“Ditangihon Debata do Joujou ni Partigor”
(Orang Benar berseru,
Tuhan menjawab)
& Ev. Johannes 5: 1- 9 & Ep. Mazmur 5: 1-9
a.
Uju
di ari sabbat di Jerusalem jonokhon harbangan ni biru biru, adong sada inganan
paridian na margoar Betesda. Disi dipamalum Jesus sahalak na pampang saleleng
tolupulu ualu taon. Dibagasan turpuk on dipaboa, mansai torop do angka na
marsahit disi, isarana, halak na mapitung, halak na ngungu, na ra pampang, na
hansitan, na sarion, na huliton dohot lam na asing. Marpungu do nasida di
bariba ni paridian Betesda i laho paimahon hamamalum ni sahitna marhite na
paimahon hagugunsang ni aek paridian i. Ai surusuruan ni Debata do tuat
marombasombas tubagasan paridian i manggunsang aek i. Asa na parjolo bongot di
hagugunsang ni aek i, gabe malum do, manang dia pe sahit na lohot tu ibana.
Ndang apala godang barita taringot tuson, boha dalanna parmalum ni angka sahit
sian hagugunsang aek paridian i. Naeng do asa tajaha jala tapahusorhusor turpuk
on asa lam bagas.
b.
Manarita
marsahit saleleng tolu pulu ualu taon ima sada partingkian na mansai leleng di
hita jolma. Jala dipaboa do na so adong mangurupi nasida laho pajonokhon tu
paridian i molo di tingki haugugnsang ni aek i. Marhite turpuk on diajari do
hita na margogo situtu do pangkirimon ni halak na pampang i asa malum, nang pe
naung leleng ibana marsahit jala ndang aang manang sada na mangurupi ibana asa
malum. Alai nang pe songon i sai na manghirim do ibana dihamamalum ni sahitna.
c.
Disituasi
na so mungkin be malum, pangkirimon na balga sian halak na pampang i sasintongna
tarida do i secara tidak langsung marhite sungkunsungkun ni Jesus na mandok: “Naeng malum ho?” (ay.6). Sabintas
sungkunsungkun ni Tuhan Jesus i mansai asing begeon, ala gaorna pe namarsahit
pasti hamamalum ni sahit do na niluluanna. Alai dison naeng do berengonta ia
sungkunsungkun ni Jesus i naeng pahothon pangkirimon na balga sian halak na
pampang i asa hipas nang pe sian kondisina ndang mungkin be malum sian
parshiton i.
d.
Sian
on dipataridahon do tu hita arti manang lapatan ni pangkirimon, ia saleleng
adong dihita pangkirimon jala disi ma sai na adong dalan haruar, asa ndang
mandelel be hita di angka situasi manang aha. Alai d ison diajari do hita asa
lam bagas mangantusi pangkirimon na sintong i. Ala molo asal marpangkirimon do
hita holan mangasahon hagogoon dohot kemampuanta, ima na gabe holan pangkirimon
na soada songon halak na pampang i na sai mangkirim dihamamalum alai ndang na
gabe malum ala holan mangasahon gogona dohot pangurupion ni halak. Alai ro do
Jesus asa panghirimon i gabe sintong ima pangkirimon na dijouhon tu Tuhan
Jesus.
e.
Tung
manang aha pe sidongolonta, diajari Hata ni Debata on do hita asa sai joujou tu
Tuhan i di uju maol siadopanta. Asa angka na porsea i sai joujou do ibana
marpangkirimon di alus ni angka hamaolon na niadopanna. Ndada mangasahon hagogoon
nang haboionta, alai marpangkirimon dibagasan haporseaon di Tuhan Jesus, ai
ndang na murak hita binahen ni pangkirimon i (Rom.5:5).
f.
Na
pinatupa ni Jesus laho pamalumhon na pampang i nadada marhite dalan na
luar-biasa songon pangkirimo ni angka na marsahit di paridian ni Betesda i na
sai paimahon hagugunsang ni aek i. Ndang na dais tangan ni Jesus tu na marsahit
u manang mambahen cara laho pamalumhon. Alai lobi sian halongangan manang angka
na luar biasa. Alai sederhana do pangubation ni Jesus tu na pampang i, holan na
mandok: “Hehe ma ho; hindat ma lagem, mardalan ma ho!”. Sian on marsiajar
hita mansai balga do huaso ni Hata ni Tuhan Jesus na manghorhon hamamalum ni
na pampang i. Uju didok Jesus, laos i do
na saut. Ndang adong na mangambati Hata ni Debata. Molo adong hita songon na
pampang on situasina, porsea ma hita laho maggulahon Hata ni Tuhan i. Molo di
dok Jesus “HEHE MA HO”, disi ma
adong huaso ni Jesus na mangula dibagasan ngolunta asa hehe. Lapatanna asa lam
bagas marsiajar hita laho marpos ni roha manghangoluhon huaso ni Hata ni Tuhan
i na balga i dibagasan ngolunta. Ia Hata ni Tuhan i ima na mangolu jala na
mangula dibagasan hangoluanta. Tasungkun be ma dibagasan rohanta, naung sadia
bagas rohanta laho unduk tu Hata ni Tuhan i. Molo didok Tuhan i, “UNANG HO MABIAR”, manang “UNANG HOLSOAN HO,” taulahon do i?
