“Jesus Mangalului Jala Paluahon Na Mago”
& Ev. Amos 5: 4 - 6 & Ep. Lukas 19: 1 - 10
a.
Dihita saluhutna nahinaholongan dibagasan
Jesus Kristus; di panggulmiton ni ngolunta na satongkin on, dibasabasahon Tuhan
Debata do tu hita asini rohana nang pangaramotionNa. Alai jotjot do jolma i sai
marusaha mangalului ngolungolu na so pola hombar tu lomo ni roha ni Debata.
Jala godang do jolma na so mangharingkothon Tuhan, manang so porsea di Tuhan,
jala naung dihilala singkop parngoluonna. Jotjot do jolma i songon radio, na
sai mangalului siaranna. Alai ndang olo pas di frekuensi na sasintongna, gabe
so tangkas be soarana jala gabe angonangon, ndang tabo begeon soarana. Laos
songon i ma parange nang pangalaho bangso Israel naung mandao sian adopan ni
Debata. Asa marhite Panurirang Amos dipaingot Debata ma bangsoNa i.
b.
Adong
tolu point na mansai ringkot na boi taparrohahon sian turpukta on (Amos 5: 4 –
6) jala laos na gabe sipasingot ni Tuhan na pinasahat tu bangso Israel. Asa
sipasingot i pe songon sosososo tu partingkianta angka na porsea ima:
1)
“Lulu i
hamu ma ahu, asa mangolu hamu” (Ayat 4). Lapatan ni na mangalulu i on ima
na sai marusaha laho boha asa dapot, marusaha asa marnampunasa. Boasa didok
Tuhan asa mangalului Ibana ? tong na gabe pilihan tu hita. Adong do kebebasan
di hita laho mamillit boha do cara nang dalan ni ngolunta, bebas do hita mamillit ise na naeng jumpanganta. Cara
dohot dalan ni ngolunta na tapilit i ima na manontuhon boha do sautna nang
hasilna di pardalananna muse. Dalan i do na patauduhon hita na tatuju ni
rohanta, jala ujungna molo sai tanunuti na nilomohonni rohanta ima na manuju
arah dohot na manguluhon hita tu sada tujuan. Didok asa mangalului Tuhan Debata
ndada na mangalului inganan manang bagas joro, manang gareja, manang inganan
partangiangan. Molo dibagasan turpuk on didok ndada tu Betel, Gilgal, manang
Bersyeba. Ala uju i mansai targoar do inganan i siala Tuhan Debata na patuduhon
asi ni rohaNa. Alai molo nunga ditadinghon Tuhan Debata i gabe holan inganan
sejarah nama i goaron. Laos songoni do jaman nuaeng on, sai adong dope halak na
mandok dibagasan rohana molo sorang ibana dibagasan parmingguon disi ma dapot
rohana na boi dapotna songon bagian ni haluaon, pasupasu manang angka
halongangan. “Haoojak” ni Tuhan Debata do na manghorhon impola ni parmingguon,
inganan ni parmingguon, parpunguan. Jotjot do sala molo sai dietong dope
inganan i na mangalehon panghorhon na lumobi sian inganan na asing. Jala asa
songon inganan na suman manang gareja i pe digoari do bagas joro ni Debata.
