“Mangulahon na Denggan tu Saluhut Halak”
Berbuat Baik Kepada Semua Orang
& Ev: Galatia 6: 1-10 & Ep:
Psalmen 66 : 1 - 9
- Dihaborhatan ni Apostel Paulus na patoluhon rap
dohot si Timotius, Lukas, Tertius dohot Titus di taon 57 M manuju
Filadelfia-Epesus, dibege ma naung digaori halak Jahudi Huria naung
pinaojakna di Galatia onom taon naung salpu. Dihaborhatan na paduahhon rap dohot si Timotius,
Silas (Silvanus) dohot Lukas (Ul.15:41-16:10-17; 18: 22; 24: 27;
Kol.4:11-14, taon 51-52 M. Ai disi dibege halak Jahudi na di Jerusalem
naung lam tu toropna jongjong Huria di luat Galatia: Pisidia, Liakonia, Frigia,
Isauria, Silisia, Antiokia, Ikonium, Listra dohot di kota Derba, lumobi ma
na sian sipelebegu hian, songon pribumi na sian pinompar ni bangso Kalt na
di Turky Tengah (halak gaul) ro ma angka guruguru Jahudi (Judaisme)
mamodahon patik Hajhudion, huhut menghasut (mempengaruhi) halak Galatia,
mandok: “Ia si Paulus, ndang na tutu Apostel ni Debata/ Kristus)”, ninna
halak jahudi ( Gal.1: 6-9; 5:1-12.).
- Laho manggotapi poda haliluon na niajarhon ni
Judaisme di huria Galatia on, didiktehon ma surat Galatia on (Surat Paulus
na patoluhon tu huria, si onom bindu: 149 ayat) tu si Tertius asa dikirim
tu Galatia, huroha ala fasih do Si Tertius didok manurat suratna na tu
Roma, sian Korintus (Rom.16:22).
- Mansai tangkas do ditanda si Paulus dohot karakter
ni halak Jahudi nang halak Galatia naung gabe ruas ni huria ni Kristus.
Tinogu tu Barita na Uli naung jinamitahonna di angka kota-kota galatia si
tolu bulan parjolo, dung malum sahit ni matana i (Ul.13:14-52; 14 – 16:1-8;
1 Kor.2: 1 – 3; Gal.4: 13-14):
Ø Mansai mura dope diela guru-guru Jahudi na ro sian
Jerusalem i ruas ni huria Galatia na sian bangso sipelebegu nam arragam (masyarakat
majemuk) di sandok Galatia dohot Pisidia (Turky tengah, selatan, barat dohot
Timur laut), mambahen gaor haporseaon ala ni poda na marasingasing i. Alai
didok, halak Prigia (Indo-Jerman) do jumolo manjalo poda ni Jahudi i, dung
salpu si paulus. Halak Prigia naung leleng mananda manang marsaor dohot halak
Jahudi di Galatia, lumobi na di kota Ancyra (Ankara, ibu kota Turky nuaeng)
mulai sian taon 200-1.200 SM, nang na di Likaonia, Kapadosia pe, na ginoaran
nasida bangso Kimeri (abad-7), na manomba debata baal Sabazios, Dionisos,
Kibele (Magna Mater: Ibu Agung) ni halak Galatia: isara si Maria di parugamo
Katolik rupani.
Ø Mura do tarjalo halak Frigia poda parsunaton na pinodahon
ni Judaisme, mandok : “Asa tutu Kristen naung malua hamu, ingkon radotanmuna do
nasa Patik ni Jahudi. Ai ndang dung maralo patik tu haporseaon, songon
pinodahon ni si Paulus tu hamu”, ninna nasida. Tutu do, ninna roha ni halak
Frigia, na ummaju tingki i. Ai ndang di ugamo nasida na sai laon (sipelebegu),
sude angka malim ni Kibele (Magna Mater: Ibu Agung) ingkon dipaias do
(Dikebiri). I do syarat utama nasida, asa boi marhalado tu Kibele. Alai
marasing situtu do tu hasomalan ni ugamo na manomba Sabazios dohot Dionysos, na
holan pasombu tagas ni sibuk dohot hagiot ni daging (selesra), mangallangi dohot
marpesta-pesta, manortor, mardansa, marjoget, dna. (pat.Ul.14:16; 16: 6-19a;
18:2).
- Dibagasan turpukta on ditogutogu Apostel Paulus do
huria i songon dia marpangalaho na
denggan songon halak na mangolu di bagasan gomgoman ni Tondi ni Debata.
