Jahowa
Mangalehon Gogo Tu Na Loja
1
Korint 9 : 16 – 23
a. Ia
surat 1 Korint on ginurithon Apostel Paulus siala naung adong do laporan
taringot tu na masa di huria Korint sian si Apolos dohot sian angka na asing,
tarlumobi sian keluarga Kloe. Tujuan ni surat ni Si Paulus on asa paturehon
angka na sala di huria Korint dohot laho mangalusi paraloan ni angka pangajari
pargapgap na manegai huria i jala na mangalo haapostelon ni si Paulus. Hasalaan
na masa di huria i, ima: Naparjolo; Dibagasan huria i masa parbadaan dohot
parbolat bolatan, na marpulik pulik diri (berkelompok-kelompok). Adong ma
kelompok na mangalo Apostel Paulus, na mandok ndada ahli filsafat manang na
malo marjamita. Dungi dialusi Si Paulus molo marjamita ibana ndada sian
parbinotoan ni jolma i, na sian Debata do na pinaboana. Haroroanna ndada songon
ahli filsafat, alai na gabe sitindangi ni Kristus do ibana ro tu huria i.
Napaduahon; Ruas di huria Korint ndang marture dohot denggan, sai mian dope
dipasombu huria i angka ruas na mangalangkup gabe ruas disi. Naeng do
haruarhonon ni Apostel Paulus ruas sisongon i sian Huria Korint.
Napatoluhon;Sai na tagi do ruas i mangalului hasalaan, dungi marsiadu laho
mangalualu tu halak sileban, dialo Apostel Paulus do pangalaho sisongon on.
Napaopathon; Ndang adong subang ni huria i, ala salah pangantusion na hea ni
dok Apostel Paulus tu nasida, alai diputar-balikan gabe madabu ma nasida tu
pangalangkupon. Mansai gogo do dialo si Paulus pangalaho nasida i. Napalimahon;
taringot tu pardongan saripeon, na boi do sirangon pasanganna na sian halak
sipelebegu, manang hot ripe?. Napaonomhon; dipaloas huria i do martubuan angka
sisomba ganaganaan dohot hasomalanna, ido umbahen asa ro sungkunsungkun na boi
do panganon juhut naung pinelehon tu ganaganaan?Napapituhon ima; taringot tu
parpunguan; sai jotjot do angka parompuan ro tu parpunguan so manudungi ulu
nasida, dungi angka ulaon nabadia ndang denggan dipatupa dungi angka
silehonlehon ni Debata tu nasida gabe disalahgunakan. Napaualuhon; Adong sian
ruas i na manulak haheheon ni pamatang ni Jesus Kristus.
