Nunga Denggan Saluhutna Dibahen
Jesus
(Yesus Menjadikan
Segala-Galanya Baik)
{Markus 7 : 24 – 37
I. Patujolo
Ia Evangelium Markus on disurathon Johannes Markus
hirahira taon 60/70 M tu halak Kristen naung lilu haporseaonna di huta Rom. Maksud
Evangelium on i ma napabotohon naung ro do Debata tu hita di bagasan Jesus
Kristus, asa dipadomu hita dohot Ibana marhite hamamate, haheheon dohot
hananaekNa. Molo tapaihutihut saluhut isi evangelium on, boi do tangkas taida
di bagasan na ado do sada “hahomion” (mistery) taringot tu hadirion dohot misi
panghobasion ni Tuhan Jesus di portibi on. Lapatanna, tung mansai ringkot
situtu do barita haluaon na binoan ni
Tuhan Jesus, ala ndang tama harajaon ni Debata dipatolhas tu halak na so ungkap
simalolong dohot sipareonna manjalosa. Dibahen i do jotjot di orai mamaritahon
tanda halongangan na binahen ni Jesus tu halak na torop. Jala ndang
diharingkothon Jesus dope hamuliaon dohot pamujion sian jolma ala nitanda
halongangan molo so jumpang dope tingkina Anak ni jolma i dipatimbul
(dimuliakan). Dibagasan turpuk on adong dua halongangan na pinatupa ni Jesus.
Disi patar do taida ulaon ni Jesus ndada holan pamalumhon sahit ni pardagingon,
alai dohot do sahit ni partondion.
II. Hatorangan:
1) Ay.24-26 ; Huria
nahinaholongan dibagasan Jesus Kristus, na ro do marroan sian na so bangso
Jahudi pe manopot Jesus laho manjalo haluaon i marhite na malua sian sibolis.
Na masa do di luat Tirus ulaon ni Tuhan Jesus laho papatarhon huaso ni Debata
ditongatonga ni masyarakat na so halak Jahudi. Asa dirajumi angka sisean i, na
so riperipe ni halak Israel barita haluaon i. Na mar-hak do nang halak
Siroponosia mangido haluaon sian Jesus. Jala secara khusus dipatuduhon turpuk
on do na dohot do angka parompuan taruli di perhatian ni Jesus di haluaon i.
Dipatorang panurat Mateus, na boruboru Kanaan do Parompuan na manjou Jesus i di
luat Tirus dohot Sidon. Dipajongjong Raja Herodes I do angka inganan pamelean
di Tirus dohot Sidon. Jala di pudian ni ari gabe tarbarita ma luat on songon sada
luat sisomba begu, sisomba sibolis. Jadi di tingki na ro i Jesus tu luat tano
on diboto angka penduduk na ro disi do i, na maringan Jesus ditongatonga
nasida. Nang tingki di Galilea pe Jesus, sai adong do na ro sian luat on
manopot Ibana (Mark.3:8).
2) Ay.27-30; Dimasuhi
Jesus do sada jabu disi. Jadi tibu do ro sada ina sian suku (ras) Siroponisia, na marhata Gorik (Junani).
Ditopot ibana ma Jesus jala marsinggang ibana tu jolona, laho paboahon na
partondi na hodar ia boruna. Panurat Mateus mandok: “posi diae boruna ala
dipaporsukporsuk sibolis.” Dipangido ibana tu Jesus, asa dipabali Ibana
sibolis sian boruna. Sisomba Sibolis naung mamboto barita ni Jesus do na
mangido pangurupion ni Jesus. Ala ni i do umbahen na nidok Jesus mangalusi: “Loas
jolo bosur angka dakdanak; ai ndang tama buaton sipanganon ni angka dakdanak,
laho mandabuhonsa tu jolo ni angka biang.” Mansai posi do nian alus ni
Jesus i, alai toho muse do alus ni parompuan i tu Ibana: “I do nian Tuhan; alai dohot do
angka biang, na ditoru ni meja i mangallang na pinarpisikpisikhon i angka
dakdanak!” Na dirajumi parompuan i do Jesus i: TUHAN. Gumodang do nian gelar “TUHAN”
i dipangke dung haheheon ni Jesus sian na mate. Alai di turpuk on nunga
dipatujolo parompuan i mandok: “TUHAN”
lapatanna: SIPALUA. Ido tutu,
Sipalua do ulaon ni Jesus, jala ido nuaeng dipangidohon parompuan i patupaonNa tu
boruna na ginosagosa ni sibolis i. Jala dung dibege Jesus alus ni parompuan i,
gabe didok Ibana ma: “Ala nihatam i, laho ma ho; nunga ruar
sibolis i sian borum i!” Setuju do Jesus tu penilaian ni parompuan i,
taringot tu biang i ma panangga i na metmet na piniaro di angka jabu na
mamparhaseanghon na pinarpisikhon ni angka dakdanak. Dipasombu Jesus do
parompuan i sahat tu kesimpulanna sandiri taringot tu pandohan ni Jesus i. Jolo
dipasombu parompuan i ma jolo nian bosur angka dakdanak (Israel) dung i pe asa
sipelebegu. Adong do tingkina sahat barita na uli tu angka sipelebegu.
