Jesus
Mangajari, Huhut Pabalihon Tondi Na Hodar
Markus
1 : 21 – 28
a. Dijolo
ni turpuk on naung dipatorang do taringot tu pernyataan ni Jesus di angka
siseanNa na pinillitNa i : “Dung i bahenongku ma hamu gabe sijala jolma.
Diondolhon Huaso ni Jesus do membentuk masa depan ni angka siseanNa ditangan ni
Jesus. Dibahen Jesus do nasida sisean i gabe ulaulaNa laho marhobas ditonga ni
jolma, masyarakat, bangso nang portibi on. Dijou do nasida gabe sijala jolma
sian sijala dengke; ia dengke na mangolu di aek laut nang di aek tao nang di
aek sunge na manggombarhon haholomon ni portibi on (maut; kebinasaan); dengke
na manggombarhon angka jolma i asa ditangkup, dijala, diselamatkan tubagasan
Harjaon ni Debata. Ingkon toguon nasida do sude jolma nang diluat dia pe so
pola marnida bohi, sian sandok luat, houm dohot marga dohot sian sandok
parhataan. Jala ingkon sahat boanon ni angka siseanNa sude na tinogu i tu
haimbaruon, sian bangko dohot parngoluon na golap di na robi (haholomon ni tao)
tu pangalaho dohot parngoluon na tiur dibagasan Harajaon ni Debata. Mamereng
siulaon na mansai bidang situtu, boi do bobonosan roha ni angka sisean i, jala
boi gabe sumurut ala ndang tolapsa mangulahon i. Alai naeng do pos roha ni
angka sisean i di huaso ni Jesus, ido umbahen so pola marsidalian nasida
mangihuthon Ibana.
b. Hasosonggop
Harajaon ni Debata dipatuduhon Jesus do i marhite angka tanda tanda. Sada sian
tanda i, ima hababali ni tondi na hodar na sai manggosagosa jolma i. Tangkas do
dihatahon Jesus paboa na sarahutan do hababali ni tondi na hodar tu hasosonggop
ni Harajaon ni Debata. AI didok do; “Alai molo Hupabali angka tondi na hodar
marhitehite tangan ni Debata, naung songgop ma Harajaon ni Debata tu hamu”
(Lukas 11: 20). Tutu marragam do tanda i, isarana hamamalum ni angka sahit,
haheheon ni na mate gabe mulak mangolu, dohot angka na asing i, alai holan
tanda sambing do i. Ndada syarat mutlak i, ai asing do hajongjongan ni tanda
sian hajongjongan ni syarat mutlak. Syarat mutlak ndang boi so ingkon adong asa
gabe sah haroroan ni na mamboansa, alai
molo tanda adong do na tinuduna. Ndang tarsirang syarat sian diri ni na
mamboansa, alai tanda sai na sirang do sian diri na mamboansa. Ndang jadi
pahusoron hajjongjongan ni tanda gabe dos dohot syarat. Ingkon manat do hita
lumobi di angka ari parpudi on. Adong do deba na manggoari dirina huria
mamodahon ingkon boi do huria patupahon angka tanda halongangan, isarana
manangiangkon na marsahiht asa malum, ipe asa tarjalo huria i songon huria na
sintong, hapapatar ni Harajaon ni Debata. Molo so margogo angka naposo ni
Debata patupahon angka tanda-tanda halongangan, ndang na sintong i naposo ni
Debata na sinonggopan ni Tondi Parbadia, ninna nasida. Nunga dipasamak poda na
songon on lapatan dohot hajongjongan ni tanda tu lapatan dohot hajongjongan ni
syarat. Nunga dibahen tanda gabe syarat. Ihut tusi, talpe ma jolma i madabu tu pangunjunan,
i ma gabe porsea tu tanda ndada porsea tu na tinudu ni tanda i, ima Jesus
Kristus. Alai ndang jadi dohononta na so ringkot angka tanda i, ringkot do i.