b. Didok
umpasa Batak ; Ndang loja aek paihutihut rura” ninna. Manang songon dia pe
dalan siboluson ni aek i, manang angka batu na ambat disi, manang angka
tunggar, na rahis, na mordong, sai didalani do i paima sahat tu tujuanna
(laut). Dibagasan pangantusion i, ndang pengalaman pardalanan i na gabe pokok
pikiran, alai manang dia pe i na penting sahat ma tu tujuan. Ianggo so sahat tu
tujuan, marisuang do pengalaman na di tongan dalan i. Digombarhon umpasa i do
nang pengalaman na marragam ditongatonga ni ngolu ni hajolmaon. Isara ni
natoras na paanjuanju ianakhonna, pangajari tu na niajaranna Ndang marnaloja
idaon laho manogunogu. Sipata tung mansai dao mangulur holan paihutihut hagiot
ni ianakhonna i, alai ianggo tujuanna, beha asa hasea, beha asa bertobat,
manang asa dumenggan masa depanna. Songon i ma nang pambahenan ni Apostel
Paulus di turpuk on, na so marnaloja paihutihut huria i asa unang manimbil sian
hinalomohon ni Debata. Tung sangajo do ibana beradaptasi tu lingkunganna, alai
ianggo tujuanna beha asa gumodang hamonanghononna dohot togihononna tu Debata (
1 Kor.9: 19).
c. Ido
umbahen naeng marusaha Apostel Paulus laho mangalehon sada tiruan na denggan,
jala sude angka hagiot na halak Kristen naeng ma terkendali, boi mangarajai
diri, mangorom hisap hisap ni daging saluhutna i ala ni patik na ummarga jala
na tumimbo i ma haholongon i. Haholongon i ndada na mangahut tu diri, alai laho
sumarihon angka na dihumaliangna. Ala ni i sude parbinotoanta naeng ma didasori
ala ni holong. Ido ala na didok Apostel Paulus, nang pe marbarita nauli ibana
ndada ala ni lomolomo ni rohana i alai gabe sada utangna do i tu Debata
marningot holong ni Kristus na manangkup ibana asa gabe parbarita na uli. Udut
ni i, ndada na naeng manjalo upa ibana sian ulaon marbarita na uli i. Holan na
mangulahon parsuruon ni Kristus i do ibana disi, jala diulahon ibana do i
dibagasan las ni roha. Sadalan na nidok
ni Jesus di Lukas 17 : 10 “Songon i do nang hamu; molo dung diula hamu saluhut
na nidokkonna i tu hamu, dok hamu ma: Naposo na so hasea do hami; intap ulaon
na patut do huula hami.” Ala ni i aha upa sijaloon ni Apostel i ? ima na
maralus di ayat 18 Di na mamaritahon
barita na uli i ahu, so hurugii hamu, asa unang hupangasahon huasongku di
barita na uli i. Ndada pola adong situntuton ni apostel i diulaonna tu
tongatonga ni ruas nang pe na patut do jaloonna upa sian i.Siala ni i ndada
adong be keterpaksaan dina mangula ulaon na marbarita na uli i ibana, disi ma
kebebasan ni apostel i. Mangula do ibana didasori haholongon i, jala hamajuon
ni Harajaon ni Kristus i do na gabe upana.
d. Sai
marusaha do Apostel paulus laho pahombar diri na tu angka ruas i asa boi
dihamonanghon ibana nasida. Dipatutoru Apostel Paulus do dirina asa boi
berkomunikasi dohot ruasna, manghilalahon aha do namasa ditongatonga ni ruasna
i, aha do pergumulanna. Ai didok di ay.19 hupatutoru do diringku tutoru ni saluhutna,
asa tumorop nasida hutogihon. Nang pe dipatutoru dirina tu angka na gale alai
ndada gabe murak hadirionna songon apostel, hot do ibana Apostel alai na olo do
ibana manghilalahon na masa ditongatonga ni ruasna i. Molo so pola ringkot di
rohana ndang pola dihagogohon ibana manahan disi, alai molo mansai ringkot do i
sai gogoanna do laho mempertahanhon. Molo tu horong ni halak Jahudi, tudos ma
dibahen ibana dirina songon halak Jahudi. Suang songon i tu halak na so Jahudi,
alai ndang unduk ibana di hasomalan na dua horong i manang sian horong na asing
pe. Sai adong do dasor na hot di roha ni Apostel Paulus ima Patik ni Kristus,
sian sudut dia pe sai na ingkon hombar ma tu patik ni Kristus ngoluna ima
prinsip ni ngoluna. Molo di Huta Jerusalem dipasomal Apostel Paulus do mangolu
dibagasan patik, alai molo di huta Antiokhia ndada hombar tu patik i ibana
mangolu. Ido umbahen na hea di orai ibana Apostel Petrus na marpangalaho songon
halak Jahudi ditongatonga ni naso Jahudi. Kesadaran ni Apostel Paulus ima molo
diwajibhon do patik tu halak na so Jahudi, boi do gabe menghalangi hararat
Barita na Uli i. Ihut ni i ndada na mandok asa molo naeng mamboan halak tu
Kristus gabe mardosa i iba. Apostel Paulus ndada na n aeng patutoru derajatna
alai naeng ma boi ibana masuk tu ganup jolma na di humaliangna, molo adong na
gale dohot ibana manghilalahon hagaleon ni dongan jolma i asa disi ma ibana boi
mangurupi jala manogunogu na gale i (ay.22) asa tung boi ibana mangurupi
hamaolon ni dongan jolma i. Sudena i diulahon ibana siala Barita na Uli i
(ay.23). Tujuanna asa dapotan haluaon dongan jolma i, sude nai hira
utangna do i tu angka jolma ido ala olo
ibana mangulahon i. songon na nidok ibana di Rom 1: 14 4 “Na marutang do ahu di
halak Junani nang di bangso na leban, di angka parhapistaran nang di angka na
hurang roha.” Diulahon apostel Paulus pe saluhutna i boi mardongan tu horong
dia pe, asa dohot ibana gabe partohap disi. Ngolu na boi mangarajai diri ima
sada dasor panghirimon ni Apostel Paulus ala dihaporseai ibana do ditingkina
jouon ni Jesus Kristus ma ibana jala partohap di tumpal sijaloona sian Debata.