Bagas ni dietong na mian jala mangula Debata martimbanghon inganan na asing
isarana angka kantor, pasar, manang warung kios manang bagas na sandiri. On ma
na ingkos tapatingkos; siala Debat ima Debata na bersifat Maha Hadir manang
jotjot didok Omni present, na mangula do Debata sian manang inganan dia pe
tahi, so boi hita jolma mengkotak-kotakkan Tuhan. Ndang boi taatur Tuhan alai baliksa
Tuhan i do na mangatur ngolunta. Na mangula do Debata di sude partingkian di
sude inganan. BE 811 DI AU MA HO TUHAN:
Di au ma Ho Tuhan di ari-aringki, Ai denggan ni basaM padame rohangki. Di sude
partingkian, di sude inganan; Di au ma Ho O Tuhan asi rohaM. On ma na ingkon tangkas tapahami, siala Debata
na songkal na so hatudosan, alai jotjot do sibolis i mambuat sada kesempatan
laho mangelaela hita, jala paliluhon hita, ala hea adong masa disi, ima na tutu
jala gabe inganan na onding sian na asing jala boi gabe inganan na di
keramatkan, manang na gabe istimewa. (isarana tour holyland; inganan na
dipatuduhon boi gabe umbadiaan an sian inganan na asing) tanah suci, berarti
adong tanah yang tidak suci (hape di portibi on dope. Haroan ni angka pasupasu
ni parpunguanta ima Tuhan Debata, ndada inganan na sai taetong hajongjongan ni
Debata. Adong na mandok, na tumagon do ahu marminggu di inganan on ala adong
disi pasupasu. Laho ma ahu marminggu tu gareja na sada an ala disi do bertumbuh
haporseaonku, jala disi do godang angka halongangan. Laho ma ahu marminggu tu
gareja na sada an ala disi tabo do begeon jamitana. Hita na hinaholongan toho
ma i molo i do na hinahilalaonna gabe manghorhon tu partondionna. Alai ingkon
botoonta do tung so adong do dasor ni teologina nang dasor alkitabiahna disi.
Ai mual ni nasa pasupasu holan Tuhan Debata do ndada ala perasaan inganan
manang bangunan gereja.
2)
Asa
mangolu hamu: ima pandohan na patuduhon didia ma Debata marasi ni roha laho
jumpangan. Jala adong sada kepastian sian Tuhan Debata, ia angka na mangalului
Ibana sai na jumpangna do. Jeremia 29: 13 mandok: “Jala luluanmuna ma ahu laos
jumpang hamu, molo tung dilului hamu ahu sian nasa rohamuna.” Binsan adong dope
tingki, dilehon kesempatan, lului ma Tuhan i asa mangolu hita angka na porsea.
(ptds.Joh.10:10; 15:5). Angka jolma na mangharinghothon hangoluan sian serep
dohot toruk ni rohana olo mangalului Tuhan Debata. Sai naeng ma tama hita
diadopanna, jala mangolu na hombar tu lomoNa, ai jonok na ma ari ni Tuhan i.
Mangolua jala mian dibagasan Kristus Jesus, hombar tu asi ni rohana na sai
manetek, jala humusor dohot mangula di panggulmiton ni ngolunta marhite
panogunoguonNa. Tajalo do angka na sinita ni rohanta, pasupasu pansamotan sian
asi ni rohaNa, sai hhot dope hita nuaeng, jala mardalan do ulaon, parkarejoan,
bisnis sai torus dope lam tu dengganna, sude lancar ndang apa godang gangguan.
Sai diramoti Tuhan i do ngolunta, gabe saluhut na taula i mangalehon angka
pansamotan na lomak, asa sai tahilalahon ngolu na sai manghkirim di Ibana.
3)
Unang
ma lului Betel, unang laho tu Gilgal, jala unang mamolus tu Bersyeba:
v Betel: lapatanna bagas
ni Debata. Betel ima inganan na hea masa angka peristiwa na penting. Di Betel
do si Jakob, pardalananna sian Beersheba tu Haran, adong ma parnidaanna di
nipina surusuruan ni Debata marnangkok-tuat di tangga ni Banuaginjang. Jala na
paduahaliihon dibege ibana soara ni Debata mamanghulingi ibana. Jala si Jakob,
na gabe goaron Israel, pajongjong langgatan di inganan i. Sai jotjot do di
paboa taringot tu Betel; israna di 1 Musa 12; 1 Musa 28, uju na lintun si Jakob
sian muruk ni roha ni hahana si Esau, na mameanghon diri ni diatas ni batu jala
marnipi do ibana mamereng angka anak ni tangga na patomuhon langit dohot
portibi on dohot angka surusuruan na manarnangkotk tuat, jala Tuhan Debata
maringanan di bagian partimbo ni tangga i na mangalehon padan tu si Jakob, na
jaloonna do sogot tano Kanaan i. Dungkon tarjolma si Jakob jala hehe, gabe di
miahi si Jakob ma batu (baetylus) marhiehite miak jala digoari ma inganan i
Betel. Dibarita na asing molo tajaha di 1 Musa 35 Parpadanan ni Debata dohot si
Jakob diulahi muse marhite na manggoari inganan i : El-Betel, jala ditingki i
ma goar ni si Jakob diganti gabe Israel. Sian dua barita i digurithon do
andorang i goar ni inganani ima Luz sian hata Kanaan. Betel gabe pamusatan ni
parsombaon ni ganaganaan di Harajaon Israel Utara dungkon bola dua Harajaon
Israel gabe dua bagian sian partingkian ni Raja Rehabeam, anak ni raja Salomo.
