Mangurupi Sian Nasa Haholongon
2 Korint 8: 1 – 7
A. Patoejoloe
Konteks na masa di huta Jerusalem masa haraparon dohot hapogoson.
Sibonsirina ima ala ni sala pangantusion manang pamikiron na parjolo, mula
hajongjong ni huria i. Molo tajaha di Buku Ulaon ni Apostel 2: 45; 4:32-35 sude
do paradongan mangarajumi artanasida i gabe arta nihatopan, jala ganup
manggadisi hauma, jabu ro di angka artana, jala disagihon tu angka na pogos.
Dimulanai songo huria sabungan Jerusalem jala huria mulamula, dirajumi ruas i
do i songon sada ulaonna uli, jala angka apostel i pe mansai las do rohanasida
mida pangalaho i. Alai ala ni las ni rohana mansai balga i, gabe lupa do nasida
sumarihon ngolu tu ari na mangihut. Gabe ala ni i masama hapogoson dohot
haraparon. Ndang diorom dirina masilehonlehon i laho bohal nasida dipudian ni
ari, ndang mamereng tu jolo jala ndang sumarihon ari pangapudian. Gabe halak siurupan nasida nuaeng, angka na mora
jala mararta hian.
Dua taon andorang so disurathon Apostel Paulus turpuk on, nunga disosoi
ibana huria Korint asa papungu tumpak tu huria (na ginoaran angka na badia) di
Jerusalem. Laos diaboa ibana do di surat i naung disosohon ibana hian huria
Galatia patupahon songon i ( 1 Korint 16: 1- 4).
Dibagasan turpuk on dipaboa ibana do naung dohot angka huria na di
Makedonia (ima huria Pilippi, Tessalonika dohot Beroa) papungu panguruion
tuhuria na di Jerusalem. Huria n amarsitaonon jala marhaporsuhon do angka huria
na di Makedonia i hinorhon ni barita na uli pinasahat ni Apostel Paulus di
angka luat i (Ul.Ap.16-17) alaidihatindanghon Apostel i do haburjuonnasida
papungu tumpak dohot manongoshonsa. Huroha, ndang pola diigil Apostel Paulus
asa dohot huria na di Makedonia papungu tumpakk ala parungkilon na balga na
masa tu nasida. Alai mangihuthon ayat 4, nasida sandiri do mangelek/managapoi
Apostel i dohot gomos asa parsidohot
nasida lho mangurupi. Jala hataridaanna gumodang do tumpak na tarpapungu
i sian na hhinirim ni Apostel i hian. Ndang adong pamingkiron ni huria i
mandok: “Ai hami pe marsitaonon jala pogos do, ndang tarhona hami mangurupi
nasida”.
B. Hatoerangan
Hinorhon ni pamingkiron manang
mentalitas ni sasahalak do mangonjar ibana mangadopi na masa. Adong do
pamikiron namaol muba, adong do na hira na so olo muba iadon ala naung gabe
bangko, alai adong do na mura muba, hombar do i tu panjaloon ni sasahalak tu
poda, pangaarion, hatorangan, dohot sipaingot. Molo taida pambahenan ni angka
huria na di Makedona i tangkas do dohononta naung nionjar ni pangantusion ni
Hata ni debata do nasida mangadopi parungkilon dohot hapogoson nasida sandiri,
dohot maradophon parungkilon nang hapogoson ni huria Jerusalem. Ndang marisuang
hata ni Debata na binege jala ginuruhonnasida na sai laon, tung i do ijahannasida
manumpahi huria i.
Taida ma jolo manang na piga naung hinangoluhon ni angka huria na di
Makedonia i:
1)
Naparjoloe;
pasahat diri tu Tuhan i (Ay.5): Ganup halak na manumpahi ulaon Harajaon ni
Debata ia so jolo pasahat diri tu Debata ndang pola ditimbangi rohana naung
tama manang hurang tama na pinasahatna i. Holan, asal ma adong dipasahat. Ndang
pola dipikiri rohana manang naung hombar manang na so hombar i tu pasupasu na
jinalona sian Debata, andorang so dipasahat ibana tumpakna tu angka ulaon
Harajaon ni Debata. Saijumolo do rohana manungkun, aha mana dapot ahu dung
hupasahat tumpakhu ? Ai molo dung dipasahat halak dirina tu Debata gabe
rajumanna ma : “Bagian ni ngolu hakristenon do tumpak, asiasi manang pelean i
jala bagian ni parsombaon (ibadah) tu Debata do i,” na marlapatan ndang
tarsirang be i sian ngoluna songon halak Kristen.
