Hot Do Pasupasu Ni Debata Ro Di Salelengna
2 Samuel 7; 25 – 29
A. Patujholo
Dijolo ni turpuk on dipabotohon do na tinongos Debata
Panurirang Natan laho manjumpangi si Daud jala paboahon tu ibana, na mansai
holong do roha ni Debata mida ibana. Umbege i mansai las do roha ni si Daud,
jala ndang tarhatahon las ni rohana i, uju bongot ibana tu bilutna jala hundul
diadopan ni Debata. Pandohan hundul diadopan ni Debata na patuduhon haunduhon
ni rohana jala manungkap diadopan ni Tuhan. Sidok mauliate do roha ni si Daud
dina hilalaonna na sai laon, ditanda ibana do dirina sian dia do haroroanna
najolo ima siala pangurupion ni Debata tu ibana. Dihamauliatehon si Duad do
pambahenan ni Debata dibagasan ngoluna. So tinagam ni roha, sada anak na
pinasombu ni keluarga, ndang dipardulihon, na holan disuru laho marmahan dorbia
tu panjampalan, boi toguon ni Tuhan gabe sahalak pamimpin ditonga bangso
Israel. Dipilit Debata do ibana laho manggantihon si Saul na gabe songon raja
jala saluhut keluarga nang pinomparna pe gabe pasupasu tu saluhut bangso.
B. Hatorangan
1) Dibagasan turpuk on, taparrohahon
do jonok ni parsaoran ni si Daud dohot Debata. Sai martangiang do si Daud tanda
ni rosu parsaoranna dohot Debata. Tabereng ma dibagasan turpuk on adong dua
maksud ni tangiang na pinasahatna tu Debata:
a) Naparjolo, ia tangiang on
patoranghon jala patogoshon ia raja pinompar ni si Daud ima bagian ni integral
ni padanni Debata dohot bangsoNa.
b) Napaduahon, tangiang on
napatuduhon songon dia do sasintongna tangiang ni bangso Israel laho
manangianghon hadumaon ni bangso ni Debata. Ia tangiang i namanaringoti
hatoguon ni raja pinompar ni si Daud. Marhite i, tabereng ma sada sian angka
naposo ni Debata martangiang hombar tu padan ni Debata.
2) Adong do pengalaman ni si Daud na
luar biasa raphon Tuhan i. Pangurupion, parmahanion dohot hamonangan na sai
mangihut pardalanan ni ngoluna. Disadari si Daud do saluhutna i siala ni
pambahenan ni Tuhan i, nang pe songon i, ndang mandok ia ari ari ni si Daud dao
sian angka parsualon. Angka hamaolon pe dibolus ibana do, alaitongtong do ibana
marsihohot rohana tu angka padan ni Tuhan i.
3) Dihamauliatehon si Daud do padan
i nang pe so patar dope idaon jala nang pe tu pinmparna hasahatanna muse haduan, ndang tu ibana be
langsung. Diroha ni si Daud na dohot ibana di bagabaga ni Debat tu diria mansai
arga situtu di rohana. Molo taparrohahon pardalanan ni ngolu si Daud, dapot
hita ma parsiajaran na mansai arga situtu ima; Haporseaonta na lam togu. Padan
ni Tuhan i tu angka halak na satia tu Ibana ima hasasaut lomo ni rohaNa.
4) Marnida pengalaman ni parngoluon
ni si Daud i, tu hita angka na porsea ima angka pinompar ni si Daud di
partingkian on, naeng ma sidok mauliate rohanta di angka padan ni Tuhan i na
mansai uli, naung dipadanhon tu hita marhite HataNa na tarsurat di Bibelta i. Alai porlu do
botoonta ia padan ni Tuhan na mansai ui i ndada na gabe mandok malua hita sian
tanggung jawabta. Alai marhite padan ni Tuhan i laho mamotivasi hita jala patoguhon
hita laho mangolu dibagasan hasatiaon di adopanNa sian nasa roha nang ateate.
Ido alana ndang adong be sidalianta ndang mandok mauliate, ndang adong be
sidalianta sai marungutungut, holsoan tarlumobi laho manalahon Tuhan i. Siala
ni i taambolonghon ma saluhut holso ni rohanta nang pandeleanta. Tapahusorhusor
ma Hata ni Tuhanta i arian dohot borngin pe, asa lam margogo haporseaonta,
marurat togu dibagasan Tuhan i, jala dipargogoi ma hita laho mangadopi nasa
parsualon ni ngolunta.
5) Songon halak na porsea hita di
Jesus Kristus, ingkkon pos do rohanta, ia Debata na tasomba i na mangaramoti
hita jala mangalehon na ringkot di ngolunta laho pangkeonta asa ndang
marhahurangan be hita disi. Diparade Ibana do saluhutna dihita. Songon topik di
minggunta mandok: Hot do pasupasu ni Debata ro di salelengna. Ndang hea muba
jala mose padan ni Debata, hita jolma do na sai sipata mubauba hinorhon ni
dosa, hahurangan nang kelemahanta songon jolma hita.
6) Dipatuduhon Debata do holongna
laho mamasumasu hita. Ai didok do di Johannes 3:16Ai songon on do holong ni
roha ni Debata di portibi on, pola do Anakna na sasada i dilehon, asa unang
mago ganup na porsea di Ibana, asa hangoluan na salelenglelengna di ibana.
Jesus Kristus do na dipadanthon tu hta na gabe dalan hasonanganta jala na hot
ro di salalengni lelengna. Asa angka na porsea di Jesus i naeng ma palumehon
Haporseaonna di Jesus Kristus tu angka pinomparna marhite Haporseaonna na
mangolu di parange nang parulaonna. Ndang sae holan arta nang sinamot alai na
hot ima haporseaonta dibagasan Jesus Kristus i do na gabe pasupasu na ummuli
jala na dumenggan sipasahathonta tu angka pinomparta. Halak na porsea tongtong
jonok marparsaoran tu Jesus Kristus marhite tangiang, pangidoan nang elekelekna
laho mangondihon dirina, keluargana, pinomparna nang bangsona asa malua sian
hamaolon jala maduma ngoluna jala hot mananda asi dohot holong ni Debata. Amen.
