Jamita Minggu VII Dung. TRINITATIS – 31 Juli 2022

“Habisuhon Na Sian Ginjang”

Hikmat Yang Dari Atas

 

& Ev: Jakobus 3: 13 – 18                       & Ep: Parjamita 2: 18 – 23

 

a.      Patujolo

Mangihuthon hasomalan, ia surat jakobus didok do surat ni si Jakobus, anggi ni Tuhan Jesus. Surat on disurathon hirahira taon 57. Nang pe godang do angka penafsir mandok si Jakobus na asing, ala surat on disurat di hata gorik, hape si Jakobus, anggi ni Jesus, holan mangantusi hata heber do.

Surat Jakobus on, dipasahat tu sampuludua  marga na adong di parserahan ( 1 :1), jala ndang tangkas dipaboa dia do inganan hasahatan ni surat on. Alai mangihuthon angka pande bisuk: surat on dipasahat tu halak Kristen Jahudi di luar ni Palestina (pangarantoan) tarlumobi ma i na di Asia na metmet.

Molo tasigati isi ni surat Jakobus on, tarida do disi, taringot tu pangalaho (parulaon) ni halak Kristen. Jala adong do 54 hali tarida hata parenta (surusuru) taringot tu na laho mangulahon.

Surat on ditongos laho pasingothon halak Kristen na holan umboto patik-patik dohot aturan-aturan ni ha-Kristenon, hape ndang diulahon di parngoluonna siganup ari. Boi dohonon, halak Kristen sigodang hata do nasida, alai kenyataan na asing, huhut laho mamodai huria si sampulu dua marga na di parserahan i. Ala di hatiha i, huria-huria na adong di hutahuta na metmet tubu anga parsalisian, angka na paburnangburnang dirina (3: 4-12; 4:1-6, 11,13), dipatudos nasida do dirina dohot portibi on (4:4), godang do ruas ni hhuria i halak na pogos (1:9-11; 2:5)

 b.      Hatorangan:

1)   Ayat 13-14: Di ayat on, panurat mangadopi angka pangajari (guru), jala angka guru/pangajari di dok do na bisuk. Somalna, nasida mangajari di gareja ala ni i ndang boi marneang ni roha nasida taringot tu “bisuk”. Marasing do “bisuk” dohot “parbinotoan”. Halak na bisuk, i ma halak na porsea jala marpangusandean holan tu Debata. Ala ni i, ndang adong gunana godang parbinotoan ni jolma, hape  ndang marbisuk ibana. Ingkon sadalan do bisuk dohot parbinotoan, asa na dua on mansai porlu do tu sadasada guru manang pangajari. Jala bisuk, ingkon sadalan do dohot haporseaon (2:18), jala ingkon tarida muse di parulaon ni angka guru hatiha i, na holan manghatahon dohot paburnangburnang diri do nasida, jala ndang dipangke nasida parbinotoanna i tu ulaon na denggan. Ala ni i do disosoi panurat, asa sude angka guru (pangajari) pataridahon manang patuduhon parbinotoanna tu huria sian panghataion nang sian parulaon, alana “bisuk” do mangajari jolma laho mangula dohot manghatai.

    Diturpuk on ndang didok aha na naeng siulahonon jala ndang adong parenta na mandok: “ulahon on”, alai mangarahon jala paingothon do asa mangula jolma i di bagasan halambohon, ala halambohon do hataridaan ni bisuk apala na umporlu sahali.

2)       Ayat 15 – 17: Bisuk na so sintong (hikmat yang palsu) ima: pangiburuon, hatongkaron dibagasan roha, paburnangburnang diri huhut margabus, ndada ro sian ginjang songon na tarida di bindu 1: 5-8, alai bisuk na sian portibi on do (pat.1 Kor.1: 20).

Bisuk na sian portibi on holan mangahut tu diri (papujipuji dirina) do jala patubu parsalisian. Ndang dihalomohon i hasadaon alai baliksa holan patubu hagaoron, paburnangburnang dirina jala sai maralo dohot hasintongan. Sudena i, holan manghorhon habebernit, hadangolon dohot sitaonon tu jolma.

Hata “psuchike” (dihata Gorik) lapatanna: “Kurang rohani, tidak memiliki Roh Allah, bersifat benda.” Hata on patuduhon keadaan ni jolma songon parngoluon ni pinahan (hewan) na so marparsaoran dohot Debata, jala pangalaho sisongon on, marharoroan do i sian sibolis (roh jahat, ptds ay.6). Sai maralo do bisuk na sian ginjang dohot bisuk na sian portibi on.

Di ayat 17 dipatorang do tu hita habisuhon na sian ginjang dibagasan pitu rumang, ima:

1.       Bontor (suci, murni) lapatanna dao /ias sian turik (noda, bercak). Molo ndang bontor roha sadasada jolma, ndang tarbahen i marbisuk manang ndang tagamon adong bisuk di ibana. Bisuk na bontor boi mangula, mangatur dohot mangarajai roha dohot pingkiran ni jolma.

2.       Olo mardame, lapatanna, ndang manghalomohon parsalisian dohot hagaoron, baliksa tongtong mangula dibagasan halambohon, jala olo marpanganju.

3.     Halambohon; halambohon ni Jesus do ojahan ni halak Kristen taringot tu parulaon na lambok. HataNa pe lambok tu hita jolma, laos hita pe gabe parlambok ni roha asa lambok ma hatana songon na siniraan.

4. Pangoloi: Lapatanna rade rohana laho mangurupi jala diurupi (bersedia menuntun dan dituntun).

5.   Gok asi ni roha dohot parbue na denggan. Lapatanna na marasi ni roha mamereng angka dongan, jala manjalo sala huhut mananda hasalaan ni donganna. Ala ni i, molo mangula ibana sai tongtong do manggotil parbue na denggan, ala gok asi ni roha sian Debata.

6.       Dao sian hangangguon ni roha (marhaporseaon na togu).

7.       Ndang adong pangansion. Lapatanna ndang olo margabus manang manghatindanghon hata na so tutu.

        Napitu on ma rumang ni bisuk na sian ginjang, jala molo asing sian na pitu on, marpanghorhon tu na so hinalomohon ni Debata. Isarana, pangiburuon, manegai parsaoran, paburnangburnang diri, hageduhon dohot lan na asing.

3)  Ayat 18; ayat on, sada poda taringot tu na manabur dohot parbuena. Bisuk na sian ginjang manaburhon boni na denggan jala marparbuehon hasintongan. Halak na marbisuk ima halak na manaburhon dame jala hasintongan do gotilonna. Jala manang ise na mangulahon dame dapot hatigoran ma ibana, laos ibana digoari jolma partigor.

 

c.       Sipahusorhusoron.

