Panghobasion Na Gok Holong
Pelayanan yang penuh kasih
EV. 2 Korint 6 : 1 – 10 EP. Job 38: 1 – 11
Huria na
hinaholongan dibagasan Jesus Kristus
Sai tongtong do denggan parsaoran ni ap.Paulus dohot angka huria na hea
hinobasanna di luat Akhaya saleleng maringan nasida di Efesus. Huria na di
Korint ima huria na godang sipingkiron ala ni na masa hagaoron. Gumodang sian tongatonga
ruas ni huria i na marharoroan sian na so Jahudi, jala ndang hea dope diajari
Hata ni Debata na sian Padan na Robi, angka latarbelakang ni haporseaon i dohot
hasomalanna na mansai maralo tu ruhutruhut hakristenon. Mansai godang dope na
ingkon niajaran tu nasida andorang sahat nasida tu hagogok ni partondion ( 1
Kor.3 :1-3). Ditingki ap.Paulus manurathon 2 Korint on, na ni arop ni roha ni
ap.Paulus asa di parrohahon nasida Barita Nauli i jala asa arga di nasida i
jala manjanghon ibana songon apostel. Mangula do ap.Paulus dohot angka donganna
laho manosoi huria i marasi ni roha mangurupi angka ruas ni huria na pogos di
Jerusalem, ima dalan na patuduhon parsitutuon ni ha-apostelonna.
Dipanatapan ni ap.Paulus
di ruas ni huria na di Korint, hurang mangharingkothon ulaon asi ni roha,
hurang marsitutu na marhuria, jala ndang mamparrohahon angka silehonlehon ni
Debata tu nasida. Ihut ni i muse gabe ndang ditangihon nasida poda ni ap.Paulus
gabe ndang diantusi nasida angka pangajarion na sala manang angka poda
haliluon. Disosoi ap.Paulus do nasida asa unang marnalemba laho mangasahon
hagogoon ni Kristus i dinasida.
A. Hajongjongan ni
sahalak parhobas.
Hata parhobas,
bhs.Indonesia, Pelayan sian hata gorik “διακονος” (diakonos) lapatanna: pelayan,
pembantu, diaken (5:15-21). Nadimaksud ni ap.paulus ima taringot haluon na niulahon ni Jesus Kristus, ima na manjou ruas ni huria di Korintus asa
olo mardame dohot Debata nang sama nasida
(ay.20), ndada nasida be na mangolu i, alai mangolu dibagasan Kristus i (ay.15).
Asa molo nunga mardame nasida dohot
Debata dohot ma mangihut asa mardame nasida dohot angka parhobas. Asa tangkas
parsaoran nasida dohot angka parbarita nauli (dohot ma disi Ap.Paulus) na
dihaposi Debata laho pararathon barita nauli.
Songon sahalak
naposo ni Debata na martanggung-jawab, dipangido ap.Paulus do angka ruas
nahinobasanna i manjanghon dohot denggan taringot tu Barita Nauli ni Jesus Kristus.
Ndang lomo rohana gabe ndang diharingkothon angka asiasi ni Debata siala ndang
denggan panjanghonon nasida di Barita nauli i. Lapatanna na so denggan
panjanghonon ni ruas ni huria i tu ap.Paulus siala asupasup ni parpoda
haliluon, na mambahen nasida manulak Barita na Uli i. Hape di tingki parasian
ni Debata ima gabe sada kesempatan na nilehon ni Debata tu nasida asa
marhaporseaon jala marhamubaon laho manjanghon Barita na uli i, unang be sai
marnalemba rohana. Di naung patar asi ni roha ni Debata di nasida naeng ma
manjou roha nang haporseaon nasida asa burju manjanghon Debata di ngoluna.
Dipaadop roha ni ap.Paulus
do angka hahurangan ni naposo ni Debata, boi do gabe partuktuhan gabe
manghorhon halak na hinobasan gabe manulak asi ni roha ni Debata. Alai ndang
dos ap.paulus dohot angka parpoda haliluon i. Mansai gogo do dibuktihon ap.Paulus
hasintonganna songon naposo ni Debata. Taparrohahon ma parsitutuonna songon
naposo ni Debata:
1. Ndang hea
Ap.paulus mambahen partuktuhan. Alai disude na niulahonna ala biar mida Debata
do.
2. Ditingki hasusaan
nang hamaolon, laos so hea do ibana holsoan, alai dibolus do sude hasusaan i
marhite na marsitutu di haporseaon, marhite na jaga, martangiang nang marpuasa.
3. Sai jaga do roha
ni ap.Paulus di hapolinon, habengeton, nang parasinirohaon, jala ndang
marpangalensem ibana disi. Sai dipangasahon ibana do pandonganion ni Tondi
Parbadia dohot marhite bodil ni partondionna.
4. Saluhut kualitas
ni partondion i sai hot di parngoluon ni ap.Paulus, disude situasi, sai dpuji
ibana do hasangapon ni Debata. (8-10).
Dipanjaouon ni ap.Paulus
tu ruas ni huria na di Korint songon “dongan saulaon” napatuduhon ruas
ni huria ima songon parhobas ni Kristus. Sai dipaingot do nasida asa marhobas
dohot denggan jala marsitutu.
