Bahan Jamita Minggu VII Dung Trinitatis, 3 Agustus 2014

Roma Hamu Tu Jahowa Asa Mangolu Hamu

Jesaya 55 : 1 - 5

       a.        Dibuhai si Jesaya do bindu on marhite panjouon tu angka na mauas. Ditingki Padan na robi di bangso Israel aek dohot haleon potir ima siarsakhononhon nasida. Haleon potir ndada holan siarsakhonon alai nunga gabe bagian bura ni padan i. Dungkon marpadan Debata dohot bangso Israel, dipasingot si Musa do bangso i dipangalaosion nasida i. Molo tajaha di 5 Musa 28 : 15, dipasingot si Musa do nasida: “Alai tung sura so ditangihon ho soara ni Jahowa, Debatam, asa mangaringkoti mangulahon angka uhumna dohot aturanna, angka na hutonahon i tu ho sadarion, songgop ma tu ho sude angka torutoru on jala mangonai tu ho.” Luat Israel dibolus aek Jordan sian purba. Alai ala dolok dolok gabe maol do nasida mangalului aek. Sian dia do nasida dapotan aek ? Sai tu Debata Jahowa do nasida martangiang mangido udan, patumburhon angka suansuanan jala mangalehon gotilon ni porlak nasida marlobilobi. Sude na i masa molo gabe pangoloi nasida, alai molo ndang pangoloi di padan ni Debata nasida gabe soada be ro udan mampanghorhon haleon potir di nasida. Boi ma on tajaha di Buku Rut, siala hajahaton ni bangso Israel, di paro Debata haleon potir dohot haraparon di bangso i. Na sarupa muse masa di partingkian ni panurirang Elia dohot raja Ahab ( 1 Rajaraja 17), ndang ro udan hinorhon dosa nasida manomba debata baal.

     b.       Sipanganon dohot siinumon ima sada kebutuhan na mansai ringkot di jolma. Mansai ringkot do sipanganon dohot siinumon asa mangolu jolma i. Ido umbahen jotjot Debata mandok HataNa marhite gombaran sipanganon dohot siinumon laho manungguli bangsoNa. Turpuk on dipasahat si Jesaya tu bangso Israel na dibagasan habuangan Babel, masa haraparon dohot na mauas di partondionnasida, nunga dao nasida sian Debata. Na masa sisongon on didok parpsalmen di Psalmen 42: 2-4 “Songon pangkalungunhon ni ursa di angka guluan, songon i do pangkalungunhon ni tondingku tu Ho, ale Debata. Mauas do tondingku di Debata, ni Debata na mangolu i, andigan pe tolhas ahu, asa huida bohi ni Debata? Sai iluilungku do sipanganonku arian dohot borngin, ai manipat ari do dipandok tu ahu: Didia do Debatam?”.

Di hita nahinaholongan dibagasan Jesus Kristus, boi masa do pangalaho sisongon i dipardalanan ni ngolunta. Adong do tingki masa hagaleon dohot krisis iman manang haporseaon, sai soada do na mangurupi parsorion di ngolunta, sai naeng do mangalualu hita tu na gumogo dohot na tau mangalehon dalan sian hamaolon i. Sai mauas do hita marsaor dohot Debata laos songon i do bangso Israel di habuangan Babel. Panjouon ni si Jesaya patuduhon hagaleon ni partondion nasida, songon tano na mahiang. Panjouon ni si Jesaya tu sude na mauas jala na male asa ro tu aek hangoluan. Songon na nidok ni Jesus di Mateus 11: 28 “Ro ma hamu tu Ahu, hamu angka na loja jala na sorat, asa hupasonang hamu!”. Dungi tu boru Samaria, didok Jesus di Johannes 4: 13-14 “Dung i ninna Jesus ma mangalusi ibana: Sai mangulahi mauas do nasa na minum sian aek on. Alai na manginum aek silehononki, na so tupa mauas be i ro di salelenglelengna. Ai anggo aek silehononki, gabe mual do i di bagasan ibana, na mabaor sahat ro di hangoluan sisalelenglelengna.”

Dijou Debata do hita asa ro tu Ibana, alai jotjot do hita sai holsoan dohot marungutungut ala ni arga na ingkon sigararonta, adong na mandok: “Marsaor dohot Debata gabe mangorui tingkingku, Marsaor dohot Debata gabe mangorui tingk marsonangsonang, Marsaor dohot Debata gabe padaohon ahu dohot angka donganku, gabe maila iba, didok ma pabadiabadiahon, Marsaor dohot Debatagabe mangorui pangomoanku.”