e. Molo
mamereng situasi dohot kondisi masyarakat di negaranta marragam pangalaho dohot
pambahenan nang angka na masa. Naparpudi on mansai godang do kasus narkoba
manginona tu masyarakat nang bangsonta Indonesia, dungi kemiskinan, nang angka
pengangguran na lam godang tarlumobi PHK
na masa di akhir taon 2014 na salpu, nuaeng lam tamba na pengangguran, suang
songon i bencana banjir, angka na pogos. Tontu ringkot do nasida niurupan. Na
tarjou do hita songon apostel Paulus laho masuk tu persoalan ni ngolu
masyarakat na dibagasan persoalan nang hamaolon ai nasa nadiula ibana ima patik
ni Kristus i, ima haholongon i, songon na nidok ibana di Galatia 6: 2 “Masiurupan ma hamu mamorsan angka na dokdok
i; i ma dalan mangaradoti patik ni Kristus”. Songon Jesus i sandiri na olo
bongot tu portibi patutoru dirina doshon jolma ma ibana, didok di Pilippi 2: 6-
7 “Atik pe rupa ni Debata di Ibana, ndada
songon na nidobo dirajumi rohana tudosna i tu Debata. Dirumari do dirina jala
disolukkon rupa ni hatoban, gabe suman tu jolma do Ibana jala rumang jolma
dapot di Ibana. Dipatutoru do dirina; na gabe pangoloi do Ibana paima mate,
pola tung mate tarsilang!” Ro do Ibana manjumpangi angka na dangol, na
pogos, na marsahit, na mora, na marpangkat, na tarelaela, nadipasiding
masyarakat; alai ndada gabe moru derajatNa, bolas sian parsaoran i dapot Ibana cara laho manogunogu dohot
paulihon nang mangurupi hamaolon nasida. Na mapitung gabe marnida, na pampang
gabe mardalan, na huliton gabe sombu, na mate gabe mangolu, na ngunguon gabe
marbinege, na hona songgopan tondi na hodar gabe malua, na mauas jala male gabe
bosuran, jala sian i ma barita na uli didapot godang jolma.
f. Songon topik ni minggunta mandok : “Jahowa
Mangalehon Gogo Tu na Loja”, sai lehonon ni Debata do tu hita gogo asal ma hita
olo marhaposan tu Ibana. Naung dipasahat do tu hita pos ni roha asa
margogo marhite Tondi Parbadia. Ai didok
Jesus do tu angka siseanna di Johannes 14: 26-27 :26 “Alai anggo Pangondian i,
i ma Tondi Parbadia, sisuruon ni Ama i marhitehite Goarhu, ajarhonon jala
paingothonon ni I do tu hamu nasa na huhatahon i tu hamu! Dame do hutinggalhon
di hamu; dame na di Ahu, i do hulehon di hamu. Ndang songon pangalehon ni
portibi on pangalehonku. Unang ma bonsa jala unang ma mabiar rohamuna!”. Ala ni
i na tarjou do hita naung pinargogoan ni Tondi Parbadia i, laho mampargogoihon
angka dongan jolma na dibagasan hagaleon hinorhon ni angka parsualon na lam
mangimbukbuk di jaman on. Tapatuduhon ma na margogo do Tuhanta i laho
manghamonanghon angka na gale ditonga ni portibi on (Ptds. Jes 40: 21-31).
Dilehon do tu hita ragam silehonlehonNa i asa taparhaseang i laho patimbulhon
Harajaon ni Debata di tonga ni portibi on. Amen.
