Ai Denggan Do Uhum Ni Jahowa Tu Ho
(Tuhan Telah
Berbuat Baik Kepadamu)
Lukas 9: 22 – 27
1) Huria nahinaholongan dibagasan
Jesus Kristus, Keamanan na terjamin disada negara ima ala denggan diaturhon
pemimpin manang pamarentana aturan i. Dipadalan dohot denggan hukum asa menank
jala sonang warga negarana maringan ditonga ni bangso i. Molo so denggan do uhum nang aturan negara
ditegakkan boi do sursar jala maheu warga negara manghorhon hagunturon nang
ketidaknyamanan maringan di negara i. Suang songon i do ngolunta molo so
diaturhon Tuhanta i boi do gabe lomlomonta di ngolu on. Jala gabe aturan ni
sibolis ma na tarpangke disi jala gabe sibolison ma halak na so olo mian
dibagasan Tuhan i. Ala ni i dibagasan turpuk on ma dipatorang Jesus angka
kriteria na gabe siihuthon Kristus.
2) Aya.22: huria na hinaholongan
dibagasan Jesus Kristus, dihalomohon
Jesus do asa ni halak Ibana marhahonaan tu silang i, ido alana dungkon
dihatindanghon si Petrus ise do Jesus i, asa di uduti Jesus ma taringot tu
panaritaanNa. Mansai maol do tarjalo angka sisean i. Ndang tarpikiran nasida
Mesias na manarita. Anak ni Jolma i mangae godang panaritaan, ditulak angka
sintua ni malim dohot angka siboto surat. Ai bunuon nasida do Ibana jala hehe
sian na mate di ari patoluhon. Alai ndang diantusi angka sisean i hataNa i
taringot tu haheheon holan fokus ni rohana tu panaritaan i do, ditulak jala
dibunu. Gabe menek ma roha nasida. Molo
di Matius di dok do na dipaingot si Petrus do Jesus i taringot tusi. Mat.16:22 “...Asi ma roha ni Debata di Ho, Tuhan!
Unang ma songgop i tu Ho! Alai dialusi Jesus do si Petrus na mandok; Mat.16:23 “....Laho ma ne ho, bolis! Gasip
do ho di Ahu, ai ndang diparrohahon ho angka na di Debata, angka na di jolma
do.” Pangantusion ni angka sisean i taringot tu Mesias dohot Harajaon i
ndang singkop dope. Ala ni i diajari ringkot dope diajari Jesus nasida asa
singkop pangantusionna. Na ro do Mesias i laho manobus dosa ni jolma dohot
portibi on di hau pinarsilang i. On ma missi ni Jesus uju ro Ibana tu portibi
on, dipasahat Ibana do hasintongan i dohot denggan tarbukka jala tangkas. Aut sugari
diantusi nasida taringot tu haheheon ni Jesus i, pasti gok las ni roha nasida
mambege barita ni Jesus i.
3) Ay.23 ; Dung dipatorang Jesus
panaritaan i di ay.22 taringot tu dirina, sahat ma nuaeng panaritaan i pe aeon
ni angka siihuthon Kristus do. Adong
tolu hal na pasahatonNa tu angka siseanNa nang tu hita di parting kian on ima: mansoadahon
diri, manuhuk silamg, mangihuthon Jesus. Aha na nialaman ni Jesus jala laos i
do nialaman ni angka siihuthon Ibana. Dison ma Jesus terbuka patoranghon
hasintongan i, ndang janji manis manang mamadanhon angka arta ni portibi on.
Alai jelas do dipatorang Jesus taringot tu haroroNa tu portibi on. Mansoadahon
diri jotjot do dilapati. Jotjot do dilapati na mansoadahon diri on manadinghon
angka na sinangkapan ni roha songon angka keberhasilan ni karir dohot gok ni
arta asa mangihuthon Kristus. Alai godang do na bangkol rohana manadinghon
parange nang pangalaho n a buruk laho mangihuthon Kristus. Atik boha adong
donganta hea mandok;karas do ahu, ai nunga songon i partubuna ndang boi ubaon
i. Manang adong mandok; ala ni sursar di parumatanggaon ma mambahen ahu gabe
songon on. Ala ni keluarga dohot parngoluon na salpu dohot angka kondisi na
gabe sisalaon asa ndang boi ibana pauba rohana. Mansai tegas do Jesus dohot
tanggung jawab ganup jolma laho mangihuthon Ibana. Ganup jolma do na
martanggung jawab di dirina laho mansoadahon diri, manuhuk silang dohot
mangihuthon Jesus. Tung aha pe najolo masa dibagasan ngoluna. Mangihuthon Jesus
ndang marhite lomo ni rohanta jala boha carana, alai na manulak Jesus do hita
disi. Asa na dihalomohon Jesus laho mangihuthon Ibana ima na maniru
parngoluonNa dohot pasangaphon Debata. Atik adong hasomalan na maralo tu
sanagkap dohot lomo ni roha ni Debata di dirinta asa sigop ma tatundali jala
tatadinghon. Molo tung borat pe mangulahonsa, sai Tuhanta ma na margogoihon
hita patupahon nasa na denggan i.