Marhite turpuk on, dipapatar do tu hita dua pangalaho ima:

1.       Pangalaho na mangasahon habisuhonna (bisuk sian portibi on). Di pangalaho on, ditengatengahon jolma i do habisuhon na marhite pangiburuon, hatangkangon, gabus dohot ginjang ni roha. “Pangiburuon”, jotjot do i tubu tu sadasada jolma molo dibereng berhasil donganna. Ala ni i gabe ndang harmonis be parsaorannasida. “Hatangkangon”, jotjot do tarida di angka jolma na marsalisi. Di jolma na sai tongtong marsalisi, tontu ndang jumpang di nasida holong dohot dame. “Margabus” ima na manghatindanghon hata na so tutu. Tuhan Jesus mandok: Mateus 5: 37 – “Songon on ma hatamuna: Olo, anggo olo; ndang, ia ndang! Nasa na ganda sian i, sian na jahat do i!”. Gabus on do na jotjot diula ruas ni huria nang parhalado pe, na jotjot mamboan hasusaan dohot hamaolon di tongatonga ni huria dohot masyarakat.

2.    Pangalaho na manghangoluhon habisuhon sian ginjang. Habisuhon na sian ginjang (hikmat Ilahi) ima bontor, olo mardame, lambok, pangoloi, gok asi ni roha dohot parbue na denggan, dao sian hagangguon dohot panginsahion.”

Pangalaho i do na pinatorang Ap.Paulus di Galatia 5: 22 – 23. Habisuhon sian ginjang i ma silehonlehon ni Debata maradophon sadasada halak. Ai boi do pistar, alai ndang bisuk. Alai boi do jumpang hapistaran dohot habisuhon di sadasada halak. Habisuhon na songon i do na pinangido ni raja Salomo tu Debata umbahen na boi dipadame ibana dua ina na marsigulut taringot tu posoposo (pat. 1 Rajaraja 3: 16-18). Habisuhon sisongon i do na patut tapangido tu Tuhan Jesus, asa diurupi hita di ganup inganan dohot tingki.

Habisuhon sian ginjang sarongkahan do i dohot dame, halambohon, hapantason, dohot hasintongan. Asa ingkon hantus do pangantusionta taringot tu hapistaran dohot bisuk. Di umpama ni halak Batak didok: “Ijuk di parapara, hotang di parlabian, na bisuk nampuna hata na oto tu panggadisan”. Pangalaho si songon on somal do tarida na di humalinga hita. Alai hata i naeng ma taganti gabe: “na bisuk nampuna hata na olo siajaran.”

Jala ndang pola heran hita molo godang halak na pistar, alai ndang malo mameakhon hapistaranna. Godang do angka pangula ni huria na pistar, alai ndang marbisuk mangulahon tohonanna. Angka na malo targoar di negaranta on alai ndang malo mamangke hamaloonna i gabe tergadai tu politik nang kepentingan kelompok. Ia habisuhon i, basabasa ni Debata do i tu hita jolma. Molo dao do sadasada jolma sian Debata, ndang tagamon mian di ibana bisuk na sian banuaginjang. Tu angka ompunta na parjolo ipe tongtong do dibasabasahon Debata habisuhon tu nasida, isarana; boi do nasida mangalugahon soluna ditongatonga ni laut na bidang, nang pe so adong di nasida kompas. Diboto nasida do partingkian i laho manabur boni tu balian/hauma. Nda bisuk na sian Debata do i ? I do umbahen didok Tuhanta Jesus: “Dibahen i pantas ma hamu marroha songon ulok, huhut lidang ma rohamuna songon darapati!” (Mat.10:16b). Amen.

Jamita Partangiangan – Epistel Minggu VII Dung Trinitatis, 26 Juli 2022

“Habisuhon Na Sian Ginjang”

Hikmat Yang Dari Atas

 

& Ev. Parjamita 2: 18 - 23                                            & Ep. Jakobus 2: 18-23

 

1. Dihamu na hinaholongan dibagasan Jesus Kristus. Tung so tabo do begeon molo sude angka naung taulahon, manang naung taparade gabe sisoada didok halak. Jala boi do tubu hansit ni roha molo songon na so ni argaan  ni halak naung niula na sailaon. Hira songon i ma molo tajaha sude Buku Parjamita na marisihon angka poda nang sipaingot na mangondolhon “na marisuang do hape sudena” – semua akan siasia. Tung so naintusan do lapatan ni pandohan Buku Parjamita on. Hape digoari do Buku Parjamita, artina sahlak pangajari, parbinoto, na bisuk na mamingkirhon saluhutna. Tarmasuk ma na manurat buku on si Salomo. Mansai bahat do partingkian ni si Salomo laho marsiajar, hombar tu na inangidona habisuhon sian Debata asa boi manimbang dia do lomo ni roha ni Debata laho manguluhon bangso Israel, bangso na balga ima bangso ni Debata. Mansai pistar jala malo do si Salomo ala dipasupasu Debata ibana habisuhon nang mangihut angka hamoraon. 700 ma ripena dohot 300 ma muse radingna ( 1 Raja 11: 1 – 13) sian angka bangso na asing, hape naung dipaingot Debata asa unang mambuat boru sian bangso na asing asa unang maon tarihut nasida manomba debata sileban i. Sian na sinulingkitan ni si Salomo, marisuang do hape sude sogot, songon na mandurung alogo. Sude angka na pasonang roha; hamoraon dohot hagiot ni badan na mambahen jolma madabu tu ginjang ni roha. Siala laho mandapothon nasonangan ni portibi, boi do gabe maruba jolma i, apalagi molo so puas rohana, sai diulahi do muse manjalahi kepuasan ( hape gabe mangulahon haotoon do hape ibana disi), sai laho ma rohana pasonanghon dirina, parmabukan, parmainanon tu angka boruboru sibabijalang. Didok rohana naung parohon hasonangan ma i di dirina. Asa sipaingot di hita jolma, sai adong doha ni jolma ndang merasa cukup dohot puas, alai boha do hita angka na porsea manghaholongi Debata  marhite angka naung pinasahatNa i tu hita (sinonduk, nang ripe, iananghon, arta, pangkat nang jabatan) asa tahalashon, jala tahamauliatehon i saluhutna basabasa ni Tuhan i tu hita. Merasa bersyukur dan puas di pasupasu ni Tuhan i. Asa tabahen ma Kristus na gabe uluan di rumatangganta, na mamasumasu keluarganta, parkarejoanta nang masa depan ni kekuarga dohot iananghonta. (ptds. Ef.1:22).

