Jamita Evangelium Minggu XVI D.Trinitatis – 15 September 2024

Ai Denggan Do Uhum Ni Jahowa Tu Ho      

 (Tuhan Telah Berbuat Baik Kepadamu)

Psalmen 116: 1 – 9   

 

 

1)     Huria nahinaholongan dibagasan Jesus Kristus, Rajuan do Psalm on songon Psalm hamauliateon tu Debata ba dihatahon par-Psalem i di tongatonga ni bangso i (ay.14-18). Mandok mauliate ibana ala naung dialusi Debata tangiangna (ay.6-7,16). Andorang so i nunga marbagabaga ibana (bernazar; ay.18) ingkon pelehonona hamauliteon tu Debata (ay.17). Dihilala ibana do utangna i tu Debata na paluahon ibana sian hamagoan naung manghaliangi ibana (ay.38,16). I ma saluhutna dipaandar ibana di Psalm 116 on.

2)     Ay.1-2: Paingothon di panangihonon ni Debata. Somalna, pujipujian tu Debata do pamuhai ni angka Psalm. Anggp Psalm on, dipungka do dohot “panindangion” taringot tu holong ni roha ni par-Psalm i tu Debata, didok: “holong do rohangku di Jahowa”. Holong, i do sada impola ni ngolu ni na porsea tu Debata. Adong do sitolu sada ihot unok ni parsaoran ni jolma dohot Debata. DI Padan na Robi, ima: holong tu Debata, biar maradophon Debata dohot haporseaon di Debata (love for God, fear of God, Believe in God). Ganup ditaringoti sada sian na tolu i, ingkon antusan do i di bagasan hagogok ni na tolu i. Laos i do na gabe ojahan na tingkos dijouhon di 5 Musa 6: 4 – 5 na gabe ojahan ni panghangoluhon ni patik ni Debata. Dihatindanghon ibana, na holong do rohana di Jahowa. Holong ni rohana i tubu marhite na manghilalahon asi ni roha ni Debata. Nunga jumolo didai ibana asi ni roha ni Debata. Adong dua pandohan manggombarhon i, didok par-Psalm i: a. Ditangihon do joujounki; parhuarajaiongku. Ro ibana tu adopan ni Debata, mangusehon ngoluna (joujou dohot parhurajaon), olo Debata manjalo ibana, olo Debata manangihon. B.Dipaeleng pinggolna tu ahu, saleleng ahu mangolu. Hatop Debata mangalusi; rade tongtong Debata mananginhon. Ndada holan marsasahali, alai saleleng ibana mangolu, ai naeng saleleng mangolu ibana pajoujou Debata. Parsaoran na manongtong dohot Debata marojahan di holong ni roha.

3)     Ay.3-4: Parsorionna. Dipajojor ibana ma parsorionna, na manggombarhon parsorion na mansai parir: a. Dihaliangi angka rante nihamatean ahu; b.Mangonai tu ahu hagogotan ni banua toru; c.Mangonai tu ahu hagogotan dohot pardangolan. Nang pe ndang apala dipaboa rumang ni angka i, alai tangkas parsorion na so haadopan ibana do i sian gogona sandiri. Di na songon i ma joujou ibana tu Jahowa. Dipangido asa Jahowa mangurupi ibana, paluahon ibana sian pardangolan i. Pos do rohana manjouhon i tu Debata, ala dihaporseai ibana do tuk huaso dohot holong ni Debata paluahon ibana.

4)     Ay.5-6: Panindangion di Jahowa parasi roha. Adong tolu pandohan dipangke di ayat on manggombarhon bangko ni Debata: a. Parasi roha (Indonesia:pengasih; Heber: Hanun) manggombarhon na hatop, hibas Debata mangalusi, manangihon na porsea. Mangalusi jala mangula Ibana songon ama; b. Na bonar (Indonesia: adil; Heber: Tsadik), habonaron na marmual sian holong ni roha. Ndang pulut rohaNa amereng na niasianna mardangol.Parasiroha (Indonesia:penyayang; Heber: rehem). Dos do lapatan ni “rehem” – rahim di hata Indonesia (dohot hata Arab). Dua lapatanna: bortian dohot asi ni roha, patudos dohot pandohan (Allah yang rahimi). Asa digombarhon do asi ni roha ni Debata songon bortian na niinganan ni posoposo. Songon bortian i ma asi ni roha ni Debata mangulosi; marmudumudu, mangaramoti na porsea. Songon ima bagas ni pangantusion ni par-Psalm i di Debata. Tarida do asi ni roha ni Debata nang di pambahenanNa tu angka siunjur roha (orang sederhana), angka na bulus marhaporseaon tu Debata, songon i nang tu par-Psalem i.

5)     Ay.7-9: Panghangoluhon ma. Hira na manghatai ibana tu firina, mandok: sonang ma, demak ma. Molo mangula Debata di bagasan dirina, molo rap Debata dohot Ibana, disi do hasonangan, disi do hademahonna. Diulahi ibana ma muse patoranghon pambahenan asi ni roha ni Debata, di bagasan rumang tangiang, panindangion. Nunga malua ibana sian hamatean, nunga marujung partangisan, denggan dalanna. Singkop ma antong asi ni roha ni Debata. Songon na marpadan ma ibana marparange na denggan, mardalan di dalan ni Jahowa.

6)     Huria ni Tuhanta na hinaholongan dibagasan Jesus Kristus. Digombarhon do parsorion na borat di turpuk on. Songon dia balga ni asi ni roha ni Debata, mangalusi dohot paluahon Parpsalmen i. Tarsosak ibana, pola diondam hamatean dohot banua toru. Asa dijouhon par-Psalm ma asa tu Debata marhaporseaon. Angka na porsea i pe ndang tarsirang sian angka na ginoaran hamaolon nang hasusaan. Alai songon par-Psalm i ma hita tongtong MARTANGIANG. Tangiang i do dalanta asa solhot jala jonok dohot Debata. Disi ma dapot hita hagogon nang tiur ni roha odhot pingkiran laho mangatasi i saluhutna. Tangiang i do dalan ni angka na manghaposa Jahowa di ngoluna jala sai dapotan dalan haruar sian ragam ni hasusaan nang persoalan i. Jala angka na porsea i pe tongtong patuduhon sikap biar mida Debata ma ngolunta on jala holong rohanta di Ibana marhite na mian jala mangolu mangulahon lomo ni roha ni Debata.

7)     Topik ni minggunta mandok: Ai Denggan Do Uhum Ni Jahowa Tu Ho (Tuhan Telah Berbuat Baik Kepadamu). Tung borat situtu pe tabolus di ngolu on, sai ingot ma angka na denggan na binahen ni Debata, asa sai holan tu Debata ma alualunta. Ibana ma haposanta jala ndang humordit hita. Pengalaman rohani bersama Tuhan akan perlindunganNya tidak menggoyahkan iman percaya kita sebab Tuhan telah berbuat baik kepada kita. Sebagaimana yang disampaikan Yeremia 29: 11 – “Sebab Aku ini mengetahui rancangan-rancangan apa yang ada pada-Ku mengenai kamu, demikianlah firman TUHAN, yaitu rancangan damai sejahtera dan bukan rancangan kecelakaan, untuk memberikan kepadamu hari depan y  yang penuh harapan.” Amen.