       c.        Dia do sipillitonta, holsoholsonata i do manang haluaon naung diparade Debata marhitehite AnakNa Jesus Kristus ima silehonlehonNa tu hita? Nunga tung mansai oto hhita molo sai mamillit holsoholsonta i. Didok Debata do soada martuhor, ndang pola margarar. Ai didok do di ayat 1. “O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.” Parsaoran dohot Debata mangalehon habaoran pasupasu dibagasan ngolunta. Dijou jala digonghon Debata do hita asa ro mangan dohot minum sian roti dohot aek so pola marpanuhor. Dijou do hita asa manjalo sude sian Ibana ndang martuhor. Didok di ayat 2, “Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma ahu, asa panganonmuna na tabo i, jala bosuran rohamuna di tabotabo.” Nunga dilehon Debata tu hita gratis asa papuas dirinta, boasa gabe suang tingki, gogo dohot hepeng holan tu na boi jaloonta so pola martuhor sian Tuhan? Boasa pola maol hita jala susa na diluar ni Debata na so boi papuashon hita? Ndang ringko hepengta i di Debata, ndang marlapatan i. Ndada boi hita pajumpang dohot Debata marhitehite gogonta, hepeng, hamoraon dohot hasangaponta. Ndang adong na boi di hita jolma pangkeon laho manuhor Debata. Hamoraon, arta nang parbinotoan dohot huaso, sabalga dia pe i ndada boi manggantihon Debata Jahowa.

      d.       Boido ra pangkilalaanta mamereng keluarga, pardihuta/amantana dohot ianakhon, naung gabe hita disi. Boi do ditingki naung saut na dibagasan rohanta nang sintasinta ni rohanta asa gabe las rohanta. Alai naeng botoonta las ni roha parsatongkinan do i songon na nidok di Buku Parjamita i, ai marisuang do saluhutna na di portibi on. Ianggo sada pe di potibi on ndang adong na pasonangkon rohanta. Na tau pasonanghon rohanta holan marhite parsaoranta dohot Debata Jahowa i do. Naung ditompa do jolma i asa marsaor dohot Debata, alai molo sanga mandao jolma i, disi ma ro hasusaan, mahiang partondion i hinorhoon ni aek na soada mangalehon hangoluan nang hademakon. Holan Debata do na tau mangalehon hademakon na di portibi on nang na di surgo. Torop halak na marsiadu manggulut arta, huaso dohot hasangapon na dipingkiri nasida boi mangalehon hademakon, las ni roha, hape diujungna  gabe mara do, adong keluarga na marsirang, sai dibagasan biar ni roha, jala adong na marujung tu hurungan dohot hamatean na porsuk.

     e.       Diondolhon si Jesaya do tu halak Israel na mauas jala na male di partondionna, ia so jolo jaloon nasida aek dohot sipanganon sian Debata ingkon jumolo do nasida manangihon dohot denggan. Ido di dok di ayat 2b dohot 3  “Sai tangihon hamu ma ahu, asa panganonmuna na tabo i, jala bosuran rohamuna di tabotabo. Tarehon hamu ma pinggolmuna, jala ro ma hamu tu ahu! Tangihon hamu ma, asa mangolu tondimuna i! Jadi bahenonku ma tu hamu padan salelenglelengna: I ma padan parasian na sintong i tu si Daud na so tupa muba.” Pandohan: “Tangihon dohot tarehon pinggoluna, ido na sai jotjot didokhon asa di na laho mangan dohot minum sian Debata ndada marhite na manggarar manang mangula alai holan marhite na manangihon do. Asa ro tu Debata namangalehon las ni roha, hadameon, angka na mauasa jala na male ima marhite na manangihon Ibana. Tung so  boi do hita ro tu adopanNa ia so jumolo hita manangihon Ibana, molo so tatangihon, ndada mangolu be hita, alai molo tatangihon soaraNa nang HataNa mangolu ma hita.

Boasa songon i ringkotna manangihon? Ingkon tangihononta do Debata na mangalehon roti dohot siinumon na manongtong dibagasan padanNa. Marasing do padan dohot Patik na dilehon di dolok Sinai tu angka ompu ni halak Israel uju i. Ditingki dilehon Debata PadanNa dohot PatikNa tu Halak Israel, dipangido Debata do asa ditangihon nasida jala dioloi. Di 5 Musa 6 : 3 “Antong tangihon ma i, ale Israel, jala ringkoti mangulahon angka i, asa marhasonangan ho, jala asa lam torop situtu hamu, songon naung pinorbagabaga ni Jahowa Debata ni angka ompum tu ho, di tano habaoran ni susu dohot situak ni loba.” Alai sipanganon dohot siinumon na dilehon Debata marhite panurirang Jesaya dibagasan turpuk on ndada na dapot tinuhor marhite pangoloion. Asa molo tatuhor sipanganon dohot siinumon i marhite pangoloion, ndang tingkos be tangihononta padan i dohot denggan.

