Horas ma di hita
saluhutna.
Dibagasan turpuk
on mansai ringkot do hita manaringoti angka sibahason laho pabagashon
pangantusionta di topik on. Adong ma piga-piga bahan pokok siberengonta:
1. Sian sejarahna
Klemens na sian Aleksandria ima
sahalak ama ni huria sian huria purba. Na targoar do nasida di sejarah ni huria
ala ni habaranionna dohot parsitutuonna laho patomuhon haporseaon ni Kristen
dohot filsafat. Dipaboa ibana do ia halak Rom na mangido tu Ap.Petrus asa
manurat taringot tu parngoluon ni Jesus di nasida. Jala boi do dapot roha na
pasidhohot si Markus mangurupi manurathon i, sian bukti ni angka terjemahan na
godang manurathon angka istilah Aramik, angka na manjaha surat ni si Markus ima
halak na so sian Jahudi. Mansai jempek do surat ni si Markus hombar tu
pamingkiron ni halak Rom na so apala risik laho mangalapati angka parhataan na
bagas lapatanna. Surat ni si Markus ima laho patuduhon taringot tu diri ni
Jesus Kristus dohot pangulaonNa di portibi on. Suart Markus on naeng paboahon
taringot tu Jesus songon sisean na ro laho marhobas dohot mamelehon ngoluNa
songon Sipalua tu saluhut jolma (Mrk.10:45). Ido umbahen di sude data pribadi
ni Jesus mansai ringkas do dipaboa si Markus, jala gumodang do manaringoti
pribadiNa nang angka panghobasionNa di portibi on.
2. Sian panuratanna.
Pangalaho masa
taringot tu Jesus dohot Beelsebul sasintongna ima sada sian saluhut ulaon
panghobasionNa di luat Galilea. Na mansai ringkot botoonta ima adong dipamasuk
barita taringot tu keluarga ni Jesus songon sisipan jotjot di goari teknik sandwiching
manang bracketing, jala godang iadonta di Surat ni si Markus. Lapatanna ima
laho patuduhon partingkian na marsanggasangga, asa manarik tu roha, asa
marparsualhon, na rumingkot mambahen dua barita asa gabe ditafsirhon.
Songon na pinatupa
si Markus jumolo manaringoti angka na torop i dohot keluarga ni Jesus (Mrk.3: 20-21).
Dung disisiphon taringot tu partontangan ni Jesus dohot angka siboto surat
(mrk.3: 22-30) ditonga ni bingkas na masa di keluarga ni Jesus dohot situan
natorop (Mrk.3:31-35). Jadi molo diparrohahon turpukta on marisihon: Jesus
dohot situan natorop (20); na ro keluarga ni Jesus (21); angka siboto surat na
mandikte (22); Alus tu angka siboto surat (23-30); ro ma muse keluarga ni Jesus
(31); Jesus dohot angka situan natorop (32-35). Nanaeng sipatuduhon on ni Jesus
pangalaho partontangan na maralo tu Jesus dohot angka na manjanghon pangajarion
ni Jesus. Jala bungkas sian keluarga dohot siboto surat, tujuan ni keluarga
laho pahohom Jesus di sikapNa i di huta Kapernamun asa unang gabe gaor di tonga
ni masyarakat nang di pamarenta uju i. Tujuan ni keluarga laho padaohon Jesus
sian mara, ima dalan nasida asa manghophop Jesus. Sian panatapan ni si Markus
dos do na niulahon ni Keluarga ni Jesus dohot angka siboto surat i, nang pe
ndang apala patar songon paraloan siboto surat i. Marasing dohot sikap ni torop
halak di pangajarion ni Jesus na manjanghon pangajarionNa i.
3. Sipahusorhusoron.
a. Sikap ni angka
sibotosurat.
Naung ditangihon
angka siboto surat i do taringot Barita ni Jesus songon sahalak guru,
pangajari, parjamita, pangubati na mansai targoar uju i. Mansai torop halak na
ro laho m angalului Jesus ala pangajarionNa na mansai luar biasa ihutni i na
boi patupahon ragam ni halongangan; pamalum na marsahit jala pabalihon na
sinonggopan sibolis. Gabe si paro biar ni roha do barita i di roha ni angka
siboto surat ala harorona i gabe sada ancaman di angka siboto surat di na
marlaoan angka siihuthon nasida. Ido umbahen ditongos angka siboto surat
suruanna laho manulingkiti dohot mangalului mula ni huaso ni Jesus mangulahon i alai dibahen
do dohot tahitahi na jat. Dung pajumpang angka siboto surat i dohot Jesus,
jumolo do disungkun nasida sian dia do parbinotoan ni Jesus laho patupahon angka
halongangan i doht na pabalihon angka tondi na
jat. Di partingkian i, pabalihon si bolis sada pangalaho naung somal
masa. Godang do masa na mangulahon ulaon haholomon, angka ajiajian na di roha
ni siboto surat doshon dohot na niulahon ni Jesus hatiha i. Hatiha diida nasida
na binahen ni Jesus halongangan, gabe pintor di dok nasida do manuduh
pambahenan ni Jesus na sinonggopan ni si Bellsebul laho pabalihon sibolis i.
Beelsebul ima na ginoaran sisombaon ni halak Kanaan na lapatanna ‘debata na ro
sian banua ginjang”, alai di hatiha i, sai dipangke halak Jahudi do goar i laho
paboahaon parhuaso di naroko, inganan ni angka setan. Didok roha nasida naung
sinonggopan tondi ni Beelsebul do Jesus, jala naung leleng i masa di diri ni
Jesus. Sude pandohan na so hasea sian siboto surat i tu Jesus naung marulakloni
do i masa. Di ay. 22 bentuk imperfek (e;legon) ditingki patoranghon
“berkata”. Patuduhon naung sian uju i naung somal do angka siboto surat i manuduh na so tingkos
taringot ti na binahen ni Jesus (Markus 2:7, 2:16, 2:18).
b. Sikap ni Jesus tu
angka sibotosurat.
