesus i, naeng mangalehon sada gombaran tu angka siseanna= asa marsitutu mangulahon ulaonna laho mambaritahon Barita Nauli asa pagodanghu manungkun taringot na naeng siulahon ni Ama i mardomu ma i marhite harajaon na bersifat politis; Kristus na marhuaso gabe Raja. Sian ayat 8 on, godang do na so diparrohahon angka penafsir ima taringot tu parjojor ni goar ni angka kota; mamungka sian Jerusalem (angka sisean i manjalo Tondi Parbadia) jala haruar sahat tu humaliang Judea, Samaria jala sahat tu ujung ni portibi on. Ia parjojor ni goar huta i ndada na so adong lapatanna. Ia lapatan ni i laho patuduhon ia mamaritahon Barita Nauli i ndada nibatasan holan tu angka luat na tertentu, alai dibuhai sian ingannta/luatta  ganup, jala marujung sahat tudia sangkap ni Debata di hita laho mamaritahonsa. Hata “ujung ni tano on” jotjot do di lapati martudutudu tu Kota Rom na mansai tarbarita ditingki i. Alai molo lam tapamanat lapatan ni “ujung ni tano on” boi do i mandok mambaritahon Barita Nauli ingkon sahat tu sandok portibi on, asa ndada adong be agia ise pe na so manjalo Barita Nauli i. Hata “sitindangi” mansai jotjot do tajah di Buku Ulaon Apostel on. Sitindangi ima sahalak na mamaritahon (paboahon) angka na ni idana dohot na binegena (Ul.Ap.4:19-20). Ganup hata “sitindangi” di Buku Ulaon Apostel dilapati sian Hata Gorik (Marturia), jala marisihon pangantusion “martir” manang “Syahid”. Molo pandok Warren Wiersbe; ia buku Ulaon Apostel on laho mangondolhon assurance (jaminan) haroro ni Jesus na paduahalihon, jala didok nasida do muse; ia hananaek ni Jesus tu Banuaginjang ima bagian na mansai ringkot dibagasan panghobasion-Na, ala molo so mulak Ibana tu AmaNa, ndada boi gohanNa bagabagaNa i laho pasaorhon Tondi Parbadia (Joh.16:5-15). Jala muse Jesus na di Banua Ginjang i gabe Malim Bolon na manangianghon hita (Heb.4 : 14 – 16). Jala Ibana na mangondihon hita tu Ama i jala na manesa angka dodsanta molo tasolosoli angka dosanta (1 Joh.1:9- 2:2)

     3.       Ayat 9 – 11; Pandok ni si Wiersbe taringot tu ayat on, ima sada jaminan haroro ni Jesus na paduahalihon na boi sipeopon, ala dibagasan ayat i, adong di dok angka surusuruan i mandok : “....Anggo Jesus i, na tarhinsat sian lambungmuna tu banua ginjang i, na ro do Ibana sogot, songon na niidamuna Ibana laho dompak banua ginjang i” (11b). Ala ni i ganup na porsea tu Jesus na naek tu Banua Ginjang dibagasan rupa na boi idaon ni manisia, ingkon porsea di haroroNa na paduahalihon na marrumangkon pamatang nang rupa na nyata jala na boi di bereng manisia. Ala ni i haroroNa nanidokna paduahalihon i marhite ombun diadopan ni angka jolma (Mat.24:30; 26:64; Pangk.1:7), ndada haroro na sangombas boti (sangkidop mata) di pangantusion ni pigapiga huria ( 1 Kor.15:51-52; 1 Tess.4: 13-18).

     4.       Ayat 12-14; Di ayat on dipatorang taringot tu angka sisean i na mangoloi parsuruon ni Guru nasida (ima Jesus), mulak nasida tu Jerusalem sian dolok Jetun, nangkok nasida tu Bilut parginjang (kemungkinan di jabu ni Johanes Markus; Ul.Ap.12:12 ). Disi ma nasida na saroha nunut dibagasan unduk dohot serep ni roha marpungu martangiang huhut managam hasasaor ni Tondi Parbadia. Molo tinaringotan tu na martangiang on, boi dapot hita nasida manongtong martangiang dibagasan haserepon. Mansai ringkot do pangalaho sisongon on tiruonta dibagasan hurianta ganup, ala molo adong parungutunguton dohot parsalisian di roha ni angka dongan na martangiang i, ndada boi nasida martangiang dohot denggan. Martangiang do angka sisean i dibagasan haserepon sahat tu na taralus tangiang nasida i. Dilehon do tingkina asa martangiang.