 

b.    Dijolo ni turpukta on (ay.12-17) dipaboa do ia habisuhon i mangatasi haootoon, songon panondang mangatasi haholomon. Simalolong ni halak na bisuk adong disimanjujungna, alai halak na oto sai mardalan di haholomon. Alai na dua halak on, na oto manang na bisuk pe rup manaon na masa di portibi on ima manaon manang mamolus hamatean. Ndang adong na hot di nasida nasuda, nabisuk pe manang na oto. Saluhut naung diulahon dibagasan ngoluna do toru mataniari marisuang do hape saluhutna, songon na mandurung alogo. Didok roha ni si Salomo ndang sae holan parbinotoan, dohot habisuhon ni manisia, alai naeng ma sadar manisia i saluhutna i marharoroan sin Tuhan Debata do i. Asa hhita angka na porsea unang adong na manengahon dirina siala pencapaian, keberhasilan, manang gabe mararta, gabe paradongan, marpangkat, marlaba, marhasil dohot angka naung saut nataparsintahon. Saluhutna i ala holan asi ni roha ni Debata sambing do tu hita. Dihaposi Tuhanta i do hita mamangke na adong nuaeng  di hita, tahamauliatehon tu Tuhan i, jala arga tabahen angka pasupasuNa i, asa gabe siboan as ni roha nang pasupasu ngounta on di portibi  on. Tapasiding ma roha na sai marungutungut gabe roha na sai mandok mauliate, taparhaseang ma saluhut pasupasu i dohot angka partingkian i.

c.     Sahat ma hita muse tu turpukta on (ay.18-23), diulanghon muse paboahon saluhut angka sintasinta ni roha, holong diri, haparirion, jut ni roha, ginjang ni roha, na laho salpu do i sude. Saluhutna na naung taperjuanghon, tausahahon na sai laon na gabe tu pinomparta do i sogot. Halak na pistar manang na marbisuk dohot halak na oto, na hurang bisuk rup mangarajai di dirina sandiri, adong do haputusan di dirina tumagon ma mangalangi dohot minum, marsonangsonang sian ulaon naung hinalojahonna hian. Disadari si Salomo do ipe saluhutna sian tangan ni Debata do. Ise ma halak na boi mangan dohot minum manghilalahon pasupasu diluar ni Debata ? Dijadihon Debata pe portibi on hombar tu lomo ni rohaNa do. Tu angka jolma lomoanni rohaNa dipasupasuhon habisuhon, parbinotoan nang gabe halomoan, alai angka pardosa i disuru Debata angka sipapunguon jala ditingkina asa dipasahat i tu angka na hinalomohon roha ni Debata. Hamoraon ima pasupasu manang bura di angka halak na manjalosa. Siala ni i tapargunahon ma sude angka arta i laho pasangaphon Debata. Poda 3: 9 – 10 Pasangap ma Jahowa marhite sian hamoraonmu dohot marhite sian patumonaan ni sandok pangomoanmu. Jadi marsipinjot ma angka sopom, jala sirnip tuak anggur angka pangilanganmu.

d.    Topik ni Minggunta: Habisuhon sian ginjang, na paboahon mansai ringkot situtu dihita jolma habisuhon laho manghalashon angka pasupasu nang denggan basana i. Tarlumobi dipasahat tu hita hata nang patikNa i laho manogunogu hita tu hamuliaon. Hamuliaon i naung tajalo dibagasan Jesus Kristus, disi ma haluaon nang hasesaan ni dosanta. Angka na porsea na sai mamanghe bisuk na sian ginjang ima sian Kristus i laho mamanghe sude na naung dibasabasahon Debata dibagasan ngoluna. Habisuhon na sian ginjang patiurhon dalan nang langkanta asa unang bolas di paotooto portibi on. Mansai godang do jolma dipalilu pangkat, arta nang parbinotoanna, asa ndang be diargahon bisuk na sian Debata. Mansai mura do jolma marlomo lomo di ngoluna ala mangasahon diri nang gogona sambing. Taida ma godang masa angka kasus-kasus pembunuhan, ala ni rencana busuk, hansit ni roha dohot angka hisap hisap ni pardagingon. Hita angka na porsea tung so tarboan hita do sude na di portibi on (arta, pangkat nang parbinotoanta i). Ta tadinghon do luhutna di portibi na laho salpu on. Ala sorang pe hita di portibi on ndang adong na taboan, jala salpu pe hita sian portibi on (dung mate hita) soadong boanonta. 1 Timotius 6 : 7- Ai ndang adong taboan tu hasiangan on, jala ndang tarboan hita agia aha laho ruar.

d. Ala ni i ma tapargunahon ma na pinasahat ni Tuhani marhite bisukna sian Ibana asa marguna diparngoluanta gabe pasupasu nang tu sundut na mangihut.(ptds.ay.24-25). Tahalaputi ma na mangguruhon parngoluon partondion, papunguhon arta na dibanua ginjang i, mangulahon na denggan na hombar tu lomo ni roha ni Debata (Gal.6:8; Mat.6:20; Pil2:12; 1 Kor.15:58). Amen.

 

Jamita Minggu VI Dung. TRINITATIS – 24 Juli 2022

“Debata Satia Dibagasan HolongNa”

Tuhan Setia Dalam KasihNya

 

& Ev: Hosea 1: 2 – 9                                                 & Ep: Kolose 2: 6 – 19 

a.   Ia Buku Hosea paboahon taringot tu panghobasion ni panurirang Hosea ditongatonga bangso Israel (Harajaon Utara) saleleng taon 785 – 725 A.Masehi. Barita taringot tu nasida mansai menarik do ala na mangula do ibana di masa krisis ni bangso i na madabu tu pardosaon dohot pangalaho harorangon. Naung godang do sipasingot nang apoapo di bangso i alai ndang ditangihon, asa ujungna hasisiap ni bangso i ma dibahen Debata marhite bangso Asyur. Hamaolon ni panghobasion panurirang Hosea sian parumatanggaonna, parripena nang iananghonna gabe tipologi ni pergumulan ni bangso Israel di naung sega parsaoran ni keluarga Hosea doshon dohot naung sega parsaoran ni bangso Israel tu Debata. Laos dipatuduhon do asi ni roha ni Debata tu bangsoNa. Na so satia be si Gomer maradophon si Hosea gabe sega ma parumatanggaonna laos gabe gombaran na dipangke tu na laho manggombarhon parngoluon ni bangso Israel na so satia be tu Debata. Disomba bangso i do debata ganaganaan, manundali Debata Jahowa. Ala ni pangalaho i ma asa hona uhuman ni Debata bangso i. Alai asi ni roha ni Debata tu bangsona i hot do nang mubauba. Dijalo Debata do bangsoNa i jala paturehon parsaoran na naung sega i.

b.    (ay.2) Disuru Debata do si Hosea laho mambuat si Gomer boruboru sibabijalang i na gabe jolmana. Bahat do angka pande mandok, ndada na toho situtu ibana mangoli dohot si Gomer, alai songon alegoris (gambaran). Dilapati angka pande i do si Hosea songon gombaran ni parnidaanna na masa haduan, ndada na masa di dirina. Alai sian turpuk on ndang adong na bersifat alegoris, mansai sintong do na masa parngoluon parsaripeon ni si Hosea dohot si Gomer i. Alai gabe boru sibabijalang ma pangalahona dungkon marsaripe dohot si Hosea. Uju saut marumatangga si Hosea mangalapati i sian Debata do na manotophon i, siala parsaripeon i ima tudosan na dipangke Debata tu bangso Israel. Didok panurirang i do na marmainan do bangso i, songon ripena si Gomer na so satia tu ibana, tudos tusi ma bangso Israel na so satia tu Debata. Didok doi na mangalangkup pangalaho ni si Gomer dohot bangso Israel. Pangalangkup partondion na somal digoari angka ugamo na manomba hanapuon ni Kanaan, marhite na marmainan di parsombaonna. 

