Bahan Jamita Evangelium Minggu XI Dung Trinitatis, 31 Agustus 2014

Mansoadahon Diri, Mamorsan Silang, Mangihuthon Jesus

Mateus 16: 21 – 28

    a.       Dijolo ni turpukta on dipaboa do barita taringot tu panindangion ni si Petrus songon sahalak sisean ni Jesus na marsitutu mangihuthon Jesus, songon na mewakili angka sisean i ibana mandok Jesus ima: Kristus (Mesias), Raja na pinarbagabaga i do Ho, Anak ni Debata na mangolu”. Gabe tangkas ma panindangion ni sisean i, Mesias do Jesus jala Raja na pinarbagabaga. Dibagasan Ibana do saut bagabaga ni Debata na di Padan na Robi. Ibana do sipaimaon i, jala ndang adong be na asing. Lam singkop panindangion i, marhite pandohan: Anak ni Debata na mangolu, Anak ni Debata do Ibana, jala Debata na ro tu portibi on, sumolukhon rumang ni jolma jala hatoban (Pil.2). Didok Tuhan Jesus do si Petrus sisean na martua ala ni panindangion i. Ndada holan hajolmaon be i alai nunga ulaon ni Debata. Mangula Debata dibagasan Ibana, papatarhon taringot tu Jesus. Didok Jesus ma ibana batu mamak, jala di atas batu mamak i paojahonNa huriaNa. Molo mangolu na porsea di bagasan panindangion na sintong i, gabe batu mamak ma ibana, gabe dohot ma ibana rap dohot angka apostel gabe ojahan, na ojak di Jesus ojahan na sintong. Diuduti Jesus muse bagabaga i taringot tu anak hinsu ni banuaginjang. Huaso i mangihot dohot paluahon na dipasahat ndada holan tu si Petrus alai tu sude siseanNa i. Sikap maradophon panindangion i do manontuhon ngolu ni jolma. Angka sisean, angka na porsea ingkon diadophon tu panindangion asa dibahen pamilliton, jaloonna manang tulahononna. Adong dua ragam tujuan ni Jesus umbahen na disungkun i tu siesanna ima: naparjolo; asa sude umbotosa, manang songon dia panandaon ni natorop dohot sisean i taringot tu Jesus. Paduahon; asa tangkas marhite pamangan nasida manghatindangkon Jesus. Ndang cukup holan dibagasan roha manang holan dibagasan pikiran haporseaon i. Alai ingkon tangkas do haruar sian pamangan mandok porsea di Jesus Kristus Anak ni Debata (ptds. Rom 10: 10).

     b.      Diuduti mamuse barita ni turpukta on Jesus na paboahon sitaononNa dohot poda tu na giot mangihuthon Jesus. Jala ndada holan Jesus, dipudian ni ari dohot do nang angka sisean i marsitaonon ala ni Kristus. Ala ni i do nuaeng marhite sungkunsungkun i, i do songon langkah parjolo paradehon sisean i, tu tahap na mangihut. Nunga ditontuhon Debata Ama, sitaonon i do dalan manuju tu hamonangan, ala ni i didok Apostel Paulus, “Itahalashon do angka sitaonon si songon i ( Rom. 5:3), ai marhite sitaonon si songon i do dalan tu hamonangan, i ma sitaonon ala ni hatigoran dohot ala ni Kristus i. Dung dipatorang Jesus tu angka siseanna, na ingkon manaon na porsuk sian angka sintua ni natorop, sian sintua ni malim nang sian sibotosurat pe, pola ingkon mate Ibana bunuon, pintor dipaingot si Petrus ma Jesus mandok; “Asi ma roha ni Debata di Ho, Tuhan! Unang ma songgop i tu Ho!”. Molo didok si Petrus pe songon i siala naung di hatindanghon ibana do taringot tu Jesus di ayat 16, 20 ia Jesus ima Raja na Pinarbagabaga i jala Anak ni Debata na mangolu ima Kristus. Alai mansai koras do pandohan ni Jesus tu ibana: “Laho ma ne ho, bolis!”, ima patuduhon parsitutuon ni Jesus laho mangalehon hatorangan na tangkas taringot tu pandohanNa i tu si Petrus dohot angka siseanNa na asing. Ia hagiot ni si Petrus dohot siseanNa i na marharoroan si sibolis do i, sada sikap laho manulak sangkap haluaon ni Debata. Angka sisean ni Jesus mangantusi hadirion ni Jesus holan sebatas manisia dope na naeng patupahon haluaon secara politis na gok huaso jala ndang diantusi siseani dope haroro ni Jesus laho pasauthon lomo ni roha ni Debata.