c. Mangajari,
ido dalan dipatupa Jesus laho pajongjonghon dohot pararathon Harajaon ni Debata,
gumodang do panghorhon dohot parbue ni na niula ni Jesus marhite na mangajari
sian na marjamita. Ai marhite na mangajari dapot ma pangalaho na masisungkunan,
masipatangkasan. Adong tingki di angka na niajaran i laho pabotohon pingkiran
dohot haporseaonna; i ma na ginoaran dialog di tingki na parpudi on. Jala holan
marhite dialog do boi hhot jongjong jala togu marurat hasintongan i di roha ni
jolma, ala tangkas diantusi jala dihaporseai. Pangajarion d dalan ni Jesus,
jala jotjot do ibana digoari guru. Sian mulai na papungu angka sisean sahat ro
di na manopot angka huta, ulaon ni guru pangajari do dipatupa Jesus. Ihut tusi,
digoari angka sisean i do ibana guru. Ndang dijua, dijangkon do pandohan ni
angka sisean i (Joh.13: 13). Suang songon i nang si Nekodemus, Parise i,
digoari do ibana guru na ro sian Debata, na so adong manang ise pe na tuk
patupahon songon na binahenNa i (Joh.3:2). Laos i do didok di ayat 21,
dibongoti Jesus na ma parguruan ni halak Jahudi manang Sinagoge laho mangajari
di tingki ari Sabbat.
d. Marasing
do poda dohot cara ni angka siboto surat manang patik tu poda dohot cara ni
Jesus laho mangajari. Ia poda ni angka siboto surat manang patik tarsurat do i
di buku ni si Musa na lima i, jala cara nasida mangajarhon i, ima indoktrinasi
(parenta sambing). Impola ni pangajarion nasida ima Legalisme manang
mangondolhon hukum sebab-akibat. Molo diulahon ho on, ba songon on ma upana dos
ma i positip manang negatip> Mansai rongking do sebab-akibat i dibahen
nasida. Alai poda na niajarhon ni Jesus, poda na imbaru do (ay.27), asing sian
poda na niajarhon ni angka Parise i. Aha ma i? I ma Harajaon ni Debata rap
dohot ruhut (etika) hangoluan di angka ruas ni harajaon i. Cara ni Jesus
mangajarhonsa; ima mengatasi masalah (problem solving) ni na niadopanNa manang
na niajaranNa. Ndada holan di hata (retorika) sambing songon na pinatupa ni
angka siboto patik, na pola sahat ro di mambahen surat jolma i, alai ianggo
nasida tung so olo do mangurupi nang marhite gogo ni sada jarijari sambing
(Luk.11:46). Na niondolhon ni Jesus di pangajarionNa i ma Barita na Uli songon
na tarsurat di Lukas 4: 18-19. Barita na Uli ima hagogoon ni Debata laho manesa
dosa, mangalehon haluaon, pamalum angka sahit, dohot lan angka na asing dope,
na mambahen jolma i soratan jala maheu ala
ni dosana. Alai adong dope apala na umbalga hasurungan ni pangajarion ni
Jesus i. Didok di ayat 22, “Laos angka na di Bagasjoro i do manghatindanghonsa,
ai marsahala do pangajarionna di nasida. Ndada songon pangajarion ni angka
sibotosurat. Ndada aleale ni Jesus manang sisean i na manghatindanghonsa, ndad
na mambuat roha nasida, alai tung sian roha na ias do panindangion nasida i.
Boasa didok marsahala? Parjolo: Ndada na niapilNa manang parbinotoanNa i, alai
tung sandok ngoluNa do isi ni pangajarionNa. Ia guru na marsahala i ma guru na
rade mamelehon dirina, ngoluna laho manghophop dohot paluahon angka na
niajaranna. Ala ni i panghophopon na i do gabe dapotan ngolu na imbaru angka na
niajaranna. Muba ma angka na niajaran ni Jesus di bagasan turpuk on. Na ginosagosa
ni tondi na hodar gabe malua, hisar, merdeka jala bebas. Situan na torop i gabe
dohot manghatindanghon na sintong, didok nasida. “Poda na imbaru”. Na so dung
masa atik pe mansai godang na manggoari dirina be guru di tongatonga nasida.
Paduahon, ndang adong sahalak pe na tuk manual podaNa i. Tarjalo angka na
umbegesa do hasintongan na niajarhon ni Jesus i. Ai guru na gok hasintongan
dohot asi ni roha do Jesus i. Ndang tarsirang hasintonganNa sian asi ni rohaNa.