c.    (ay.3-5) Si Gomer binti Diblaim ima goar ni ripe si Hosea. Goar na biasa na so pola adong tudosan manang lapatanna. Anak na parjolo na tinubuhonna ima na margoar: Jisreel na marlapatan Debata na manaburhon. Goarna i marlapatan ganda: naparjolo, dungkon dipaserak bangso Israel ala ni dosana, disaburhon Debata do muse bangso na i tu tano nasida. Napaduahon, angka dosa na pinamasa di rura Jisreel sian halak Jehu gabe hona uhum, jala daionna ma halelengse ni bangso i. Mudar ni si Jisreel ma na gabe patumonaan dipangalaho lilu ni Jehu na membela ulaon ni Tuhan i, marhite na mamunu sude halak na manomba debata baal ( II Raja 10:1-11). Dibagasan panguhuman, didok Debata: ponggolhononku ma sior ni Israel di rura Jesreel. Didok sior na manggombarhon hagogoon (ptds. 1 Musa 49:24). Harajaon ni Israel, ingkon marujung ma. Sior naung ponggol i patuduhon na so margogo be. 

d.  (Ay.6). Dungi ditubuhon ma muse sada boru na margoar Lo-Ruhama (tidak dikasihani- Na soniasian). Dakdanak boru ni si Gomer digoari hombar tu na sinangkapan ni Debata laho paboahon tu bangso Israel, na so patut nasida taruli asi ni roha. Na soniasian ima patuduhon sibaran ni Harajaon i Utara, naung mardosa mangalo Debata jala tingkina dapotan uhuman. 

e.  (ay.7). asing roha ni Debata maradophon Israel Dangsina (selatan – Jehuda), didok Debata: “....marpangulahi do rohangKu tu pinompar ni Juda.” Naung madabu do nasida tu bangso Asyur (722 A.M), alai dung raja Sanherib mangarongsohon Jerusalem, ro do hagogon ni Debata Jahowa laho paluahon huta i ( II Raja 19: 35). 

f.     (ay.8-9). Dungi sorang ma muse anak baoa ni si Gomer na margoar Lo-Ami na marlapatan: ndang bangsongKu. Di dolok Sinai do bangso Israel manjanghon padan i asa gabe bangso ni Debata jala Debata na gabe Tuhan nasida (1 Musa 19: 1 -7). Sai marulak loni bangso Israel mangalosi parjanjian i, jala marhite suara ni panurirang, mangkuling ma si Hosea na paboahon tulahanna ma nasida. Alai ndang leleng masa i (ptds. Hosea 2: 3), alai gabe manghorhon habuangan jala halelengse ni Harajaon Utara. 

g.  Dipatudos do bangso Israel tu si Gomer na so satia i. Naung ditadinghon bangso Israel do parsombaon nasida tu Tuhan Debata songon hasianna, gabe mangihuthon Baal. Uhuman ni Debata sai manghorhon ma i sahat tu pinompar nasida. Ido umbahen disordak Debata pasupasuNa i, na sai laon dirimpu nasida sian debata Baal. Tung luluanna ma hasianna Debata, alai ndang dapotsa be i. Gombaran pangalaho ni si Gomer nang bangso Israel na so satia tu Debata gabe sada perenungan aplikatif di parngoluanta songon bangso ni Debata, angka na porsea na tarjou tu haluaon ni Kristus. Boha do parsaoranta dohot Debata na sai laon ? Turpuk on ima gombaran ni hadadabu ni jolma i tu hadosaon. Diela jaman ni portibi on do hita, di angka pencapaian, keberhasilan, hamajuon ni parbinotoan, nang kecanggihan tehknologi, gabe so dibereng be sian pambahenan ni Debata. Gabe madabu ma torop jolma na mamangke dasor ni sude ulaonna sian pikiran manang logika. Torop jolma berlomba-lomba menjadi pintar gabe madabu tu na mangasahon pikiran, asa sude usaha na i holan ala ni kemampuanna ma dietong, hasianna nama utokutokna, ndang Debata be hasianna, gabe godang ma na manadinghon Debata gabe atheisme (ndang porsea be tu Debata). Jala adong do atehis praksis, lapatanna disomba do Debata molo holan martangiang, parmingguon, parpunguan, partangiangan, alai sude keberhasilanna sian gogona sambing do dietong i.

h.   Mansai godang do hasian ni jolma di portibi on, angka arta, pangkat, goar, sinonduk, ripe, ianangkon, dohot angka hasomalan na so hombar tu lomo ni roha ni Debata (pangalaho dosa/ dosa hasian). Mansai torop do halak sisongon i dihasiangan on molo taparrohahon di media cetak, media sosial sinuaeng on. Jala godang do na targoar halak Kristen na mangulahon korupsi, ulaon na maralo tu patik ni Debata, harorangon nang angka no so boi be targoar panutan, manang gabe tiruan, ndang adong be etika, moral. Ditonga ni huria pe godang do ruas na so mabiar be tu Debata, na mangalaosi patik nang Hata ni Debata, suang songon i terlibat do na deba na targoar parhalado, manang naposo ni Debata. Marsak situtu do Debata mamereng pangalahonta na andul marasing sian na pinangidona songon angka na porsea.

i.         Topik ni minggunta mandok : “Debata na satia dibagasan holongna”, sipata ndang satia hita tu Debata, alai satia do Tuhanta i paimaimahon hamumulak ni parjahat i tumadinghon dalanna na so hasea i. Songon Ama dohot ina di bagas parumatanggaon asa dijaga hasatiaonna be ganup marsadasada. Songon ruas ni huria, sai satia ma hita tu hurianta be songon na tabahen tu Tuhan i. Gabe ruas na burju masibasabasa laho pauliulihon huria ni Tuhanta, dilehon kewajibanna songon ruas, jala manjalo hakna dilayani. Hasatiaonta songon warga negara Indonesia, marhite na mengisi kemerdekaan melalui karya nyata dan pengabdian utuh tu kemajuan negaranta.

j.         Huria ni Tuhanta, sipata sai adong do goarna “hasianta” na di porti bi on, ima angka dosa hasian na so boi longkang sian dirinta ala sai tahasiholi jala taulahon. Lupa hita dihasatiaon ni holong ni Debata tu hita. Sai muba ma rohanta manadinghon angka dosa hasian i. Tahasiholi ma Tuhan Debata na umbasabasahon nasa pasupasu pardagingon nang partondion. Joh.15:13 Na sumeahon hosana humongkop angka alealena, i do parholong ni roha na so halompoan. Marhite holong ni Jesus kristus tu hita jolma pardosa dipalua hita sian dosa nang hamatean na saleleng ni lelengna asa bongot hita tu hangoluan na so ra suda i. Psalm 103: 12 Songon dao ni habinsaran sian hasundutan dipadao Ibana sian hita angka pangalaosintai. Ala ni i tung tapasolhot ma tu Ibana Sipalua i (ptds. 1 Ptr.1:18-19). Unang mandao hita sian asi ni rohaNa i. Sai taingot ma HataNa i na mamodai jala manosoi hita asa unang lilu. Unang leas manang langgus rohanta di asi ni rohaNa i alai lam tapamanat ma dirinta, pangalahonta asa hombar tu lomo ni roha ni Debata marhitehite Jesus Kristus na satia i. Amen.