     c.       Molo nunga dipatandahon Jesus taringot tu identitasNa na sasintongna, sahat ma tu panorangion taringot tu identitas ni angka siseanNa, manang angka siihuthon Tuhan Jesus. Dipodahon Jesus do laho mangihuthon Ibana ima:

• Mansoadahon diri, Lapatanna olo mamelehon dirina hibul tu Debata (ptds.Rom.12:1). Naolo patujolohon Tuhan i dibagasan ngoluna sian kepentinganna sandiri. Dipatuduhon ma ngolu sipangoloi di Hata ni Debata sian na mangoloi sangkap, roha, nang pingkiranna sandiri. Astuanna, molo adong halak na mambahen hansit rohanta, boi do ro pangkilalaan na muruk, manghosomi, dohot na naeng mambalos. Alai molo nunga gabe siihuthon Kristus hita, ndada ulaonta be sisongon i, na tarjou do hita songon Kristus i manesa dosanta, laos tarjou do hita manesa dosa nang saala ni dongan jolma tu hita. Dipardalanan ni ngolunta, sai jumpangan hita do pangalaho nang tantangan sisongon i. 
• Mamorsan silang, Lapatanna  rade mangadopi konsekuensi na umborat ima agoan hosa laho mangihuthon Jesus. Mamorsan silang na marlapatan laho manghatindangkon dirina siihuthon Kristus, tung aha pe na masa, tung resiko aha pe i, dohot angka bentuk pengorbanan, tung di situasi dia pe i, na mansai maol situtu pe i molo satio jala pangoloi do ibana di Tuhani, na lehonon ni Tuhan i do hagogoon dohot patuduhon dalan. Songon angka kuli pangku di dermaga kapal laut i do i, masijolojoloanan do angka kuli i laho menawarhon angka barang ni penumpang laho situhukhononna sagodanggodang na pe taho ima di rohana asa dapot mambalanjoi keluargana sian upana i. Laos songon i do di bandara udara nang di terminal pe tung godang do na mangulahon sisongon i holan asa dapot balanjo di diri nang keluargana. Angka siihuthon Kristus naeng ma mangetong silang i songon ‘balanjo’ tu partondionna, asa mangolu ibana. Tarlatih do angka na porsea i sian ragam ni angka hamaolon na niadopanna, sa boratboratna situhukonna etongonna ma i songon ‘balanjo’ tu hangoluan sogot i. 
• Mangihuthon Jesus. Mangihuthon Jesus ndada sada pilihan alai sada panjouon do on, lapatanna mangihuthon Jesus ima marhaporseaon tu Jesus, ndada laho tu rekreasi, alai laho patuduhon haposan do Ibana dibagasan ngolunta. Molo naeng mangihuthon Jesus, nunga sadalan disi naung paubahon roha, pingkiran, nang pangalaho dohot parangena. Mangihuthon Jesus ndang manonditnondit, alai na togu dohot marsihohot dibagasan Tuhan Jesus. Alai adong do deba jolma na sala mangihuthon Jesus, didok rohana molo naung gabe siihuthon Jesus, dao ma sian angka sahit, molo ro sahit pintor malum ma, dao sian hasusaan, ngoluna lam gabe, mamora, sinur na pinahan, gabe na niula. Songon pangantusion ni gerakan New age movement (gerakan zaman baru). Ala ni Jesus i ndada gabe Tuhan di roha nasida alai gabe ‘alat’ promosi asa martamba raus ni huriana. Ala ni i molo gabe siihuthon Jesus naeng ma gabe pangoloi di Hata ni Debata.