C.      Sipahusorhusoron

v  Hananaek ni Tuhan Jesus tu Banuaginjang ima sada puncak ni panangkokhon ni Kristus dibagasan hamuliaon ni Debata. Dipabangkit, dipatimbo, jala laos dipasangap Debata marhite na hundul disiamun ni Debata (Mark.16:19; Heb.1:3-4). Hananaek ni Kristus tu Banuaginjang mamuha dalan jala gabe jaminan tu angka na porsea ia hita pasidohot do dipahehe jala dipatimbo Ibana. On ma na gabe pangkirimon tu angka na porsea, nunga diparade Kristus inganan tu hita na porsea di Ibana. On ma sada kepastian di hita hangoluan na salelengnilelengna. Hananaek ni Kristus tu Banuaginjang laho mangangkat status ni angka na porsea gabe panean di Harajaon ni Debata. Songon panean ni Harajaon ni Debata naeng ma tapatuduhon citra-diri ima imago dei ni Debata songon ruas ni Harajaon NI Debata ala hita do na gabe sitindangi ni Kristus di portibi on.

v  Asa hita saluhtna na gabe sitindangi ni Kristus sai tongtong patuduhon komitmen dohot tanggungjawab laho mambaritahon Barita Nauli i marhite keseriusan, haserepon ni roha, pangoloion jala hasatiaon. Hita ma angka anka ni Debata na tarjou gabe sira dohot panondang di portibi on jala gabe pasupasu tu humaliangta. Amen.

Bahan Jamita Epistel Hananaek Tuhan Jesus, 9 Mei 2013

Pos Ni Roha Di Hananek Tuhan Jesus

Markus 16 : 14 – 20

      A.      Patujolo

 Adong do tolu bagian Markus 16, ima : a). Ayat 1-8 Taringot tu Haheheon ni Jesus sian na mate; b). Ayat 9-18: Dipataridahon Tuhan Jesus diri-Na tu angka sisean-Na, jala laos disuru angka siseanNa manjamitahon Barita na Uli; c) Ayat 19-29: Hananek ni Tuhan Jesus tu banuaginjang. Jadi turpuk on masuk tu horong na paduahon dohot napatoluhon, ima na manaringoti naung hehe Tuhan Jesus sian na mate, jala na hinsat huhut manaek muse tu banua ginjang.

Andorang so turpuk on dipatorang do Jesus na pataridahon diriNa parjolo tu boruboru na margoar: Maria Magdalena. Sian boruboru on do dipabali Tuhan Jesus uju i pitu sibolis manang tondi na hodar (Luk.8:82); Joh.20:11-14). Jadi borhat ma boruboru on mandapothon angka dongan ni Tuhan Jesus na jolo, i ma angka sisean-Na jala dibaritahon ma tu nasida, paboa naung hehe Tuhan Jesus sian na mate; hatiha i, na sai marsak jala tumatangis do pe nasida. “Alai ndang porsea nasida, naung mangolu jala diida si Maria Ibana” (Ay.11). Jala dohot ma sidua halak on mamar4itahon dohot manghatindangthon haheheon-Na i, alai tong do ndang porsea nasida (ay.13). Dung i ma turpukta sadari on, na sian ayat 14-20

