“Polin Mangihuthon Jesus”
Mengikut Yesus Secara Total
& Ev: Lukas 12:
49 - 53 & Ep: Psalmen 82: 1 - 8
A.
Patujolo
Ia turpukta on na binaritahon si Lukas
taringot tu pardalanan panghobasion ni
Tuhan Jesus sian Galilea tu Jerusalem. Mansai denggan do laho mangantusi turpuk
on marhite na manjaha andorang dohot dungkon ni turpuk on, na manaringoti jolma
na mangadopi hamatean dohot panguhuman (ptds.12: 20,40). Siala ni i disosohon
do tuhita asa tongtong satia laho mangulahon angka ulaon na pinasahat tu hita
di portibi on. Dibagasan turpuk on dipatorang Jesus do tu angka na manangihonsa
angka hamaolon na naeng siadopanna. Asa ditingkina na ro ma Tuhanta Jesus muse
laho papatarhon HarajaonNa.
B. Hatorangan
1)
Aya.49: Mansai andul marasing do molo
dijaha ayat on dohot Bindu 4: 14- 9:50, na paboahon taringot tu Jesus na
mangajari, marhobas dohot mangulahon bahat angka halongangan. Hape dibagasan
ayat on dipaboa ia Jesus na ro mamboan angka hamaolon, manang partontangan (api
na nidanggurhon mamboan partontangan). Pandohan ‘mandanggurhon’ dipangke laho
mangalapati na netral. Molo dipahombar tu Mat.10;34, pandohan i dipangke laho
paboahon siboan dame. Na nidok panurat Lukas dison laho mamuhai tu angka ayat
na mangihut ay.51-53. Siala ni i mangalapati ‘api’ dison ndada martudutudu tu
hasasaor ni Tondi Parbadia. Alai api na nimaksud dison ima panirangon,
partontangan, uhuman, krisis. Dungi mansai ringkot taparrohahon hata ‘ro’, ima
napatuduhon haroro ni Tuhan Jesus. Na ro ma Ibana tu portibi on, na paboahon
ndang sian portibi on Ibana. Na sian Banuaginjang do Jesus ro tu portibi on.
Marhite pambahenanNa; sian hamatean nang haheheonNa na patimbulhon angka
partontangan, krisis. Naung ro do api i, naung didanggurhon tu portibi on, alai
ndang martimburak dope panghorhon api i, alai na mangihut ma ro i dibagasan
parngoluon ni hajolmaon.
2)
Ay.50: Dipaboa do dison taringot tu
pandidion na jinalo ni Tuhan Jesus. Ayat on paboahon muse pardalanan ni Jesus
tu Jerusalem sian mula ulaonNa Jesus nididi si Johannes pandidi (3:21). Diujung
ni pardalananNa i dipandidihon ma Jesus patuduhon naung sada Ibana dibagasan
panaritaan nang hamateanNa. Di ay.50b, dipaboa taringot na niarsakhon Tuhan
Jesus (ptds.Luk.22:42-44); sangkap ni Debata tu Tuhan Jesus naung dibuhai jala
sahat tu hamamateNa. Naung dipaima Jesus na masa i jala bolusonNa do angka na
naeng masa tu diriNa.
3)
Ay.51-53: sian turpuk on naeng paboahon haluaon, hadameon na binoan ni Tuhan Jesus
ndada haluaon “haportibion” nang dame ni ‘portibi’. Haroro ni Jesus mamboan
partontangan, asa angka jolma mambuat haputusan laho mangjanghon Jesus manang
manulak Jesus. Siala ni i ma masa partontangan di angka jolma na manjanghon
Jesus dohot na manulak Jesus dibagasan rumatangga. Molo dipahombar sian Mika 7:
6 adong parasingan haporseaon na mangihuthon Jesus dohot na so mangihuthon
Jesus. Masa parasingan ni haporseaon, masa parbadaan, partontangan sian anak
baoa tu amana, anakboru tu inongna, parumaen dohot simatuana na patuduhon angka
horong pinompar na marasing. Hape molo keluarga ima sada lembaga na terkecil di
portibi o n na manggombarhon hasadaon, parsaoran na rosu, alai boi do gabe marasing
nang maralo sama nasida ala ni na mangihut Jesus dohot na manulak Jesus. Mangihuthon
Jesus ndada haputusan kelompok, kategorial manang komunal, alai individual,
manang secara pribadi do sian haporseaonna laho manjalo manang mangihuthon
Jesus. Alai ndada na manudu holan sada horong pinompar na sintong manang sada
golongan. Alai molo diparrohahon sai hira adong krisis na masa partontangan
sian angka generasi na maniop gomos angka hasomalan ni haKristenon maralohon
angka generasi na so maniop hasomalan i manang na gabe kompromis tu haportibion
na sai diela bisuk ni portibi on laho
mambahen haputusan tu dirina sandiri. Ido alana didok Jesus tu angka siseanNa
taringot tu harorona laho mambahen partontangan, panirangan. Masa patujolo ni
krisis, asa gira ma angkajolma mambahen haputusanna di haporseaonna. Di na masa
krisis dohot na laho mamutushon tu dirina nang masa depanna ganup marsadasada
gabe patubu parsalisian nang partontangan maralohon angka naung somal
padalanhon haporseaonna di Tuhan i.
C.
Sipahusorhusoron
1)
Haroro ni Jesus ndada na holan laho pasombu
tagas ni jolma. Alai haroro ni Jesus mamboan hadameon, ndada hadameon na diroha
ni portibi on. Mansai andul do dao sian panatapan nang pangkirimon ni jolma na
di portibi on sian na niigil ni Debata dibagasan Jesus Kristus. Hajongjonga ni
Jesus na ro tu portibi on sai hira api
na mangungkap harorangon, hajahaton, pargabuson, sipaotooto na naung
somal diulahon jolma.
2)
Molo angka siihuthon Kristus naeng ma
tapatuduhon hapolinon ni roha. Songon topik ni minggunta na mandok “POLIN
MANGIHUTHON JESUS” (Mengikut Yesus secara total). Ndang adong be disi marlangku
angka hasomalan manang ruhutruhut nabinahen ni jolma. Jesus na ro paimbaruhon
portibi on, nang roha ni jolma menerobos angka bisuk ni portibi on. Songon
hajongjonganNa manerobos angka ritual nang angka hasomalan ni halak Jahudi.
Hajongjongan ni huria songon singkat ni Kristus ditonga ni portibi on mamboan
pembaharuan na hombar tu lomo ni rohaNa. Huria HKBP mian ditonga ni portibi on
na inklusif, terbuka jala dialogis. Ndada huria na eksklusif (tertutup). Angka
na porsea naeng patutuhon hapolinon ni rohana mangihuthon Jesus, ndada “ASA” alai
“ALA.” Mangihuthon Jesus ndada ASA gabe............... alai mangihuthon Jesus ALA
naung ditobus ahu. Siala ni i unang adong halak Kristus na manipulatif, (ada
udang dibalik batu). Tapatuduhon ma kualitas ni haporseaonta ditonga keluarga,
lingkunganta nang dihumaliang. Amen.