Sian buku 2 Rajaraja digurithon do ia si Jerobeam, ima raja na parjolo si
Harajaon Utara, na pajongjonghon langgatan tu anak lombu sere di kota Dan
tungkan utara dohot di kota Betel di selatan ni harajaonna, jala manodo angka
halak na so sian halak Lewi gabe malim nasida.
v Gilgal: Lapatanna, margalumbang, marumbak, manang
margilinggiling. Gilgal ima inganan parlapelapean na parjolo bangso Israel,
uju mamasuhi Tano Parjanjian i na
niuluhon si JJOsua. Gilgal ima inganan ni si Abraham parjolo pajongjonghon
langgatan. Ima inganan ni si Samuel mamelehon pelean sipotongon di adopan ni
poti parpadanan ni Debata. Uju ndang
adong di Shiloh poti parpadanan ni Debata dohot Gilgal, disi ma bangso Israel
pahothon hasatiaon nasida tu raja Saul na dipasaut Debata siala pangidoan
nasida. DI Buku ni si Josua dipaboa di ia bangso Israel, “naung bungkas isan
aek Jordan di ari sampulu bulan na parjolo jala maringan do nasida di Gilgal,
di tungkan timur Jerikho, songon ingananna parjolo uju naeng sahat nasida tu
tano Kanaan. Dungi di pajongjong si Josua ma sampuludua batu na dibuat sian aek
Jordan, na gabe halongangan ala mahiang do aek i uju dibolus nasida di Gilgal.
Nasampulu dua batu i gabe parningotan ni pangaramotion ni Debata tu sampulu dua
marga bangso Israel.
v Bersyeba: di hata
Heber lapatanna; mual ni aek na marbualbual. Sada kota najolo di Kanaan (1 Musa
21: 33). Inganan parpunguan di luat Negeb, kota na jolo i na marhahonaan dohot
si Abraham (1 Musa 21:22-33: 22: 19), dohot si Ishak (1 Musa 26: 23-33) dohot
si Jakob (1 Musa 28: 10; 46; 1 – 5) dungi dibuat bangso Israel muse songon
inganan parpunguan nasida ( 1 Samuel 8: 2). Didok si Amos do inganan i songon
inganan na pinaasing (Am.5:5; 8:14).
c.
