Debatanta
Na Sangap Jala Na Timbul
Ev. Psalmen 8: 1 – 10 Ep. Rom
5: 1 - 5
a)
Ia turpukta on ima ende puji-pujian hamuliaon sian
hasangapon na so boi dapot ni jolma ala ni keterbatasanna. Adong pangantusio
sian hasangpon ni Harajaon ni Debata di Surgo sahat tu angka binatang na lea
situtu di portibi on. Digombarhon do ia
manisia songon pusat ni panompaon ni Debata.
Diantusi parpsalmen
on na targoar halongangan dibagasan dirinta songon manisia. Dibagasan bindu on
dipatuduhon do habalgaon ni jolma i:
1.
Ayat 2: pandohan “goar-Mu” patuduhon ndang holan pribadi
ni Debata alai pangungkapokn taringot tu diriNa. Pandohan “goar-Mu” dohot
habadianMu ima hasarupaan dibagasan ende, na paboahon pribadi ni Debata dohot
pangungkaponNa marhite panompaon. Nang pe sian panompaon i patuduhon
hamuliaonNa, mangungkap hajongjonganNa, dohot hasongkalonNa, alai saluhutna i
ala ni Debata sandiri. Ii turpuk on
mangajarhon tu hita ia sude pamujion dohot parsombaon na sintong tu
Debata na holan timbul dibagasan roha na sinondangan ni pangungkapon ni Debata.
Marhite pangungkapon ni portibi on manang hatopan dohot pangungkapon na
marimpola ima HataNa, rohanta i dipaadophon tu hasongkalon ni Debata asa
tubu ma pamujion tu Debata.
2.
Ayat 3 mandok: sian pamangan ni angka dakdanak dohot
angka posoposo dijadihon Ho do paranganmu, ala ni angka na mangalo Ho, asa
paonjaphon musu dohot sitahi sudolsudol. Adong dua na gabe paradoks dison; ima
angka posoposo dohot angka dakdanak na manusu sian horong ni musu nang angka
parhosom. Hata “posoposo” manggombarhon hagaleon dohot haserepon ni roha ni
jolma, alai adong do hagogoon nasida na lobi umbalga sian angka musu ni Debata.
Hagoon i na marojahan tu Debata na ni haporseaon nasida. Nasida ma halak na
mananda pangungkapon nang hasongkalon ni Debata, huhut mambaritahonsa. Dipangke
Debata do angka na gale di roha ni portibi on laho paboahon huasoNa jala
manghuntam angka musu ni Debata. Sabalikna pandohan musu dohot parhosom
manggombarhon hagogoon ni manisia laho pabongangkon dirina dohot na patujolohon
dirina. Inti ni musu ni Debata ima nasida na so mananda goar ni Debata dohot
pangungkapon ni Debata gabe so dipuji be Debata.
3.
Dijou jala dipillit Debata do halak na gale di roha ni
portibi on. Tujuanna ima laho pabotohon
ia dalan ni Debata ndada dalan ni jolma jala ndang tardodo jolma i. Tujuan na
asing asa unang hita manengahhon dirinta diadopan ni Debata. Haroroan ni puji-pujian
tu Debata holan sian angka halak na mananda hagaleonna jala na marpangusandean
tu Debata. Sabalikna angka jolma na ginjang roha ima na so porsea tu Debata,
ndada na so olo mamuji Debata alai na mangaleai Debata.
4.
Ayat 4 – 5 : Diparsiajari parpsalmen on do langit, bulan
nang mata ni ari dohot sude na tinompa ni Debata. Jala so panagaman ni roha
ditompa Debata ma manisia i: “Tung aha ma
nian jolma i, umbahen pola ditaringoti roham ibana? Jala anak ni jolma i,
umbahen pola diebati Ho?” (ay.5). Jala sai joujou do ibana dibagasan bukbak
ni roha: “Humurang apala otik do ibana
sian Debata dibahen Ho, alai ditalitalihon Ho muse hamuliaon dohot hatongamon
tu ibana. Dipabangkit Ho do ibana gumomgom angka jadijadian ni tanganmu, sude
do tahe dipatunduk Ho tu ibana.” (ay.6-7). Toho ma tutu na didok
parpsalmen. Molo tabandingkon portibi on di tompa Debata na mansai balga, jolma
i holan songon monis, manang pasir di laut na balga.
5.