Jamita Partangiangan – Epistel Minggu VI Dung Trinitatis, 24 Juli 2022

“Debata na Satia Dibagasan HolongNa”

 

& Ev. Kolose 2: 6 - 19                                            & Ep. Hosea 1: 2 – 9

 

                  

1. Ia Kolose on ima na sinurat ni Deutro Pauline, i ma sisean ni si Paulus na manorushon cita-cita dohot teologia ni guruna na relatif hatop monding ala ni pangaleleon sian Kesar-kesar na anti kekristenan. Nang pe teologi ni gruna do di angka huria na ni dalanan ni hobasan ni ap.Paulus na sinurathon nasida atas goar ni Ap.paulus, ndang tarbahen so godang angka pergeseran istilah, alat peraga, jala alo ni huria naung marasisng. Langgam bahasa pe marasing do i, ai marholangholang 30 tu 40 taon ma parasinganna. Isarana molo ta perbandinghon langgam bahasa dohot cara berpikir i di proto Pauline (Rom 6: 5; 1 Kor.15: 12ff; 2 Kor.13: 14; Pil.3:20f, Kol.2:12; 13:1ff/Deutro Pauline). Jadi tarbahen hita do menafsirhon on sian cara berpikir ni si paulus, huhut mamereng perkembangan di konteks.
2. Digombarhon do di surat on na marungkil do Apostel i maradophon sada alo na naeng manegai haporseaon ni huria i. Nunga mulai poda haliluon i masuk tu ruas nu huria. Ia poda ni halak i hira boi rumushononhon songon on: Nang pe naung Kristen jolma, ingkon hormatanna do tongtong angka huaso dohot hagogoon ni setan na secara nyata mangarajai portibi on ( 2:8). Marragam ma dibahen modifikasi ni on asa hira na so maralo tu na marsomba tu Debata. Alai pemikiran nasida mandok ala kenyataan do huaso haholomon, begu, tondi, nang pe Debata doraja, Kristus Anak ni Debata dohot Tondi Parbadia, ingkon lehonon do hormat tu fakta-fakta i, asa unang marmara; ingkon adong keseimbangan di huaso ni ilahilah ni ngolu on. Ala ni i ma tantangan ni Ap.paulus di surat on, songon naung tangkas i di guruhon sian Katekhismus (pangajarion tu na naeng gabe halak Kristen-Marguru malua) dohot di ganup kebaktian parmingguon, ima paboa sasada Kristus i do Tuhan ni portibi on. Huasona mangatasi sauluht portibi on. Sada do huria di portibi on,, ndang sekte, saluhut ingkon marsomba tu Tuhan i ala pamatang ni Kristus do huria i na ni rajaan Tuhan i dohot na manggomggomi saluhut portibi on.
3. Hamu angka dongan na hinaholongan, boha ma asa unang madabu hita tu poda haliluon alai hot di poda na sintong ? Ingkon manongtong marparange marurat, dipauliuli dibagasan Tuhan Jesus Kristus (ay.6-7). Gabe halak na porsea nang sae tarsurat di huria manang di KTP dohot na holan manjanghon Jesus songon Sipalua, alai ingkon tongtong do lam magodang dibagasan Ibana, mananda Tuhan i lam bagas. Boha hita ruas ni huria HKBP naung lam magodang do di haporseaon manang lam marpengpeng ? Mansai torop do ruasna, angka pangula ni huria, angka pandita. Boi do dohonon hatoropon ni ruas gabe parameter ni ruas naung tang marhaporseaon ? Ala ni ma di dok di Heber 5: 12 Ai tumimbangkon lelengna i, nunga patut guru hamu nian, hape angka sisiasia ni hata ni Debata dope siajarhononhon tu hamu; gabe susu nama ringkot di hamu, ndada sipanganon hian.
4. Sian turpukta on adong ma piga piga siputihonta:

1.       Naparjolo (ay.6): Manjanghon Kristus, astuanna manghaporseai dohot manghaposi Tuhanta Jesus Kristus, Ibana do Anak ni Debata na ro paluahon hita jolma pardosa on. Manjanghon Kristus dohot disude dagingta i, rohanta i ima ngolunta na manjalo Kristus i mian dibagasan hita.

2.       Napaduahon: Dibagasan Kristus, dung tajanghon Kristus i asa mangolu ma hita dibagasan Ibana, sada dohot Kristus, songon hau anggur i, digombarhon do hita angka ranting i sada dohot bonana ima Jesus Kristus i (Yesus pokok dan kitalah cabangnya-ende sikola Minggu) Joh.15.

3.       Patoluhon : Marurat (berakar), dunghon dibagasan Kristus hita, gabe lam sada lam marurat ma hita dibagasan Kristus. Dipangke do dison istilah botanical, tanaman yang sudah menyatu dengan tanah akan sulit lepas dari tanah itu karena akrnya sudah menyatu. Siala marhite urat ni tanoman i i laho mambuat angka sari makanan sian tano nang aek asa mangolu tanomani. Lam tubu do angka urat  ni tanoman i lam bagas mangalului zat-zat makanan asa lam balga ma tanoman i. Gombaran ni halak naung marurat dibagasan Kristus: ndang mura mura be hasit rohana, ndang mura be tersinggung, ndang mura mandelel manang putus asa. Sai diadopi do angka na masa tung sadia maol pe dalan i manag angka parsualon di ngoluna tetap do rohana benget, dihaburjuhon mangula angka na uli na denggan, sai dijugulhon martangiang. Saluhut angka na niulana marhasil jala marparbue. Ndang adong partingkian na marisuang dibahen ala sai Tuhan i do na sai manjoloani roha nang pingkiranna asa dibuhai sude angka ulaonna marhitehite goar ni Jesus Kristus. Jadi sada tanoman na marurat ndang mura i malos, manang tarhindat sian tano, ala naung bagas marurat tu tano i jala manahan di angka bencana, ujian di parngoluon.

4.       Paopathon: dungkon marurat hita adong ma pertumbuhan iman yang semakin hari semakin besar. Lam magodang; adong hamuboan ni roha (songon si Sakeus perobahan radikal). Lam burju rohana masilehonlehon, ndang mangholit, olo mangurupi, martanggung jawab, gabe haposan, arga di ibana tingki (selalu tepat waktu). Angka halak na naung tang marhaporseaon ndang songon dakdanak be marhaporseaon alai nunga dewasa iman. Dia sudah mampu mengahadpi kekerasan hidup (memakan makanan keras), bertumbuh mengikuti jejak Kristus, memiliki karakter Kristus Yesus (Ef.4:13; Heb.5:12-14; 1 Kor.3:2).

