Parhahamaranggion
Dibagasan Holong
Kasih Persaudaraan
Ev: 2 Sam. 1 : 17 –
27
Ep: 2 Kor 8: 7 – 15
Huria na
hinaholongan dibagasan Jesus Kristus
Molo tajaha Surat
2 Samuel ima manaringoti raj Daud songon sahalak na manggomgomi bangso Israel.
Dungkon naung dimiahi malim Samuel ibana na gabe raja ( 1 Sam.16.), ingkon
paimanna do na nia lelengna asa angka na matua ni Israel manjanghon ibana gabe
rja ni Israel, dungkon marujung raja Saul dohot Isyboset ( 2 Sam.4-5). Buku 2
Samuel ima na manurathon taringot panggomgomion raja Daud songon raja ditonga
bangso Israel. Godang do dibaritahon taringot parngoluonna, sai diramoti Debata
do pardalanan ni ngoluna (2 Samuel 5:10,12; 7:16; 8:14b; ). Alai dohot do
dipaboa taringot hadadabu harajonna, alai ndada i tujuan ni na manurathon buku
on alai napaboahon pujipujionna di asini roha ni Debata di pardalanan ni
ngoluna.
Dungkon tajaha
taringot parngoluon ni si Daud, adong ma tolu masa na gabe siingotonta sian
panghobasion ni si Daud:
a) Papindahon ibukota
harajon ni bangso Israel tu Jersualem
b) Papindahon poti
parpadanan ni Debata tu Jerusalem
c) Pahothon harajaon
ni bangso Israel marhite na manaluhon angka harajon na dihumaliangna (palistin,
Edom, Moab, dna).
Alaia adong dope
napinarsintana, alai ditulak Debata do i, ima sangkap laho pajongjonghon bagas
joro ni Debata. Ihutni angka ulaon na marhasil diulahon ibana, alai adong do na
gabe mara di ibana, na gabe dosana di adopan ni Debata, ima na martuptup
laho pamatehon si Uria laho mambuat
oroanna na margoar si Batsyeba, dungi dosa bongak ni rohana mangasahon torop ni
soldaduna di harajaonna.
Habalian ni si
Daud gabe sada masalah na so tartagam hian. Sian buku 1 Samuel, na bali do si
Daud sian harajaon ni si Saul, simatuana sandiri na naeng mambuat hosana. Sian
buku 2 Samuel, na bali do si Daud sian kudeta na niulahon ianakhonna si
Absalom.
Dihatiha madabu si
Daud tu dosa pangalupon dohot si Batsyeba, dipataridahon do partondion ni si
Daud na jonok tu Debata. Dipardalanan ni ngouna jumpanganna do hasatiaon ni
Debata na so paloashon ibana di hasusaan i.
Andorang so
turpukta on dipaboa do taringot hamamate ni si Saul jala si Daud
manghamonanghon parporangan maradophon halak Amalek. Dipahot do muse barita i
marhite haroro ni sahalak Amalek sian parporangan laho mamaritahon tu si Daud.
Napaboahon naung dibuat ibana hosa ni si Saul sian pangidoan nis i Saul sandiri
(6 – 10). Dipasahat halak Amalek i do na gabe bukti na ima tumpal dohot rutas
na adong di si Saul hian (10). Alai molo tajaha sian 1 Samuel 31:1-10, marasing
situtu do. Boi dohonon na margabus do halak Amalek i, alai boasa gabe margabus
halak Amalek i? Boi do ala naung tangkas diboto nasida na manggantihon si Saul
pasti do si Daud, di dok roahan gabe barita na uli doi di si Daud di hamamate
ni si Saul asa gabe raja ma si Daud. Na manubut roha ni si Daud do halak Amalek
i alai ndada songon i na di roha ni si Daud. Molo di roha ni si Daud naung
dibunu halak Amalek i do si Saul ima halak naung miniahan, sada hajahaton bolon
do i di roha ni si Daud jala ingkon dabuon uhuman hamatean tu nasida (14-16)! Mansai lungun di roha ni si Daud hamamate ni
si Saul nang si Johanthan anakhonna dongan ni si Daud (17-27).
Nang pe sai
marhosom ni roha si Saul tu si Daud jala naung ditotophon Debata si Daud gabe raja manggantihon si Saul, alai ndang na
gabe marlomolomo si Daud tu si Saul. Siala ni i ndada na gabe paksaon lomo ni
rohana manang marhitehite halak na asing. On ma sadapangalaho na mansai ringko
tiruonta songon halak na porsea hita. Tapaloas ma lomo ni roha ni Debata na
saut dibagasan ngolunta, nang angka partingkian pe sai saut ma lomo ni roha ni
Debata. Unang ma tabahen sude situasi nang kondisi gabe hombar tu lomo ni
rohanta, naeng ma saluhut hombar tu lomo ni roha ni Debata. Hatiha tarbunu si
saul dohot anakna si Jonatan di parporangan, digurithon si Daud do sada ende
habot ni rohana “Ende andung” (2Sam. 1:17).
Turpukta on ma
andung andung ni si Daud ala ni hamamateni si Saul dohot si Jonathan. Ndada na
marsandiwara si Daud, ndada na naeng
mambuat untung ibana songon halak Amalek i. Tarbukti do sian na dilele
si Saul ibana sahat tu na mate si Saul dibahen si Daud do na dumenggan.
Dipatuduhon si Daud do nanihormatan raja songon na patut jala na miniahan ni
Debata.