Ayat 6-9: turpuk on ima laho patoguhon muse angka
pambahenan dohot parenta ni Debata tu jolma i asa mangarajai saluhut angka
binatang di darat nang laut dohot udara, jala mangarajai sude angka na tinompa
ni Debata (parenta na dos tarsurat di 1 Musa 1: 26 - 28).
6.
Pujian sian parpsalmen songon refelksi tu hita na mananda
dohot na mangulahon parsuruon ni Debata dibagasan ngolunta. Parhataan
“surusuruan” na dipangke di ay.6 ima hata “Elohim” manang “Debata”. Na boi
ditafsirhon: Debata na manjadihon hita songon parhuaso manang uluan manang
angka jadian ni Debata songon surusuruan, manang otik tumoru sian Ibana
sandiri. Pangantusion on mangonjar rohanta laho mamuji dohot manomba Tuhan i
sian nasa hadirionta. Disuru Debata do hita asa rap mangula dohot Ibana laho
manjaga parngoluonta dohot portibi on. On ma ingananta dohot gunana hita
dibagasan panompaonNa. Laho manggohi hasjongjonganta dibagasan HarajaonNa,
dilehon Ibana do tu hita kemampuan laho mamikirhon angka pingkiranNa, laho
manghilalahon dohot mangungkap rohaNa jala laho mananda dohot mangulahon lomo
ni rohaNa.
7.
Naparpudi marhite las ni roha siala haburjuon i Tuhan i,
dipaujung parpsalmen on ma pujian i: Ale Jahowa, Sigomgom hami, mansai sangap
do goarmu di liat portibi on. (ay.10). Manisia holan sada do na boi ulahononna
songon ungkap ni las ni rohana mandok mauliate disude na binahen ni Debata, ima mamuji dohot pasangaphon goar ni Tuhan i.
b.
Sipahusorhusoron:
- Dipaojak Debata
do jolma i distatus na mansai uli, Ditompa do jolma i hombar tu gombaran
(Heb. Tselem) nang rupa
(heb.Demut) ni Panompa i (1 Musa 1:
26). Tselem ima uhir manang patung na diuhir hombar tu gombaran ni Panompa
i, jala Demut ima hadosan. Lapatan ni Debata manompa jolma i hombar tu
rupaNa ima: paojakhon jala mangalehon tugas tu jolma i songoon wakil ni
Debata di portibi on laho mangatasi, mamarenta sude portibi on jala
tanggungjawab ni Debata sandiri songon silehon tugas/mandat (ay.7-9).
Mandat laho mangarajai/mamarenta ndada na laho manegai alai mengelola
dohot bertanggung jawab laho gabe pasupasu nang hadumaon tu jolma i
sandiri. Ihut ni i hasarupaon ni jolma i dohot Debata na manggombarhon
hubungan na rosu Debata dohot jolma i, Hubungan on na boi mambahen Debata
mandok HataNa tu jolma i, mangulahon dohot marningot padan dohot Ibana.
Jala sabalikna na boi do jolma i markomunikasi mannag manghatai dohot
Debata. Asa marhite gombaran na dimaksud dison ndada gombaran na mate
manang uhiran ni patung, alai patung na dipangolu Debata, siala Debata na
mangolu, ala ni i ma as digoari ma jolma angka na marngolu (bdk. 1 Musa 1:
7).
- Siala ni i asa
disadari jolma i ma taringot tu hajongjonganna i, jala asa unang gabe marlomolomo
disi. Jala unang ma adong jolma i padoshon dirin songon Panompa, siala
pangalaho sisongon i ma na mambahen madabu jolma i tu bagasan dosa. Adong
do batasan na tangkas sian jolma, songon na tinompa ni Debtaa. Songon
jolma na dipasangap, jolma i ingkon boi patuduhon sifat-sifat habadiaon
songon na adong di Debata. Sifat-sifat habadiaon i marragam do, isarana na
boi manghamauliatehon habalgaon ni huaso ni Debata na tangkas di
parngoluonna, lingkungan nang alam. Asing ni i na boi do jolma i
mampargunahon sude na tinompa ni Debata tu dirina sandiri jala
martanggungjawab. Dijou do jolma i laho mamboan mulak muse tu tujuan na
parjolo diatas ni panompaon. Marhite na mamboan barita las ni roha, saluhut
ruas ni Debata boi marsibahen na boi sipatupaon laho paulihon angka na
tinompa ni Debata. Amen.