5.       Palimahon: Manghamauliatehon basabasa ni Tuhan i. Angka halak na porsea naung tang marhaporseon tongtong do dihamauliatehon saluhutNa tu Debata. Na tau manghamauliatehon saluhut ima angka na mandai asi ni roha ni Tuhan i tung aha pe na masa, nang situasi dohot kondisi, siala Tuhan Debata na sumarihon ngoluna jala pos rohana di pasupasu ni Tuhan i.

5. Manjaga angka sipaotooto: Di ayat 8 – hata bisukbisuk, hata lensem: angka naung somal niuarihon sian najolo alai ndang apala adong dasor hasintonganna. Nang sipata adong hata na songon sintong begeon manang tabo alai ndang adong dasor teologi manang dasor na sian Hata ni Debata. Boi doi laho paliluhon (menyesatkan) molo so manat hita di angka poda pangajarion. Isarana digabung dua jaran na mandok ndang holan sae haluaon na sian Kristus i alai dohot do nang angka ruhut ruhut na sipatupaon manang dipadalan (wajib). Porsea tu Kristuys alai wajib mangulahon parsunaton ( ay.11). Dungi porsea tu Kristus alai dohot angka sipadaoon manang aturan na binahen, pantang ni sipanganon, pangalaho ngolu na marbahudung (ay.16, 20-23). Dungi na porsea di Kristus alai dohot disomba surusuruan (ay.18).
6. Dibagasan Kristus: Ima angka na mangasahon holan Kristus sambing; disi ma dipatutuhon kesempurnaan holan dibagasan Kristus (ay.9-10). Angka na porsea naung pos do rohana mananda Debata marhitehite Kristus Jesus. Holan dibagasan Kristus do sempurna ngoluna, ndang adong na hurang. Sipata na gabe tantangan jaman nuaeng on alas berpikir ni jolma, molo ro angka na bernit, hamatean manang angka bencana gabe ndang masuk akal pikiranna molo tutu do Debata manghaholongi ibana boasa masa angka na parir, hamatean nang parsahiton, nang sidangolon. Ido umbahen mansai torop jolma manadinghon Debata,, ditundali Kristus. Ndang porsea be di Kristus jala godang na gabe atheis, ndang mar Tuhan be. Ala ni i unang ma pikiran nang logika na tapanghe laho manghuton Jesus alai marhite haporseaon; Debata na manompa jala sumarihon ngolunta sahat tu na manongtong i dibagasan Jesus Kristus. Nunga sempurna Kristus i ndang pola be ditambai dohot manang aha pe be i.
7. Ay.11 – 13 : parsunaton Kristus do na rumingkot sian parsunaton i pardagingon. Ndang na rumingkto pardagingon alai partondion do. Angka ritusritus manang ruhut ruhut hajahudion i ndang adong be ringkot ni i molo dungkon dibagasan Kristus. Dison ma dialo Ap.paulus angka na menggabungkan manang mencampurkan haporseaon di Kristus dohot hasomalan ni hajahudion.   Naung tardidi nasida ala naung porsea halak Kolose dibagasan Jesus Kristus, na marlapatan naung sada do nasida dibagasan hamatean dohot haheheon ni Kristus Jesus. Ido umbahen sai jotjot di dok ia Jesus i ma na parjolo (sulung-buah sulung) jala hita na angka na mangihut, angka siihuthon Kristus-Ima halak Kristen. Halak Kolose ima na so sian Jahudi, jadi molo nunga dibagasan Kristus ndang pola dohot be angka hasomalan ni halak jahudi laho mangulahon parsunaton, ai naung dijalo Kristus do nasida ndada ala ni parsunaton i. Naung disesa Jesus do angka dosanta sadarion ro di salelengni lelengna, alai unang gabe dipangashon i asa marlomo lomo di ngoluna (ptds. Rom 6: 1-19).
8. Ay.14-15 : Kristus do hagogoonta na manesa angka dosanta, tung so boi be Sibolis i mangondam nang manguhumi hita. Kristus i do na marhuaso na mangalehon hamonangan di hita. Uju i angka ajaran Judais me manang ideologi asketis (na so olo saor manjalahi portibi alai sai mangalului ngolu partondion, kehiudpan tirakat) ima na masa di angka dalan sipaotooto. Boi do gabe ditambai tu patik ni ugamo laho tujuan na denggan di dok rohana asa mangurupi na torop i sai marsiihohot. Na gabe masala ima nasida sai ringgas do mangulahon i sandiri,, alai huhut do diuhumi halak na asing dohot na mangarehei angka halak Kristen na so mangihuthon pangalaho nasida. Holan i do di dok Ap.Paulus asa unang tinggil jala tangi sipareonna tu na masa i, unang ma sai tu si rohana. Alai rimggas ma mangihuthon angka parguruan dohot di angka ulaon diakoni ni huria gabe dalannta manghobasi Kristus.
9. Huria na hinaholongan;  (ay.16-19), Di podai Ap.Paulus huria i ala adong na manggoari dirina na naung marnida surusuruan ni Debata, didok rohanasida boi songon si Johannes na mandapot pangungkapon taringot ari sogot di Pulo Patmos (Pangk.1: 1-3). Didok rohanasida ma na tumimbo partondionna sian ruas na asing marhite na maniksa pamatangna, na mansoadahon diri (self-abasement). Didok Ap.Paulus nasida ma angka jolma na merasa tumimbo jala na humebat siala ndang marsihohot nasdia tu Jesus Kristus. Didok rohana naung jaloon nasida pangungkapon sian Debata, hape holan pikiran nasida sandiri do, holan na  maranganangan do nasida. Ido alana dipaingot Ap.paulus: unang gabe dipatalu hamonanganmu siala nasida, dipalilu nasida. Ai Kristus do Uluan, ulu ni pamatang, hita ma huria pamatangni Kristus i. Jala Kristus i do uluan ni nasa na tinompa, pusat ni parsombaon holan tu Kristus. Sude aturan ni huria asa marpusat ma tu Kristus, marhite Kristus do dalan haluaonta, ndang adong be dalan na asing tu Banuaginjang i. Molo soada Kristus na gabe uluanta tung so marguna jala berfungsi do pamatang i. Siala ni i songon angka ruas ni pamatang ni Kristus asa unduk ma hita tu Uluanta ia Jesus Kristus i, unang ma hita masiuhuman.
10. Topik ni Minggunta ima: Debata na satia dibagasan HolongNa, tongtong ma huria na jongjong ditongatonga portibi on songon representatif ni Harajaon nI Debata ditongatonga portibi on. Huria na manghaholongi ruasna jala ruas na manghaholongi Debata marhitehite huria. Dibagasan Taon orientasi pelayanan HKBP Tahun Kesehatian, naeng ma huria di portibi on sada songon Jesus Kristus sada dohot Ama i. Ala ni i marhitehite Tondi Parbadia tapatuduhon ma hasadaon ditonga ni huria na nirahut ni holong ni Kristus laho manogunogu ruas sama ruas, paingothon, rup masitungkolan, rup manupahi diulaon asi ni roha jala rupa masitangiangan. Amen.