Dipatuduhon si
Daud do pangalaho na biar mida Jahowa marhite na hormat jala mangargahon angka
na miniahan ni Debata, ima na manjou halak na porsea asa
a. Marserep ni roha
laho manghormati angka manang ise pe tarlumobi angka naung miniahan niDebata
gabe naposoNa, manang na gabe panggomgomi, manang na gabe uluan di
lingkunganta, maysarakat, di huria nang di negaranta, angka pangajari, angka
tuan. Boi do sasahalak madabu tu pangalaho na so dihalomohon ni roha ni Debata,
manang gabe partuktuhan manang tihas di tongatonganta. Alai taingot ma ndada
sian hita haroroan panguhuman manang pamaloson, ndang sian hita huaso laho
mandabu uhum tu manang ise pe. Holan si Debata Jahowa do huaso panguhuman i (jaha
Rom 12: 19; Heb.10:30)
b. Patuduhon holong
ni roha na polin tu angka na hinaholonga. Ende andung ni si Daud on patuduhon
balga ni holong ni rohana, ang pe dimusui jala dilelei ibana. Ndang moru
haholonganna, sai dibahen do na dumenggan sahat tu na mangujungi parngoluon ni
si Saul nang si Jonathan pe.
c. Sai satia do si
Daud manghaholongi Debata marhite na manghaholongi dongan jolma nang musuna
sandiri pe.
d. Diloas si Daud do
na marhuaso Debata dibagasan ngoluna. Jadi ndada lomo ni roha ni Si Daud
sipasautonna alai diloas do lomo ni roha ni Debata tulus mardalan. Laos songon
i ma nian angka na porsea i mangihuthon Debata jahowa dibagasan ngoluna.
Huria ni Tuhanta
na hinaholongan dibagasan Jesus Kristus
Hombar tu topik ni
minggunta sadari on mandok: “Parhahamaranggion Dibagasan Holong” asa
tapatuduhon ma i songon halak na porsea hita dibagasan Jesus Kristus. Naung
dipatuduhon si Daud do i panghobasion na gok holong i tu Debata marhite na
patupahon angka na uli na denggan di ujung ni ngolu ni dongan nang musuna pe
(Saul dohot si Jonathan). 1
Johannes 4:20
Pargabus do halak na mandok: Holong rohana di Debata; hape dihosomi do
donganna. Ai na so mangkaholongi donganna na niidana, tung songon dia ma
haholonganna Debata na so niidana?
Parhahamaranggion
naeng ma mian dihita saluhut angka na porsea na gok holong dibagasan Jesus Kristus i do na
pinangido ni Debata dibagasan ngolunta. Naung
dipatuduhon Jesus Kristus do pangalaho i dibagasan parngoluan pardagingonNa
sahat tu hau pinarsilang i. Disarihon Jesus do ngolunta asa sahat tu na
manongtong i, diulahon do hata ni Debata, unduk jala serep marroha. Laos ido na
niigil ni Ap.Paulus sian huria Korint, asa angka silehonlehon ni Debata
rajumanna ma i sian Debata, jala pelehononna ma muse tu Debata marhite angka
panghobasionna. TAINGOT MA angka na uli na denggan na pinarade ni Debata laho
haluaonta marhitehite Jesus Kristus i. Laos taingot ma angka na uli na denggan
i laho manjou hita marasini roha tu angka dongan jolma. 1 Johannes 4:21 On do patik na tajalo sian Ibana: Na
mangkaholongi Debata, i ma na mangkaholongi nang donganna.
Songon na
pinangido ni Ap.Paulus tu huria na di Korint asa sian bulus ni roha nang sian
ias ni roha laho marhobas di adopan i Debata, unang ma ala na dipaksa, ala na
nionjar ni halak, alai sian haporseaon na mangolu ma ibana masilehonlehon.
1
Johannes 5:2
Sian on do taboto, naung holong rohanta di angka anak ni Debata: Molo
tahaholongi Debata jala taradoti patikna . Sian haporseaon na mangolu dibagasan Jesus
Kristus ma hita angka na porsea marpanumpak na uli na denggan tu saluhut jola.
Panjouon di
panghobasion “Kasih persaudaraan” naeng ma dipatuduhon dibagasan orientasi
pelayanan HKBP di taon 2021 “Tahun Pemberdayaan”.
Tarpatupa hita do
Tahun pemberdayaan na dibagasan haholongon molo sai tapatujolohon hagogoon nang
huaso ni Debata dibagasan Jesus Kristus laho patupahon i saluhutna. Ai ndang
tarpatupa jala tarula hita ulaon asi ni roha nang panghobasion na dibagasan
haholongon i molo sian gogo, hapistaran, nang lomonta sandiri. Taloas ma Tuhan
Debata mangarajai roha nang pingkiranta patupahon angka ulaon pemberdayaan di
tonga ni keluarga, huria, masyarakat nang negaranta.
Di masa pandemic
on na so marhaujungan dope, hape lam borat dope adoponta manjou hita angka na
porsea pasidohot di angka ulaon na boi paneang angka boban ni masyarakat na
terdampak covid-19, manang ruasta na marsitaonon, na dibagasan arsak,
parsahiton, angka hamaolon. Marhite partisipasinta di ulaon i na patauhon angka
jolma na mian do Debata jala mangula di tongatonga ni portibi on mamboan
haluaon, las ni roha dohot gogo. Tapuji ma Tuhanta Jesus Kristus naung manghamonanghon hita sian na bernit na tataon
di portibi on, asa marhamonangan do angka na porsea i molo paloashon Tuhanta
Jesus Kristus mangula dibagasan ngolunta. Amen.