      B.      Hatorangan

     1)      Ayat 14 – 16 : Disada tingki rap mangan ma Jesus dohot angka sisean-Na disada inganan na so apala dipaboa goarna (tontu naung somal do i dibolus nasida rap dohot Jesus), dipangke Tuhan Jesus ma i tingki laho pataridahon dohot patandahon diri-Na tu nasida nasampulu sada sisean. Dipaingot jala dipinsang Jesus do nasida ala ni ganggu dohot jogal ni roha nasdia na so olo porsea, di angka na mamaritahon haheheon-Na sian na mate. Boasa ndang porsea nasida di haheheon ni Jesus i ? Ala mungkin lupa nasida di pandohan ni Jesus, paboa na hehe do Ibana di ari patoluhon; dung i ra hinorhon ni na mabiar nasida mida halak Jahudi dohot panggomgomi di tingki i; jala muse dohot na so mungkin didok rohanasida boi jolma “mulak mangolu” sian na mate, atik pe nian hea do diida nasida dipangolu Jesus naung mate, songon boru ni si Jairus. Alai dung dipinsang Jesus nasida di jogal ni rohanasida i, jala diida nasida Jesus dijolo manang di lambung nasida, ndang be ganggu rohanasida di haheheon noi Jesus, manang gabe porsea ma nasida di Jesus dohot di haheheonNa. Ndan pola be dialusi sisean i hata ni Jesus, ai pintor ihut do instruksi ni Jesus na tarbarita i, i ma parsuruNa di nasida, songon na tarsurat di ayat 156 i : “Laho ma hamu tu liat portibi on, jamitahon hamu ma barita na uli i tu nasa na tinompa”. Dison diparentahon do “manjamitahon” barita nauli, ddanag songon na di Mateus 28: 19 (mandidi tu bagasan Goar ni Ama, Anak dohot Tondi Parbadia). Alaiboi do antusanta i, ala Evangelium Markus do na tertua sian evangelium na tolu nari. Jadi boi dohonon na ringkas do isi ni Markus alai nungan manghamham sudena pangantusion sian na tolu evangelium. Jadi marhite pandohan i dilehon Jesus do tu siseanNa i tugas “PI” na mansai balga, tu sandok portibi on, jala nunga dohot disi tugas “pandidion” ai ayat na mangihut (ay.16) didok do: “Na porsea jala tardidi, dapotan hangoluan, alai na so porsea i, hona uhum do!”. Ndang tarsirang haporseaon sian pandidion. Na marlapatan ndang boi halak mandok porsea ibana, hape ndang olo tardidi, manang olo tardidi, alai ndang porsea ibana di Debata Sitolusada i. Jadi sai hot do haporseaon dohot sakramen pandidi on i. Marhite on laos ondolhononhon do, molo dung tardidi manang ise pe tu bagasan Goar ni Debata Sitolusada i, sah do i jala ndang boi muse tardidi mangulahi (baptisan ulang). Jadi poda haliluon (ajaran palsu) do i, molo adong huria manang kelompok na mangajarhon pandidion paduahalion (diulang). Asing ni sakramen pandidion, adong dope sakramen sada nari na ingkon siradotan ni angka na porsea, i ma Ulaon na Badia manang Parpanganon na Badia; na dua on do sakramen di sandok Huria Protestan, ai ido na langsung diparentahon jala di dok Jesus asa “diulahon” sisean-Na i di na mamaritahon manang di na manjamitahon Barita na Uli i nasida.

     2)      Ayat 17 – 18; Ndada holan dilehon Jesus tu angka sisean-Na i parenta manang ulaon  na ingkon ulaon nasida, alai diperlengkapi do nasida dohot angka hagogoon na mangasahon Goar ni Tuhan Jesus, i ma parjolo: Boi nasdia pabalihon angka sibolis dohot ,manghatahon angka hata na imbaru na marhagogoon mangurupi nasida laho manjamitahon dohot mamaritahon Hata ni Debata. Napaduahon; boi nasida manaluhon angka na marbisa songon angka ulok na olo manurbing, boi jumputonnasida, so pola mangkorhon parmaraan tu ngolunasida, laos i tng sura pe adong na painumhon rasun tu nasida manang tarsor tarinum nasida, ndang pola mahua nasida, ai diramoti Tuhan i do nasida, asa unang  marmara. Napatoluhon; boi nasida pamalum angka na marsahit, marhite na mangampehon tangan di bagasan “Goar ni Jesus, gabe malum ma angka na marsahit i (pat. Ul.AP.8:7; 2:4; 28:3-8; 28:8 ; 19:20).

     3)      Ayat 19 – 20. Mansai sederhana do pamaritahonon ni Evangelium Markus on taringot tu hananaek ni Tuhan Jesus tu  banua ginjang. Holan di dok di ayat 19: “Asa anggo Tuhan i, dung manghatai Ibana dohot nasida, tarhinsat ma tu banua ginjang, laho hundul tu siamun ni Debata”. Na umporlu di Evangelium Markus on, i ma manghatahon angka ulaon ni Tuhan Jesus di tano on secara ringkas padat, jala dung sidung  jala singkop sude ulaon-Na i diulahon jala dipasahat tu angka sisean-Na i, manorushon dohot pahembanghon ulaon-Na i, jala dang adong be na so diulahon Ibana, nunga tingkina be  manaek Ibana tu banua ginjang laho hundul tu siamun ni Debata. Dasar-dasar pangulaon ni angka sisean di pudian in ari nunga dilehon Tuhan Jesus be secara lengkap, jala sitorushonon nasida ma i tu Huria, asa Huria i manorushon i muse sepanjang  zaman. Molo taparbandingkon Barita “Hananek ni Tuhan Jesus tu banuaginjang” dohot angka Evangelium sinoptik na dua nari, asingasing do penekananna be (pat. Mat.28:16-20; Luk 24:50-53), alai rap manghatindangkon do, paboa Tuhan Jesus tutu situttu do hinsat jala manaek tu banuaginjang.