Ndada dihuphupi manang disolukhon asi ni rohana hasintongan ni Debata, manang
sebalikna. Ndang jadi mago hasintongan ala asi ni roha manang asi ni roha ala
hasintongan. Ingkon rap adong do i duansa, laos i do jumpangta dibagasan diri
ni Jesus. Mardalan do hasintongan ni Debata, i ma uhum hamatean tu pardosa.
Jesus do siangkatta tu hamatean i. Asi ni roha ni Debata do tu hita pardosa asa
unang bongot tu hamatean saleleng nilelengna. Ala ni i, ditongos ma Jesus
Kristus na gabe hapapatar ni asi ni rohana i. Ia guru na marsahala ima guru na
digohi hasintongan dohot asi ni roha ngoluna. Patoluhon, sisada panghilalaan do
guru i, dohot na niajaranna (empati). Songon dia hansitna pangontak ni sitaonon
ni na ginosa ni tondi na hodar i, songon
i ma pangontak na panghilalaan ni Jesu;kjs.
Ndang adong parholangna. Tung ala ni empati i do umbahen na tangkas cara dohot
pambahenan ni Jesus tu na sinonggopan ni tondi na hodar i. DI haradeonNa gabe
sisada sitaonon dohot angka na hansitan, disi do ojak sahala ni pangajarionNa
i.
e. Na
mangae do halak na ginonggoman ni tondi na hodar i. DI ayat 23 didok
mangangguuhi. Ndada holan na mago rohana, alai digosa tondi na hodar i do ibana
pola sahat ro di na mangangguhi. Songon i ma ngolu ni halak na ginonggoman ni
hagogoon na asing. Konflik batin, manang masirapusan dibagasan rohana. Adong
dua hagogoon na masiroroan, Boasa? Ditanda ibana do hasintonganna ise na ro
manopot ibana. Diboto do mandok: “Jesus na sian Nasaret, nabadia ni Debata.
Tangkas do partinandaaan dohot parbinotoanna. Ndada jolma na somal na
niadopanna i, na tinongos ni Debata do i. Na badia, lapatanna na khusus, na
marsintuhu, asing sian hasomalan na masa. Nabadia ni Debata do Jesus i,
lapatananna na khusus siann Debata, ditongos Debata tu ulaon khusus.
Sasintongna apala tu na hansitan na di turpuk on do kekhusussan ulaon ni Jesus
i. Alai dipihak na asing, balik muse do didok tondi na jahat i. “Marhua Ho tu
hami! Na ro do Ho hape mangago hami?”. Di na sabagian, diboto do Jesus sian
Nasaret, nabadia ni Debata. Alai suhar na binotona i do muse dituduhon tu Jesus
i, ai didok na mangago haroroNa. Maralao do parbinotoanna tu panjanghonna. Tu
partinandaanna tu kebutuhanna. Songon i ma ngolu ni jolma na sinonggopan ni sibolis. Ai diboto sibolis i do mandok
Jesus Anak ni Debata, alai sikapna manulak manang mangunjuni (Mat.4:3). I ma
halak na mardua roha. Didok si Jakobus do; “Sai na gaor do dalan ni halak na
mardua roha (Jak.1: 8). Mardua roha, i ma panahit ni jolma na gumodang di ombas on. Asing dihatindanghon hombar tu
haporseaonna, asing muse diulahon asal ma dapotan ibana. Jotjot do
panindangion i maralo manang suhar tu
pangulahonon. Manang beha pe dipatupa laho manghuphupi hagogoon na masirapusan
na dibagasan rohana i, alai na torang ima panghorhonna. Ndang boi so marsahit
angka jolma sidua roha.
f.
Torang do sikap ni Jesus tu angka jolma na
ginonggoman ni sibolis, na mangae konflik dibagasan dirina. Ndang dialomohon
Jesus digosa angka tondi na hodar jolma i. Di bagasan turpuk on, songgak
songgak do dibahen laho pabalihon sibolis i. Cara na somal do on dipatupa
Jesus, jala na naeng patuduhononna i ma na so olo toleran Jesus tu hagogoon ni
sibolis. Ingkon pasohotonNa nasa hagogoon ni sibolis, tondi na jahat i. Marhite
songgak songgak dibahen Jesus, gabe malum panepane ni simatua boru ni si Petrus
(Luk.4: 39), suang songon i do nang laho pasohothon alogo na gogo di tao (Mat.