Sipahusorhusoron dihita:
1)
Ahama
na sai talului saleleng on ? Betel, Gilgal dohot Barseyeba ima tolu ingananna
bersejarah do i ala i dohot do tarbuang jala disiaphon. Na tolu inganan gabe
inganan na bersejarah memproses tu na mangihut asa sada bangso Israel. Inganan
na gok masa ulaon partondion, na marimpola siala soada tudosan songon i di
portibi on. Na tolu inganan on ima inganan pangungkapon ni hajongjongan ni
Debata, na patoguhon, inganan panogunoguon, dohot padan na marmulia i
dipasahat. Tung osada do angka barita ni bangso Israel molo so masa taringot tu
Betel dohot Gilgal, lapatanna ndang lopas bangso Israel sian sejarah na masa di
tolu inganan i. Alai aha ma na masa tu tolu inganan i ? Hata ni Debata mandok :
“...Ai tarboan tu habuangan sogot ia Gilgal,
jala ia Betel gabe sisoada.” (ay.5b). Boasa ? Dunga di laonlaon ni ari sude
inganan i maruba do gabe inganan parsombaon ni ganaganaan. Maruba ma goar ni
Betel gabe Bet-Aven, na marlapatan bagas halumlamon, bagas na marisuang, bagas
parmainan. Naneg disiapho ma Betel ndang adong be lapatanna, ndang adong be na
masa disi. Siala Betel gabe inganan parsombaon anak ni lombu na niuhir laho
sisombaon. Bagas joro ni Debata gabe bagas na marisuang, angka harorangon masa ma disi. Gilgal, songon goarnai na gabe
margilinggiling ma torus, suang songon i Barsyeba di partingkian ni si Amos,
gabe inganan debata ganaganaan, ndada inganan pasupasu be. Na dirimpu bangso
Israel dope na mian jala hadir Debata na jolo i di sinueng on. Ala na dua
inganan i hea masa gabe inganan ni Debata mangula. Na uju i do i inganan i gabe inganan na mansai marimpola,
molo diparbadia i pe i uju i boi do tarjalo roha, alai dung di pardalanan ni
tingki ndada be inganan na dosouju i na mian Debata patuduhon asi ni rohaNa,
ima na sala. Alai na ro do Debata tu inganan Betel, Gilgal, dohot Barsyeba laho
paboahon panguhuman. Nang dang dipamasa dope alai ingkon masa ma uhuman i.
2)
Didok
di Jesaya 55:6 Sai lulu i hamu ma Jahowa,
binsan tarbahen dope jumpang ibana; jou hamu ma ibana, binsan jonok dope ibana.
Mangalului Debata ala adong sihol ni roha di haradeon ni Debata marasi ni roha.
Songon halak na mauas di tongan i halongonan, holan aek i do na ringkot di
ngoluna asa sombu panghilalaanna. Songon halak na male, na mangharingkothon
sipanganon, songon halak na sai mangalului hepeng siganup ari arian dohot
borngin torus marusaha, asa dapotna jala ndang marnaloja.Songon sahalak
pengusaha naung sukses alai gabe madabu tu na mamangke narkotika, dung mamora
ibana ndang binoto be aha nanaeng siluluonna. Godang do angka public figure
mannag angka artis na mamangke narkoba ala dipuncak karir ndang diboto be aha siluluanna, gabe tu foyafoya
dohot mangulahon na so sintong diulahon, parmainan, mabuk minuman keras, ai
ndang diboto be aha na naeng siluluanna di
portibi on.
3)
Ala
ni i hamuna nahinaholongan talului ma Tuhan Jesus na mandok Ibana do dalan,
hasintongan, hatigoran nang hangoluan. Naung mate jala hehe Ibana sian na mate,
manaek do Ibana tu Banuaginjang i paradehon inganan tu hita. Dung terkenal
Elvis Presley, mansai susa do rohana mangalului lapatan ni parngoluon on. Boi
do masa songon i di parngoluonta dimasa naung sukses manang so sukses pe, adong
perasaan hampa sahat tu titik nol manang titik terendah dibagasan ngolunta.
Holan sada do na ringkot di hita ima Tuhan Jesus Sipalua hita. Tung so boi do
boanonta naung taomo di portibi on tu surgo i. Tatadinghon do luhutna na di
portibi on: angka gelar akademis, pangkat, hamoraon, hagabeon, hasangapon,
haulion, angka hapistaran, nang angka na asing so boi boanonta tu surgo i, tatiop
ma gomos haporseaonta i dibagasan Jesus Kristus i. BE 255 HOLAN SADA DO NA RINGKOT: Holan sada do na ringkot, Jesus lehon
i di au Manang aha pe na dapot, ndang tuk pasonangkon au Nang arta, nang
sangap, sude hamoraon Ndang tau mangalehon di au hasonangan Alai molo dapot na
sasada i Tongtong las rohangku hinorhon ni i. Amen.