     C.      Sipahusorhusoron

v  Tahaporseai ma hananaek ni Tuhan Jesus tu siamun ni Debata. Ndang adong be na ummaol sian na manghaporseai hahihinsat dohot hananaek ni Tuhan Jesus tu banuaginjang. Ndang masuk angkal dohot di pingkiran ni torop jolma, na boi “habang tu banua ginjang,” so manang na adong habongNa, manang masin penggerakNa di pamatangNa i. Dungi muse tudia jala dompak dia ma Ibana habang, ai na sai lambas parlangitan (jagad raya ) on. Hinorhon ni i do torop jolma ndang porsea di Tuhan Jesus manang gabe murtad maninggalhon Debata, ala ndang tarjalo utokutokna angka na marpardomuan tu ngolu ni Tuhanta i. Memang i do, ndada angka na marpardomuan tu ngolu ni Tuhan i. Memang i do, ndada utokutok parjolo sipangasahononhon, alai haporseaon do dohot mamereng angka ulaon ni Tuhan Jesus, na patuduhon Ibana do Debata jala Sipalua manisia. Angka ulaon-Na i ma patuduhon tu hita dohot angka haholongan na pinatupa-Na i do papatarhon na Debata situtu do Ibana jala sada do Ibana dohot Debata, Ama-Na i (Joh.17). Dimulanai nunga adong Hata i, jala saor tu Debata do Hata i, Jala Debata do Hata i.....Gabe daging ma Hata i.....(Joh.1:1-4+14). Jadi umbahen na rope Ibana tu portibion (Joh.3:16), asa malua do angka na porsea di Ibana. Boha ma asa malua jolma sian dosana be, i do na niula ni Ibana saleleng si tolu taon satonga i, jala dung singkop sude i, mulak ma Ibana tu inganan-Na hian, i ma di lambung ni Ama i di banua ginjang. Haporseaon do na ringkot tu si, ndang utokutok manang ilmu pasti. Jolo haporseai ma, dung i idaonmu ma bukti ni na hinaporseaan mi. Sintong jala tutu situtu do Tuhan Jesus Kristus manaek tu banua ginjang.

v  Jamitahon ma Barita Nauli i. Tugas ni angka n aporsea di Tuhan Jesus naung manaek tu banua ginjang i, ima mamaritahon dohot manjamitahon taringot tu Tuhan Jesus dohot angk aulaon-Na, tarmasuk hamamate, haheheon dohot hananaek-Na tu banua ginjang. Ido evangelium manang Barita nauli sijamitahononhon ni angka naung tardok sisean ni Tuhan Jesus. Jadi i ngkon sude do hita gabe “pandita”, jala borhat tu sandok portibi on; na marlapatan ingkon sude hita gab eparbarita nauli masa kini, songon ruas  ni  huria i, manang aha pe ulaonta dohot kedudukanta di masyarakat. Tonmtu jumolo ma Keluarga na gabe lingkungan manang lembaga terkecil di dunia, gabe “dapur” sibaritahonon ni angka na porsea; disi ma ama, ina, manarihon (marbarita nauli) tu ianangkonna. Tramsauk parbarita nauli do hita molo sai tapatuduhon parange na denggan disandok parsaoranta di rumah tangga, ditongatonga ni huria, molo tapataridahon i marhite pambahenan na denggan jala tarpuji maradophon na humaliang hita. Tapangke ma angka talenta na nilehon ni Debata di hita laho pararathon Bariota Nauli, ima haluaon n apinatupa ni Tuhan Jesus.

v  Tuhan i do na margogoihon hita di angka ulaonnta songon angka sisean ni Jesus i; ima marhite naung saur Tondi Parbadia dinasida manigor dibagasan las ni roha dohot gogo do nasida mamaritahon Barita nauli i. Asa nang hita naung manjalo haluaon na sian Kristus i, jaloonta do Tondi Parbadia na margogoihon hita. Molo tapingkiri  dohot tenang jala tabereng tu pudi  ni ngolunta dohot pardalanan  ni ngolunta sian mulai dung sorang hita tu portibion, nda godang angka halongangan disi ? gabe boi hita di stsatus inuaeng on ? nda dipargogoi Tuhan i do hita di tingki dakdanak ?, marsingkola, dohot sahat na tu na marrumatangga? Ndada holan sahat disi ro di salelenglelengna do ramotanNa hita. Ala ni i dihananaek Tuhan Jesus tubanua ginjang laho patoguhon haporseaonta ala ditingkina pe masa do hananek tu angka na mangihuthon Ibana. Amen.