18: 26). Ndada ganup tongkin Jesus manonggahi, alai jolo tangkas do diboto situasi dohot ombasna. Tujuanna pe torang do,
i ma laho paluahon jolma i sian hagogoon na mambahen mabiar. Ai asi do rohana
mamereng angka jolma na ginosagosa ni hagogoon nisibolis i. Ndang dihalomohon
Jesus marharajaon tondi na hodar di ngolu ni jolma i. Laos adong do nang sada
metode konseling na ginoaranna metode konfrontatif tangkas mangalo hagogoon na
manggomgom jolma i. Alai naeng ma tangkas parbinotoan dohot keterampilan ni
parmahan i laho mangulahon metode konfrontatif on. Diboto nang situasi dohot
ombasna, asa unang adong be dalan ni tondi na hodar i mangalo manang di bahasa
Indonesia didok: “Menggoncang-goncang orang itu, sambil menjerit dengan suara
nyaring, keluar dari padanya”. Alani songgaksonggak ni Jesus i gabe suhar ma na
masa i. Andorang so i, tondi na hodar i do mangasupi Jesus, alai dunghons
disonggak, gabe tondi na hodar i ma marsoara na gogo lahor haruar.
g. Manghorhon
panindangion na imbaru do pangajarion dohot pambahenan ni Jesus i di angka na
manangihon dohot mamerengsa. Masisungkunan ma sama nasida, na beha do on. Alai
dapot ma panimpulina, poda na imbaru do on. Dia ma i? boi dipaksa tondi na
hodar mardongan sahala tunduk do nang tondi na hodar tu sahala pangajarion ni
Jesus. Ianggo hasomalan ni Jahudi, ndang apala adong na olo mangantoi jolma na
songon on, jala ndang pola somal jolma na songon on dohot tu loloan. Sai
dipasiding situan na torop do jolma na songon on. Alai ianggo Jesus i, diantoi
do ibana, dipabali tondi na hodar i, gabe hipas ibana di ombas i. Hagogoon ni
Debata laho patundukkhon tondi na hodar i, ido apala na rumingkot. Jadi ndada
holan hamamalum ni sahhit ni jolma i. Debata do na naeng tarbarita, jala apala
i do na parjolo sahali. Ihut tusi nang haluaon ni jolma na ginosa ni tondi na
hodar i.
h. Ndang
tarbahen so rarat barita taringot tu pambahenan ni Jesus i. Ndang adong
hagogoon na tuk mangambatisa, jala ido tanda paboa naung bangkit raja Debata
gumonggom langit dohot tano on, ro disandok isina. Tutu sai adong do hagogoon
na manguji mangambati hararat ni Harajaon ni Debata. Sipata sai songon na
marnangkok tuat do pardalanna. Hinorhon ni i, ndang tarbahen so lulu lulu
manang sungkunsungkun roha ni jolma i. Alai na torang, molo dung dipajongjong
Debata Harajaon ni portibi on, Ibana Pargogo na so hatudosan, ndang tarbahen so
saut na sinangkapanNa. Sipata, sian angka na tinagam hian marhobas gabe
parsidohot pajongjonghon angka tanda tanda Harajaon ni Debata, ndang dapot
hita. Baliksa, olo do nasida gabe pangambati hararat ni Harajaon i. Sipata sian
na so tinagam, puas do panindangion na sintong laho mambahen rarat Barita Na
Uli i, songon na masa dii turpukta on. Didok, gabe sar ma baritana tu sandok
luat Galilea. I ma na patuduhon na so tarambat agia aha pardalan ni Barita Na
Uli, asi ni roha dohot hasintongan ni Debata. AI Ibana do Raja situtu jala na
manongtong. Manang na beha pe gogo ni sibolis i, nunga dipatunduk Jesus i. Ala
ni i angka siihuthon Kristus na be mabiar di pardalanan ni ngoluna, sai
marhamonangan do ngoluna jala margogo ala sai Kristus i do na mandongani ibana
(ptds. II Tim. 1:7; Joh.16:33). Amen.
