“Patar Do
Saluhutna Diadopan ni Tuhan i”
Semua Nyata Dihadapan
Tuhan
& Ev: Psalmen
139: 1 - 6 & Ep: Lukas 14: 25-33
A.
Patujolo
Dijolo ni Debata do hita mangolu
saluhutna, diadopan ni mataNa. Ndang adong na so diboto Ibana nasa na niula ni
jolma manang sadihari pe. Gari angka na di pingkiran ni jolma i pe diboto Ibana
manang tu dia ujungna. Sude sangkap ni hajolmaon i tangkas do i diida Debata,
jala di pamanat Ibana do sandok parulan ni ganup. Songon i do saluhut di adopan
ni Debata, nang na porsea tu Ibana nang na so porsea pe. Jala si Daud sandiri
pe di bagasan turpuk on dirajumi ibana do na masurungku do saluhut pamingkirion
ni Debata, jalamatimbohu, ai ndang tuk be gogo ni pingkiranna laho mangantus
nasa pambahenan ni Debata. Debata na mamboto saluhut do Ibana, jala ndang adong
haporusan ni jolma pe manang na tu dia sian adopanna. Patar do saluhutna di
adopan ni Tuhan i. Ala ni i do umbahen na diauhon roha ni si Daud, na ringkot
do ganup jolma menyadari nasa na niulana di jolo ni Debata.
B.
Hatorangan
1)
Ditanda Debata do angka halak na mian di
Ibana ditanda do si Daud naung jinauNa i. Jahow do sigomgom saluhut isi ni tano
on. Diboto Jahowa sandok pikiran dohot roha ni si Daud naposoNa i. Disadari si
Daud do hasongkalon ni Debata na mangalinggomi ibana. Ndang adong na holip sian
panatapan ni Debata dinasa na [iningkiran dohot na naniulahon ni si Daud
naposoNa i sian adopan ni Debata. Ndang adong ruang gerak ni si Daud na so
patar dijolo ni Debata. Sude panggulmitonna
sai dipamanat Debata do. Ala ni ido umbahen na jamot ibana di angka sipingkiran
ro diulaonna pe. Ndada holan angka na tarida i na patar di jolo ni Debata, gari
pingkiran ni angka jolma na so tertuang dope tu angka pangulaon (tindakan)
nunga diboto Debata, sahat ro di ujungna muse nunga diboto Ibana. Didodo Ibana
do saluhut roha ni hajolmaon di atas tano on.
2)
Debata ni ganup tingki do Ibana na
umboto keadaan ni jolma, manang sadihari pe; manang na hundul, manang na
jongjong, manang na modom, manang na mardalandalan, disege jahowa do saluhutna
i. Dibege Jahowa do saluhutna hata ni jolma
na haruar sian sialap ingkauna i. Sahat do i tu Debata, ala ni i do
umbahen namanat si Daud di angka sidohononna, ai na taripar do i tu Debata. Diboto
Debata do manang na di dia si Daud, ditanda Ibana do sian jolo dohot sian pudi.
Dijolo ni Debata manguluhon ibana, jala dionjar Jahowa do si Daud sian pudina
asa margogo di angka pangulaonna i (ay.5). Tangan ni Debata na gogo i do na
mangalinggomi si Daud.
3)
Sadar do si Daud, na sahalak jolma na
terbatas do ibana, na adong do limit naung binahen ni Debata. Ndada jolma na so
terbatas jolma i, alai tung jolma na dibatasi limit tertentu do. Disadari si
Daud do batas ni sandok gogona nang angka pikiranna pe. Diokui ibana do na
sumurung do Debata na marhuaso i sian nasa na tinompa ni Debata. Songon i do
apostel Paulus di Padan na Imbaru, na mandok : “Bagasna i antong, hamoraon,
hapistaran dohot parbinotoan ni Debata! Na so hasigatan do angka uhumNa jala na
so habogasan do angka dalanna! (Rom.11:33)
4)
Na Mahahadir do Debatanda i, ai tung
sura pe manaek si Daud tu ginjang disi do Debata; jala manang tu dia pe laho
ibana nunga disi Debata. Jadi di jolo ni Debata do mangolu jolma i. Jala ndang
adong inganan haporusanna manang tu dia pe. Ndang tarbahen jolma i patupahon
manang aha pe laho mangondingi langkana ro di angka pingkiranna sian adopan ni
bohi ni Debata. Na tuk do Ibana ro manang sadihari pe tu nasa hajolmaon. Tuk do
huaso ni Debata patupahon habalgaon si songon i.
C.
Sipahusorhusoron
1.
Jahowa na Marhuaso do Debatanta i, na
tarpatupa Ibana do manang aha pe na hinalomohon ni rohaNa. Ditoru ni huasoNa do
saluhut manang aha pe na masa di sandok portibi on. Ndang porlu holso rohanta
molo adong huaso na asing na mangambati huaso ni Debata. Ingkon tulus do nasa
na hinalomohonNa di nada hajolmaon. Diboto Ibana do sude ruang gerak ni angka
jolma i, jala tangkas do i di Ibana.
2.
Ndang adong jolma na manahan di jolo ni bohi
ni Debata, manang na margogo laho manabunihon manang aha sian jolo ni Debata.
Na Maha hadir do Ibana, jala marnida saluhut pambahenan ni angka na tinompaNa
i. Parbinoto do Ibana di saluhut na masa, jala ndang tarbahen jolma i laho
maporus manang tu dia pe.
3.
Mansai ringkot do ganup jolma menyadari
na manusia terbatas do hita saluhutna. Di angka batas batas ni kemampuan na
nilehon ni Debata do hita boi mangula, jala disi do ruang greakta, jala ndang
lobi sian angka batas naung adong i. Nang pingkiranta, rohanta dohot nasa panghobasionta
di sandok ngolunta, dibagasan batasbatas na nilehon ni Debata ma i taulahon.
Tasadari ma batas na nilehonna i tu hita.
4.
Hombar tu topik ni minggunta mandok: “Patar
do saluhutna i diadopan ni Tuhan i.” Ndang adong na buni sian adopanNa, ala ni
i biar ma rohanta mida Ibana. Tongtong ma tapatuduhon hasatiaonta laho
mangihuthon Tuhanta Jesus i, unang adong sangkapsangkap, manang roharoha na
asing, asing sian na polin rohana mangihuthon Jesus. Amen.
B.E No 42 HAMU SUDE NAUNG TINORUAN BL. 216
2. Na ro ma Gurumi , tarehon pinggolna tu podaNa i
naeng patuduhononNa dalan di ho nuaeng tu surgo i.
Ai na buni anggo najolo , patar do di sude na olo
Porsea di Tuhanta i . Ibana do na paboahon
Saluhut na hinalomohon ni Debata , AmaNa i.