Halak na mangolu di bagasan gomgoman ni Tondi i i ma halak namanongtong
mangolu di bagasan holong ni roha, Hataridaanna dipatuduhon si Paulus di
turpukta on, marhite pigapiga pangalaho manang sikap diri, ima:
a) Manogu dongan na tinggang marhite tondi na lambok (Ay.1):
Diboto si paulus do ndang adong halak na sempurna marpangalaho. Manang beha pe
hadengganon ni sasahalak sai adong do hahurangan ni i. Angka halak Kristen pe
na boi dope “tarsulandit”, manang “tarsomong mardosa”. Alai didok si Paulus,
molo adong halak na songon i, ndang laos pasombuon, manang manigor hatop
uhumon. “Tarsomoong mardosa” ima na madabu tu dosa sian na so tinuntunna. Songon
halak na mardalan di na landit na boi do sian na so panuntunanna tarsulandit di
dalan i laos tinggang. Halak na songon i tontu ndada laos degehononhon, alai
sitoguon do asa boi hot muse jongjong. Songon i do halak na tarsomong mardosa,
ndang manigor hatop uhumon, alai sitoguon do nasida asa boi malua sian dosa i.
Tugas ni halak Kristen naung taruli di Tond i i do mangurupi nasida asa mulak
tu dalan na sintong, marhitehite “tondi na lambok”. Halambohon i do sada sian
parbue ni Tondi na ingkon siparangehonon ni halak Kristen songon na tarsurat di
Galatia 5: 22 i. Marhite tondi na lambok, na marlapatan do i dibagasan holong
parhahamaranggion dohot haserepon. Ruhutruhut hakristenon na marojahan di
parhahamaranggion do na ginohan ni roha namasihaholongan.
b) Masiurupan mamorsan angka na dokdok i. Godang do angka
boban na dokdok siporsanon ni halak Kristen. Tarmasuk do di angka tuntutan laho
mangalo dosa, ro di angka hatahata dohotgodaan-godaan na ro sian duru na boi
gabe siparungkilhononhon. Alai disosoi si paulus do huria i, asa masiurupan
laho mamorsan angka boban na dokdok siporsanon ni ganup halak Kristen, ala
marhite dalan na songon i do hita
mangaradoti patik ni Kristus. Pangibulan ni patik ni Kristus songon na tarsurat
di Johannes 13: 34 i, ima roha masihaholongan: “Patik na imbaru ma hulehon tu
hamu: “Naeng ma masihaholongan hamu, songon holong ni rohangku di hamu, naeng
ma songon i dohot hamu masihaholongan”. Hataridaan ni roha na masihaholongan i,
ima marhite na masiurupan. Mangolu dibagasan gomgoman nii Tondi ni Debata,
marlapatan do i mangolu di bagasan roha na masiurupan. Marhite i do hita halak
Kristen patuduhon rasa solidaritas tu angka dongan, dohoht dalan mangihuthon
Kristus. Nunga jumolo Kristus patuduhon solidaritasna tu hita jolma, marhite na
mangalehon dirina gabe dosa humophop hita ( 2 Korint 5: 21).
c) Ndang jadi paburnangburnang diri: Sada pangalaho na boi
mangambat halak Kristen laho masiurupan i ma pangalaho na paburnangburnang
diri, manang kesombongan, ai pangalaho na songon on ndang padonokhon diri tu
dongan alai na padaohon do. Jadi halak na paototohon dirina do halak na
paburnangburnang diri. Ai dietong dirina tumimbo manang dumenggan sian halak na
asing. Masuk tu a paburnangburnang diri do nang “kesombongan rohani”. I ma na
manganggap dirina umporseaan manang dumenggan parugamaoonna sian halak na asing.
Jala sai olo manguhumuhumi donganna. Cara laho mangagohon kesombongan i
mangihuthon si Paulus, ndada marhite na membandinghon dirinta manang
keberhasilanta tu keberhasilan ni halak na asing na taanggap tumoru sian
dirinta, alai marhite na membandinghon tu a dumenggan dope na ingkon sieahanta.
Marhite i ma hita ingkon sai tongtong manangkasi diri. Jala manang ise na
sintong manangkasi diri ingkon sahat do tu kesimpulan, na saluhuht jolma adong
be do hahurangan dohot hagaleonna di hjolo ni Debata. Laos di ondolhon si
Paulus do ndang apala ringkot penilaian ni halak na asing tu dirina. Ai na
manontuhon penilaian tu dirinta : Debata do. DI jolo ni Debata adong be do
siporsanonna. Namarlapatan ganup halak mempertanggungjawabhon pambahenan dohot
sude na niulana tu Tuhan i.