4) Ayat 24-26 ; dison ma tangka dapot hita hal na borat
antusanta songon na paradoks. Dipaingot Jesus do, Ai agoan hosa ma na naeng
paluahon hosana; alai na agoan hosa ala ni Ahu, i do na pangoluhonsa. Tung
soada do labana angka na marsigolgol laho manjaga ngoluna holan laho
mangharingkothon na di portibi on. Mamora, marjabatan, marpangkat,
marhapistaran, margogo, marbisuk soada lapatanna i molo holan laho tu dirina
sambing, jala laho mangahut angka arta portibi on. Dung mate hita ndnag adong
be marguna saluhutna i, marisuang do ninna Buku Parjamita. Sabalikna molo
tapangke i saluhutna na adong dihita laho mamaritahon Kristus jala
manghatindanghon Kristus alai gabe agoan hosa hita ala ni i, ima na marguna na
pasalihon Debat do hita disi. Taruli hangoluan na manongtong i do hita na
marroha mangula lomo ni roha ni Tuhan i. Unang ma hita maila manghatindanghon
Kristus i dibagasan ngolunta; atik boha maila dope halak Kristen martangiang
diloloan alai ndang mandok pamer. Manang barani do hita paboa halak Kristen
hita ? Angka na maila manghatindangkon Kristus justru dihasogohon Tuhan i do i.
Alai na dihalomohon Tuhan ima na olo jala ringgas manghatindanghon dohot
pasanagp Kristus i jala Tuhan i Jesus pe hatindanghononNa do hita diadopan ni
Debata Ama i.
5) Ay.27; dison ma dipaboahon Jesus
tu nasida adong na so mate sian nasida na maringan ditongatonga nasida andorang
so marnida Harajaon ni Debata. Sian turpuk on paingothon hita dua syarat laho
mangihuthon Jesus. Angka na mangihuthon Jesus, disoadahon ma dirina, topotonna
ma angka dosana. TadinghononNa ma parngoluon nang pangalaho na robi na gok
hisaphisap ni daging dohot portibi on. Dungi Hata ni Tuhan i mandok ia angka na
mangihuthon Jesus, ima na rade manuhuk konsekuensina, angka insakhinsak, reherehe,
ondamondam, digosagosa jala ditindos ala ni goarNa. Siala Anak ni Jolma i
ingkon mangae na hansit jala manarita ditulak angka sintua ni malim dohot angka
siboto surat. Na mate dibunuh do Anak ni Jolma i jala ditanom jala hehe di ari
patoluhon. Siala ni i, asa tongtong ma hita marsihohot dibagasan haporseaonta
tu Ibana ima Jesus Kristus, Anak sasada ni Debata Ama i, Mesiasa jala Sipalua
hita sian nasa dosa pangalaosionta.
6) Sipahusorhusoron:
Ø Angka siihuthon Kristus atik boha
dope raguragu dope rohana, sian turpuk on manghirpasi haporseaonta asa hot
manghaholongi Tuhanta i gumodang asa sian dirinat. Ima na patuduhon sikap na
manuhuk silang ala ni hasintongan ni Kristus. Manopoti dosa dohot hasalaan
manadingkon pangalaho nang ngolu na robi i mamasuhi ngolu na imbaru dibagasan
Kristus.
Ø Angka siihuthon Kristus ima na
manuhuk silang ni Kristus, ingkon togu ma haporseaonna mangadopi angka
reherehe, insakinsak, ondamondam, panindosan, panaritaan nang hamaolon ala ni
goarNa. Sian huria na parjolo sahat tu partingkian on nunga diae angka
siihuthon Kristus i sahat tu na agoan hosa. Alai hot do Barita na Uli i sahat
tu liat portibi on baritahonon ni angka na porsea i. Margogo do na porsea i
mangadopi hamaolon i saluhutna ala ni Kristus donganna. Tudos songon na nidok
Jesus di Johannes 16:33 “... Haporsuhon do jambarmuna di portibi on; alai pos
ma rohamuna: Nunga talu hubahen portibi on.”
Ø Topik ni minggunta mandok: Ai
Denggan Do Uhum Ni Jahowa Tu Ho (Tuhan Telah Berbuat Baik Kepadamu).
Panindangionta angka na satia tu Debata ima mandok mauliate dohot mamuji Ibana
disandok parngoluonta. Ndang adong na so denggan na binahen ni Debata tu hita. Sabalikna
hita do na so deggan marpangalaho dompak Debata. Jotjot do hita tarunjun,
mamboan lomo ni rohanta mardosa,mangalaosi Patik nang HataNa. Ala ni i gale do
hita, sipata lupa, ndang marningot Ibana, jala jungkat rohanta. Mansai denggan
do pambahenan ni Debata marhite Jesus Kristus
na mangalehon hasesaan ni dosa nang hamonangan manaluhon sibolis i. Ala
ni hot ma hita dibagasan Tuhan i na sai
tongtong jonok, solhot tu Ibana marhite tangiangta. Asa dapotan bisuk ang gogo
hita mangadopi nasa musu nang sumbia ni portibi on. Molo naung denggan do uhum
ni Jahowa tu hita, nang hita pe ingkon marespon i marhite na unduk, serep, jala
marroha mangulahon lomo ni rohaNa. Amen.