     d.      Di hita angka siihuthon Kristus Ia Poda (syarat) na tolu on ndada na gabe paksaan, molo naeng diihuthon manang ndang saguru di rohana ganup do i, asa molo nanaeng mangihuthon Jesus ingkon marhite roha na bulus jala tulus do. Boi do ra sung kunsungkun di roha na deba: borat ma poda na i? Alai di hita do keputusan, taihuthon do Jesus manang ndang? Di hita do pilihan, ala ni i dipatorang Jesus ma muse mandok pilihan i: “Ai na naeng paluahon hosana, mangagohonsa do; alai na agoan hosa ala ni Ahu, i do na jumpangan”. Tung soadong do jolma na boi jala mampu paluahon dirina, ido umbahen na ro do Jesus tu tongatonga ni portibi on laho paluahon hita jolma asa jaloonta hangoluan na saleleng ni lelengna. Ndang adong na boi tarpatupa hita jolma laho paluahon dirinta sian hamagoan nang hamatean saleleng ni lelengna i. I do umbahen diuduti Jesus muse mandok: “Ai aha ma antong gunana di jolma, nang liat portibi on diomo, anggo mago do tondina? Aha ma tarlehon jolma bahen tobus ni tondina?” Tung manang aha pe na niomo hita di portibi on nda tau i mangalehon dalan haluaon dohot na manggantihon tondinta (nyawa). Tondi nanidok na dison ima hatongtongon, jadi ndang dibatasi hamatean sambing. Ala ni  i ndang adong na boi manggantihon haluaon ni ngolu marhite manang aha pe sian na adong di portibi on.

     e.       Mangihuthon Jesus ima asi ni roha ni Debata na balga do i tu hajolmaon asa manadingkon ngolu na robi na mangihot jolma i manghaholongi ngolu na dibagasan dosa jala tu na mamasuhi hangoluan na imbaru raphon Tuhan Jesus tu hangoluan na saleleng ni lelengna. Ala jumpang na ma tingkina Anak ni Jolma i didongani angka surusuruanNa na gabe Panguhum jala mambalos ganup parulaon ni jolma. Ala ni ni naeng do marsiajar hita sian sisean ni Jesus termasuk si Petrus: Manghatindangkon Jesus naeng ma sadalan dohot haimbaruon ni ngolu. Molo holan hata do ndada sae laho patulushon sangkap ni Tuhan i, ndada holan na manghatindangkon haporseaon songon si Petrus, alai naeng ma tarida panghorhonna di ngolu siganup ari, diparange, panglaho, songon na nidok ni Tuhan Jesus: “Mansoadahon diri,Mamorsan Silang, Mangihuthon Jesus.

     f.     Dipardalanan ni ngolu angka na porsea i, naeng do rajumanna na mardalan do ibana raphon Jesus nanaeng pasahathon diriNa tu Debata, ndada tu sangkap ni portibi on. Ala ni  i tarjou do angka siihuthon Jesus marsihohot satia di ngoluna tung aha pe na masa; arsak, sitaonon, parmaraan, hamaolon, ndada na gabe manginsurut ibana mangihuthon Jesus. Mangihuthon Jesus dipatuduhon ma sikap pangoloion, unduk dohot serep ni roha mangulahon lomo ni roha ni Debata mamaritahon Barita na Uli i ( Jes.53:7; Mat.10:24-25; 1 Ptr.2: 23). Songon haunduhon ni Jesus tu Debata Ama i sadalan na nidok Apostel Paulus di Pilippi 2 : 5-11 Songon parrohaon ni Kristus Jesus ma parrohaonmuna! Atik pe rupa ni Debata di Ibana, ndada songon na nidobo dirajumi rohana tudosna i tu Debata. Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. Dipatutoru do dirina; na gabe pangoloi do Ibana paima mate, pola tung mate tarsilang! Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! Songon pandohan ni halak Indonesia: “Berakit-rakit ke hulu berenang-renang ke tepian, bersakit-sakit dahulu, bersenang-senang kemudian”. Manang songon judul sada sinetron “Sengsara Membawa Nikmat”, Dohot songon istilah ni sahalak artis Amerika Jane Fonda di taon 1982 na memproduseri Video Aerobik: No Pain, No Gain, dungi ditambai ma muse di haporseaonta: “No Crown Without Cross”, Lapatanna ndang adong hasilna molo so adong usaha nang kerja keras, ndang adong hasilna molo soadong pengorbanan. Ganup siihuthon Kristus manuhuk silangna be, jala tatuhuk ma i mardonganhon Tuhan i asa tartaon hita dibagasan benget ni roha, jala diujungna dapot hita ma las ni roha na manongtong i. Amen.