3) Ay.31: Di ayat
on dipabotohon do taringot tu pardlanan ni Jesus na manghaliangi. Pardalanan si
songon i dibahen Jesus do gabe sada dalan asa boi tongtong Ibana mangalehon
pangajarion tu siseanNa. Borhat do Jesus sian luat Tirus, laho sian Sidon sahat
tu Tao Galialea, luat na masuk tu huta Dekapolis. Di luat on ma Jesus
pamalumhon sahalak na nengel jala na mangungu. Pamuhai do hasasahat ni barita
haluaon i tu halak Israel umbahen na dipillit Debata bangso i di sangkap
hatuaonna i. Dung dimulai sian halak Israel pasahatonna ma nang tu halak na
asing sian ragam ni bangso dohot ruas/suku. Ai ndang saotikotikna na naeng
paluaon ni Debata, alai tung sagodanggodangna do. Angka jolma na olo manangihon
soara ni Jesus i do na taruli di barita haluaon i. Tutu ndang di jolo ni Jesus
peak boru ni inanta i, alai di jabuna do. Jadi hamalumon sian jarak na dao do
na pinatupa ni Jesus di turpuk on. Jala sasada on do jumpang hita pambahenan ni
Jesus sisongon i di sandok barita na uli ni buku Markus. Marhite turpuk on, naeng tandaonta huaso ni Jesus na
mangatasi saluhut inganan (jarak). Ndang di ambati manang aha pe pardalan ni
huaso ni Jesus. Tarida sian i ha-Debata-on ni Jesus na Marhuaso do Ibana.
4) Ay.32; Dung
sahat Jesus tu huta Dekapolis, ro do jolma natorop mamboan na marsahit ngungu
jala nengel i tu joloNa. Hata nengel dison boi do marlapatan ndang marbinege.
Ia hata na ngungu marlapatan ma i bisu, mansai maol situtu manghatai (gagap),
manang maoto. Ia sahit i ndang na diboan ibana sian hatutubuna, alai na songgop
do i tu ibana di bagasan ngoluna ala ni sada sahit, isarana sahit ala na
niihuthon ni sibolis. Dibahen i do umbahen na mengelek situtu natorop i asa
dipatupa Jesus hamamalum ni sahit nijolma i.
5) Ay.33-35; Dung i diboan Jesus ma
ibana tu suhi, holang sian natorop i. Sian on taboto tung ringkot situtu do di
Jesus sada parsaoran na jonok tu jolma marsadasada. Hadirion ni Jesus dison
dipapatar i ma asa boi Ibana marsaor di bagasan hata naradophon jolma naung
mangungu di ngoluna. Jala asa boi Ibana bongot tu ngolu parbagasan ni jolma i.
Laos patoguhon hadirionna. Dungi martangiang ma Jesus rap dohot jolma i. Dison
ma tarida balga ni asi rohaNa, jala na sian Debata do huasona pamalum na
marshit i. Didok Jesus ma sanghababa hata: “Hephata”, na marlapatan “mungkap
ma” (5:41); 7:11, 15:37). Mungkap ma tutu parbinegeanna, harhar ma nang ihot ni
dilana, gabe tingkos ma panghulingna. Pandohan mungkap dison ndang holan
marlapatan hamumungkap ni pamatang sambing, alai dohot do hamumungkap ni
partondion. Lapatanna, ia hamamalum na pinatupa ni Jesus ima hamamalum ni
saluhut bangko hadirion ni hajolmaon i.