Ndang dipasombu
Jesus pangalaho ni angka siboto surat i, di jou Jesus do nasida laos dialusi do
sude angka tuduhan nasida marhite sada umpama. Sian umpama ni Jesus i, nanaeng
siondolhonon ni Jesus ima: 1. Ndang adong hadomuan ni Jesus dohot Sibolis; 2.
Na manegai ulaon ni sibolis do naniulahon ni Jesus, lapatanna naung dibagasan
gomgomanNa do huaso ni sibolis i. Mansai manarik di rohanta di panorangion ni
Jesus di umpamana i marhite tirket tirket : ni harajaon, bagas dohot sibolis.
Dipatupa Jesus do i asa manggombarhon anggo metmet do parsaoranna doshon laho
tu halumlamon do i. Dua situasi na dipatorang Jesus, ima situasi Makro mandok
harajaon dohot situasi mikro mandok bagas ima bagian ni politik dohot sosial.
Sian pengalaman ni parporangon dohot partontangan dibagasan dipatoang Jesus
songon sada siingoton di parsualon i.
Dungkon salose
manaringti umpama i, dipaboa Jesus ma muse sada pandohan taringot tu dosa na so
tarsesa ima na mangaleai Tondi Parbadia. Sian hata ”blasfhme,w” (hujat).
Mansai ringko do on ala naung tangkas do diboto ianggo sude dosa dohot na
mangaleai angka anak ni jolma disesa do i, alai molo mangaleai Tondi Parbadia
ndang tarsesaan i, ala naung mangulahon dosa na manongtong. Na mangaleai Tondi
Parbadia na marlapatan mangalo Debata Ama (Pngk.13: 6; 16:9); mangalo Kristus
(Mat.27: 39; Luk.23:39); manang na mangalo Tondi Parbadia (Mat.12: 32; Mrk.3:
29,30. Alai dibagasan turpuk on, na nidok Jesus mangaleai Tondi Parbadia. Alai
naeng do tapatangkas na mangaleai Tondi Parbadia diantusi sian na manjaha
Markus 1: 7-8, dihatiha i Johannes pandidi hea do mandok:
“On do jamitana; Na ro ma sian pudingku na
gumogo sian ahu; na hurang tama do ahu paunduk ahu mangkarhari tali ni
sipatuna. Aek do hudidihon tu hamu; alai Tondi Parbadia do didihononna tu hamu.”
Na gumogo do
Jesus, na marhuaso marhite huaso ni Tondi ni Debata mangihot sibolis jala
manaluhon angka siseanna. Jadi alasan ni Jesus mandok angka siboto surat i
mangaleai Tondi Parbadia ima siala naung didok angka siboto surat i do Ibana “sinonggopan
ni tondi na jat” (ay.30). Hatiha i naung dipamalum Jesus do sahalak na marsahit
na sinonggopan tondi na jat, jala na masa i patuduhon naung ro do harajaon ni
Debata di panghobasionNa. Lukas 11:20 Alai molo hupabali angka tondi na hodar marhitehite
tangan ni Debata, naung songgop ma harajaon ni Debata tu hamu (Mat.12:28). ‘Tangan
ni Debata’ dilapati do i ‘Tondi ni Debata’.
Dosa na mangalo
Tondi Parbadia ima na doshon na mangulahon dosa na so boi sinesaan dosana.
Lapatan ni dosa na manongtong ima roha na mangoloi pangalaosion. Ima angka
jolma na so olo marhamubaon ni roha.
Sian mulana i
naung diparrohahon angka siboto surat i do angka sihobasan ni Jesus. Jala nunga
dibege nasida pangajarion dohot marnida sandiri angka halongangan na binahen ni
Jesus,alai dang porsea dope nasida. Sai na boi dope sesaan dosa ni angka siboto
surat i molo na holan manulak panindangion ni Jesus (Mat.12: 32a), alai
parsualanna naung ditulak nasida do panindangion na parpudi on ima sian Tondi
Parbadia.
Naung marulakloni
do Tondi Parbadia i mangalehon panindangion taringot tu ulaon ni Jesus na sian Debata Ama jala mangalehon asiasi
haluaon dibagasan Ibana, alai sai na hot dope rohanasida na jogal i, jala
sangaja do di datdati mandok ulaonNai na sian sibolis. Jadi tangkas ma na adong
be dalan laho pasahathon panindangion tu nasida. Panindangion na sian Tondi
Parbadia ima panindangion na parpudi. Ido umbahen na so hasesan be pambahenan
nasida. Jala ndang adong kesempatan nasida marhamubaon ni roha. Ido umbahen
didok dosa na so hasesaan do na mangalo Tondi Parbadia jala manongtong do
dosana i.
Ala ni i naung
didok Jesus di bagasan turpuk on ndada holan sian sikap pangalaho na manulak
Tondi Parbadia alai dohot do sian rohana sandiri na so olo jala marjogal ni
roha sian panggora ni Tondi Parbadia. Tudos songon na nidok BE. 424: 1 Soara
ni Tondi ni Tuhanta I jot-jot dilao si, ditulak ho i. Sai, Tanda jeamu, pauba
roham, dapothon Tuhanmu, si sesa dosam.
Amen.