 

Jamita Minggu V Dung. TRINITATIS – 17 Juli 2022

“Jesus Mangalului Jala Paluahon Na Mago”

Yesus Mencari Dan Menyelamatkan Yang Hilang

 

& Ev: Lukas 19: 1-10                          & Ep: Amos 5: 4 - 6

  

 

a.       Hamuna nahinaholongan naung jotjot do tabege barita taringot tu si Sakeus ( sian hata Gorik : Zakhaios, sian hata Heber: Zakkay, lapatanna halak na burju, halak na tigor). Gelleng do halakna, pardaging na metmet (jotjot didok orangnya pendek-ay.3). Ulaonna ima songon pemungut cukai manang sijalo beo na mangurus angka pajak ni negara, na uju i dimasa ni panggomgomion ni bangso Rom, jadi antek ni bangso Rom do ibana. Mamora do ibana sian parkarejoanna i alai godang do na so manghalomohon ibana ala ulaonna, godang dongan sabangsona na marsogo ni roha di ibana ala ni ulaonna i songon sijalobeo. Sian ulaonna na mangurupi penjajah Romawi dianggap do ibana songon penghianat bangsa. Ala ulaon nasida di lapangan sai manindos dohot posi jala kejam tu rakyat, ido alana asa gabe dihasogohon torop jolma angka sijalo beo. Jotjot do sipatudos ulaonnasida songon pamunu manang dohot songon panangko ( Luk.5:30; 3:13b) sian situasi na torop marsogo ni roha di ibana ndang adong be donganna, merasa terkucilkan, terisolasi, tersisihkan gabe ro ma rasa kesepian (loneliness).

b.       (ay.1) – Di na ro Jesus tu huta Jerikho, jala naung tarbarita ulaon ni Jesus tu angka luat, sahat ma tu roha ni si Sakeus naeng pajumpang dohot Jesus. Pos do roha ni si Sakeus laho pasahathon na di rohana tu Jesus. Mansai las do rohana di haroro ni Jesus tu hutana i, jala torop do jolma naeng pajumpang dohot Jesus. Alai ala torop ni jolma na naeng pajumpang dohot Jesus, ndang tolap ni si Sakeus laho mamereng Jesus, ai pardaging na metmet do ibana. Alai ndang putus asa ibana, tubu ma di rohana laho manangkohi sada hau ara (galagala) na ditopi dalan nabinolusan ni Jesus. Sian i ma ibana boi mamereng bohi ni Jesus. Dison ma siparsiajaranta adong usaha na so marisuang (tidak ada usaha yang siasia). Sada sorminan do na binahen si Sakeus laho marusaha mangalului Jesus, adong sihol ni roha (kerinduan untuk bertemu Yesus). Asa na gabe sunggulsunggul tu haporseaonta sadia bagas nang sihol ni rohanta pajumpang dohot Jesus di ngolunta ? Tubu do di rohanta asa boi pajumpang dohot Tuhan Jesus marhite parpunguan, partangiangan, parmingguon. Dia do na gumogo di rohanta, masihol tu portibi on marhite angka inganan destinasi wisata manang tu Tuhan i do  marhite parsaoranta dohot Tuhan i.

c.       (ay.3-5) - Diboto Jesus do usaha nang sihol ni roha ni natorop i termasuk ma si Sakeus laho pajumpang dohot Ibana. Diida Jesus do usaha ni si Sakeus laho mamereng Ibana manang mandapothon Ibana asa ro ma Hata ni Tuhan Jesus tu ibana: “O Sakeus, hatop ma ho mijur, ai ingkon sorang Ahu tu jabum i sadarion.” Sada pangkirimon na maralus sian Tuhan Jesus tu si Sakeus, sada las ni roha bolon di si Sakeus umbege soara ni Jesus. Dipatuduhon Jesus do kepedulian ni angka na sai mauas, angka na male, angka na masihol pajumpang dohot Jesus. Dipungka Jesus do dalan tu angka na lungun roha, angka na kesepian (loneliness). Sian on sada sungguksunggul tu angka huria laho amparrohahon sihol ni roha ni angka ruas ni huria na membutuhkan topangan (sustaining) , pendampingan  (nurturing) dan pertolongan (helping) tu angka na mauas jala na male. Angka na terpinggirkan ranah sosial, na terisolasi, na dikucilkan. Boha do huria sigop mamatamatai permasalahan ruas ni huria asa sahat panogunoguon ni huria marhite kehadiran ni angka parhobas sintua nang pandita jala rade ro sorang tu bagas ni ruas na.

d.       Ndang hasalaan ni si Sakeus parjolo dibereng Jesus, alai dipatujolo do komukasi na mengeratkan, danmendekatkan. Boha do asa boi pos roha ni ruas leluasa mandok na di rohana marhite kehadiran ni parhobas di bagas ni ruas i. Jotjot do angka na marsala, na disingkirkan masyarakat gabe dohot huria padaohon dirina sian ruas na hona stigma na so denggan i. Haroro ni Jesus tu angka pardosa do, tu angka na marsahit pamatang nang sahit partondion. Ndang adong roha pasidinghon, manang paduruhon alai boha do angka na pardosa i asa malua sian dosana. Tugas ni huria do songon singkat ni Kristus laho manogunogu angka ruas nang jolma na tarduru, na pinasiding ni hatoropan ala ni dosana.

e.       “Sadarion, ingkon sorang.... (ay.5b-6): Pandohan i na patuduhon rencana keselamatan na nyata hadir ditingki i, dibagas ni si Sakeus Naung diparade Jesus do si Sakeus gabe tiruan, asa adong sitiruon ni angka na mora di portibi on asa diboto aha sibahenon dohot sipatupaon asa boi masuk tu Harajaon ni Debata. Haluaon na sorang di tonga ni bagas ala ni sosok kepala ruma tangga na mangaluli Jesus, na mananda Jesus. Asa angka natoras patuduhon wibawa ni na naung tang marhaporseaon. Na mamboan Jesus ditonga ni ruma tangga, ima na mamboan haluaon ditonga ni bagas. Asa haluaon i dihilalahon ama, ina, ianakhon, nang keluarganta saluhutna. Asa ganup na porsea sai gabe penggagas hasosorang ni Jesus, penggagas keselamatan nang haluaon di angka ganup keluarga

f.        (ay.7) - Marungutungut do natorop tu Jesus na manjanghon pardosa songon si Sakeus. Molo pamerengan ni natorop holan hal na naegatif, manang hasalaan nang dosa ni jolma. On ma mewakili pada umumna jolma sinuaeng on. Jumpang hita do nang di tonga ni huria, ruas na sai holan mamereng hal na negatif dohot hasalaan nang dosa ni donganna, tanpa adong usaha laho paingothon, mandongani manang manogunogu. Unang ma hita holan na menilai, manang marungutungut alai ndang adong pambahenan nang saotik pe songon usaha laho manogu dongan sian dosa nang hasalanna. Unang ma sifat ni ruas na holan manguhumuhumi sian pamerengan nang pambahenan alai jumolo ma sifat na manghaholongi na pataruhon dohot patuduhon haluaon na sian Jesus i.