2)
Napaduahon,
haradeon dohot sihol ni roha (ay.4); “gogo diapoi nasida hami jala dipangido
asi ni roha..” di hata indonesia didok: “dengan kerelaan sendiri mereka meminta
dan mendesak kepada kami....”. Songon naung tataringoti di joo, ndang pola
dohot huria na di Makedonia nian diigil Apostel Paulus parsidhohot laho
mangurupi ala nasida pe dibagasan parungkilon dohot hapogoson do. Alai sihol ni
roha ni angka huria i do dohot haradeon mangonjar nasida mangulahon i. Ndang
diaturhon Apostel i manang na sadia tumpak ni marsasahuria manang marsasahalak.
Dipasahat ibana do tu haradeon nasida mangalehon. Ndang olo apostel i mamaksa
manang ise pe pasahat silehonlehon (ay.8). Balga do panghorhon ni haradeon
dohot sihol ni roha i mangonjar nasida mangurupi ai songon hinatinanghon ni
apostel i: “gumodang sian na huhirim hami...” (ay.5). Angkup ni i ndang
marnaloja nasida papungu tumpak i atik pe diaturhon Apostel Paulus ganup Ari
Minggu papunguhon (I Korint 16:2). Ndang adong na marungutungut nang pe ingkon
manang piga hali papungu tumpak mangurupi dongan. Disi do hataridaanna, molo
adong na rade, na masihol jala naung pasahat diri tu Debata, gabe ndang pola
lomos huria di godang ni panumpahion.
3)
Napatoluhon ;
pasahathon hombar tu na adong (ay.3); Molo adong haradeon, gabe psahaton ma
hombar tu na adong, ndang hombar tu na so adong. Sude jolma do adong na
tarpatupasa, alai tutu ndang sai dos na tarpatupa ganup jolma. Didok apostel i:
“Molo adong ringkot ni roha halashonon do na dapot, nda tung lobi sian na dapot
(2 Korint.8:12). Na tarpatupa, ima na adong, manang hombar tu na adong. Alai
siingoton unang ginabusan na adong, manang unang didok na so adong na adong i.
Angkup ni i nda tung lobi sian na tolap lehonon ai molo adong di iba ndang sude
i pakkeon mangurupi dongan so tung gabe so adong tading pakeon tu na ringkot di
iba, manang so tung gabe marporsuk iba (2 Korint 8: 23), songon na masa di
Jerusalem uju i. Atik pe pandohona ni apostel di ayat 3 i: “....lobi tahe sian
gogona...” anggo lapatanna ndang holan hagogoon ni hajolmaon be dipangasahon
angka huria na di Makedonia papungu tumpak i alai nunga hagogon ni Debata, ai
lobi sian hagogoon ni jolma do hagogoon ni Debata.
4)
Paopathon;
ndang olo papeol hasahatan ni Tumpak. Nunga tontu hasahatan ni tumpak
sipapunguon i, ima mangurupi huria na di Jerusalem. Sude do na dapot i
dipasahat tu tujuan naung tontu i, ndang diorui manang ndang gabe dipake tu
tujuan na asing. Anggo didok roha nian ala so sai dipabotoboto apostel i manang
na sadia na dapot, jala ala tar godang do na dapot ndang pola sala nian molo
dipake i tu angka haporluan na asing. Alai ndang olo angka huria na di
Makedonia patupahon songon i ai molo tu Jerusalem do tujuan ni tumpak i, ba
himpal do i dipasahat nasida. Sian i tarida ndada holan mangalehon
dinhangoluhonnasida dohot do lapatan dohot tujuan ni silehonlehon i.
