Jamita Minggu I Dung. TRINITATIS (Hasitolusadaon ni Debata)– 19 Juni 2022

Gabe Angka Anak Ni Debata Marhite Haprseaon Di Jesus Kristus

 

Ev. Galatia 3: 23-29                                         Ep. Yesaya 65: 1 - 9

 

1. Debata na manomoa langit dohot tanoon nang saluhut pangisi ni tanoon masiboan mansamna be. Adong be do halobianna jala na rup masitumpahan. Jolma i pe di tompa Debata mamboan rupana nang angka parasinganna be. Sian rupa, pangalaho, nang angka silehonlehon ni Debata na adong diibana. Angka ragam parasingan silehonlehon ni Debata tu jolma laho pasadaho jolma i do di parsaoranna di kondisi hidup sosial ni jolma i na saling membutuhkan. Molo so sada dan saling membutuhkan manusia akan sulit melengkapi dan memenuhi kebutuhan serta masa depannya.
2. Hasadaon i do na ingkon dipatuduhon ditonga ni huria i. Ima na disosohon AP.Paulus. Hape angka halak jahudi sai mamereng parasinganna sian angka bangso na asing. Sada parasingan na tangkas ima halak jahudi marnampunahon Patik ni Debata, hape ndang adong dapot i di bangso na asing. Ala ni parasingan i mambahen halak Jahudi gabe so olo mangan sahundulan dohot halak na so Jahudi, on ma na di orai Ap.paulus (Bindu 2). Marsitutu do AP.Paulus patuduhon ia ndang adong parasingan ni halak Jahudi dohot na so jahudi. Ndang boi halak jahudi di pintori siala ni patik, ala ni i dos do nasida dohot halak na so Jahudi na so marnampunahon Patik i. Saluhut jolma do mardosa ( 2: 15-16).
3. Dungi dabagasan turpuk on (3:23-29), dipatuduhon Ap.Paulus on do ia halak Jahudi dohot halak na so Jahudi rup halak na mardosa. Ndang adpng parasinganna.  Saluhut nasida holan na boi do dipintori sian haporseaonna gabe angka anak ni Debata (26), saluhut na nasida sada dibagasan Jesus Kristus (28).
4. Na saleleng on hal na umborat di roha ni halak Jahudi ima Patik nasida i, asa didok roha nasida angka halak na so jahudi ndang adong patik di nasida umbahen na gabe tardok rumar ma ngoluna. Dipatduuhon AP.Paulus do hasalaan nasida, ia Patik i ndang boi mambahen haak jahudi gabe pintor jala holan marhite haporseaon do jolma i di paretonghon bonar ( 2:16). Dungi dipatuduhon Ap.Paulus ma hadomuan ni Patik dohot haporseaon. Ia patik songon siparorot (3:14). Guru siparorot ima laho manjagai angka anakhonna, tarmasuk ma i angka hatoban manang pangurupi na pataruhon angka dakdanak i tu parsingkolaan. Dungkon agodang pe angka dakdanak i, asa ndang ringkot be di nasida guru na mangarorot nasida i. Laos songon i ma dungkon tingki digohi Kristus ulaon haluaon-Na, asa boi ma dohonon jolma i dietong tigor ala ni haporseaon. Ido umbahen jolma i ndang manghaporluhon Patik na dilapati songon guru siparorot (24-25).
5. Na gabe sungkunsungkun: Adomng do tahe parasingan ni halak Jahudi dohot halak na so Jahudi ? Nunga sai jotjot di patorang Ap.paulus ndang adong oarasingan nasida i, ala disada sisi naung sude nasida mardosa, sahalak pe ndang adong na tigor (2:16); 3: 22. Dungi disisi na asing saluhut nasida ingkon marhite haporseaon asa di pintori; ai najolo mansai lea do halak na so Jahuhdi, ala siala ni haporseaon gabe angka anak ni Debata na badia ma nasida raphon dohot angka halak Jahudi (3:26). Nang pe halak Jahudi manang na so Jahudi, baoa, boruboru, tuan manang hatoban, saluhut nasida gabe sada dibagasan Kristus (3:28), jala jaloon nasida do tenateanan marhite padan i (3;29).
6. Dipargunahon ma aek i laho mandidi songon tanda mamburi dohot ngolu na imbaru. Marhite pandidion, gabe masuk ma hita tubagasan asi ni roha ni Debata. Asi ni roha na itajalo i dibagasan Jesus Kristus gabe dalan haluaon. Huria Galataia na sai marungkil dohot angka pangalaho na sai marngharingkothon  praktik ni Patik i. Adong horong na mandok molo gabe siihuthon Kristus, ingkon jagaonna do dirina asa unduk tu Patik songon hasomalan di Padan Na Robi. Ido umbahen ro Apostel Paulus mamodai huria na di Galatia. Dipaingot Ap.paulus do huria na di Galatia asa mangolu dibagasan Kristus ima mangolu dibagasan asi ni roha, asa disi ma Kristus do gabe siparorot tu huriana. Patik na gabe siparorot asa patandahon ruas do i tu Kristus i. Ungkap do haluaon i tu sude jolma dohot disi halak Junani na so mananda ruhut ruhut hajahudion asa dapotan haluaon na sian Tuhan i. Dipalua Tuhan Debata do hita, jala di didi gabe songon tanda ni halak na porsea. Gabe halak na porsea ima na mangolu dibagasan haluaon dohot asi ni roha. Asi ni roha i dipasahat tu saluhut jolma na so mardia imbar.
7. Songon halak na porsea hita ; boha do hita marpangalaho dibagasan ngolum ? Boi do goaron ngolum gabe pasupasu tu sude jolma, jala tudos do i dohot barita ni Kristus i ? (Plp. 1:27; Ep. 4:1)? Boha, sai mangolu dope hita di na robi i ?A (Ep. 4:22)? Boha do hita mandalani parngoluanta na imbaru na lam tu dengganna ? (Ep. 4: 23-24)?