g.       (ay.8)- Panjanghonon ni si Sakeus tu Tuhan Jesus tarbukti mamuhai haporseaonna na lam mangerbang.las ni roha bolon na so habilangan na sorang dibagasna nang di rohana laho manguba rohana asa dohot songon Jesus marasini roha. Pola do taronjar haporseaonna mandok: “Satonga artangki  lehononku tu na pogos.” Ima parbue ni haporseaon. Adong pertobatan ni bagas i, nang di si Sakeus. Manjanghon Jesus marhite na mangihut adong pambahenan, beriman dan berbuat dan berbuah. Iman dan perbuatan serasi dibagasan ngoluna. Namanjanghkon asi ni roha ni Jesus do na tau mangalehon asi ni roha ni Jesus tu angka na hurangan, angka na lea, angka na pogos, tudos tu na mamelehon mulak muse tu Tuhan Jesus (ptds. Mat.25:40b “Nasa na binahenmuna tu sada sian anggingku angka na metmet on, na tu Ahu do i dibahen hamu! ). Pambahenan ni si Sakeus ima ulaon ni Harajaon ni Debata laho paluahon jolma sian hamagoan nang hasusaanna. Hea do tabege adong di partingkian on halak na songon si Sakeus na berobah, bertobat secara radikal marhite na mamelehon artana satonga tu na pogos ? Adong do na mora ruas ni huria dipelehon do godang tu huria nang pe ndang tardok satonga artana i, alai laho holan mambuat sangap, asa targoar na dermawan na burju roha. Alai ndang dos burju ni rohana masilehonlehon tu naposo ni Debata, dia ma na nidokna disi ? Aha ma tujuan ni i ? Tung so adong do na boi patudoson burju ni roha si Sakeus dohot angka jolma na dihasiangan nuaeng on. Jala diuduti muse didok si Sakeus: jala ia adong na huangati, siopat lompit ma hupaulak. Na nidokna naung diingot iabana do patik ni si Musa na tarsurat di 2 Musa 22 i, na mandok angka na ro sian na so patut angka pansamotanna, ima korupsi, na mamaksa memeras na niomona sian halak na asing, ingkon gararonna ma i opat hali lipat. Parbue ni haporseaon paubahon si Sakeus secara radikal.

h.       (ay.9) – ise ma na targoar pinompar ni si Abraham; Unang ma songon pangantusion ni halak parise nang saduse dohot siboto surat, na holan mangasahon haporseaon ni ompu nasida asa pasidohot nasida angka pinomparna haluaon na sian opmunasida i. Haluaon i ndada marhite ompu, natoras, nang keluarga. Alai ala tatiro do haporseaon ni si Abraham asa sintong targoar pinompar ni si Abraham songon na pinarangehon si Sakeus. Penryataan dohot pengakuan ni Jesus taringot tu haporseaon ni si Sakeus sada indikator na gabe tiruan ma na niula ni si Sakeus. Gabe jamita na mangolu ma na pinarangehn si Sakeus tu hatoropan. Ima na membungkam kesombongan, keremehan ni na torop i mamereng si Sakeus.

i.  Sipahusorhusoron: Adong tolu pangalaho na boi parsiajaranta sian turpuk on, ima:

1.       Pangalaho ni natorop i mamereng Jesus dohot si Sakeus: jotjot do hita manguhumuhumi na marsala marhite pamerenganta alai ndang roha manogunogu. Siapata RPP (Ruhut Parmahanion Paminsangon) na pinasama huria holan na mandabuhon uhuman do so padohot laho manogunogu na hona uhuman ni huria i. Jala torop do jolma holan na marninda hasalaanna ndang adong roha mangalehon kesempatan asa marhamubaon ni roha na mardosa nang na marsala i. Disisi na asing sai marminggu hita, mamuji Tuhanta i songon sihatoropan i marnida Jesus di jamitaNa, alai dung na sorang Jesus di jabu ni si Sakeus i ndang lomo rohana nasida di sikap ni Jesus i. Las ma nian rohanta molo adong kesempatan pertobatan ni angka donganta na mardosa i. Ai na adong do angka paramedis na martugas mangubati angka na marsahit, jala laos songon i do haroro ni Jesus laho mangubati rohanta na marsahit i asa marhamubaon ni roha jala mulak tu dalan ni Debata.

2.       Angka na marsahit be do hita on ala ni dosanta i. Tatiru ma si Sakeus na sai sihol rohana mangalului Jesus asa pajumpang. Jesus pe dilului do si Sakeus na masihol rohana di Ibana. Asa martomu ma na masihasiholan ala ni haporseaon ni si Sakeus i na patoguhon haporseaonna. Sahat didia do sihol ni rohanta tu Jesus Sipalua i di ngolunta ? Haporseaon ni si Sakeus ima haporseaon na songon ompuna si Abraham na marparbue. Asa perobahan na radikal sian haporseaon nis si Sakeus na mangolu marhite na olo mangalehon artana satonga dohot paulakhon si opat lompit tu angka na pogos. Laos songon i ma haporseaonta molo sintong di hita marhaporseaon tu Tuhan Jesus Sipalua i, adong sibahenon nang sipatupaon jadi ndang holan Hata. Dipasupasu Debata hita jala gabe pasupasu ma ngolunta on. Torop do jolma mago ala ni bergelimang harta, kedudukan, nang huaso, ndang ditanda be silehon pasupasu i, uju ro hagogotan, hamaolon, nang hasusaan ipe asa tarjolma jala mulak rohana na mago i mandapothon Tuhanna. Ala ni binsan dilehon Tuhan i dope di hita partingkian, tingki parasian on tapauba ma rohanta asa lam solhot tu Tuhan i.

3.       Tatiru ma holong ni Tuhan Jesus na rade rohana manjonohi, manogunogu na mago, na tarbuang, na so dipardulihon portibi on. Atik adong na taboto sian ruas na naung lilu jala mago, taluluima, taarahon, tajou asa dipajonok rohana tu Tuhan Jesus Sipalua i. Na ro do Jesus mangalului jala paluahon na mago marhite hita na porsea gabe ulaulaNa di tonga ni keluarga, huria nang masyarakat. Amen.

 

BE.512 : Didalan i Jesus tano

1. Didalani Jesus tano dohot laut Tahi holong ni rohana  dipasaut, Namura luhut dibaen tondina i, Dung disesa utang ni dosanta i. Hahaanggi, rohamu sude, taarahon ma donganta be Hahaanggi, dao nang jonok be! Hara tu jolo Na donganmu sude.

2. Nunga monang di jabum hataNa i? Hata i dipangke Ho sinjatami? I do hapistaran na sumurung i, Jumpang do mura sudena baenon nii. Hahaanggi,……

3. Dongan, pinalua ni Tuhanta i, Taondingi, taapoi na lilu i. Asa lam dame luatta , lam ture, Itahaholongi ma donganta be. Hahaanggi,……