C. Sipahusorhusoron
Dihita nahinaholongan, angkup ni i, adong manang piga nari siparrohanonon
asa ungkap roha ni angka dongan manumpahi angka ulaon na denggan:
a)
Adong na
manghirpasi: Adong do ulaon na ingkon ulahonon ni sude jolma alai ndang adong
nanggo sahalak pe na mangulahon. Isarana ulaon na ingkon ulahonon ni duse jolma
do ulaon parasinirohaon alai olo do nanggo sada jolma pe ndang mangulahon i ala
so ada na manghirpasi. Rigkot do di huria adong na marulaon papungu tumpka tu
angka haporluoan na marragam i. Alai ingkon ingotonna do anga haporluan na
marragam i. Alai ingkon ingotonna do angka dalan na so maralo tu lomo ni roha
ni Debata laho papunguhonsa. DI ulaon asi ni roha on diulahon Apostel i do
ulaon panghirpason marhite sosososo dohot bagabaga songon na nidokna, isarana
di 2 Korint 8:8; 2 Korint 9:6-7.
b)
Haposan: na
tarsurat di 2 Korint 8: 20 mandok: “Unang ditihai hami di tumpak na balga na
huhapadothon hami, i do na hutamparhon hami. Ai hupikkiri hami na patut ingoton
di jolo ni Tuhan i, nang di jolo ni jolma.” Pos do roha ni angka huria i di
Apostel Paulus taringot tu angka tumpak i alai ndang olo ibana so mardongan mangaradoti
angka tumpak i ai ndang lomo rohana so tung gabe sitihaan siala i. Gabe disuru
do sahalak na leak tau (haposan)mamboan sngka tumpak i sian Korint marhite
surat ( I Korint 16: 3; jaha 2 Korint 8: 22-23). Sumurut do haringgason ni
jolma mangulahon panumpahion moo ndang haposan halak hasahatan ni angka tumpak.
c)
Panjouon
Diakonia bersifat komunal nang personal: Huria na tarjou secara komunal
marasini ni roha; mangulaon asi ni rohani Debata marhite holong sian ulaon
diakoni sosial. Hajongjongan ni huria ndang holan sumarihon dirina, alai
manatap tu duru ni huria na godang angka manaon na bernit nang hasusaan. Huria ma na gabe parhitean
asini roha ni Debata, jiwa sosial sai tongtong lohot di huria i tu bagasan nang
tu duruni huria i. Asa huria ma representatif ni Debata laho sumarihon angka na
hurangan. Adong be do na hurang manang tantangan di huria i, alai ndang
manundati huria i lahi patupahon diakonia sosialna. Halak na porsea berdiakonia
secara personal, marasini roha, tama mamelehon dirina gabe pelean na mangolu
(ptds. Rm 12:1). Nang pe sai adong do hahurangan, nang dosanta, alai disi ma
haporseaonta na lam togu laho patupahon
na tolap sibahenon laho mangurupi dongan jolma na dibagasan hamaolon,
hahurangan. Di angka pandita adong na ginoaran Tumpak Liat Pandita (TLP), asing
ni ia ngka tekenlist sipatupaon di angka na masa hamaolon di dongan saulaon.
d) Domu tu Topik ni Minggunta: MANGURUPI SIAN NASA HAHOLONGON. Taulahon ma pangurupion i ala nionjar haholongon tu Tuhan Debata. Molo si Salomo diurupi do Ratu Syeba di angka na maol di rohana. Dipatupa si Salomo ala holong nang biar ni rohana mida Debata Jahowa. Siala habisuhonna i sian Debata do i, hombar tu na pinangidona. Psalmen 111:10 Biar mida Jahowa do parmulaan ni habisuhon, maruli hapistaran na sumurung do sude angka na mangulahonsa; hot do baritana i ro di salelenglelengna. Tapasiding ma roha egoisme, na mangholit, na so olo marholong ni roha dohot na marasini roha. Halak na mangalehon dohot mamelehon dirina tu Debata ido angka na sanggup mangalehon manang sadia pe tu ulaon asini roha i. Jesus Kristus do dasor ni haholongon ni angka na porsea i asa olo mangurupi. Songon Jesus Kristus na marholong ni roha tu hita jolma pardosa, mangalehon diriNa humanghop hita asa malua hita. Marhite hamamate ni Jesus Kristus dohot haheheonNa na gabe jaminan pos ni rohanta laho mamelehon dirinta gabe ulaulaNa di tonga portibi on.Amen.