Ala disondo dapot hita Padan na Imbaru na sian Debata marhite panurirang Jesaya, ala didok di ayat 3: “Jadi bahenonku ma...” na patuduhon sipamasaon tu tingki na naeng ro na manongtong. Marasing songon na naung dipasahat tu si Musa ima patikNa i na marujung tu halelengse ni Jerusalem dohot na tarbuang tu Babel bangsoNa i. Siala padan i mangondolhon pangoloion tu jolma, alai ndang mampu jala ndang tolap ni jolma i mangulahonsa.

     f.         Alai padan na mangihut na imbaru ima padan haholongon, padan na manongtong naung nipadanhon Debata tu si David. Ditingki marpadan Debata dohot si David, ndang masa dope padan i. Ditingki manghatai si Jesaya, ndang saut dope padan i ro. Dipadanhon Debata do tu si David marhite sian pinomparna ma ro Padan asi ni roha na manongtong. Na boi jahaonta di 2 Samuel 7: 12-16 “Ia dung jumpang tingkim mate, marpungu ho tu angka ompum, patindangonku ma pinomparmu dipudim, na ruar sian butuham, tu Ibana ma pahotonku harajaon. Ingkon Ibana pauli sada bagas di Goarhu, jala Ahu pahothon habangsa ni harajaonna ro di salelenglelengna. Ahu gabe Amana, jala Ibana gabe Anakku. Molo tung mambahen dosa Ibana, linsinglinsing ni jolma pangkeonku mangalinsingi Ibana. Alai ndang unsatonku sian Ibana anggo asi ni rohangku, songon na huunsati sian si Saul, naung hupaijur di jolomi. Alai ingkon hot do anggo pinomparmi dohot harajaonmu ro di salelenglelengna di jolom, habangsam pe ingkon hot do ro di salelenglelengna” 

Panurirang Jesaya ndada manaringoti sada padan na margantung tu pangoloionta, alai padan na ro sian pinompar ni si David  ima Padan Asi ni roha. Anak ni si David i do na manggarar dohot na manean padan i, ibana do na manggarar argana asa boi daionta sipanganon dohot siinumon i gratis. Ala ni i ditingki dipasahat si Jesaya joujouna on, na marpanatap do ibana dao tu panjouon ni Kristus. Ditingki diborngin na parpudi rap mangan Jsus dohot angka siseanna, “DagingKu do on, mudarHu do on na niusehon humongkop hamu”. Naung dipasahat Jesus do dagingNa dohot mudarNa laho pamahap hauason dohot hamaleonta asa boi hita ro tu meja parmanganon i dohot gratis.

      g.        Diayat 4, dibahen Debata do Jesus i gabe sitindangi tu angka bangso, Jesus do na gabe sitindangki ni Padan ni Debata dohot manisia. Jesus do na gabe jaminan ni Debata laho mangurupi jolma i laho manggohi padan i. Dibahen si Jesaya do hata sitindangi dohot penjamin d Jesaya 19: 20 “I ma gabe tanda dohot sitindangi di Jahowa Zebaot di tano Misir, ai mangangguhi ma nasida tu Jahowa maradophon angka pangarupa, jadi tongosonna ma di nasida sada sipalua dohot partogi, asa dipalua nasida.” Jesus do na menjamin sude hagogok ni Padan  dohot Debata, asa marhite Jesus do hita jolma pardosa on dipalua. Naung dialusi Jesus do Padan i di Hau Pinarsilang i, mabugang do dagingNa, maraburan do mudarNa asa manang ise nanaeng ro dohot porsea tu Ibana, jaloonna ma hangoluan na saleleng ni lelengna.

Dungi di ayat 5, martudutudu do i tu Jesus, marhitehite Jesus do asa malua saluhut bangso. Bangso Indonesia do hita, ndada bangso Jahudi, ndada pinompar si Abraham hita secara langsung, alai pasidohot do hita di haluaon marhite padan na imbaru i. Hita do na termasuk angka bangso na di liat portibi on na dohot manjalo haluaon sian Debata; ima padan na imbaru ni Debata dohot manisia. Asa molo adopanta pe angka hamaolon, hasusaan, pandelean nang parmaraan, naeng ma tapasahat i tu Debata, asa Ibana na paturehon(Psalmen 37: 5 “Pasahat ma dalanmu tu Jahowa jala haposi Ibana, asa Ibana paturehon.”)  Songon topik di Minggunta “Ro ma Hamu tu Jahowa asa mangolu Hamu”. Unang ma tapangasahon gogo, pingkiran nang roharohanta, alai tapangasahon ma Ibana, ai Ibana do mual ni nasa pasupasu di hita jolma. Holan asi ni Roha ni Debata sambing do i sude di hita jolma, molo sian parulaon ndada dapot hita haluaon i (Epe.2:4-9).Ai didok Jesus do di Mateus 11:28 “Ro ma hamu tu Ahu, hamu angka na loja jala na sorat, asa hupasonang hamu!”. Amen.