“Debata Do Panguhum”
Allah Adalah Hakim
& Ev: Psalmen 50:
1 – 6 & Ep: Mateus 24: 45 – 51
a.
Patujolo
Ia psalmen on ima Ende ni Si Asap na paboahon
ia Debata ima na marhuaso, panompa nasa na adong di portibi on, na songkal jala
na marmulia. Disada masa panguhuman sai adong do na margoar hakim na martugas
laho mamareso, manimbangi dohot manelesaihon sada parkaro. Ulaon ni hakim
mansai ringkot di proses i. Alai na gabe siholsohononthon, di angka na naung
masa proses peradilan na mardalan, peran ni hakim on do na sai jotjot
disalahgunahon, jala gabe so mardalan be dohot sintong. Molo tabereng di
negaranta on, masa do diadili sahalak ina na matua ala manangko parbue ni
coklat so piga godang na, alai ingkon di penjara. Dungi angka koruptor na mambuat
hepeng ni negara milyran alai ndang adil panguhuman i, neang do dibahen angka
na papeol uhum. Gabe dirugihon ma negara nang pihak na asing. Na dipenjarahon
pe dapot fasilitas songon di hotel nang
pe di hurungan.
b.
Hatorangan.
1.
Ia Pesalmen 50 on ima na marisihon angka
sipaingot, gombaran taringot panguhuman, uju dipangido Debata sian jolma i asa
mampartanggungjawabhon angka naung niajarhon Debata tu nasida. Na ro do Debata
tu tongatonga ni portibi on laho
manguhumi, asa saluhut na di portibi on mamparohahon panjouonNa i, ndada holan
ala pangalaho na so ture ni bangsoNa Israel tingki i. Alai asa sude jolma i
mangharingkothon laho umboto parsombaon na sintong tu Debata, ima dibagasan
tondi nang hasintongan.
2.
Uju ro Debata laho paingothon, na ro doo
Ibana dibagasan hatiuron na sian Sion, haulion partimbo, marhite angka
hasongkalanNa (ay.1-2). Na ro ma Ibana jala ndang marnasoan (ay.3). Ndang
huphuponNa simalolongNa di angka dosa na binahen ni jolma, patuduhononNa ma na
so lomo rohaNa mida angka dosa i. PapunguonNa ma angka jolma na hinaholonganNa
tu Debata, alai angka nasida bulus rohana mangihot padan dohot Ibana, na
manjanghon Ibana gabe Debatana dohot na pasahathon dirina tu Ibana songon
bangsoNa (ay.5).
3.
Asa ulahononna ma padan dohot Debata,
padan na tandi marhite parsitutuon. Songon jolma na mardosa sai adong do
hasesaan ni dosa na dipatupa ala ni pangalaosion di padan na parjolo asa boi
janghonon mulak tu padan na imbaru. Asa angka langit na gabe saksi laho
mamaritahon hatigoranNa diangka luat, nang sahat tu ujung ni portibi on. Asa
hatigoran ni Debata di hatindanghon, tarbukti, jala ndang adong na mangalo
(ay.6).
4.
Tuhan Debata do na gabe panguhum na
tigor, Ibana do na paboahon jala pasahat sipasingot tu bangsoNa na so mian
dibagasan hasintongan, na mangalaosi HataNa jala na mangalo pangajarionNa.
Halak Israel hatiha i, sai dibahen do usaha laho mambahen sisip tu Tuhan i
marhite pelean sipotongon siala pangalaho dosa na binahen nasida. Ndang jujur
nasida, diulahon nasida do pandoboon, ido asa gabe muruk ma Debata jala
paingothon nasida. Jala ndang lomo roha ni Debata di pelean na pinelehon nasida.
C. Sipahusorhusoron
1)
Dibagasan parngoluonta, mansai rarat do
angka dosa na taula, na mambahen marsak roha ni Tuhan Debata. Tuhanta i do na
gabe panguhum na manulingkiti jala na pasahat sipasingot dohot na menguhumi di
angka na marsala. Siala ndang dipasiding Debata simalolongNa di angka
pambahenan sala dohot na so nihalomohonNa. Jala uju dipaingot Debata pe, na
mandok laho papunguonNa do hita muse mulak tu Ibana, marhite parpadanan na
khusus, asa ia hita angka jolma na mardosa manghatindanghon hasalaanta na taula
jala ndang ulahononta be i. Sasintongna angka parguruanta na tapatupa songon na
somal i mansai ringkot do i, alai parguruan na sintong ima na saurdot dohot
pambahenan nang pangalaho.
2)
Laho patigorhon dasor ni pelean ni bangso i,
di parentahon Tuhan Debata do asa pasahathon pelean hamauliateon na marhadomuan
tu pelean haluaon (3 Musa 7:11-15). Dihasiholi Tuhan Debata do manghangoluhon parsombaon tu Debata na tubu
sian roha na sai manghamauliatehon asi ni roha ni Debata di haluaon na pinasahatNa
( Psalm 50:14a). Marhite parenta laho manggohi padan na naung dipaboa nasida di
adopan ni Debata (50:14b), Dihalomohon Debata do bangso Israel manomba Ibana
marhite na mangargahon hajongjongan nang huaso ni Debata.
3)
Di jaman sinuaeng on mansai godang do “Musang
berbulu domba”, godang sipaotooto, manipu, mengkamuflase diri. Berengon do
songon na badia, burju, tulus, jala bulus. Hape na tulus, bulus mangulahon na
jat do. Boi do angka nasida manipu godang jolma alai ndang boi i diadopan ni
Debata. Patar do diadopan ni Debata sidodo roha, na manukingkiti ateate nang
pingkiranta jolma. Godang do taparrohahon barita angka jolma na manipu,
sipaotooto na gabe hona tangkup polisi nang masyarakat. Songon peribahasa
Indonesia: “Sepandaipandai tupai melaompat akhirnya jatuh juga”, samalomalo ni
jolma manutupi angkal, nang malomalona (bisuk ni portibi on) sai ungkap do
sogot i. Unang ma terperdaya hita di kesalehan palsu. Nang hita na porsea; asa
unang adong na marpangalensem, kepurapuraan. Atik na holan di ari minggu do
hita songon na tulus, bulus, badia, burju, tobok, masijalangan dohot angka
dongan ruas, tutu ma pamujion nang endeta, jala burju tumangihon Hata ni Tuhan
i, dipatuduhon bohi na bertobat. Hape dung salpu minggu, di ari senen sahat tu
sabtu kumat ma muse gabe ulaula ni sibolis, manang gabe sibolison, diula
badabada, ondamondam, manipu, ndang jujur ditigatiga nang ulaon, mangulahon mark up, korupsi, ndang jujur, ndang olo
mardame, parhosop, teal, elat, late ni roha sai masigorgor. Alai ndang boi tabunihonon
i saluhutna sian adopan ni Debata. Ndang boi ala tapagodang hamauliateon, nang
pelean laho manutupi dosa nang hasalaannta. Sai na ro do Tuhan i di ari nang
tingkiNa na manguhumi hita. Sai polin ma haporseaonta laho mangihuthon Tuhanta Jesus,
jala pangoloi di Hata ni Tuhan i, ala naung ditobus sude dosa nang hasalaanta.
Tapangido Tondi Parbadia mandongani jala mangajari hita asa unang madabu hita
tu elaela ni sibolis nang portibi on. Amen.