Ap.Paulus sai
pamanat parngoluonna songon sada dalan laho mambaritahon taringot tu Kristus,
naeng songon i ma hita angka na porsea di Jesus Kristus. Unang ma gabe sihataan
angka pangalaho nang parangenta, gabe partuktuhan tu godang jolma, jala gabe
manulak Kristus.
Ditingki dibagasan
hurungan, sai dipargunahon ap.Paulus do kesempatan i mambaritahon barita na
uli. Angka hamaolon na masa di tongatonga ni masyarakat, gabe sada kesempatan
do i di ap.Paulus laho paboahon asi ni roha ni Debata
Angka na tapatupa
di situasi na mansai maol di tonga masyarakat, ima patuduhon haporseaonta na
sasintongna. Ndang na gabe terpengaruh ap.Paulus di situasi hamaolon i, manang tantangan
sian angka halak na di humaliangna. Ndada olo ibana pasaorhon ngoluna songon
naposo ni Debata dohot hasomalan ni portibi on.
c. Unang ma
marisuang Asi ni roha ni Debata.
Barita naul, ima
naung dipasahat Debata asi ni rohaNa tu jolma marhitehite AnakNa Jesus Kristus.
Mansai denggan do nian marhaporseaon, mangantusi, dohot mangapil Bibel i, alai
ndang sae holan i jala ndang adong laba ni i ia so tajanghon Jesus Kristus
dibagasan ngolunta. Panjanghononta i do manghorhon ngolu na marpanindangion,
naung dipalua jala hombar tu lomo ni roha ni Debata, jala gabe barita nauli tu humaliang
hita.
Mansai ringkot do
hita halak na porsea marparhaseang tingki dohot denggan. Partingkian laho
pasonanghon roha ni Debata marhite na mangulahon lomo ni rohaNa. Jala angka na
porsea mamereng saluhut partingkian i; ima partingkian ni Debata, asa holan kepentingan ni Debata do na
tapatujolohon disi, ndadakepentinganta, partingkianta, jala ndang lomo ni
rohanta be disi. Saluhut na pinasahat ni
Debata tu hita gabe ndang marisuang dohot saluhut partingkian alai gabe
marparbue (1Kor.7:29).
Jadi tarbatas do
partingkianta, ndang adong na manongtong di portibi on nang di hita pe manisia,
suang songon i hahipason, parngoluonnta pe tarbatas do. Adong be do tingki ni i
saluhutna, ido asa unang marisuang angka partingkian i laho marlehaleha,
marnalemba.
Tabuat ma
kesempatan di partingkian na pinasahat ni Tuhan i tu hita marhite na mangulahon
angka na uli na denggan hombar tu lomo ni roha ni Debata. Tapangke ma tingki on
dohot sadenggandengganna asa gabe marlapatan ngolunta tu tongatonga keluarga,
huria nang masyarakat. Gabe pasupasu ngolunta, gabe sada panindangion na tutu
taringot tu asi ni roha ni Debata. Molo nunga ro tingki ni Tuhan i, ndang adong
be na boi manundatisa, jala ndang adong be kesempatan di hita.
Hamu na angka ruas
ni huria Tuhanta Jesus Kristus
Marhite hite angka
asiasi ni Debata naung tajalo asa taparhaseang i songon pangula na mangula
ditongatonga ni huria ni Tuhanta nang di portibi on. Mansai torop do halak
masihol dohot laho marhobas di tonga ni huria ni Tuhanta alai ndang sude na boi
mangulahon i dohot denggan, polin, jala tulus rohana. Molo marsitutu do hita
laho marhobas diadopan ni Debata ndada diadopan ni jolma, adong do arga ni
sigararonta disi. Boi do mansai ragam pangambati laho marhobas dijolo ni
Debata. Panghobasion ni ap.Paulus pe mangadopi ragam ni pangambati, ragam ni
hamaolon, panaritaan, uhuman linsinglinsing, dihurunghon, dileai, difitnah jala
hea do naeng agoan hosa ibana.
Mangadopi
saluhutna i, dipangke ap.Paulus do angka sinjatana: ima habengeton ni roha,
martangiang, marpuaso. Alai songon naung dipaboa ap.Paulus, saluhutna i naeng
ma diulahon marhite lambas ni roha, marhite holong na mamolin dohot marhite
pangurupion ni Tondi Parbadia.
Mansai jotjot do
hita gabe marsak, jala mandele siala ni hamaolon na taadopi dibagasan
panghobasionnta. Hape molo tabayanghon hamaolon na niadopan ni ap.Paulus, ndang
adong imbar ni i saluhutna sian na taadopi. Boi do pintor gale semangatta laho
melayani hape holan ala persoalan na metmet. Ido umbahen disude panghobasionta
i naeng ma Tuhanta i na tapangido laho pasingkophon dohot mamasumasu. Pasolhot
dirim tu Debata asa dilehon gogo laho
marhobas di adopanNa.
Margogo do ap.Paulus
ala olo ibana marsiajar sian panaonon ni Tuhanta Jesus Kristus mangadopi dalan
ni silang i (Via Dolorosa). Ndada boi margogo ap.Paulus dohot Jesus ia so
marhite pangaramotion ni Debata. Laos songon i ma hita angka na porsea sai
diramoti Tuhanta ma hita laho mangulahon ulaon asi ni rohaNa i, jala taulahon
ma saluhutna i marhite holong ni Tuhanta Jesus Kristus Sipalua hita. Amen.