6) Ay. 36-37; Singkop do tutu ulaon
ni Jesus i laos malum do jolma na marsahit i jala malua sian rahutrahut ni sibolis.
Dung i diorai Jesus do jolma natorop i asa unang nian dipaboaboa tanda
halongangan i tu halak. Lapatanna, ndang sahat dope tingkina Anak ni jolma i
ditanda jala dipatimbul hape baliksa do na masa, larangan i gabe songon sada
dalan pahebahebahon ulaon panindangion ni halak natorop i (1: 45; 5: 20).
Marhite ulaon ni Jesus i longang do angka jolma na torop i laos disi do
dihatindanghon nasida na uli situtu do napinatupa ni Jesus i. Panindangion
sisongon i laos bersifat eskatologis do, i ma na mangondolhon panghirimon di
ngolu na imbaru marhite haluaon napinatupa ni Jesus.
III. Sipahusorhusoron.
Adong ma pigapiga na boi putihanta sian turpuk on jala na
ingkon parsiajaranta, Ima:
Ø Dohot do angka parompuan taruli
di sangkap hatuaon ni Debata sian sude bangso, houm dohot ras. Patar do huaso
ni Debata na mangatasi saluhut huaso nihajolmaon, marhite ulaon ni Jesus Tuhan
i. Ibana do Sipalua naung ro papatarhon huaso ni Amana tu saluhut bangso. Jesus
do Tuhan, Sipalua angka na ginosagosa ni sibolis nang di tingki on. Ro ma tu
Jesus, jala bege Hatana laho paluahon angka na ginosagosa ni sibolis.
Ø Dipartingkian on mansai godang do
jolma na dibagasan parsahiton ni pardagingon dohot partondion. Panghorhon ni
kemajuan ni tehknologi informasi di tingki on torop do jolma gabe gale jala
losok rohana pahombarhon ngoluna tu Tuhan Jesus. Adong do jolma na so rade
rohana mangharingkothon hata ni Debata di ngoluna. Nunga gabe nengel jala
mangungu jolma tu barita haluaon na sian Jesus. On do sada sahit na mansai maol
situtu dipamalum. Marhite turpuk on dipapatar (dipabotohon) do tu hita, ia
haroro ni Tuhan Jesus tu portibi on ndada holan pamalumhon sahit pardagingon
alai dohot do sahit partondion.
Ø Dibahen i do asa rade hita
manjangkon Jesus dohothataNa di bagasan ngolunta siapari. Tajanghon ma Jesus
asa ro tu roha parbagasanta laho paimbaruhon ngolunta, asa tongtong hita
mangolu dibagasan dalan na sintong. Tarlumobi di tingkinta sinuaeng on na
sedang mangadopi krisis ekonomi na boi manghhorhon pandelean di rohanta. DI
tingki sisongon on do haporseaonta diuji asa lam tang na laho mangadopi
tantangan dohot ngolu na marubauba. Tapajonok jala tapahombar ma ngolunta tu
Tuhan Jesus, tatangihon jala taparangehon ma hataNa di bagasan ngolunta asa
tolap hitamanahan di saluhut tantangan, krisis dohot gejolak.
Ø Topik ni Minggunta ima; Nunga
Denggan Saluhutna Dibahen Jesus (Yesus Menjadikan Segala-Galanya Baik). Kunci
ni saluhut haluaon sian nasa hagogotan nang parsorion ima ungkap rohanta tu
Debata. Molo nunga taungkap rohanta tu Debata marhite Jesus Kristus, idaonNa ma
angka sangka na uli na denggan. Halak sipelebegu i olo ro tu Jesus jala porsea,
ujungna tangihononna ma soara ni Jesus jala na manaringoti haburujuon ni Debata,
denggan do dibahen Jesus tu ibana. Ala ni i taloas ma ngolunta dipadenggan
Tuhanta Jesus Kristus i. Rade do Tuhanta i mangurupi jala manogunogu dohot
paluahon hita sian nasa ragam hamaolon asal ma ungkao rohanta jala denggan ma
saluhutna dibahen Jesus. Ala ni i marlas ni roha gok olopolop ma na
manghilalahon pambahenan ni Jesus. Asa angak na manghilalahon pambahenanNa i
gabe marpanindangion tu sandok halak nang tu sandok portibi on, dunga denggan
saluhutna dibahen Jesus na ro mamboan haluaon na manongtong di hita. Amen.