d) Masilehonan di angka parsaulian na adong di hita: Tarida
do na manongtong adong pangajarion di huria Galatia. Alai di sosohon si Paulus
do songon dia tanggung-jawab ni halak Kristen tu guruna manang tu halak na
mangajari dohot manogunogu haporseaon nasida. Ingkon radotan ni halak Kristen
manang huria i do parsaoran na denggan tu guruna marhite na mangalehon deba sian
arta manang parsaulian na adong di ibana tu guruna i. Na naeng dohonon ni si
Paulus disi, i ma : “Molo adong na mangajarhon hasintongan i tu hamu, patut do
molo dilehon hamu deba sian artamuna i tu ibana”. Mangolu di bagasan gomgoman
ni Tondi i digombarhon do songon parsaoran na denggan tu angka hahaanggi, ima
hubungan na saling berbagi. Hubungan ni guru di bagasan haporseaon dohot na
niajaranna, isara nihubungan ni pandita dohot ruas na pinarmahanna, ima
hubungan na masilehonan sibasabasa manang parsaulian na adong di ibana. Sahalak
na manjalo pangajarion manang poda sian guruna tama mangaloas guruna i taruli
sian nasa parsaulian na adong di ibana. Jala songon i guruna i tama mangalehon
parsaulian na adong di ibana, Ima sipanganon partondion manang hata ni Debata.
SI Paulus dison patangkashon aha naung hea didok ibana di Rom 15: 27, dohot 1 Korint
9: 11, songon i naung hea didok Tuhan Jesus di pangajarionna tu angka siseanna,
ima na mandok: “Tama do marupa angka pangula.” Jala halak na manjalo
pangajarion sian guruna i, tama mangihuthon hata dohot tiruan na nilehon ni
guruna i, jala ingkon sai marusaha mangeahi parngoluon na lam tu dengganna.
e) Unang marnaloja mambahen na denggan, ai manggotil dohita
muse di tingkina; dison tarida peringatan na koras sian si Paulus. Nasa na
taula patar do i dijolo ni Debata jala na ingkon pertanggung-jawabhononta diadopanNa.
Ndang boi Debata paotootoon, manang leaan. “Ai ia i disabur halak, i do gotilonna”. Sahalak partani nnaeng manabur
manang manuan boni, ingkon jolo dipillit do tano na denggan bahen inganan
panaburan manang panuanan niboni i. Jala molo disabur boni na manghirim do
ibana di hasil na sagodanggodangna. Manabur hira dos do i dohot penanaman modal
di angka partigatiga manang pengusaha, jala na tong manghirim di pangomoan na
godang sian modal na tinanomna i. Dison dipatudos si paulus do angka pambahenan
dohhot pangulaonta tu namanabur. Molo manabur halak tu daging, na manghirim do
ibana di hasil na denggan sian dirina sandiri. Alai na manghorhon hamagoan do
i, ai na laho mago jala busuk do daging i. Alai angka na manabur tu tondi,
manghirim do hasil sian tondi i, ima hangoluan na saleleng nilelengna. Na
manabur tu Tondi na marlapatan do i, marparange hombar tu panogunoguon nitondi
i, jala marparbuehon angka parbue ni Tondi i (Gal.5: 22). Halak na mangolu
dibagasan gomgoman ni Tondi, ndang
marnaloja mambahen angka na denggan. Marparange hombar tu panogunoguon
ni Tondi, marlapatan mangula angka na hasea tu dongan jolma. Didok si paulus,
angka na mambahen na denggan, i do angka na manabur tu Tondi, jala na manggotil
muse di tingkina sian Tondi i, hangoluan na saleleng nilelengna. Di tingkina na
nidokna, i ma di ari paruhuman i. Disi ma lehonon ni Debata upa ni angka halak
na mangolu di bagasan Tondi i, ima ngolu na salelengnilelengna, asal ma unang
pargale hita nuaeng.
f) Dilehon Debata do di hita kesempatan laho mangula angka
na denggan di ngolunta on, ima tingki parasian, andorang so ro dope ari
paruhuman i. Jadi ingkon pangkeonta do kesempatan i sadenggandengganna. “Alai
gumodang ma tu donganta sahaporseaon”. “Dongan
sahaporseaon”, na nidok si Paulus ima halak naung manjalo barita na uli i
dibagasan haporseaon, naung gabe sada keluarga dibagasan Kristus, keluarga ni
Debata (pat. Mark.3:32-35; Ep.2:19), angka naung masuk tu huria i. Molo didok
si paulus songon i, ndang na gabe mangorui lapatan ni holong na niajarhon ni
Jesus, na so mambolati jolma haholongan i. Alai maksud ni si Paulus disi, asa
jumolo ma taulahon holong i di lingkunganta, di lingkungan ni huria i. Disi do
hita pasomalsomalhon dirinta laho mangulahon na denggan. Ndang mungkin hita mambahen
na denggan tu luar, molo so tarulahon hita dope na denggan di lingkunganta,
dibagasan huria i. Laos domu tusi do, molo ndang adong pambahenanta na dneggan
tu luar, gabe sompit do holong ni roha i, jala boi bergeser tu roha diri manang
egoisme, na holan mamaingkirhon diri dohot golonganna sandiri. Amen.
